Jisas meni ta tani lo naitu, tiyato ato towesi arosawiyei ape, ne au teꞌeye.
19
Sosu aꞌi pe Jisas peri anowe teꞌe tepaꞌasiye su, le lu feni aiwawe aꞌi lowe omo pani Galili arunatiyewe, omo pani Judia, Saꞌi Jordan feni eire maꞌe heneri. 2 Lu taune tomu neꞌese le moꞌo umasiti. Omo pani ape sahe le lu taune u se ape au taꞌane faraꞌuweteye.3 Nowe ape se lu Farisi tamo le maꞌe areareyei ne fai. Lowe le maꞌe apou teꞌe toweriye, “Meni ta marepi sitewi yahowaꞌi se, tani lo tiyato ato towesi arosawiyei awere. Le tani lo tiyato ato towesi arosawiyei su, le yo peri ta arisiyei awere?”
4 Sosu Jisas lowe maꞌe itiyaꞌu eiye, “Fene Owane Sitewi lo peri one towe ape sahe leseye ape, siye teꞌeye awere?
‘Tu naifa weriyei Owane Sitewi lai lu taune taꞌaneye su, sosu le meni ta, menitani ta taꞌaneye.’ Stt 1:27; 5:2
5 Sosu le lowesi maꞌe eiye,
‘Meni ta lai menitani ta naituweyei ne toteyei su, le tai mai lo arunatiyewe, tani lo mase nate tawesinamiyei. Lowesi tahe paꞌare taꞌi aꞌi henerairowa.’ Stt 2:24
6 Lowesi naituwei su, lowesi taꞌi taꞌi aꞌi irorowata. Ahowa, lowe tahe paꞌare taꞌi aꞌi henerairowa. Serai ane fene maꞌe au teꞌesiya. Owane Sitewi lai lowesi lo naituwei ape au ti nate tawesiye. Lu taune werese werese naituwei lowesi lo ape tiyato ato towesi arosawirowata.”
7 Sosu lowe le maꞌe itiyaꞌu teꞌe toweriye, “Piyene Moses apou eiye, fene tani fene lo omo lo sitewi maꞌe eimawesawiyei ne toteyei su, fene one towe ta le maꞌe lese aure. One towe ape apou leseye,
‘Ane tani ano naituwe tiyato ato towesi arosawirowa. Serai ane tani ano omo lo sitewi lo maꞌe si eimawesawirowa.’” Lo 24:1-4
8 Sosu Jisas lowe maꞌe apou eiye, “Tu naifa weriyei Owane Sitewi lai lu taune taꞌaneye su, le apou toteye. Meni ta naituwei su, le menitani taꞌi aꞌi naitu ti nate tawesinamiyei. Serai le menitani ape mi mi pasi pasi weriyei ironamitorowa. Fene lu kuseriye aꞌi ne. Serai fene ai marepi erasi aꞌi totenamiteyei, ‘Ane tani ano omo sitewi topo lo maꞌe eimawesawiyei ne toterowa.’ Fene peri ape au teꞌenamiteye su, Moses one towe ape ne fene maꞌe lese auwe. 9 Ane fene maꞌe au teꞌesiya, fene tani yo seni wisere aꞌi ironamiteye ape naituwei tiyato ato towesi arosawirowawe, menitani tereꞌe naituwei su, fene tafaꞌe yo seni luwaru aꞌi irowei.”a
10 Jisas lo lu disaipel le maꞌe apou teꞌeye, “Nohuweripi ape yo seni eito eite ironamirowa su, Lowesi naiturowata. Lowesi yoꞌorei ki, watiꞌare ki wou aꞌi mi mi weriyei ironamitorowa. Etiri ape wisere aꞌi ne.”
11 Ahowa, Jisas lowe maꞌe itiyaꞌu eiye, “Ei, peri ape kairefi aꞌi ne. Lu taune tamo peri ano ape tote wanu umasirowata. Ahowa, Owane Sitewi lai lu taune tewi oso aꞌi maꞌe kairefi aꞌi auwe. Serai lowe faraꞌu peri ano ape tote wanu umasirowa. 12 Peri ano wanure! Lu tereꞌe tamo lowe naitu taꞌame ape, irosiya. Tu naifa mai lai eimane auteiye su, le tahe tou taꞌame ape, menitani ta naitu ene arowata. Lu tereꞌe tamo irosiya ape, meni ta foro so lowe lo ani tou fu arosawi. Lu tereꞌe tamo apou aꞌi totesiya. Ane Owane Sitewi lo wiyawi mi mi pasi pasi ironamirowa. Serai ane menitani ta naiturowata. Sosu ane Owane Sitewi lo wiyawi pefine aꞌi au taꞌanerowa. Fene marepi ape apou wou aꞌi toteteye. Serai fene faraꞌu yoꞌorei ki ironamirowa.”
Jisas eimane werese marepi erasi aꞌi tote wawesiyeteye.
13 Sosu aꞌi pe lu taune tamo eimane lowe lo Jisas maꞌe au teꞌe wisereyeyei ne henetai. Lowe Jisas maꞌe teꞌeye, “Ne eimane werese nomo lo ereti no se au isawe wisereyere. Sosu lowe ne Owane Sitewi maꞌe ei towerire.” Ahowa, Jisas lo lu disaipel, ai peri erasi irowe ape, lowe eimane werese einamiye. Lowe eimane werese lowe lo Jisas maꞌe henetairowata. 14 Ahowa, Jisas lowe maꞌe eiye, “Fene eimane ape mo ane maꞌe owe ape einamire. Lu taune eimane eito eite wou aꞌi Owane Sitewi lai lowe au noweinoweinamitorowa. Serai fene lowe ane maꞌe ani arosa.”b 15 Sosu Jisas ereti lo se mato lowe lo sahe isawe hetesiye tepaꞌasiye su, le omo ape arunatiyewe, fi.
Meni maꞌaru tomu neꞌese iroteye ape Jisas maꞌe ei toweriyei ne fai.
16 Sosu aꞌi pe meni ta Jisas maꞌe peri ta ei toweriyei ne fai. Le apou ei toweriye, “Atuatu siye meni, ane mi mi pasi pasi weriyei ironamitereme. Piye wiyawi wisere aꞌi ane eiwerou irowei awere? Serai ane mi mi pasi pasi ironamitorowa.”
17 Sosu Jisas le maꞌe itiyaꞌu eiye, “‘Ne piyene ane maꞌe etiri wisere aꞌi ne ei towerisiya awere? Owane Sitewi taꞌi aꞌi le wisere aꞌi ne. Ahowa, ne marepi hepene heꞌi aꞌi anireme su, ne Moses lo yo peri werese umasinamite.’”c
18 Meni ape Jisas maꞌe itiyaꞌu ei toweriye, “Owane Sitewi lo yo peri eiwerou ane fu umasinamirowa awere?” Sosu Jisas le maꞌe itiyaꞌu eiye,
“‘Ne meni ta owe ape aine teraꞌere. Ne naituwei owe ape tiyato ato towesire. Ne etiri ta owe ape taꞌarei anite. Ne lu taune maꞌe peri owe ape arearere. 19 Ne tai mai no lo iyape ei ani arowete. Peri lowesi lo ne wanu umasite. Topo ne ne wawesiyesiya ape, aiwawe aꞌi tiyati maꞌe yo seni ape aiwawe aꞌi tote wawesiyenamite.’” Lo 5:16-20
20 Sosu meni yoꞌorei ape le maꞌe itiyaꞌu eiye, “Etiri werese ne ane maꞌe au teꞌeye ape, ane mi mi weriyei ironamiteye. Etiri tereꞌe ta ane piye iro poꞌuteye awere?”
21 Jisas le maꞌe eiye, “Ne yo seni aseyaro pefine aꞌi tote iroreme su, ne etiri werese werese no lu taune yahowaꞌi maꞌe ani none hese erei poꞌutesawi. Maꞌaru werese no lu taune maꞌaru ariye aꞌi ape, ani hese erei noneyei su, ne etiri wisere aꞌi Owane Sitewi lo omo sahe fu taꞌuwerowa. Sosu ne ane moꞌo umasita.” 22 Ahowa, meni yoꞌorei peri ape wanuwe su, le marepi orese aꞌi teriteyewe, fi. Piyene awere? Meni ape etiri maꞌaru tomu neꞌese iroteye.
23 Sosu Jisas lu disaipel lo maꞌe apou eiye, “Peri pefine aꞌi ane fene maꞌe au teꞌesiya. Lu taune tamo etiri maꞌaru tomu neꞌese taꞌuwe ani fu iroteye ape, yo ape kairefi aꞌi umasiyei ne Owane Sitewi lo omo hire maꞌe wirowa. 24 Sosu ane fene maꞌe apou tame au teꞌesiya. Fe kamel ta ipari tahe lo niꞌari lo yo papu wirowata. Aiwawe aꞌi lu taune tamo maꞌaru etiri tomu neꞌese taꞌuwe ani fu iroteye ape, lowe Owane Sitewi lo omo hire maꞌe wiyei ne poꞌuterowa.”
25 Sosu Jisas lo lu disaipel peri ape wanuwe su, lowe marepi hepene se suꞌariye. Sosu le maꞌe itiyaꞌu teꞌe toweriye, “Sosu eiwerai Owane Sitewi lo omo hire maꞌe wirowa awere?”
26 Sosu Jisas lu disaipel lo maꞌe atati tei siye etiyewe, lowe maꞌe au teꞌeye, “Lu taune werese wiyawi au ani irowei ne toteyei su, lowe Owane Sitewi lo omo maꞌe wirowata. Ahowa, Owane Sitewi aꞌi lai lu taune omo lo maꞌe hene wirowa. Owane Sitewi Pefine aꞌi lai etiri werese werese faraꞌu irorowa.”d
27 Sosu Pita le maꞌe itiyaꞌu ei toweriye, “Siyere! Nomo etiri werese nomo lo arunatiyewe, ne maꞌe moꞌo umasinamiteye. Serai nomo piye etiri ta aniyei awere?”
28 Sosu Jisas lowe maꞌe eiye, “Peri ano pefine aꞌi ne. Wanure! Ane fene maꞌe au teꞌesiya. Ei, fene werese etiri werese fene lo arunatiyewe, ane maꞌe moꞌo umasinamiteye. Nowe yeꞌewi su, ane Tai ano lo omo hire sahe me toꞌu pefine aꞌi lo onunamirowa su, fene ereti feni hesi werese aꞌi lowe hesi aꞌi (12) me toꞌu sahe aiwawe aꞌi onurowa. Serai fene lai Israel lo niyene ereti feni hesi werese aꞌi lowe hesi aꞌi (12) yo seni lowe lo au hese ereirowa.e 29 Lu taune werese wesi towafi lowe lo, neme tareripi towafi lowe lo tai mai towafi lowe lo, eimane towafi lowe lo, omo sitewi towafi lo arunatirowawe, sosu wiyawi ano au ani ironamirowa su, nowe yeꞌewi su lowe etiri tomu neꞌese anirowa. Sosu Owane Sitewi lai lowe maꞌe au ferafereirowawe, sosu lowe marepi hepene heꞌi aꞌi se mi mi pasi pasi weriyei ironamitorowa. 30 Ahowa, lu taune tomu neꞌese apou aꞌi toteyei su, ‘Ane yaru tutawe fa henera.’ Lu taune marepi apou ape totesiya ape, lowe yaru yeꞌewi henerairowa. Aiwawe aꞌi lu taune yaru yeꞌewi irorowa su, lowe yaru tutawe henerairowa.”f