3-4 Tu naifa meni owane Herot lai ai lu tamo Jon ereti aniteyei ne eimawesawiyewe, ereti lowe wafei se ti tawesiyewe, kalabus wesi maꞌe eimawesawi. Piyene awere? Jon le maꞌe apou eiye, “Ne paꞌise no Filip lo tani Herotias naituwe. Yo seni no luwaru aꞌi ne.” Serai Herot ai lu tamo Jon ereti aniteyei ne eimawesawiyewe, kalabus wesi maꞌe hene ani fu arowe.^a 5 Jon peri ape le maꞌe teꞌeye su, Herot ai marepi erasi le ne toteye. Le Jon aine teraꞌeyei ne toteye. Ahowa, le lu taune werese ne atoweiye iroteye. Lu taune werese Jon ne apou toteye. “Jon le Owane Sitewi lo peri au teꞌe siye meni pefine aꞌi ne.”^b

6 Nowe meꞌiye ta se Herot lu tamo ene ayei ne ei aniye. Nowe ape se tu naifa Herot lo mai le auteiye. Serai lowe Herot lo wesi maꞌe faiyewe, nowe ape toteteye. Sosu lowe metei sahe onuwe su, Herotias lo eime taune lowe maꞌe umaꞌiye irowe. Herot menitani ape siyeye su, le marepi erasi aꞌi tote nineꞌiye. 7 Le menitani ape siyeye su, Herot le maꞌe peri teꞌe naneiteye, le apou eiye, “Ne piye etiri ta ne ane maꞌe ei toweriyei su, ane ne maꞌe faraꞌu aurowa.” 8 Menitani ape mai lo maꞌe ei toweriyei ne fi. Le apou ei toweriye. “Etiri ta, ane piye ei toweriyei awere?” Sosu mai le maꞌe apou eiye, “Ne Herot maꞌe ei towerire, ‘Ne ane maꞌe apou aure, Jon lo mato wahu papu aita. Ane etiri ape anireme.’”

9 Sosu Herot peri ape wanuwe su, le marepi orese erasi aꞌi toteye. Sosu toteye, “Ane menitani ape peri teꞌe naneiye, lu werese metei sahe onuteye ape lowe peri teꞌe naneiyei ano wanuwe su, ane peri ano fu umasirowa. Ane nihe lowe lo se neritase aꞌi irorowata.” Serai le ai atu siye lu tamo maꞌe eiye, “Fene Jon saꞌi au hu siye meni aine teraꞌerirowawe, mato lo ane maꞌe wahu papu aita.” 10 Serai le ai atu siye lu Jon saꞌi au hu siye meni lo pereꞌi aine touwei ne eimawesawi. 11 Lowe Jon lo pereꞌi aine tou tepaꞌasiye su, lowe mato lo wahu sahe fuwewe, menitani watiꞌare ape maꞌe auri. Sosu watiꞌare ape Jon lo mato mai lo maꞌe auri. Serai mai lo apou eiye, “Wisere aꞌi tene! Ane pereye etiri eite siye soꞌoruwesiya. Jon saꞌi au hu siye meni temeniyeye.” 12 Jon lo lu feni peri ape wanuwe su, lowe Jon lo tahe paꞌare fisiye yo papu fuwe. Sosu lowe Jisas maꞌe peri heneruwe ape au teꞌeri.

13 Sosu aꞌi pe Jisas peri heneruwe ape wanuwe su, le lu taune werese arunatiyewe, wai papu arowatowe. Le lu disaipel lo mase pani lu taꞌame ape maꞌe fi. Lu taune werese Jisas wai sahe siyesawi su, lowe omo towafi lowe lo arunatiyewe, yo mai meꞌiye atati umasiti. 14 Sosu Jisas saꞌi tewiye sahe wai furi su, le lu taune werese siyeye. Le lowe werese marepi au tote ewiteye. Sosu le lu taune lo u tahe werese se ape au taꞌane faraꞌuweye.

15 Nowe neriwei su, Jisas lo lu disaipel le maꞌe au teꞌeyei ne fai. Lowe le maꞌe teꞌeye, “Meni Owane, pani eite ariye aꞌi ne. Nowe pasi ataheyewa. Ne lu taune werese omo tereꞌe maꞌe eimawesawire! Serai lowe faraꞌu ayei ta omo nepawe eteyei ne iyei.” 16 Ahowa, Jisas lowe maꞌe itiyaꞌu eiye, “Lowe omo lowe lo maꞌe owe ape eimawe fiyarisawire. Fene ayei tamo lowe werese maꞌe au isafiye nonere.” 17 Sosu lowe le maꞌe eiye, “Nomo nau taꞌase ereti feni werese irosiya, hare hesi aꞌi.” 18 Sosu le lowe maꞌe eiye, “Nau taꞌase werese, hare hesi ane ausa!”

19 Sosu le lu taune werese maꞌe eiye, “Fene senarepe sahe onure.” Le nau taꞌase ereti feni werese hare hesi ereti aniteyewe, Owane Sitewi lo omo hire maꞌe nihe hire siye aroweyewe, Owane Sitewi maꞌe au teꞌe wisereyeye. Le nau taꞌase tewi pa tewi aꞌi towesiye. Le lu disaipel lo maꞌe auwe. Sosu eiye, “Fene lu taune werese maꞌe au nonetire.” Lowe lu taune werese maꞌe au nonoti, nonetai tepaꞌasiye.^c 20 Lu taune werese nau taꞌase, hare ene a tepaꞌasiye su, lire lowe lo temeꞌeriyeye. Lowe marepi wisere aꞌi toteye. Jisas lo lu disaipel nau taꞌase tewi aꞌi hare tewi aꞌi werese ipi sahe ani asiye. Lowe ipi ereti feni hesi werese lowe hesi aꞌi ipi papu ani asi temeꞌeriyeye. 21 Lu tomu neꞌese (5,000) nau taꞌase ene ateye. Taune eimane tomu neꞌese aiwawe aꞌi ene ateye.

22 Sosu aꞌi pe Jisas pereye aꞌi lu disaipel lo maꞌe apou eiye, “Fene wai papu aratore. Hare ite feni eire maꞌe tonerire. Ane lu taune werese omo towafi lowe lo maꞌe eimawesawiyei. Sosu ane fene moꞌo umasiyei.” 23 Le lu taune werese eimawesawi su, le woto aꞌi omo hire maꞌe Owane Sitewi maꞌe au teꞌe tiyatiyei ne yaneye. Nowe neriwei su, le woto aꞌi saro iroteye.^d 24 Lu disaipel lo hare ite wai iyatutinauwe, iyatutinauwe ponei sahe heneri. Lowe hare ite ponei sahe heneri su, fiyaru, saꞌi ei erasi aꞌi henerai. Saꞌi ei wai lowe lo maꞌe ani awetu awetowe. Fiyaru erasi wai lo pihatu aine torutorowe. 25 Nowe mitaiyeye su, Jisas hare ite hire awesetaiteye. Sosu le lu disaipel lo maꞌe heneri. 26 Jisas lo lu disaipel meni ape, saꞌi hire awesetaiteye ape, siyeye su, lowe atoweiye erasi irowe apou uteye, “Sawi amou! Sepei luwaru aꞌi nomo maꞌe fai.”^e 27 Ahowa, pereye aꞌi Jisas lowe maꞌe apou eiye, “Atoweiye sawa! Marepi fene lo momotei aꞌi irote. Ane lai ne.”

28 Sosu Pita le maꞌe itiyaꞌu apou eiye, “Meni Owane, ne meni ape lai su, ne ane ei anire. Serai ane saꞌi hire maꞌe ne maꞌe awesetairowa.” 29 Sosu Jisas Pita maꞌe eiye, “Ne aiya!” Pita peri ape wanuwe su, le wai ape arunatiyewe, saꞌi hire maꞌe fi, Jisas maꞌe heneri. 30 Ahowa, Pita fiyaru erasi siyeye su, le atoweiye erasi irowe. Le saꞌi papu wiye. Sosu le Jisas maꞌe apou uteye, “Meni Owane, ne ane mase pati anire.”

31 Sosu Jisas ereti lo tesiye su, le Pita ereti lo se aniteye. Le maꞌe eiye, “Tote tawesiyei no oso aꞌi ne. Piyene ne marepi hesi aꞌi totesiya awere?”^f 32 Lowesi wai papu arowatowe su, fiyaru werese titaneye. 33 Lu werese wai sahe iroteye ape, lowe le maꞌe au nineꞌiteye. Sosu le maꞌe eiye, “Wiyeme aꞌi ne Owane Sitewi lo meni eime pefine aꞌi tene!”

34 Sosu aꞌi pe lowe wai iyatutinauwe, iyatutinauwe pani Genesaret lo wai senitewi sahe furi. 35 Lu tamo Jisas siye soꞌoruweye su, lowe Jisas omo omo lowe lo fai ape ne au teꞌe fiyariteye. Lu taune tomu neꞌese lai lu taune u tahe se Jisas maꞌe au taꞌane faraꞌuweyei ne henetai. 36 Lu taune werese u tahe se ape lowe le maꞌe kairefiyeyei se apou teꞌe toweriye, “Nomo ipari tahe weniwe no faraꞌu isawe hetesiyeyei awere? Sosu lu taune werese ipari tahe weniwe isawe hetesiteye su, u tahe lowe lo faraꞌu henerai.” Lu taune ipari tahe weniwe lo isawe hetesiyeye su, u tahe lowe lo faraꞌu aꞌi henerai.^g