5 Pita le maꞌe peri ape au teꞌeteye su, Siyere! Niꞌarawe mitaiyeyei erasi aꞌi se omo hire maꞌe itoraiyewe, lowe werese napetu tawesiye. Sosu Wanure! Peri noꞌu erasi aꞌi niꞌarawe sahe apou au teꞌeye, “Meni ape le meni eime ano ne. Ane le ne marepi erasi aꞌi tote wawesiyenamisiya. Le marepi werese ano umasinamisiya. Serai ane le ne au nineꞌinamisiya.”^b

6 Sosu lu disaipel lo ape peri ape wanuwe su, lowe tu ereme awei maꞌe onoruwe lowe marepi lowe lo se erasi aꞌi atoweiye iroteye. 7 Sosu Jisas lowe maꞌe faiyewe, lowe maꞌe ereti se isawe hetesiyeye. Sosu lowe maꞌe eiye, “Fene sinere! Atoweiye sawa!” 8 Lowe Jisas lo peri wanuwe su, lowe nihe lowe lo hire siya ani aroweye. Lowe Jisas taꞌi aꞌi siyeye. Lu hesi niꞌarawe maꞌe itorai ape, si tame wiye. Lowesi sato ariye.

9 Sosu aꞌi pe lowe omo maꞌe itorai su, Jisas lu disaipel lo hesi heta maꞌe peri kairefi aꞌi se apou eiye, “Fene lu taune werese maꞌe suwou lo peri ape owe ape au teꞌe fiyarite. Ane temeniyerowawe, si tame sinerowa su, fene faraꞌu suwou lo peri ape lu taune maꞌe au teꞌe fiyarirowa.”

10 Sosu lu disaipel lo ape le maꞌe teꞌe toweriye, Owane Sitewi lo peri soꞌoruwe siye lu tamo, lowe apou eiye, “Meni Elaija tu pei henerairowa. Piyene lowe apou teꞌesiya awere?”^c

11 Jisas lowe maꞌe itiyaꞌu apou eiye, “Ei, peri ape pefine aꞌi ne. Meni Elaija tu aiyerowa. Le aiyerowa su, le etiri werese tame au taꞌane wisereyerowa. 12 Ahowa, ane fene maꞌe apou eisiya, Meni Elaija tu henerai tepaꞌasiye. Lu tewi ape mo lowe meni ape siye soꞌoru taꞌama. Le henerai su, lu tewi ape mo marepi towafi lowe lo tote umasiteyewe, sosu le maꞌe au luwaruweye. Aiwawe aꞌi lowe ane, meni omo hire maꞌe itorai ape, lowe ane aiwawe aꞌi au luwaruwerowa. Ane fofowei erasi aꞌi teriterowa.”^d 13 Sosu lu disaipel lo peri lo ape wanuwe su, lowe Jon saꞌi au huwei siye meni ne au teꞌeteye ape, siye soꞌoruweye.^e

14 Sosu aꞌi pe lowe lu taune tomu neꞌese ito heneri su, meni ta Jisas maꞌe lowe uporo apeꞌi onuwewe, tu ereme ororuwe. Le Jisas maꞌe marepi orese aꞌi se apou ei toweriye, 15 “Meni Owane, ne ane au ferafereire. Meni eime ano meremereye aꞌi ne. Tahe werese lo auseriyesiya. Le u erasi aꞌi se. Nowe tomu neꞌese se le yehe maꞌe winetainamiteye. Aiwawe nowe tomu neꞌese se saꞌi papu winetainamiteye. 16 Ane meni eime ano eite lu disaipel no maꞌe henetaiyewe, lowe sepei luwaru aꞌi au ani eimawesawirowata.”

17 Sosu Jisas le maꞌe itiyaꞌu eiye, “Fene werese, saro ahe irosiya ape, fene tote tawesiyei fene lo poꞌuteye. Fene marepi towafi fene lo tote fareraiyesiya taꞌama. Ane fene mase nowe mi tomu neꞌese iroteye. Fene ane ne tote tawesi taꞌame. Ane si tame wirowa su, fene eiwerou irorowa awere? Ane fene mase nowe poweiye eiwerou irorowa awere? Meni eime ape heneta!” 18 Lowe meni eime ape henetai su, Jisas sepei luwaru aꞌi ape maꞌe ai peri erasi apou eiye, “Sepei luwaru aꞌi, ne meni eime eite papu arunatire! Ne ire!” Sepei luwaru aꞌi Jisas lo peri wanuwewe, le meni eime ape arunatiyewe fi. Witane aꞌi meni eime lo u faraꞌuwe tepaꞌasiye.

19 Sosu nowe meꞌiye su lu disaipel lo Jisas maꞌe peri ta eresene aꞌi teꞌe toweriyei ne fai. Lowe apou ei toweriye, “Piyene nomo sepei luwaru aꞌi ape au ani eimawesawi awere?”^f

20 Sosu Jisas lowe maꞌe eiye, “Tote tawesiyei fene lo oso aꞌi tene. Serai fene sepei luwaru aꞌi ape au eimawesawi taꞌama. Ane peri wiyeme aꞌi fene maꞌe au teꞌesiya. Wanure! Fene tote tawesiyei oso aꞌi saiyoho so wou aꞌi irosiya su, fene omo ape maꞌe apou au teꞌere, ‘Omo, ne sinere! Pani tewi maꞌe ire!’ Omo ape peri no wanurowawe, le sinerowawe, pani tewi maꞌe onurirowa. Fene etiri werese werese faraꞌu taꞌane irorowa.” 21 {Fene sepei luwaru aꞌi eito eite au ani eimawesawireme su, fene Owane Sitewi maꞌe au teꞌenamitorowa. Sosu ene ayei werese siyenairowa. Serai fene faraꞌu sepei luwaru aꞌi ape au ani sasarisawirowa.}^gh

22 Jisas lu disaipel lo aiwawe aꞌi omo pani Galili sahe taꞌuweri. Sosu Jisas lu feni lo maꞌe eiye, “Meni ta ane, meni omo hire maꞌe itorai ape, lu tamo maꞌe aine teraꞌeye ne henetirowa.ⁱ 23 Lu tewi ape mo ane aine teraꞌerowa. Ane fisiye yo papu nowe hesi heta howeirowawe, sosu nowe mi hesi heta i tepaꞌasirowa su, Owane Sitewi lai ane si tame hene sinerowa.” Lu feni werese lo peri ape wanuwe su, lowe marepi orese erasi aꞌi totenamiteye.

24 Sosu aꞌi pe Jisas lu disaipel lo aiwawe aꞌi omo Kaperneam maꞌe heneri. Lu tamo Owane Sitewi lo wesi takis maꞌaru ani siye lu peri ta Pita maꞌe teꞌe toweriyei ne fai. Lowe Pita maꞌe teꞌe toweriye, “Atuatu siye meni fene lo, le Owane Sitewi lo wesi takis maꞌaru auwe awere? Le maꞌaru tau hesi aꞌi Owane Sitewi lo wesi maꞌe fa aure!”^j 25 Sosu Pita lowe maꞌe itiyaꞌu eiye, “Ei, Atuatu siye meni nomo lo takis maꞌaru aunamiteye.” Meꞌiye se, Pita wesi papu wiyewe, Jisas tu le maꞌe ei toweriye, “Saimon, ne piye peri totesiya awere? Awei lu owane werese lai takis maꞌaru aniyei su, eiwerou maꞌe lowe lai takis maꞌaru aniyei awere? Eimane towafi lowe lo aniyei awere? Lu tewi tereꞌe se aniyei awere?” 26 Sosu Pita le maꞌe itiyaꞌu eiye, “Lowe lu tewi tereꞌe se takis maꞌaru aniyei.” Sosu Jisas le maꞌe itiyaꞌu eiye, “Ei, serai eimane lowe lo takis maꞌaru werese aurowata. 27 Serai ane ne maꞌe au teꞌesiya. Ane lu tewi ape nomo maꞌe ai marepi toteyei wou taꞌama. Ne hare ite Galili maꞌe ire. Ne hare sase saꞌi papu fure! Hare ape tutawe sase tomuwei su, ne ahi lo ani potuwerowa. Hare ape ahi papu irosiya su, ne maꞌaru tau erasi siyerowa. Ne maꞌaru tau ape lu tewi ape maꞌe aiti. Tewi aꞌi ano tewi aꞌi no lowe maꞌe aunari.”