2 Sosu Jisas peri lowe lo wanuwe su, le meni eime ta ei aniyewe, le eime ape maꞌe lowe ponei sahe au teiteye. 3 Sosu eiye, “Peri ano pefine aꞌi ne. Wanure! Fene yo seni luwaru aꞌi atati arunatirowawe, yo seni ano umasirowa su, fene eimane lo marepi wou aꞌi fa henera. Fene eimane ta wou aꞌi heneraiyei taꞌama su, fene Owane Sitewi lo omo sahe eiwerou wirowata.^b 4 Lu taune tamo marepi towafi lowe lo ani ararorowawe, eimane lo marepi wou aꞌi toteteyei su, lowe Owane Sitewi lo omo sahe iyape erasi tutawe irorowa.

5 Aiwawe aꞌi meni ta meni eime ta maꞌe au isafiye wisereyeyei su, le ane maꞌe aiwawe aꞌi au isafiye wisereyerowa.”^c

6 Sosu Weiyai! Meni ta eimane, ane ne tote tawesi umasisiya ape, le tote tawesiyei lowe lo au luwaruwerowawe, lowe yo seni luwaru aꞌi au irorowa su, Owane Sitewi tai ano meni ape maꞌe fofowei erasi aꞌi aurowa. Fene tapiye erasi aꞌi meni ape lo pereꞌi sahe wafei se ti tawesirowawe, fene le saꞌi papu fu arorowawe, sosu le atenisetirowa. Meni ape fofowei oso aꞌi teriterowa.

7 Lu taune omo omo werese irosiya ape, fene weiyai! Fene yo ano einamirowawe, serai lu taune tamo ano yo seni luwaru aꞌi irowei su, tai ano fene maꞌe fofowei erasi aꞌi aurowa. Peri pefine aꞌi lu tomu neꞌese yo ano einamiyei ne toterowa. Ahowa, meni ta yo ano einamitowa su, meni ape fofowei erasi aꞌi ironamitorowa. 8 Sosu fene ereti lowe tote tawesiyei fene lo yo seni luwaru aꞌi maꞌe niꞌariyeteyei su, fene ereti lowe fene lo aine tourowawe, ani fu arosawire. Fene Owane Sitewi lo omo maꞌe wirowa su, fene ereti taꞌi aꞌi lowe taꞌi aꞌi mase wirowa. Etiri wisere aꞌi ne. Sosu aiwawe ereti lowe fene lo yo seni luwaru aꞌi maꞌe niꞌariteyei su, fene werese ereti hesi, lowe hesi yehe omo maꞌe ironamitorowa. Yehe omo ape mi mi pasi pasi ironamitorowa. Etiri ape luwaru aꞌi tene!^d 9 Aiwawe aꞌi fene nihe taꞌi yo seni luwaru aꞌi maꞌe niꞌariteyei su, fene nihe fene lo ani tahe fu arosawire. Fene Owane Sitewi lo omo nihe taꞌi aꞌi se wirowa. Etiri ape wisere aꞌi ne. Ahowa, fene nihe hesi fene lo yo seni luwaru aꞌi maꞌe niꞌariyeteyei su, fene yehe omo maꞌe mi mi pasi pasi irotorowa. Etiri ape luwaru aꞌi tene!

10 Serai fene eimane werese ape ai marepi owe ape totenamite. Piyene awere? Owane Sitewi lo ipari wisere aꞌi (ensel) lowe au noweinoweinamisiya. Fene etiri luwaru aꞌi lowe maꞌe au luwaruwerowa su, ipari wisere aꞌi (ensel) lowe lo Owane Sitewi maꞌe etiri ape ne au teꞌerirowa. Serai fene eimane ai marepi owe ape totenamite. 11 {Ane, meni omo hire maꞌe itorai ape, lu taune yo seni luwaru aꞌi ironamiteye ape, si tame hene aniyei ne itorai.}^ef

12 “Fene eiwerou totesiya awere? Meni ta fe sipsip lu ereti feni tamo werese irosiya ape (100) fe sipsip taꞌi aꞌi ipo maꞌe erauwiyerowa su, meni ape fe sipsip werese omo toꞌu sahe arunatirowawe, fe sipsip taꞌi aꞌi, ipo maꞌe erauwiye ape, ne nehiyei ne irowa. 13 Ane peri pefine aꞌi fene maꞌe au teꞌesiya. Meni ape fe sipsip ipo sahe siyeyei su, le marepi wisere erasi aꞌi nineꞌinamirowa. Fe sipsip werese tereꞌe ne, le marepi wisere aꞌi nineꞌirowata. Lowe werese wisere aꞌi ironamirowa. Le fe sipsip werese nineꞌinamirowa. Ahowa, fe sipsip ape, ipo maꞌe erauwiyeye ape, le marepi erasi pefine aꞌi nineꞌinamisiya. 14 Eimane ta maꞌe irowa su, Tai fene lo omo hire maꞌe onunamitorowa ape, le marepi orese aꞌi totenamitorowa. Ei. Tai fene lo marepi apou totesiya, ‘Ane eimane werese werese mi mi pasi pasi temeniye wou taꞌama.’”

15 “Sosu aꞌi pe kaiyemo fene lo ta Owane Sitewi lo peri umasisiya ape, yo seni luwaru aꞌi fene maꞌe irorowa su, fene meni ape maꞌe eresene aꞌi ire. Fene le maꞌe apou eire, ‘Ne yo seni luwaru aꞌi irowei ape, ne au teꞌe fareraiyere. no wanu umasiyei su, etiri wisere aꞌi tene! Serai ne kaiyemo ape Owane Sitewi maꞌe si tame henetirowa.^g 16 Ahowa, kaiyemo, le peri no wanu umasi se taꞌame su, ne meni taꞌi tereꞌe, lu hesi le maꞌe aiwawe yo seni luwaru aꞌi lo ape au teꞌe areiyeyei ne ire. Owane Sitewi lo one towe sahe apou leseye,

18 Ane peri pefine aꞌi fene maꞌe teꞌesiya. Wanure! Fene yo ape ane fene maꞌe tu au teꞌeye ape, umasiyei su, etiri werese awei sahe fene peri ta einamiyei ape, Owane Sitewi hire maꞌe onusiya ape, aiwawe aꞌi peri ape einamirowa. Aiwawe aꞌi etiri werese awei sahe wiyeme toteyei su, Owane Sitewi omo hire sahe aiwawe aꞌi wiyeme toterowa.^h

19 Ane fene maꞌe apou tame teꞌesiya. Lu hesi marepi taꞌi aꞌi se etiri ta ne toteyei su, lowesi Tai ano maꞌe, omo hire maꞌe ironamisiya ape, etiri ape ne teꞌe towerirowawe, le lai lowesi maꞌe aurowa.ⁱ 20 Lu hesi, lu hesi heta iyape ano se taꞌuweraiyei su, ane lowe aiwawe ponei saro irorowa.”

21 Sosu aꞌi pe Pita Jisas maꞌe peri ta ei toweriyei ne fai. Le apou ei toweriye, “Meni Owane, meni ta ane maꞌe au luwaruwenamirowawe, sosu ane maꞌe si tame apou ei towerirowa, ‘Ane ne maꞌe au luwaruweye, ne faraꞌu yo seni luwaru aꞌi ano iꞌane arunatire.’ Eiwerou aꞌi ane yo seni luwaru aꞌi ape iꞌane arunatirowa awere? Ereti feni werese feni hesi aꞌi iꞌane arunatirowa awere?” 22 Sosu Jisas le maꞌe itiyaꞌu eiye, “Ahowa, fene ereti feni werese feni hesi aꞌi fene yo seni luwaru aꞌi owe ape iꞌane arunatirowa. Ane ne maꞌe au teꞌesiya. Ne yo seni luwaru aꞌi lo owe ape nawite. Ne yo seni luwaru aꞌi mi mi pasi pasi weriyei iꞌane arunatinamite.^j 23 Serai ane nowe ape se Owane Sitewi, lu taune au noweinoweirowa ape, fene maꞌe eiwerou peri anowe wou au teꞌesiya awere? Ane fene maꞌe au teꞌesiya. Nowe ape se Owane Sitewi lu taune, au noweinoweirowa ape, apou wou aꞌi teꞌesiya. Awei meni owane tutawe apou toteye, ‘Ane wiyawi yahowaꞌi siye lu werese lo etiri neri aꞌi au ani erese fareraiyei ne totesiya.’ 24 Sosu awei meni owane ape wiyawi yahowaꞌi siye meni taꞌi aꞌi ei aniye. Meni ape etiri neri aꞌi erasi iroteye, Maꞌaru tau tomu neꞌese (10 milion). Meni ape lai meni owane lo maꞌe si itiyaꞌu tame aurowata. 25 Meni owane ape le maꞌe apou eiye, ‘Ne maꞌaru neri aꞌi werese si itiyaꞌu aure!’ Meni ape maꞌaru neri aꞌi si itiyaꞌu aurowata. Serai meni owane apou au teꞌeye, ‘Fene nohuweripi awaripi lowe lo etiri werese aiwawe aꞌi lu tereꞌe maꞌe fa ete arosawire. Fene maꞌaru werese lowe lo ane maꞌe aure. Serai meni ape lo maꞌaru neri aꞌi wiyeme au ani faraꞌuwerowa.’ 26 Wiyawi yahowaꞌi siye meni peri lo wanuwe su, le meni owane lo maꞌe tu ereme awei sahe howeiteye. Le apou eiye, ‘Ahowa! Ne ane ne siye ferafereire. Ane maꞌaru no neri aꞌi, werese aꞌi teyani irowe ape, si tame itiyaꞌu aurowa.’ 27 Sosu awei meni owane meni ape lo peri wanuwe su, le meni ape ne marepi au siye ferafereiteye. Sosu le meni ape maꞌe apou eiye, ‘Ne ire! Ane maꞌaru neri aꞌi werese teyani no iꞌane arunatirowa. Ne maꞌaru werese ane maꞌe si tame itiyaꞌu owe ape aure.’

28 Sosu meni ape meni owane lo wesi arunatiyewe, fi. Nowe meꞌiye su, meni ape wiyawi yahowaꞌi ani siye meni tereꞌe siyeri. Meni tereꞌe ape maꞌaru neri aꞌi tewi oso aꞌi le maꞌe iroteye. Maꞌaru tau ereti feni hesi werese aꞌi le maꞌe teyani aꞌi iroteye. Serai meni ape lai meni tereꞌe ape pereꞌi sahe anite tawesiyewe, apou eiye, ‘Ne maꞌaru neri aꞌi werese teyani ano ane maꞌe si tame itiyaꞌu aure.’

29 Meni tereꞌe ape le maꞌe tu ereme awei maꞌe apeꞌe onuwewe, sosu itiyaꞌu apou eiye, ‘Ne ane ne siye ferafereire. Ane maꞌaru neri aꞌi werese teyani no ne maꞌe si tame itiyaꞌu aurowa.’ 30 Ahowa, meni ape taꞌoreye aꞌi ne. Le meni tereꞌe maꞌe au siye feraferei taꞌame. Le meni ape kalabus wesi maꞌe eimawe arosawi. Sosu le maꞌe eiye, ‘Ne kalabus wesi sahe ironamite. Ne maꞌaru neri aꞌi werese teyani ano si itiyaꞌu tame aurowa su, ne faraꞌu nowe maꞌe si tame henera.’

31 Sosu wiyawi yahowaꞌi ani siye lu tereꞌe lai meni ape lo yo seni luwaru aꞌi siyeye su, lowe marepi orese erasi aꞌi tote teriteteyewe, meni owane lowe lo maꞌe peri heneruwe ape ne au teꞌe areiyeye, eine fi. 32 Sosu meni owane ape lai wiyawi yahowaꞌi ani siye meni lo ape ei aniyewe, le maꞌe eiye, ‘Ne meni luwaru poto aꞌi ne. Ne ane maꞌe apou eiye su, ne ane maꞌe ferafereire.’ Ane maꞌaru neri aꞌi werese teyani no iꞌane arunati poꞌuteye. 33 Ane ne maꞌe au ferafereiye su, serai piyene ne wiyawi kaiyemo no ape maꞌe au feraferei se taꞌama. 34 Meni owane ape lai wiyawi yahowaꞌi ani siye meni lo maꞌe ai marepi erasi aꞌi iroteye. Serai le meni ape lu tewi kalabus wesi au noweinoweiyei ape heneti. Serai lowe meni ape maꞌe fofowei erasi aꞌi au ironamiteye. Meni ape maꞌaru werese aꞌi teyani meni owane lo maꞌe itiyaꞌu si tame aurowa su, serai fofowei ape poꞌuterowa.^k

35 Aiwawe aꞌi fene marepi fene lo se lu taune tereꞌe tereꞌe lo yo seni luwaru aꞌi iꞌane arunati taꞌame su, Tai ano omo hire maꞌe ironamisiya ape, le fene maꞌe aiwawe aꞌi ironamirowa.”^l