Meni owane ta wiyawi ani siye lu taꞌaneye awei lo maꞌe eimawesawi.
20
Sosu aꞌi pe Jisas lu disaipel lo maꞌe peri anowe ta au teꞌeye. Le apou eiye. “Nowe ape se Owane Sitewi lu taune, au noweinoweirowa ape, apou wou aꞌi teꞌesiya. Nowe esi mitaiyeyei su, meni owane ta wiyawi ani siye lu tamo nehiyei ne fi. Lowe taꞌaneyei awei ape au taꞌanerowa. 2 Sosu meni owane ape wiyawi ani siye lu tamo ete tepaꞌasiye su, le lowe maꞌe eiye, ‘Fene taꞌaneyei awei ano wiyawi aniyei ne ire. Nowe neriwei su, fene wiyawi ani tepaꞌasiyei su, ane maꞌaru tau tamo aꞌi fene maꞌe aurowa.’ 3 Wiyawi ani siye lu ape mo taꞌaneyei awei maꞌe fi. Sosu nowe esi ponei (9 klok) meni owane ape omo nepawe maꞌe fi. Le lu tamo yo sahe yahowaꞌi teiteye, siyeri. 4 Sosu le lowe maꞌe eiye, ‘Fene taꞌaneyei awei ano maꞌe ire. Nowe neriwei su ane maꞌaru tau tamo fene maꞌe aurowa.’ Sosu lu ape mo taꞌaneyei awei lo maꞌe wiyawi aniyei ne fi. 5 Sosu poweiye ponei se, le omo nepawe maꞌe si tame fi. Le lu tamo yo sahe yahowaꞌi teiteye, siyeri. Sosu le lowe maꞌe eiye, ‘Fene aiwawe aꞌi taꞌaneyei awei ano maꞌe ire! Sosu neriwei su, ane maꞌaru tewi ta fene maꞌe aurowa. Le nowe poweiye wati (3 klok) si tame fiyewe, lu tereꞌe tamo taꞌaneyei awei lo maꞌe eimawesawi.’6 Nowe ereti feni werese (5 klok) henerai su, meni owane ape omo nepawe amerame aꞌi maꞌe fi. Le lu tamo teiteye, siyeri. Sosu le lowe maꞌe ei toweriye, ‘Fene piyene poweiye mi werese yahowaꞌi teisiya awere?’ 7 Lowe le maꞌe itiyaꞌu apou eiye, ‘Owe meni ta nomo wiyawi aniyei ne ete taꞌame.’ Sosu meni owane ape lowe maꞌe eiye, ‘Sosu fene taꞌaneyei awei ano maꞌe wiyawi aniyei ne ire.’
8 Pasi aꞌi su, meni owane ape wiyawi meni owane lo maꞌe apou eiye, ‘Ne lu werese maꞌe maꞌaru aniyei ne ei anire. Ne lu werese nowe neriwei su awei maꞌe fi ape tu maꞌaru aure. Sosu moꞌo lu werese tereꞌe maꞌe aiwawe aꞌi aure.’a 9 Wiyawi meni owane ape lu nowe ereti feni werese awei maꞌe fi ape, ei aniye. Le lu taꞌi taꞌi aꞌi maꞌaru tau hesi taꞌi aꞌi lowe maꞌe auwe. 10 Sosu lu ape mo esi mitaiyeyei su, awei maꞌe fi ape, lowe apou toteye, ‘Lu ape maꞌaru tau hesi aꞌi aniye su, serai nomo maꞌaru tomu neꞌese anirowa. Nomo esi neriwei werese wiyawi aniteye.’ Lowe maꞌaru tau hesi aꞌi hesi aꞌi aniye. 11 Lu ape mo maꞌaru tau hesi aꞌi aniye su, lowe meni owane maꞌe ai marepi erasi aꞌi toteye. 12 Lowe le maꞌe ai peri erasi eiye, ‘Wanure! Lu ape mo, lowe neriwei su taꞌaneyei awei no maꞌe wiyawi aniyei ne fi ape, lowe nowe tewi taꞌi aꞌi wiyawi aniye. Piyene lowe maꞌaru tau hesi aꞌi aiwawe aꞌi aniye awere? Nomo esi, ponei, neriwei su, poweiye umeri aꞌi se wiyawi erasi aniye ape nomo maꞌaru tau hesi aꞌi aiwawe aꞌi aniye. Marepi no luwaru aꞌi tene!’
13 Sosu meni owane ape meni ape maꞌe apou itiyaꞌu eiye, ‘Ane fene maꞌe etiri luwaru aꞌi iro taꞌame. Ahowa, ane fene esi aꞌi eteyei ne ei aniye su, ane fene maꞌe apou eiye, fene taꞌaneyei awei ano wiyawi aniyei su, ane maꞌaru tau hesi aꞌi aurowa.’ Fene peri ano wanuwe su, fene marepi wisere aꞌi toteye. 14 Fene maꞌaru fene lo aiti. Marepi ano apou aꞌi totesiya, ‘Ane lu yeꞌewi ape mo maꞌe maꞌaru tau hesi aꞌi aiwawe aꞌi au tepaꞌasiye.’ 15 Ane yo peri ta arisiye awere? Ape ta etiri werese ano ne. Ane faraꞌu marepi ano se umasisiyawe, lu maꞌe au nonetiyei. Ane lu ape mo maꞌe wisere aꞌi irowe su, fene piyene ane ne ai marepi totenamisiya awere?
16 Serai ane fene maꞌe tame au teꞌesiya. Lu taune tamo yaru tutawe irotereme su, lowe yaru yeꞌewi irotorowa. Aiwawe lu taune tamo yaru yeꞌewi irosiya su, lowe yaru tutawe henerairowa.”b
Jisas temeniyeyei lo peri ape ne au teꞌeye.
17 Sosu aꞌi pe Jisas peri anowe ape teꞌe tepaꞌasiye su, le lu disaipel lo mase omo Jerusalem maꞌe iyei ne toteye. Le lu disaipel lo ereti feni hesi lowe hesi aꞌi (12 disaipel) eresene aꞌi heneti. Lowe yo sahe iteye su, le lowe maꞌe apou au teꞌeye, 18 “Wanure! Nomo omo
Jerusalem maꞌe iyei ne. Meni ta ane, meni hire maꞌe itorai ape, au heseyei lu owane tutawe tamo, Owane Sitewi lo yo peri soꞌoruwe siye lu tamo maꞌe henetirowa. Lowe ane au hese ereirowawe, sosu lowe ane ne apou teꞌerowa, ‘Nomo meni ape aine teraꞌe temeniyerowa!’c 19 Sosu moꞌo su au heseyei lu owane lai lu tewi tereꞌe maꞌe Owane Sitewi lo peri umasi taꞌama ape, lowe maꞌe ane henetirowa. Lu tewi tereꞌe tamo lai ane se peri teꞌe narurowa. Lowe meꞌiyeni ano maꞌe wafei tohu se ainerowawe, ane me tapeꞌi sahe aine ti tawesirowa. Ane temeniyerowawe, nowe hesi heta se Owane Sitewi lai ane si au taꞌane norohuwe sinerowa.”
Jems, Jon lowesi iyape erasi ani heneraireme.
20 Nowe ape se Sebedi lo tani, eimane hesi lo mase Jisas maꞌe peri ta ei toweriyei ne fai. Le Jisas maꞌe awei sahe lowe uporo apeꞌi onuwewe, le maꞌe peri ta ei toweriyei ne fai. 21 Sosu Jisas le maꞌe ei toweriye, “Marepi no piye peri totesiya awere?” Sosu menitani ape apou ei toweriye, “Nowe ape se, ne lu taune werese au noweinoweirowa ape, ne si tame itorairowa su, ne Owane Sitewi maꞌe peri kairefi aꞌi se apou au teꞌere. Eimane hesi ano lai, taꞌi me toꞌu sahe eyate feni no maꞌe onurowa. Sosu meni eime ano tereꞌe me toꞌu sahe ereti opi feni no maꞌe onurowa.”d 22 Ahowa, Jisas lowe maꞌe itiyaꞌu apou eiye, “Fene etiri ape ne soꞌoru taꞌama awere? Ne faraꞌu siye auwe ano se saꞌi asiya awere? Peri lo sitewi apou aiwawe aꞌi, fenesi fofowei ano teritesiya awere?” Lowe le maꞌe itiyaꞌu eiye, “Ei, nomo siye auwe no se faraꞌu saꞌi ayei.”e 23 Sosu Jisas lowe maꞌe itiyaꞌu eiye, “Ei pefine! Fenesi siye auwe ano se saꞌi arowa. Ahowa, me tutoꞌu hesi aꞌi ereti eyate feni sahe, ereti opi feni sahe ane aurowata. Tai ano aꞌi lai me toꞌu hesi ape lu hesi onuwei ne ariariye tepaꞌasiye.”
24 Sosu lu feni tereꞌe ereti feni hesi peri ape wanuwe su, lowe lu nairi maꞌe ai marepi erasi aꞌi toteteye. 25 Ahowa, Jisas lu feni werese lo le maꞌe ei taꞌuwe aniyewe, lowe maꞌe apou eiye, “Fene awei lo marepi eito eite wou owe ape totere. Awei lu owane werese lowe ereti kairefi aꞌi se lu tereꞌe tamo maꞌe au noweinoweisiya. Serai lowe iyape erasi aꞌi henerairowa. Aiwawe aꞌi awei lu owane tereꞌe, lowe lu owane ape ani fu ararorowa. Serai lowe iyape erasi pefine henerairowa.f 26 Fene awei lu owane ape wou taꞌama. Ahowa, fene iyape erasi aꞌi se heneraiyei ne toteyei su, fene wiyawi yahowaꞌi ani siye lu pefine aꞌi fa henerai.g 27 Serai meni ta, fene saro irosiya ape, yaru tutawe heneraiyei ne toteyei su, le fene lo wiyawi yahowaꞌi siye lu fa henera. 28 Apou aiwawe aꞌi ane, meni hire maꞌe itorai ape, ane hi awei maꞌe lu taune ane maꞌe wiyawi fa au taꞌaneyei ne itorai taꞌama. Ane hi awei maꞌe lu taune werese ne au temeniyeyei ne itorai. Ane lu taune tomu neꞌese ne au ferafereiyei ne itorai. Ane temeniyerowa su, ane lu taune tomu neꞌese si tame ete hene anirowa.”h
Jisas lu hesi feni nihe pokoweyei se ape au taꞌane peteneye.
29 Sosu aꞌi pe Jisas lu disaipel lo mase omo Jeriko arunatiyewe, fi. Lu taune tomu erasi le moꞌo umasiye. 30 Siyere! Lu hesi nihe pokoweyei se ape yo mai tewiye saro onuteye. Lowesi Jisas yo sahe aweraꞌiyenati ape ne wanuwe su, lowesi peri erasi aꞌi Jisas maꞌe uteye, “Meni owane, Devit lo meni eime, ne notosi maꞌe au ferafereire.” 31 Lu taune werese peri lowesi lo wanuwe su, lowe lu hesi lo peri einamiyei ne toteye. Lowe lowesi maꞌe eiye, “Peri sawa.” Ahowa, lu hesi peri kairefi erasi aꞌi tame uteye, “Meni Owane Devit lo meni eime ne notosi ne au ferafereire.”
32 Jisas peri lowesi lo wanuwe su, le lowesi maꞌe apou ei toweriye, “Ane fenesi maꞌe eiwerou irowei awere?” 33 Lowesi le maꞌe itiyaꞌu eiye, “Meni Owane, ne nihe notosi lo au taꞌane petanere.” 34 Sosu Jisas peri lowesi lo wanuwe su, le marepi ewiteye erasi aꞌi lowesi ne toteye. Serai le ereti lo se nihe lowesi lo isawe hetesiyeye. Le nihe lowesi lo isawe hetesiyeye su, witane aꞌi nihe lowesi lo petaneye. Serai lowesi etiri werese amerame aꞌi siyeteye. Lowesi Jisas aiwawe aꞌi moꞌo umasiteye.