Meni ta kewi so ani teroso fiyariteye.
13
Nowe ape se Jisas wesi ape arunatiyewe, hare ite yoꞌu tewiye sahe onuteye. 2 Lu taune tomu neꞌese le maꞌe peri lo wanuwei ne taꞌuwerai. Jisas lu taune werese siyeye su, le lu disaipel lo ape mase wai papu arowatowe. Le wai pihatu sahe onuwe. Lu taune werese hare ite yoꞌu tewiye sahe teiteye.a 3 Le lowe maꞌe peri anowe tomu neꞌese au teꞌe atuatuteye. Le lowe maꞌe apou au teꞌeye, “Wanure! Meni ta taꞌaneyei awei lo maꞌe kewi so sameyei ne fi. 4 Le kewi so taꞌaneyei awei sahe sameye fiyariye su, kewi so tamo yo mai yoꞌu tewiye sahe wiyeineye. Irowe tamo meꞌiye faiyewe, kewi so ape so aye. 5 Kewi so tereꞌe tamo taꞌaneyei awei tapiye aꞌi ape sahe wiyeineye. Taꞌaneyei awei ape peperi oso aꞌi iroteye. Serai kewi so ape saro ahe witane aꞌi perati wirai. Kewi so ape napi awei papu ito taꞌame. 6 Poweiye wirai su, kewi so ape lo wamu, poweiye ai lai kewi so ape lo wamu ti haroharoweye. Kewi so ape poweiye lai ti haroharoweye su, napi lo awei papu ito taꞌame. Serai kewi so ape haroharowe foroꞌoweye. 7 Kewi so tereꞌe tamo wafei niꞌari aꞌi ape sahe wiyeineye. Kewi so ape wafei niꞌari aꞌi ape mase perati wirai. Wafei niꞌari aꞌi ape lai kewi so ape ani napetu tawesiye. Serai kewi wamu ape erasiye taꞌame. 8 Kewi so tamo awei wisere aꞌi sahe wiyeineye ape, lowe mo wisere aꞌi perati wirai. Nowe meꞌiye ta se kewi ape mo so tomu neꞌese (100) taꞌeye. Kewi ape tamo so erasi, (60) taꞌeye. Kewi ape tamo so oso aꞌi, 30, taꞌeye. 9 Lu taune tamo apaniye se fene irosiya ape peri ape fu wanu etite!”Jisas piyene peri anowe lu taune maꞌe au teꞌeteye awere?
10 Sosu aꞌi pe Jisas lo lu disaipel le maꞌe teꞌe toweriyei ne fai. Lowe apou teꞌe toweriye, “Piyene ne lu taune maꞌe peri anowe ape au teꞌesiya awere?” 11 Sosu le lowe maꞌe itiyaꞌu eiye, “Owane Sitewi lai marepi werese lo peri fareyare aꞌi fene maꞌe au atuatu areiyeyei ne totesiya. Owane Sitewi lo marepi sitewi lo ape lu taune ape maꞌe au teꞌe areiye se taꞌame. 12 Meni ta apou toteyei su, ‘Ane Owane Sitewi lo peri wanu tote umasirowa.’ Owane Sitewi lai le maꞌe peri tereꞌe tamo au teꞌe areiyerowa. Meni ape lo soꞌoruweyei erasi aꞌi henerairowa. Ahowa, meni ta Owane Sitewi lo peri arisiyei su, Owane Sitewi lai meni ape lo soꞌoruweyei lo ape si ani sasarirowa.b 13 Serai ane peri anowe ape lowe maꞌe au teꞌe fiyarisiya.
Ane lowe maꞌe peri anowe au teꞌesiya su, lowe peri aꞌi wanusiya. Lowe peri ape lo eti wanu soꞌoruwerowata. Lowe Owane Sitewi lo peri sitewi siye soꞌoruwerowata.
14 Fene lu taune tewi aꞌi ne totere. Tu naifa weriyei Owane Sitewi lo peri au teꞌe siye meni, Aisaia apou leseye,
‘Fene peri ape wanuwei su, ahowa, fene peri lo sitewi ani soꞌoru taꞌama. Fene peri anowe siyeyei su, ahowa, fene marepi sitewi ape tote areiyerowata.c
15 Lu taune ape lo marepi saꞌi moro wou aꞌi iroteye. Apaniye lowe lo teꞌene tawesiye. Nihe lowe lo nisoꞌuwe tawesiye. Lowe nihe se siyeyei su, lowe, etiri siyeyei ape, soꞌoru taꞌama. Lowe peri ta apaniye lowe lo se wanuwei su, lowe, peri ape wanuwei ape, soꞌoru taꞌama. Lowe Owane Sitewi lo marepi tote umasi taꞌame su, serai yo seni luwaru aꞌi meꞌiyeni maꞌe atati arunati taꞌame su, ane lowe maꞌe ferafereiyei au irorowata.’ Ais 6:9-10
Peri lo ape wiyeme aꞌi henerai tepaꞌasiye.” 16 Sosu Jisas lu disaipel lo maꞌe tame eiye, “Ahowa, fene Owane Sitewi lo marepi siye soꞌoruwe tepaꞌasiye. Fene Owane Sitewi lo peri wanu tote umasi tepaꞌasiye. Serai Owane Sitewi lai fene maꞌe marepi hepene wisere aꞌi auwe.d 17 Ane peri wiyeme aꞌi fene maꞌe au teꞌesiya. Wanure! Lu tomu neꞌese, Owane Sitewi lo peri au teꞌe siye lu tomu neꞌese, lu yo seni aseyaro aꞌi ironamiteye ape, lowe etiri werese ape, fene siye tepaꞌasiye ape, siyereme. Ahowa, lowe etiri ape siye taꞌame. Aiwawe lowe peri werese ape, fene wanu tepaꞌasiye ape, wanureme. Ahowa, lowe peri ape wanu taꞌame.
Kewi so lo peri anowe lo sitewi.
18 Fene peri anowe lo sitewi eite wanure. 19 Meni ta kewi so taꞌaneyei awei sahe sameyei ne fi. Kewi so tewi aꞌi yo mai tewiye sahe wiyeineye. Peri ape lo sitewi apou aꞌi teꞌesiya. Meni ta, menitani ta Owane Sitewi lo marepi lo peri wanuwe su, sosu lowe peri ape lo sitewi soꞌoru taꞌama su, sepei luwaru aꞌi tutawe lai le maꞌe Owane Sitewi lo peri, marepi lowe lo sahe iroteye ape, tote aniye aiti. 20 Kewi so tewi aꞌi awei tapiye aꞌi ape sahe wiyeineye. Peri ape lo sitewi apou aꞌi teꞌesiya. Meni ape, Owane Sitewi lo peri wanuwe su, witane aꞌi le marepi wisere aꞌi tote nineꞌiye. 21 Meni ape marepi kairefi se taꞌama. Ahowa, nowe oso aꞌi su, le Owane Sitewi lo peri arunatiyei. Lu tamo Owane Sitewi lo peri ani fu arowei ne toteyei su, lowe meni ape maꞌe au luwaruweyei. Serai meni ape Owane Sitewi lo peri witane aꞌi arunatiyei. 22 Kewi so tamo wafei niꞌari se ape ponei sahe wiyeineye. Peri ape lo sitewi apou aꞌi teꞌesiya. Meni ape Owane Sitewi lo peri wanuwe su, awei lo etiri luwaru aꞌi werese meni ape lo marepi papu wiye. Awei lo etiri orese werese, maꞌaru lo marepi, marepi arearesiya ape, papu wiyewe, Owane Sitewi lo peri ani ti terate tawesinamiteyei. Serai meni ape lo yo seni luwaru aꞌi henerai.e 23 Kewi so tamo awei wisere aꞌi sahe wiyeineye. Peri ape lo sitewi apou aꞌi teꞌesiya. Meni ape Owane Sitewi lo peri wanuwe su, le Owane Sitewi lo peri lo eti wanu soꞌoruwe tepaꞌasiye. Meni ape lo marepi kairefi aꞌi henerai. Serai le Owane Sitewi lo wiyawi erasi poto aꞌi (100) au taꞌaneye. Lu tereꞌe tamo Owane Sitewi lo wiyawi erasi (60) au taꞌaneye. Lu tereꞌe tamo Owane Sitewi lo wiyawi oso aꞌi (30) au taꞌaneye.”
Senarepe luwaru aꞌi taꞌaneyei awei ape sahe napetu tawesiye.
24 Sosu aꞌi pe Jisas lowe maꞌe peri anowe ta au teꞌeye, le apou teꞌeye, “Nowe ape se Owane Sitewi lu taune au noweinoweirowa ape apou wou aiwawe aꞌi teꞌesiya. Meni ta taꞌaneyei awei maꞌe kewi so wisere aꞌi yehe sameyei ne fi. 25 Pasi su lu werese, nihe teiteye ape, airame tamo taꞌaneyei awei lo maꞌe au luwaruweyei ne toteyewe fai. Serai lowe wafei tohu niꞌari aꞌi ape lo so taꞌaneyei awei sahe ponei maꞌe ani teroso fiyari arowe. Wafei tohu lo so ani teroso fiyarisawi su, lowe eresene aꞌi fi. 26 Nowe meꞌiye su, kewi so lo wamu wafei tohu lo wamu aiwawe aꞌi perati wirai. 27 Sosu wiyawi yahowaꞌi ani siye lu tamo lowe meni owane lowe lo maꞌe eirai, ‘Owane ne kewi so wisere aꞌi taꞌaneyei awei sahe ani teroso fiyarisawi awere? Piyene wafei tohu lo wamu luwaru aꞌi aiwawe aꞌi wirai awere?’
28 Sosu le lowe maꞌe itiyaꞌu eiye, ‘Siyere! Airame tamo wafei tohu so taꞌaneyei awei ano sahe ani teroso fiyarisawi.’ Wiyawi yahowaꞌi ani siye lu mo le maꞌe apou teꞌe toweriye, ‘Nomo faraꞌu wafei tohu ani tahe ani fusawiyei awere?’ 29-30 Meni owane ape lowe maꞌe itiyaꞌu eiye, ‘Ahowa, lowesi aiwawe aꞌi fa irote. Fene wafei tohu lo wamu ani tahe anirowata. Fene wafei tohu lo wamu ape ani tahe aniyei su, fene kewi so lo wamu mase ani tahe aniyei. Nowe meꞌiye su, ane wiyawi yahowaꞌi ani siye lu ano maꞌe apou teꞌeyei, fene tu wafei tohu lo loꞌu ani tahe anirowawe, wafei se ti tawesirowawe, yehe maꞌe fu arore. Yehe maꞌe fu arowei su, fene kewi so foroꞌo aꞌi wesi ano papu ani fu taꞌuwere.’”
Saiyoho so lo peri anowe.
31 Sosu aꞌi pe Jisas peri anowe tereꞌe au teꞌeteye. Le apou eiye, “Nowe ape se Owane Sitewi lu taune, au noweinoweirowa ape, saiyoho so apou wou aꞌi ne. Meni ta saiyoho so taꞌaneyei awei lo ape sahe sameyei ne fi. 32 Saiyoho so ape so oso pefine aꞌi ne. So tereꞌe tereꞌe erasi aꞌi. Saiyoho so lo wamu peratiyei su, loꞌowe erasi aꞌi henerairowa. Me ta wou aꞌi ne. Saiyoho loꞌowe erasi ape haiye werese ani ararowe. Saiyoho lo loꞌowe erasi aꞌi heneraiyei su, irowe hire maꞌe sinesiya ape, lai saiyoho nei sahe uri lowe lo taꞌaneyei.”
Nau meiyei lo peri anowe.
33 Sosu aꞌi pe Jisas lowe maꞌe peri anowe tereꞌe ta au teꞌeye. Le apou eiye, “Nowe ape se Owane Sitewi lu taune, au noweinoweirowa ape, apou wou aꞌi ne. Nau ti meiyei irowe ape, menitani ta siye fi nau papu fuwe. Meꞌiye su, siye fi, nau werese fiyariyewe. Serai nau erasi aꞌi ti meiyei.”
Jisas peri anowe au teꞌeteye.
34 Jisas peri anowe tamo lu taune tomu neꞌese maꞌe au teꞌeteye. Le lowe maꞌe au teꞌe fiyariteye su, le peri amerame aꞌi au teꞌe areiye taꞌame. Ahowa, le lowe maꞌe peri anowe aꞌi au teꞌe fiyariteye. 35 Tu naifa weriyei Owane Sitewi lo peri au teꞌe siye meni ta apou leseye. Peri ape le leseye ape, wiyeme aꞌi henerai tepaꞌasiye. Le apou leseye,
“Ane lu taune maꞌe au teꞌe fiyarirowa su, ane peri anowe aꞌi au teꞌerowa. Etiri werese tu naifa weriyei fareyareye iroteye ape, pereye ane lu taune maꞌe au teꞌe areiyerowa.” Sng 78:2
Jisas wafei tohu lo sitewi au teꞌe areiyeye.
36 Sosu aꞌi pe Jisas lu taune werese arunatiyewe, le lu disaipel lo mase wesi papu wiye. Wesi papu wiye su, lu disaipel lo le maꞌe apou teꞌe toweriyei ne fai, “Ne wafei tohu lo peri sitewi nomo maꞌe faraꞌu au teꞌe areiyere.”
37 Sosu Jisas lowe maꞌe itiyaꞌu eiye, “Meni ape kewi so taꞌaneyei awei sahe sameyei ne fi ape, le, ane, meni hire maꞌe itorai ne. 38 Taꞌaneyei awei ape wou aꞌi lu taune omo omo werese sahe irosiya. Kewi so wisere aꞌi ape apou wou aꞌi, lu taune werese Owane Sitewi lo peri wanu tote tawesi umasisiya. Wafei tohu so ape apou wou aꞌi ne. Lowe lu taune werese sepei luwaru pefine aꞌi lo peri wanu umasisiya. 39 Meni ape wafei tohu so taꞌaneyei awei sahe pasi aꞌi se ani teroso fiyariye ape, le sepei luwaru aꞌi iyape Satan. Nowe ape se wiyawi yahowaꞌi ani siye lu loꞌu ani une aniyei ape, nowe ape se nowe yeꞌewi, wiyawi yahowaꞌi ani siye lu apou wou aꞌi, Owane Sitewi lo ipari wisere aꞌi (ensel) ne. 40 Serai wiyawi yahowaꞌi ani siye lu, lowe wafei tohu aine tou taꞌuwe anirowawe, yehe maꞌe ani fu arosawirowa. Apou wou aꞌi, nowe yeꞌewi se, Owane Sitewi lo ipari wisere aꞌi, lowe lu taune werese sepei luwaru aꞌi Satan lo peri wanu umasisiya ape, lowe lu tewi ape mo maꞌe eimawesawirowa.f 41 Nowe yeꞌewi se ane, meni hire maꞌe itorai ape, ane Owane Sitewi lo ipari wisere aꞌi omo omo werese maꞌe lu taune werese yo seni luwaru aꞌi ironamiteye ape, ane lowe lu tewi ape mo taꞌuweyei ne eimawesairowa. Le etiri werese lu taune yo seni luwaru aꞌi irowei ne ani taꞌuwe sasarisawirowa.g 42 Owane Sitewi lo ipari wisere aꞌi (ensel) lai lowe maꞌe ani fu arosawirowa. Yehe omo sahe lu taune werese luwei erasi irorowa. Fofowei erasi yehe omo maꞌe irorowa. Serai pi lowe lo taꞌani tawesirowa.h 43 Sosu lu taune werese yo seni aseyaro aꞌi ironamisiya ape, lowe Owane Sitewi tai lowe lo omo sahe mitaiyeyei erasi mase iro fiyarinamitorowa. Poweiye mi wou aꞌi tewi mitaiye fiyarinamitorowa. Lu taune werese apaniye se fene peri ape wanu tawesire.i
Meni ta lai maꞌaru paꞌare awei papu nehiyewe siyeye.
44 Nowe ape se Owane Sitewi lu taune, au noweinoweirowa ape, apou wou aꞌi. Meni ta taꞌaneyei awei sahe maꞌaru paꞌare nehiyewe, siyeye. Meni tereꞌe tu naifa weriyei maꞌaru paꞌare awei fisiye yo papu fu fareyareye. Sosu meni ape nehiyewe, siyeye su, marepi lo erasi nineꞌiye. Le wesi lo maꞌe si tame fiyewe, etiri lo werese lu lai eteye. Maꞌaru werese ani taꞌuweye su, le awei tewi ape eteye.”
45 Sosu aꞌi pe Jisas peri anowe tereꞌe au teꞌeye. Le apou eiye, “Ane fene maꞌe tame eisiya. Nowe ape se Owane Sitewi lu taune, au noweinoweirowa ape, apou aꞌi. Meni ta niꞌaripe wisere erasi aꞌi eteyei ne toteye. Le omo omo werese sahe niꞌaripe ape siye nehiteye. Nowe meꞌiye se le niꞌaripe wisere erasi aꞌi siyeye. 46 Le niꞌaripe erasi wisere aꞌi siyeye su, le etiri lo werese lu lai eteye. Maꞌaru werese ani taꞌuweye su, le niꞌaripe ape eteye.”
Hare honaiye lo peri anowe.
47 Sosu aꞌi pe Jisas peri anowe tereꞌe apou au teꞌeye. Le apou eiye, “Nowe ape se Owane Sitewi lu taune, au noweinoweirowa ape, apou aꞌi. Meni ta hare honaiye saꞌi papu fu arowe. Le hare honaiye si tame tore ani wirai su, hare apou ape tomu neꞌese aiwawe aniye. 48 Hare honaiye temeꞌeriyerowa su, le saꞌi tewiye maꞌe tore ani wirairowa. Hare werese ape le lai ani fu ereirowa. Hare tewi wisere aꞌi le lowe ani fu taꞌuwerowa. Hare tewi luwaru aꞌi werese ape, le lowe werese ipo sahe ani fu eresawirowa.” 49 Sosu le peri anowe lo sitewi au teꞌeye. Le apou eiye, “Nowe yeꞌewi se, Owane Sitewi lo ipari wisere aꞌi (ensel) hi awei maꞌe itorairowawe, lu taune werese werese ani taꞌuwerowa. 50 Lowe lu taune werese yo seni luwaru aꞌi ironamisiya ape, yehe omo maꞌe ani fu arorowa. Lu taune werese ape mo luwei erasi irorowa. Lowe fofowei erasi teriterowawe, sosu pi lowe lo taꞌani tawesirowa.”j
51 Sosu Jisas lu disaipel lo maꞌe apou ei toweriye, “Peri werese ano fene soꞌoruwesiya awere?” Lowe le maꞌe itiyaꞌu eiye, “Ei, nomo peri sitewi werese soꞌoruwe tepaꞌasiye.” 52 Sosu le lowe maꞌe eiye, “Owane Sitewi lo yo peri ani soꞌoruwe siye meni ta, le Owane Sitewi lo peri wanu tote tawesiyei su, le apou wou aꞌi ne. Meni owane ta etiri tomu neꞌese taꞌuwe aniye. Le wesi lo papu wiyei su, le etiri weriyei ape aiwawe etiri heꞌi aꞌi ani aitairowa.”
Lu tamo Jisas ne ai marepi totenamiteye.
53 Sosu aꞌi pe Jisas peri anowe werese au teꞌe tepaꞌasiye su, le lu disaipel lo mase wesi arunatiyewe, fi. 54 Le lu disaipel lo mase omo topo lo maꞌe heneri. Le taꞌuweyei wesi papu wiyewe, Owane Sitewi lo peri au teꞌe fiyariye. Lu taune tomu neꞌese peri lo ape wanuwe su, lowe meni ape ne hepene se suꞌariye. Lowe apou teꞌe tiyatiteye. “Soꞌoruweyei lo ape eiwerou maꞌe aniye awere? Kairefiyeyei lo ape eiwerou maꞌe aniye awere? Piye kairefiyeyei se le wiyawi erasi pefine aꞌi eite irosiya awere?k 55 Meni ape wesi taꞌane siye meni lo meni eime awere? Mai ape lo iyape Maria awere? Paꞌise werese mo lo iyape Jems, Josep, Saimon, sosu Judas, wiyeme awere?l 56 Einei lo mo lowe nomo mase irosiya awere? Meni eiwerou maꞌe kairefiyeyei lo aniye awere?” 57 Sosu lowe ai marepi le ne totenamiteye. Lowe le ne meꞌiyeni maꞌe atati aruwe. Ahowa, Jisas lowe maꞌe itiyaꞌu eiye, “Owane Sitewi lo peri au teꞌe siye lu werese ape ne, lu taune werese lai lowe maꞌe iyape erasi aꞌi ei ani arowesiya. Ahowa, lu taune omo sitewi lowe lo sahe, lowe Owane Sitewi lo peri au teꞌe siye lu werese iyape lowe lo ani fu ararosiya. Lu tewi lowe lo aiwawe aꞌi lowe Owane Sitewi lo peri au teꞌe siye lu lo iyape ani fu ararosiya.”m 58 Serai Jisas omo sitewi topo lo sahe wiyawi erasi pefine aꞌi taꞌanerowata. Piyene awere? Lowe le ne wanu tote tawesi se taꞌame.