Meni owane naituwei lo taꞌuwe hereiyei au irowe.
22
Sosu aꞌi pe Jisas lowe maꞌe peri anowe tereꞌe tame au teꞌeye. Le apou teꞌeye, 2 “Nowe ape se Owane Sitewi lai lu taune au noweinoweirowa ape apou aiwawe aꞌi teꞌesiya. Awei meni owane tutawe ta apou eiye, ‘Meni eime ano naituwei ne totesiya. Ane naituwei lo taꞌuwe hereiyei erasi au irorowa.’ 3 Ayei etiri werese ani taꞌuwe opai tepaꞌasiye su, le wiyawi yahowaꞌi ani siye lu lo lu taune maꞌe faiye ne eimawesawi. Ahowa, lu taune werese taꞌuwe hereiyei ape aiyeyei ne taꞌoreye. 4 Wiyawi yahowaꞌi ani siye lu meni owane maꞌe si tame henerai su, lowe apou eiye, ‘Lu taune werese aiyeyei ne taꞌoreye.’ Sosu meni owane ape wiyawi yahowaꞌi ani siye lu tereꞌe lu taune maꞌe faiye ne eimawesawiyewe, lowe maꞌe eiye, Fene lu taune ape mo maꞌe ane tu ei aniye ape, au teꞌere, Wanure! Meni owane nomo lo ene ayei werese ani taꞌuwe opai tepaꞌasiye. Le fe bulmakau oturei aꞌi nei tou opai tepaꞌasiye. Etiri werese taꞌuwe nanei tepaꞌasiye. Fene werese naituwei lo taꞌuwe hereiyei eite lo aiyere! 5 Ahowa, lu taune werese peri lo arisinamiteye. Lowe werese fiyari howeinati aꞌi irowe. Meni taꞌi taꞌaneyei awei topo lo maꞌe fi. Meni tereꞌe ta omo tereꞌe maꞌe etiri lo ete taꞌuweyei ne fi. 6 Lu taune tereꞌe werese, lowe meni owane lo wiyawi yahowaꞌi ani siye lu maꞌe au luwaruweteye. Lowe wiyawi yahowaꞌi ani siye lu tamo aine teraꞌeye.a 7 Awei meni owane tutawe ape peri heneruwe ape wanuwe su, le ai marepi erasi aꞌi lowe maꞌe totenamiteye. Serai le ai atu siye lu tomu neꞌese omo lowe lo maꞌe yehe se taiso fuwei ne eimawesawi. Lowe lu taune ape mo wiyawi, yahowaꞌi ani siye lu lo aine teraꞌeye ape, lowe werese aine teraꞌe tepaꞌasiye.8 Ai atu siye lu tamo lu taune tewi ape aine teraꞌeye su, lowe meni owane maꞌe si fi. Sosu meni owane ape wiyawi yahowaꞌi ani siye lu maꞌe eiye, ‘Naituwei lo taꞌuwe hereiyei lo ene ayei opai tepaꞌasiye. Lu taune tewi ape lai ane tu ei aniye ape, lowe naituwei lo taꞌuwe hereiyei aiyerowata. Lowe werese lu taune luwaru aꞌi ne. 9 Serai fene yo teri werese maꞌe irowawe, lu taune werese teꞌesiya. Fene siyeyei su, naituwei lo taꞌuwe hereiyei ano eite ei anire.’ 10 Sosu wiyawi yahowaꞌi ani siye lu yo teri lu taune tei ninaweyei ne fi. Lowe lu taune werese werese lowe siyeye ape ei aniteye. Lu taune tamo wisere aꞌi lu taune tamo luwaru aꞌi. Meni owane lo taꞌuwe wesi temeꞌeriyeye. Lu taune tomu neꞌese ene ayei ne taꞌuwerai.
11 Ahowa, meni owane ape taꞌuwe wesi ape wiye su, le lu taune werese siye etiteye. Le meni taꞌi naituwei lo ipari tahe ani asi taꞌame ape siyeye. 12 Meni owane ape meni ape maꞌe eiye, ‘Kaiyemo, Ne naituwei lo ipari tahe ani asi taꞌame. Piyene ne taꞌuwe wesi ano wirai awere?’ Meni ape peri se taꞌama. 13 Sosu meni owane wiyawi ani siye lu maꞌe apou eiye. ‘Meni ape ereti lowe wafei se ani ti tawesire. Fene le nowe maꞌe pasi aꞌi ani fu arosawire. Le fofowei erasi teriteyewe, pi taꞌani tawesitorowa. Le luwei erasi irotorowa.’”b
14 Sosu Jisas apou eiye, Wanure! Fene peri ape ne totere. Owane Sitewi lai lu taune tomu neꞌese ei aniye. Ahowa, lu taune tewi oso aꞌi le lai Owane Sitewi lo omo maꞌe wiyei ne ariariyeye.
Nomo Takis maꞌaru tamo sisar maꞌe auwei awere? Piyete awere?
15 Sosu aꞌi pe lu Farisi tamo wesi nowe maꞌe fi. Lowesi wesi tereꞌe maꞌe teꞌeyei ne taꞌuwerai. Lowe apou toteye, “Nomo yo ta Jisas areareyei ne teꞌe ani nehiyei. Sosu nomo le aine teraꞌerowa.”c 16 Sosu lowe lu feni lowe lo Jisas maꞌe teꞌe toweriyei ne eimawesawi. Herot lo lu tewi lowe aiwawe aꞌi fi. Lowe Jisas maꞌe henerai su, lowe le maꞌe apou teꞌe toweriye, “Atuatu siye meni, Nomo ne ne soꞌoruwesiya tene! Peri werese no wiyeme aꞌi ne. Ne Owane Sitewi lo peri pefine aꞌi lu taune maꞌe au teꞌe atuatu areiyesiya. Lu werese lai ne eterowata. Ne lu taune ne apou tote taꞌama. ‘Meni ape iyape erasi se ane le ne wiyawi anirowa. Meni tereꞌe ape iyape se taꞌama, Ane le maꞌe ani fu ararorowa.’ Ahowa, ne marepi eito eite tote taꞌame. 17 Ne nomo maꞌe peri ta itiyaꞌu teꞌere. Ne eiwerou totesiya awere? Nomo faraꞌu takis maꞌaru tau awei meni owane Sisar aurowa awere. Piyete awere? Nomo takis maꞌaru tamo meni owane Sisar maꞌe aurowa su, nomo Owane Sitewi lo yo peri arisirowa awere? Piyete awere?”
18 Ahowa, Jisas marepi lowe lo siye soꞌoruwe tepaꞌasiyewe, lowe le maꞌe au areareyei ne toteye. Le lowe maꞌe eiye, “Piyene fene ane areareyei ne totesiya awere? Fene marepi hesiyei tote siye lu tene! 19 Fene takis maꞌaru tau ane maꞌe ausa!” Sosu lowe maꞌaru tau le maꞌe aitai. 20 Sosu le lowe maꞌe peri ta ei toweriye, “Nihari hepene ape ne eiwerou lo awere? Iyape leseye ape eiwerou lo awere?” 21 Sosu lowe le maꞌe itiyaꞌu eiye, “Sisar lo nihari hepene sosu iyape lo aiwawe aꞌi sato irosiya.” Sosu le lowe maꞌe eiye, “Fene Sisar lo etiri Sisar maꞌe si tame aure. Etiri werese Owane Sitewi lo ne, fene Owane Sitewi maꞌe si tame aure!”d 22 Lu tewi ape mo peri ape wanuwe su, lowe hepene se suꞌari hemirehemiye. Lowe le arunatiyewe, wesi towafi lowe lo si tame fi.
Lu Sadyusi apou totesiya, Meni ta si tame norohuwe sinerowata.
23 Nowe aiwawe aꞌi se lu Sadyusi tamo Jisas maꞌe peri ta teꞌe toweriyei ne fai. Lu tewi ape mo apou totesiya. Meni ta temeniyeye su, le si tame sinerowata.e 24 Lowe le maꞌe apou teꞌe toweriye, “Atuatu siye meni, Moses apou leseye,
‘Meni ta tani lo naituwe su, lowesi eimane se taꞌama. Sosu meꞌiye se meni ape temeniyeye. Meni ape lo paꞌise, le airu lo tani fa naiture. Serai lowesi eimane auteirowawe, lowesi airu lo eimane maꞌe wou au noweinoweinamirowa. Serai eimane werese poto lo aiwawe aꞌi henerairowa.’ Lo 25:5
25 Sosu meni ape nairipi ereti feni werese ereti feni hesi aꞌi iroteye. Meni eime Poto tani lo naituwewe, sosu temeniyeye. Eimane se taꞌama. Serai Peiwe meni lai Poto lo tani naituwe. 26 Sosu meni Peiwe temeniyeye. Henei meni Poto lo tani naituwewe, sosu temeniyeye. Sosu nairipi werese Poto lo tani naituwewe, lowe werese temeniyeye. Lowe werese eimane se taꞌama. 27 Sosu meꞌiye su, menitani ape aiwawe aꞌi temeniyeye. Menitani ape eimane tamo autei taꞌame. 28 Serai nomo ne maꞌe apou teꞌe towerisiya, nowe yeꞌewi se, lu taune werese si tame sinerowa ape, menitani ape ne, eiwerai tani pefine naitunamirowa awere? Nairi ereti feni werese ereti feni hesi aꞌi awei sahe naitu tepaꞌasiye.”
29 Ahowa, Jisas lowe maꞌe itiyaꞌu eiye, “Marepi fene lo meremereye aꞌi ironamisiya. Fene Owane Sitewi lo peri lo sitewi soꞌoru taꞌama. Fene Owane Sitewi lo kairefi pefine siye soꞌoru taꞌama. 30 Nowe yeꞌewi se lu taune si tame sinerowa ape, lowe naituwei se irorowata. Lowe taune tamo eterowata. Lu taune werese Owane Sitewi lo omo hire maꞌe wirowa ape, lowe Owane Sitewi lo ipari wisere aꞌi (ensel) wou ironamitorowa.
31 Serai ane fene maꞌe si tame sineyei lo peri au teꞌesiya. Fene Owane Sitewi lo peri one towe sahe leseye ape siye teꞌe taꞌama awere? Owane Sitewi lai fene maꞌe apou au teꞌeye,
32 ‘Ane aꞌi lai Abraham lo Owane Sitewi Pefine aꞌi ne.
Ane Aisak lo Owane Sitewi Pefine aꞌi ne. Sosu ane Jakop lo Owane Sitewi Pefine aꞌi ne. Kis 3:6
Owane Sitewi lai, lu taune werese temeniyeye ape, au noweinowei se taꞌame. Ahowa, le aꞌi lai lu taune werese, hepene norohuwe se ironamisiya ape, au noweinoweinamitorowa.’” 33 Lu taune werese Jisas lo peri wanuwe su, lowe hepene se suꞌari hemirehemiteye. Lowe apou toteye, “Meni ape peri wisere aꞌi au teꞌe atuatusiya.”
Owane Sitewi lo yo peri tutawe.
34 Sosu aꞌi pe lu Farisi peri heneruwe apou wanuwe su, Jisas lai lu Sadyusi lo peri ani fu ararowewe, serai lowe peri ta itiyaꞌu teꞌerowata. Lowe peri se taꞌama. Lu Farisi peri ape wanuwe su, lowe Jisas maꞌe taꞌuwerai. 35 Meni taꞌi yo peri siye soꞌoruwe siye meni le Jisas maꞌe peri areareyei ne toteye. Le Jisas maꞌe apou ei toweriye. 36 “Atuatu siye meni. Owane Sitewi lo yo peri werese totere. Piye yo peri tutawe irosiya awere?” 37 Jisas le maꞌe itiyaꞌu eiye,
“Ne Owane Sitewi pefine aꞌi no marepi werese se tote wawesiyere. Ne aiwawe aꞌi marepi hepene werese se le maꞌe tote wawesiyere. Sosu kairefiyeyei werese no le maꞌe tote wawesiyere.” Lo 6:5
38 “Yo peri ape erasi pefine aꞌi tene. Yo peri ape peri tutawe henerai tepaꞌasiye. 39 Yo peri toꞌuresi apou aiwawe aꞌi teꞌesiya.
‘Ne lu taune topo ne ne wawesiyeyei ape aiwawe aꞌi tote wawesiyenamite!’ Wkp 19:18
40 Yo peri hesi ape lo sitewi Owane Sitewi lo yo peri werese werese hire maꞌe ironamiteye. Owane Sitewi lo peri au teꞌe siye lu lo peri werese yo peri hesi ape unahi ironamiteye.”f
Jisas lu Farisi maꞌe ei toweriye, Krais eiwerai awere?
41 Sosu lu Farisi tamo taꞌuwerai su, Jisas lowe maꞌe peri ta apou ei toweriye, 42 Le lowe maꞌe apou ei toweriye, “Meni ape Krais lai, hi awei maꞌe eimawe arosai ape, meni ape eiwerou lo eime awere?” Sosu lowe itiyaꞌu eiye. “Meni ape ne Devit lo meni eime.”g 43 Serai Jisas lowe maꞌe itiyaꞌu eiye, “Meni ape Devit lo meni eime su, piyene Devit lai Owane Sitewi lo Hepene Waraꞌi aꞌi se meni ape apou eiye, ‘Ne meni owane ano ne.’ 44 Devit peri ape apou leseye,
‘Meni owane pefine aꞌi lai meni owane ano maꞌe eiye, Ne eyate feni ano maꞌe onure. Ane airame werese fene lo, lowe no unahi fu ararore.’ Sng 110:1
45 Devit lai meni ape ne apou eiye su, ‘Ne meni owane ano ne.’ Piyene meni ape Devit lo meni eime henerai awere?”
46 Lu Farisi werese Jisas lo peri itiyaꞌu teꞌe taꞌame. Lowe werese le ne atoweiye iroteye. Serai lowe peri tereꞌe tereꞌe mi mi weriyei weriyei le maꞌe teꞌe towerirowata.