5 Sosu aꞌi pe Jisas lo lu disaipel aiwawe aꞌi hare ite toneri su, lowe nau taꞌase werese iꞌane arunatiyewe, aitai taꞌame. 6 Sosu Jisas lowe maꞌe apou eiye, “Lu Farisi, lu Sadyusi lo fe wawe saꞌi ne. Fene weiyai! Fene arute! Fene fe wawe saꞌi lowe lo meꞌiyeni maꞌe atati arure! Fe wawe saꞌi lowe lo ape aiwawe wou aꞌi marepi luwaru aꞌi lowe lo ne. Marepi lowe lo fene papu wiyei su, marepi hepene werese fene lo au luwaruwerowa.”^c 7 Lu disaipel lo peri ape wanuwe su, lowe teꞌe tiyatiteye, “Piye peri ape lo sitewi toteye awere? Nomo nau taꞌase iꞌane arunatiyewe, aitai taꞌame. Serai le peri ape nomo ne au teꞌeteye awere?” 8 Ahowa, Jisas lai marepi lowe lo siye soꞌoruwe tepaꞌasiye. Serai le lowe maꞌe eiye, “Fene wanure! Tote tawesiyei fene lo oso aꞌi tene! Fene apou toteye, ‘Nomo nau taꞌase aitai taꞌame.’ Piyene fene apou teꞌe tiyatiteye awere? 9-10 Ane lu (5,000) nawiteye ape, nau taꞌase ereti feni werese au ene aye su, eiwerou aꞌi ipi ani asi temeꞌeriyeye awere? Aiwawe ane lu, 4,000 nawiteye ape, nau taꞌase ereti feni werese feni hesi aꞌi au ene aye su, eiwerou aꞌi ipi ani asi temeꞌeriyeye awere? Fene marepi tote iꞌaneye awere? Fene wiyawi ape lo sitewi tote soꞌoru taꞌama awere?^d 11 Ane peri ape apou eiye su, ‘Fene weiyai! Lu Farisi, lu Sadyusi lo fe wawe saꞌi ape owe ape umasite.’ Fene marepi lowe lo tote umasiyei su, marepi lowe lo marepi hepene fene lo au luwaruweyei. Fene peri ape lo sitewi tote soꞌoru taꞌama awere?” 12 Sosu lowe peri ape wanuwe su, lowe peri ape lo sitewi siye soꞌoruwe tepaꞌasiye. Jisas peri ape apou eiye su, “Fene weiyai! Lu Farisi, lu Sadyusi lo marepi luwaru aꞌi owe ape umasite. Le nau taꞌase ne au teꞌeye taꞌama. Ahowa, le peri lo sitewi apou teꞌeye. ‘Fene weiyai! Fene lu Farisi lo, lu Sadyusi lo marepi lowe lo owe ape wanu umasite.’”

13 Sosu aꞌi pe Jisas lu disaipel lo aiwawe omo pani ape arunatiyewe, omo pani Sisaria, Filipai maꞌe heneri. Sosu le lu disaipel lo maꞌe apou ei toweriye, “Lu taune werese lowe ane, meni hire maꞌe itorai ape ne, eiwerai totesiya awere? Ane eiwerai awere?” 14 Sosu lowe le maꞌe itiyaꞌu eiye, “Lu taune tamo ne ne apou totesiya. ‘Ne Jon saꞌi au hu siye meni.’ Lu taune tamo apou totesiya, ‘Ne Owane Sitewi lo peri au teꞌe siye meni Elaija.’ Lu taune tereꞌe tamo apou totesiya, ‘Ne Owane Sitewi lo peri au teꞌe siye meni Jeremaia.’ Lu taune tereꞌe tamo apou totesiya, ‘Ne Owane Sitewi lo peri au teꞌe siye meni ta.’”^e 15 Sosu le lowe maꞌe ei toweriye, “Fene lai ane piye meni totesiya awere? Ane eiwerai awere?” 16 Sosu Saimon Pita itiyaꞌu apou eiye, “Ne aꞌi lai Krais tene! Ne meni ape Owane Sitewi lai hi awei maꞌe eimawe arosai. Ne Owane Sitewi, Meni Owane Pefine aꞌi, mi mi weriyei weriyei ironamisiya ape, lo meni eime.”^f

17 Sosu Jisas le maꞌe itiyaꞌu eiye, “Saimon, Jon lo meni eime, Owane Sitewi lai ne mase irosiya. Peri no ape lu lo marepi maꞌe fai taꞌama. Ahowa, Tai ano, omo hire maꞌe onunamisiya ape, le lai peri no ape marepi no papu au teꞌe atuatuteye.^g 18 Sosu ane ne maꞌe apou teꞌesiya. Ne aꞌi lai Pita. Tapiye ape sahe ane lu tewi ano au taꞌanerowa. Lu tewi ano kairefi aꞌi teinamitorowa. Sepei Satan lu tewi ano aine teraꞌeyei ne totenamisiya ape, le lu tewi ano au ani ararorowata.^h 19 Sosu ne Owane Sitewi lo omo lo yo au noweinoweisiya meni. Serai ne etiri werese awei sahe irosiya ape, ne apou eiyei su, etiri ape amou tene! Sosu Owane Sitewi lai peri no umasirowawe, Owane Sitewi lo omo sahe, le apou eiyei, ‘Ei, etiri ape amou tene!’ Aiwawe aꞌi ne apou eiyei su, ‘Etiri ape wisere aꞌi ne. Ne etiri ape irore!’ Sosu Owane Sitewi omo hire maꞌe aiwawe aꞌi peri no umasirowa. Le apou eirowa, ‘Ei, etiri wisere aꞌi ne. Ne etiri ape irore!’”ⁱ 20 Sosu le lu disaipel lo einamiyewe, lowe maꞌe eiye, “Fene lu taune werese werese maꞌe ane Krais ne owe ape au teꞌe fiyarite.”

21 Sosu aꞌi pe nowe ape se Jisas lu disaipel lo maꞌe etiri werese ne omo erasi Jerusalem sahe henerairowa ape, le lowe maꞌe au atuatu areiyeteye. Le omo erasi Jerusalem henerirowa su, Owane Sitewi lo wesi lu yaꞌariyei tamo, au heseyei lu owane tutawe tamo, Owane Sitewi lo peri siye soꞌoruwe siye lu tamo, lowe le maꞌe fofowei erasi aꞌi au irorowa. Lowe aine teraꞌerowa. Sosu nowe hesi heta i tepaꞌasirowa su, Owane Sitewi lai le si tame norohuwe hene ani sinerowa. 22 Sosu Pita peri ape wanuwe su, le Jisas maꞌe hene tiyewe, le maꞌe peri kairefi aꞌi se eiye, “Meni Owane, peri no wawero aꞌi ne! Etiri ape mo ne maꞌe henerairowata.” 23 Ahowa, Jisas Pita maꞌe atati teiyewe, le maꞌe eiye, “Sepei Satan, Ne meꞌiyeni ano maꞌe ire! Ne ane yo ano einamiyei ne toteye. Ne lai lu lo marepi totesiya. Ne Owane Sitewi lo marepi tote umasi se taꞌama.”

24 Sosu Jisas lu disaipel lo maꞌe apou eiye, “Lu taune tamo ane moꞌo tote umasiyei ne toteyei su, lowe marepi towafi lowe lo fu ani ararore! Lowe me tapeꞌi towafi lowe lo fu ani sutetirowawe, ane moꞌo umasite.^j 25 Lu taune tamo marepi erasi aꞌi se mi mi pasi pasi ironamiyei ne toteyei su, lowe witane aꞌi temeniyerowa. Aiwawe aꞌi lu taune tamo, wiyawi ano irowei ape, lu tereꞌe tamo lowe aine teraꞌeyei su, Owane Sitewi lai lowe si tame hene ani norohuwe sinerowa.^k 26 Meni ta apou toteyei su, ‘Ane awei lo etiri werese werese aꞌi ani taꞌuwerowa.’ Ahowa, marepi hepene lo yehe omo maꞌe mi mi pasi pasi weriyei ironamitorowa. Etiri werese le ani taꞌuwerowa ape, lowe le au ferafereirowa awere? Opiyai! Meni ta ape etiri tomu neꞌese ani taꞌuwerowa su, le marepi hepene lo ne piye eterowa awere? Opiyai! Le marepi hepene lo si tame eterowata.^l 27 Ane, meni hire maꞌe itorai ape, ane tai ano lo kairefi erasi aꞌi se, Owane Sitewi lo ipari wisere aꞌi (ensel) mase itorairowa. Nowe ape se, ane lu taune werese lo yo seni au hese ereirowawe, etiri apou ape lowe maꞌe itiyaꞌu aurowa. Lu taune tamo yo peri ano umasi taꞌama ape mo, ane lowe yehe omo maꞌe ani fu arosawirowa. Lu taune werese yo peri ano umasinamiteye ape, ane lowe Owane Sitewi lo omo wesi maꞌe hene ani wirowa.^m 28 Peri ano pefine aꞌi ne. Wanure! Lu tamo sato ahe teisiya ape, ane, meni hire maꞌe itorai ape, tai ano lo kairefi erasi aꞌi mase lu taune werese au noweinoweiyei ne itorairowa su, nowe ape se lowe temeniyerowata.”