Owane Sitewi lo yo peri lai yaꞌariyei lo yo peri ani ararowe.
15
Sosu aꞌi pe lu tewi tamo iyape Farisi, sosu Moses lo yo peri soꞌoruwe teꞌe siye lu tamo, lowe Jisas maꞌe teꞌe toweriyei ne fai. Lowe omo Jerusalem maꞌe fai. 2 Lowe le maꞌe apou teꞌe toweriye, “Piyene lu disaipel no yaꞌariyei nomo lo, lo yo peri arisisiya awere? Lowe nau taꞌase ene ateye su, lowe ereti lowe lo saꞌi au hu se taꞌame.”3 Sosu Jisas lowe maꞌe itiyaꞌu eiye, “Fene lai piyene Owane Sitewi lo yo peri arisisiya awere? Fene yaꞌariyei lo yo peri kairefiyeyei se tote tawesisiya. Ahowa, fene Owane Sitewi lo yo peri werese arisisiya. 4 Wanure! Tu naifa Owane Sitewi apou eiye,
‘Fene tai mai fene lo iyape ei ani arowere. Meni ta tai mai lo maꞌe teꞌe naruwei su, lu tamo meni ape fu aine teraꞌere.’ Kis 20:12; 21:17; Lo 5:16
5 Ahowa, fene apou teꞌesiya, ‘Ane etiri ape ta tai mai ano maꞌe auwei ne totesiya. Ahowa, ane lowesi maꞌe aurowata. Etiri ape ane lai Owane Sitewi maꞌe etiri ape auwei ne ariariyeye. Serai ane lowesi maꞌe etiri ape aurowata.’ 6 Fene yaꞌariyei lo yo peri ape wanu umasiteye, fene Owane Sitewi lo yo peri wiyeme aꞌi ani ararowe. Yaꞌariyei fene lo, lo yo peri apou eiye, ‘Fene mai tai fene lo lo iyape owe ape ei ani arowere.’ Marepi fene lo se Owane Sitewi lo peri yahowaꞌi henerai. 7 Fene lu marepi hesi aꞌi se lu, tu naifa weriyei Owane Sitewi lo peri au teꞌesiye meni iyape Aisaia, le fene ne wiyeme aꞌi apou leseye,
8 ‘Lu taune werese, lowe ahi aꞌi lowe lo se iyape ano ei ani arowenamisiya. Ahowa, marepi lowe lo ane maꞌe eyeri irosiya. 9 Lowe ane ne au teꞌe nineꞌiteyei su, marepi lowe lo yahowaꞌi henerairowa. Peri ape lowe au teꞌe atuaturowa ape, lowe lu lo marepi tote umasirowa.’” Ais 29:13
Etiri piye lu taune lo marepi hepene maꞌe au iro unouwesiya awere?
10 Sosu Jisas lai lu taune werese le maꞌe ute aniye. Sosu lowe maꞌe apou au eiye, “Fene peri ano wanure! Fene peri sitewi ano tote tawesire. 11 Etiri ape mo fene ahi papu ene ayei su, lowe marepi hepene fene lo au unouwerowata. Ahowa, peri luwaru aꞌi, peri wawero teꞌerowa ape, etiri ape mo ahi nowe maꞌe fai ape, lowe lu taune lo marepi hepene au unouweyei.”a 12 Sosu Jisas lo lu disaipel le maꞌe teꞌe toweriyei ne fai. “Ne peri ape au teꞌeye su, ne lu Farisi lo marepi au luwaruweye. Ne soꞌoruwesiya awere? Lowe ne ne ai marepi totesiya.” 13 Ahowa, Jisas lowe maꞌe peri anowe ta itiyaꞌu eiye, “Tai ano hire maꞌe irosiya ape, le taꞌaneyei awei irosiya. Le etiri werese, awei papu irosiya ape, le yehe sameye taꞌame su, le etiri werese ape mo ani tahe aniyewe, yehe maꞌe ani fu arosawirowa. Etiri lo napi towe werese yehe maꞌe ani fu arosawirowa. 14 Fene lu tewi ape mo arure. Lowe lu nihe pokoweyei se wou aꞌi ne. Lowe meni tereꞌe nihe pokoweyei se yo ta atuatuwei su, lowe ninapune awei fisiye yo papu winetairowa.”b
15 Sosu Pita le maꞌe itiyaꞌu eiye, “Ne faraꞌu peri anowe ape sitewi nomo maꞌe au teꞌe atuatu areiyere.” 16 Sosu Jisas le maꞌe eiye, “Ne peri anowe lo sitewi soꞌoru taꞌama awere? 17 Wanure! Etiri werese ape mo, ahi papu wiyei ape, etiri werese ape mo lire papu wiyei. Meꞌiye su, nowe maꞌe li wesi maꞌe tu narirowa. 18 Etiri ape mo ahi nowe maꞌe heneraisiya ape, lowe marepi maꞌe heneraisiya. Etiri ape mo lowe lu taune lo marepi hepene au unouwesiya. 19 Etiri eito eite mo, marepi nowe maꞌe heneraisiya ape, apou aꞌi ne. Marepi luwaru aꞌi, lu aine teraꞌeyei ne totesiya, naituwe tiyato towesi arosawiyei ne totesiya, tafaꞌe yo seni luwaru aꞌi taꞌareiyei ne totesiya, peri wawero, peri teꞌe narusiya. 20 Etiri eito eite mo lu taune lo marepi hepene au unouwesiya. Ahowa, meni ta ereti lo unou aꞌi se ayei su, etiri ape meni ape lo marepi hepene au unouwerowata.”
Kenan lo menitani ta Jisas ne tote tawesinamiteye.
21 Sosu Jisas lu taune werese arunatiyewe, omo pani Tair, omo Saidon maꞌe fi. 22 Lowe omo pani Tair maꞌe heneri su, menitani ta, omo pani Kenan maꞌe fai ape, Jisas maꞌe henerai. Le Moses lo yo peri umasi taꞌame. Le apou eiye, “Meni Owane, ne meni owane Devit lo meni eime pefine. Ne ane ne ewitere. Ne ane ne seremareyere. Sepei luwaru aꞌi lai eime taune ano papu ironamisiya. Sepei luwaru aꞌi lai eime taune ano au luwaruweyei ne totesiya.” 23 Ahowa, le menitani ape maꞌe itiyaꞌu peri ta ei taꞌame. Sosu Jisas lo lu disaipel le maꞌe eiye, “Ne menitani ape omo topo lo maꞌe eimawesawire. Le nomo maꞌe peri erasi aꞌi utetaiteye.”
24 Ahowa, Jisas le maꞌe eiye, “Ane Israel lo lu taune maꞌe seremareyeyei ne fai. Lowe fe sipsip ipo maꞌe erau aiyeye wou aꞌi ne. Lowe aꞌi maꞌe, ane lai au seremareyeyei ne itorai.”c 25 Ahowa, menitani ape Jisas maꞌe lowe uporo apeꞌi onurai. Sosu le maꞌe erasi aꞌi eiye, “Meni Owane, Ne ane ne seremareyere.” 26 Sosu le menitani ape maꞌe itiyaꞌu eiye, “Ane eimane lo nau taꞌase anirowawe, you maꞌe fu arorowata. Yo seni ape luwaru aꞌi ne.” 27 Ahowa, menitani ape le maꞌe itiyaꞌu eiye, “Ei, meni owane, ne peri wiyeme aꞌi teꞌeye. Ane you ape aiwawe aꞌi ne! Ahowa, meni ta nau taꞌase ayei su, nau tewi aꞌi tewi aꞌi hi maꞌe winetaiyei. Serai ane faraꞌu nau taꞌase tewi aꞌi ape ene arowa.” 28 Sosu Jisas le maꞌe itiyaꞌu eiye, “Menitani, tote tawesiyei no wisere erasi aꞌi ne! Ane eime taune no au taꞌane faraꞌuweye.” Jisas peri ape teꞌeye su, sepei luwaru aꞌi eime taune ape arunatiyewe, sosu eime taune wisere aꞌi henerai.
Jisas lu taune u tahe iroteye ape, au ani taꞌane faraꞌuweye.
29 Sosu aꞌi pe Jisas omo Saidon, omo Tair arunatiyewe, le hare ite Galili tewiye maꞌe heneri. Le lu feni aiwawe omo ta yaneye. Le saro ahe onu fetaneyeteye. 30 Sosu le omo ape sahe onuteye su, lu taune tomu neꞌese le maꞌe taꞌuwerai. Lowe lu taune tomu neꞌese u tahe se ape le maꞌe henetai. Lu taune tamo lowe haroharoweye ape, lowe nonoꞌoweye ape, nihe pokoweye ape, ahi tomoꞌute tawesiye ape, lu taune tereꞌe tereꞌe u se ape le maꞌe henetai. 31 Serai Jisas lowe werese au ani taꞌane faraꞌuweye. Lu taune ahi tomoꞌute tawesiteye ape, lowe peri teꞌeteye. Lowe nihe pokoweye aꞌi ape, lowe siyeteye. Lu taune lowe haroharoweye aꞌi ape, lowe yeꞌi sine uweiteye. Lu taune werese Jisas maꞌe taꞌuwerai ape lowe werese siyeye su, lowe hepene se suꞌariye. Sosu lowe Israel lo Owane Sitewi wiyeme aꞌi lo iyape ei ani aroweteye.d
Jisas lu tomu neꞌese, 4,000 aiwawe aꞌi, maꞌe ene ayei tamo au aye.
32 Sosu aꞌi pe Jisas lai lu disaipel lo maꞌe ei aniye. Lowe maꞌe apou eiye, “Ane lu taune werese marepi erasi aꞌi ewite totesiya. Lowe nomo mase nowe mi hesi heta iroteye. Ene ayei werese lowe lo irote taꞌame. Lowe lau mase erasi aꞌi iroteye. Serai ane lowe omo towafi lo maꞌe eimawesawirowata. Ane lowe lau se aꞌi si eimawesawirowa su, lowe nihe meremereyerowawe, lowe yo sahe ninapune winetairowa.”e 33 Sosu lu disaipel lo le maꞌe eiye, “Nomo eiwerou maꞌe nau taꞌase tomu neꞌese aniyei awere? Omo pani eite etiri ariye aꞌi ne. Lu taune werese tomu neꞌese irosiya. Nomo lowe werese maꞌe au ene arowata.” 34 Sosu Jisas lowe maꞌe ei toweriye, “Nau taꞌase fene eiwerou aꞌi irosiya awere?” Lowe le maꞌe itiyaꞌu eiye, “Nomo nau taꞌase ereti feni werese feni hesi aꞌi irosiya. Hare tewi oso aꞌi aiwawe irosiya.”
35 Sosu le lu taune werese maꞌe eiye, “Fene werese awei peperi sahe onure.” 36 Lu taune werese awei peperi sahe onuteye su, le nau taꞌase ereti feni werese feni hesi aꞌi, hare tewi oso aꞌi ereti se aniteyewe, le Owane Sitewi maꞌe au teꞌe wisereyeye. Le nau taꞌase hare werese tewi pa tewi ani towesiteye. Nau taꞌase, hare werese tewi pa tewi towesiye su, le lu disaipel lo maꞌe auwe. Sosu lu disaipel lo nau taꞌase hare werese tewi aꞌi lu taune maꞌe au nonetiteye. 37 Lu taune werese nau taꞌase, hare werese ene ateye. Lire lowe lo temeꞌeriyeye. Marepi lowe lo wisere aꞌi tene! Lowe werese ene a tepaꞌasiye su, lu disaipel lo nau taꞌase hare tewi aꞌi ipi papu taꞌuwe ani asiteye. Lowe nau taꞌase hare tewi aꞌi ipi ereti feni werese, feni hesi aꞌi ani asi temeꞌeriyeteye. 38 Lu werese, ene ateye ape, lowe 4,000 nawiteye. Taune eimane tomu neꞌese aiwawe ene ateye. 39 Sosu Jisas lu taune werese omo towafi lowe lo maꞌe si eimawesawi su, le lu feni lo mase wai papu wi atowewe, hare ite Galili feni eire maꞌe toneri. Lowe hare ite tewiye omo pani Magdala maꞌe furi.