4 Jisas peri ape au teꞌeye su, peri ta Owane Sitewi lo peri au teꞌe siye meni tu naifa weriyei leseye ape wiyeme aꞌi henerai. Le apou leseye,

10 Sosu Jisas omo Jerusalem papu wiri su, lu taune werese omo Jerusalem iroteye ape, marepi hepene se suꞌariye. Lowe apou teꞌe toweriye, “Meni ape eiwerai pefine aꞌi awere?” 11 Sosu lu taune werese lai lowe maꞌe itiyaꞌu uteye, “Meni ape Jisas. Le Owane Sitewi lo peri au teꞌe siye meni pefine aꞌi ne. Le omo Nasaret, pani tewi Galili irosiya ape, maꞌe fai.”

12 Sosu aꞌi pe Jisas omo Jerusalem papu wiye su, le Owane Sitewi lo wesi tutawe papu wiye. Le lu tomu neꞌese Owane Sitewi lo wesi ape sahe etiri eteteye ape, le lu werese ape siyeye su, le lowe maꞌe ai marepi erasi aꞌi toteteyewe, Owane Sitewi lo wesi tutawe nowe maꞌe hene au sasarisawi. Lu tamo maꞌaru ani ereiteye ape le metei lowe lo ani apeti teroso fiyari sasariye. Lu ape mo irowe sapuwe eteteye ape, le me toꞌu lowe lo ani apeti teroso sasarisawi tepaꞌasiye. 13 Le lowe maꞌe ai marepi se apou eiye, “Tu naifa weriyei Owane Sitewi lo peri au teꞌe siye meni apou leseye,

18 Sosu aꞌi pe Jisas omo Betani sahe pasi ta howei mitaiyeyewe, sosu esi su le omo Jerusalem maꞌe si tame wiri. Le lau erasi iroteye, 19 Le yo mai sahe iteye su, le me owarape taꞌi aꞌi, yo mai tewiye sahe teiteye ape, siyeye. Le me owarape ape so ani taꞌeyei ne toteye su, le me owarape maꞌe heneri. Me owarape henerai su, owarape so werese ariye. Towe nei aꞌi iroteye. Serai le me ape maꞌe eiye, “Me owarape ne mi mi werese so owe ape taꞌere.” Jisas peri ape teꞌe tepaꞌasiye su, witane aꞌi me owarape ape foroꞌowe poꞌuteye.

20 Sosu Jisas lo lu disaipel hepene se suꞌariye. Sosu teꞌe toweriye, “Piyene me owarape witane aꞌi foroꞌoweye awere?”

21 Sosu Jisas lowe maꞌe itiyaꞌu eiye, “Ane peri pefine aꞌi fene maꞌe teꞌesiya. Wanure! Fene Owane Sitewi ne tote tawesisiya su, sosu marepi hesi aꞌi owe ape totete su, fene me owarape tereꞌe aiwawe aꞌi au taꞌanerowa. Sosu aiwawe aꞌi fene omo ape maꞌe apou teꞌeyei su, ‘Omo, ne sinere yaru no arunatirowawe, saꞌi erasi papu onurire.’ Fene apou ape tote tawesiyei su, wiyawi erasi pefine aꞌi ape henerairowa.^a 22 Etiri werese, fene lai Owane Sitewi maꞌe teꞌe toweriyei ape, Owane Sitewi lai peri no wanurowa. Fene le ne tote tawesiyei su, etiri werese fene teꞌe toweriyei ape, fene anirowa.”^b

23 Sosu aꞌi pe Jisas omo Jerusalem maꞌe heneri su, Owane Sitewi lo wesi tutawe papu lu taune maꞌe au atuatuwei ne wiri. Le lu taune peri lo au atuatuteye su, au heseyei lu owane tutawe tamo, awei lo lu owane tamo Jisas maꞌe peri ta teꞌe toweriyei ne fai. Lowe le maꞌe teꞌe toweriye, “Wiyawi erasi pefine aꞌi no ne, ne etiri ape mo ne iroteye ape, eiwerai ne irowei ne eimawesai awere? Eiwerai kairefi no auwe awere?” 24 Ahowa, Jisas lu ape mo maꞌe peri ta apou eiye, “Ane peri ta fene maꞌe ei towerisiya. Fene peri ano wiyeme aꞌi itiyaꞌu teꞌeyei su, ane faraꞌu teꞌe toweriyei fene lo itiyaꞌu teꞌerowa. Apou aꞌi eiwerai etiri ape mo irowei ne eimawesai awere? 25 Jon saꞌi au hu siye meni ne. Jon lu taune saꞌi au huwe su, wiyawi lo ape Owane Sitewi lai ausai awere? Lu lo marepi se fai awere?” Sosu lowe peri lo ape wanuwe su, lowe teꞌe tiyatiteye. Lowe apou toteye, “Nomo apou eirowa su, Jon lo wiyawi Owane Sitewi lai ausai. Nomo peri ape itiyaꞌu teꞌeyei su, le nomo maꞌe itiyaꞌu eirowa. ‘Piyene fene peri lo wanu tote umasi taꞌama awere?’ 26 Ahowa, nomo apou eirowa su, ‘Jon lo wiyawi lu lo marepi maꞌe fai.’ Nomo peri ape le maꞌe itiyaꞌu eirowa su, lu taune werese nomo ne ai marepi erasi aꞌi totenamirowa. Piyene awere? Lu taune ape mo Jon ne Owane Sitewi lo peri au teꞌe siye meni totesiya. Nomo lowe atoweiyesiya.”^c 27 Sosu lowe le maꞌe itiyaꞌu teꞌeye, “Jon lo wiyawi ape ne, eiwerai le maꞌe au ei aniye awere? Nomo soꞌoru taꞌama.” Sosu Jisas lowe maꞌe aiwawe aꞌi itiyaꞌu eiye. “Ane aiwawe aꞌi fene maꞌe kairefi ano eiwerou maꞌe fai awere? Ane fene maꞌe au teꞌe areiyerowata.”

28 Sosu Jisas lowe maꞌe peri ta tame ei toweriye. “Fene piye totesiya awere? Meni ta eimane hesi iroteye. Sosu le meni eime poto maꞌe peri ta au teꞌeyei ne fai. ‘Ne taꞌaneye awei maꞌe wiyawi taꞌaneyei ne ire!’ 29 Meni eime poto le maꞌe itiyaꞌu eiye, ‘Ei tai, Ane awei maꞌe wiyawi taꞌaneyei ne irowa.’ Ahowa, le taꞌaneyei awei maꞌe i taꞌame. 30 Sosu le meni eime Peiwe siyeri. Le apou eiye, ‘Ne taꞌaneyei awei ano wiyawi aniyei ne ire!’ Ahowa, meni eime Peiwe aite lo maꞌe itiyaꞌu eiye, ‘Opiyai! Ane taꞌaneyei awei maꞌe wiyawi aniyei ne irowata.’ Nowe meꞌiye oso aꞌi su, le marepi orese aꞌi toteye. Serai le aite lo taꞌaneyei awei maꞌe wiyawi aniyei ne fi. 31 Ane fene maꞌe peri ta ei towerisiya. Eimane hesi lo ape ne eiwerai aite lo marepi tote umasiye awere?” Lowe le maꞌe itiyaꞌu eiye, “Ei meni eime Peiwe aite lo marepi tote umasiteye.” Sosu Jisas lowe maꞌe itiyaꞌu eiye, “Ane peri pefine aꞌi fene maꞌe au teꞌesiya. Lu tewi takis ani siye lu tamo, sosu taune tafaꞌe yo seni luwaru aꞌi se ape mo, lowe Owane Sitewi lo peri wanu tote umasiteye. Lowe yo seni luwaru aꞌi lowe lo meꞌiyeni maꞌe atati arunati. Lu tewi ape mo Owane Sitewi lo omo hire maꞌe tu wirowa. Fene Owane Sitewi lo peri wanuwewe, peri lo ape arisinamiteye. Serai fene Owane Sitewi lo omo hire maꞌe wirowata. 32 Ane fene maꞌe au teꞌesiya. Jon fene maꞌe yo seni aseyaro atuatuwei ne fai. Ahowa, fene le ne tote tawesirowata. Lu ape mo takis maꞌaru ani siye lu ape mo, taune tafaꞌe yo seni luwaru aꞌi se ape mo, lowe le ne tote tawesi umasiteye. Fene yo seni irowe ape, siyeye su, fene yo seni luwaru aꞌi fene lo meꞌiyeni maꞌe atati arunati taꞌame. Fene yo seni luwaru aꞌi fene lo neritase aꞌi iro taꞌame. Serai fene Owane Sitewi ne tote tawesi se taꞌama.”^d

33 Sosu aꞌi pe Jisas lowe maꞌe peri anowe tereꞌe ta au teꞌeye, Jisas apou eiye, “Peri anowe eite wanure! Meni owane ta taꞌaneyei awei taꞌaneye. Le tapiye fisahe taꞌaneyei awei lo loꞌoti yosetiteye. Le taꞌaneyei awei ponei ape sahe fisiye yo horuseye. Taꞌaneyei awei fisiye yo papu wiyawi ani siye lu wafei wain lo so aine tapoteye. Le wesi aite oso aꞌi ta taꞌaneye. Serai wiyawi ani siye lu, lowe wesi aite papu onuwewe, lo taꞌaneyei awei au noweinoweiteye. Sosu le wiyawi ani siye lu tamo awei lo au noweinoweiyei ne nehiti. Wiyawi ani siye lu ete tepaꞌasiye su, le lowe maꞌe eiye, ‘Fene taꞌaneyei awei ano au noweinoweite. Wain saꞌi taꞌuwe tepaꞌasiye su, ane wiyawi yahowaꞌi ani siye lu ano wain saꞌi tewi aꞌi aniyei ne eimawesairowa.’ Sosu meni ape omo pani eyeri maꞌe fi.^e 34 Nowe meꞌiye su, wain saꞌi taꞌane tepaꞌasiye su, meni owane ape wiyawi yahowaꞌi ani siye lu tamo awei lo maꞌe wain saꞌi tewi aꞌi aniyei ne eimawesawi. 35 Wiyawi yahowaꞌi ani siye lu ape mo taꞌaneyei awei maꞌe heneri su, wiyawi ani siye lu lowe maꞌe au luwaruweye. Lowe meni taꞌi me au se aineye. Meni taꞌi maꞌe tapiye aine fusawi. Meni taꞌi, lowe lai aine teraꞌeye. 36 Sosu meni owane peri heneruwe ape wanuwe su, le wiyawi yahowaꞌi ani siye lu tomu neꞌese lowe maꞌe wain saꞌi aniyei ne eimawesawi. Wiyawi ani siye lu ape, lowe siye aniye su, lowe lu ape mo maꞌe aiwawe aꞌi au luwaruweye. 37 Sosu meni owane ape apou toteye, ‘Ane meni eime ano wiyawi ani siye lu maꞌe eimawesawi. Lowe meni eime ano ne marepi wisere aꞌi wanu toterowa.’ 38 Ahowa, wiyawi ani siye lu meni owane lo meni eime siye aniye su, lowe apou teꞌeye, ‘Siyere! Meni owane lo meni eime fai. Nowe meꞌiye su, taꞌaneyei awei ape topo lo pefine henerairowa. Nomo meni ape ereti se aniteyewe, le maꞌe aine teraꞌeyei ne. Nomo meni ape aine teraꞌeyei su, taꞌaneyei awei ape, nomo lo henerairowa.’^f 39 Sosu wiyawi ani siye lu lai meni owane lo meni eime ereti lo se anite tawesiyewe, taꞌaneyei awei nowe maꞌe ani fu arosawi. Lowe meni eime ape aine teraꞌeye.”^g 40 Jisas peri anowe teꞌe tepaꞌasiye su, le lowe maꞌe ei toweriye, “Meni owane ape taꞌaneyei awei lo maꞌe si tame henerairowa su, le lai wiyawi ani siye lu werese maꞌe eiwerou irorowa awere?”

41 Sosu lowe itiyaꞌu eiye, “Le aiyerowa su, le wiyawi ani siye lu luwaru werese aꞌi lo ape ereti aniteyewe, sosu le lowe maꞌe aine teraꞌerowa. Lowe werese temeniyerowa su, meni owane ape wiyawi ani siye lu tewi tereꞌe eteyei ne nehitirowa. Nowe meꞌiye henerairowa su wiyawi ani siye lu ape mo lowe meni owane maꞌe wain saꞌi tewi aꞌi si itiyaꞌu aurowa.”

42 Jisas lowe maꞌe ei toweriye, “Fene Owane Sitewi lo one towe sahe peri ape siye teꞌe taꞌame awere? Owane Sitewi lo peri apou teꞌesiya,

45 Owane Sitewi lo wesi lu owane ape mo, lu Farisi ape mo wanuwe su, lowe apou toteye. Peri anowe ape le nomo ne au teꞌeye. 46 Lowe Jisas ereti se anite tawesiyei ne toteye su, lowe lu taune werese ne atoweiyeye. Piyene awere? Lu taune werese Jisas ne apou toteye, “Jisas, le Owane Sitewi lo peri au teꞌe siye meni pefine aꞌi ne.”