8 Ahowa, lu taune fene ne atuatu siye lu owe ape teꞌete. Fene lai atuatu siye meni taꞌi aꞌi irosiya. Atuatu siye meni ape Owane Sitewi Pefine aꞌi ne. Fene werese kaiyemo mo aiwawe aꞌi ne. 9 Lu tereꞌe fene maꞌe owe ape teꞌete. ‘Ne tai ano ne.’ Fene tai pefine aꞌi irosiya. Owane Sitewi Pefine aꞌi, omo hire maꞌe ironamitorowa ape, le aꞌi lai tai pefine aꞌi fene lo ne. 10 Fene lu tereꞌe maꞌe owe ape teꞌere. ‘Ne meni owane ano ne. Fene meni owane pefine taꞌi aꞌi irosiya. Meni ape Krais tene. Owane Sitewi meni ape ariariyeyewe, hi awei maꞌe eimawe arosai. 11 Lu tamo, iyape erasi pefine aꞌi irosiya ape, lowe wiyawi yahowaꞌi ani siye lu fene lo fa heneraire.’^c 12 Meni ta apou toteyei su, ‘Ane iyape erasi aꞌi irosiya.’ Ahowa, Owane Sitewi lai meni ape ani ararorowa. Meni ta apou toteyei su, ‘Ane meni yahowaꞌi ne.’ Owane Sitewi lai meni ape iyape erasi aꞌi ei ani arowerowa.”^d

13 Sosu aꞌi pe Jisas lu Farisi, Owane Sitewi lo yo peri soꞌoruwe siye lu maꞌe apou eiye, “Fene werese Farisi, Owane Sitewi lo yo peri soꞌoruwe siye lu, fene werese marepi hesi aꞌi totesiya. Ane fene maꞌe eisiya. Weiyai! Fene yo ape Owane Sitewi maꞌe wiyei ape ti tawesisiya. Fene Owane Sitewi lo omo maꞌe wi taꞌame su, fene apou totesiya, ‘Lu taune Owane Sitewi ne tote tawesi umasiteye ape, lowe lai Owane Sitewi lo omo maꞌe wirowata.’ 14 {Lu Farisi, Owane Sitewi lo yo peri soꞌoruwe siye lu fene marepi hesi aꞌi totesiya ape, ane fene maꞌe eiwa. Weiyai! Fene taune weiname areareteyewe, sosu wesi lowe lo fene lai taꞌarei aniye. Fene lu taune maꞌe areareyei ne totesiya. Serai fene peri wawero aꞌi Owane Sitewi maꞌe pitase aꞌi au teꞌesiya. Nowe yeꞌewi su, fene fofowei erasi aꞌi teritenamitorowa.}^e

15 Fene, lu Farisi, Owane Sitewi lo yo peri soꞌoruwe siye lu, fene marepi hesi aꞌi totesiya ape, ane fene werese maꞌe au teꞌesiya. Weiyai! Fene saꞌi erasi toneriyewe, nawei pani iteyewe, fene meni taꞌi aꞌi nehiti. Fene meni ape siyeye su, fene le maꞌe apou eiye, ‘Ne nomo aiwawe aꞌi fa henera!’ Meni ape marepi fene lo tote umasiyei su, fene meni ape sepei Satan maꞌe henetirowa. Serai le sepei Satan lo eimane wou henerairowa. Yo seni luwaru aꞌi lo, luwaru aꞌi tene!

16 Fene meni nihe pokoweyei aiwawe aꞌi ne. Fene Owane Sitewi lo yo lu taune maꞌe au atuatuwei ne toteyei su, fene Owane Sitewi lo yo soꞌoru taꞌama. Fene lowe maꞌe teꞌesiya, ‘Fene peri teꞌe naneiyei ta Owane Sitewi lo wesi lo kairefiyeyei se teꞌeyei su, peri teꞌe naneiyei ape pefine taꞌama.’ Ahowa, meni ta peri teꞌe naneiyei ta apou eiyei su, ‘Tapiye gol lo iyape se Owane Sitewi lo wesi sahe irosiya ape, ane peri teꞌe naneiyei.’ Peri teꞌe naneiyei ape, le peri lo ape fa umasite.^f 17 Fene meremereye aꞌi ne. Marepi fene lo meremereye aꞌi tote tawesinamisiya. Fene peri ano itiyaꞌu teꞌere. Owane Sitewi lo nihe se etiri ape mo ne fene piye tutawe totesiya awere? Tapiye gol Owane Sitewi lo wesi irosiya ape, tutawe awere? Owane Sitewi lo wesi ape lai tapiye gol aseyaro aꞌi au iro taꞌaneye. Owane Sitewi lo wesi ape tutawe awere? Fene piye tutawe totesiya awere? Ahowa, Owane Sitewi lo wesi tutawe irosiya ape, tapiye gol ani araronamisiya. 18 Meni ta apou teꞌeyei su, ‘Ane peri teꞌe naneiyei ta tapiye wari lo kairefiyeyei se au teꞌeyei.’ Peri teꞌe naneiyei ape yahowaꞌi ne. Ahowa, meni ta Owane Sitewi maꞌe fe sipsip tapiye wari sahe aine teraꞌe au hese lei tiseroꞌowei su, sosu Owane Sitewi maꞌe apou teꞌeyei, ‘Ane ne maꞌe peri teꞌe naneiyei ta au teꞌe areiyesiya.’ Peri teꞌe naneiyei ape kairefi aꞌi ne. Meni ape teꞌe naneiyei ape fu umasite. 19 Fene marepi meremereye aꞌi ne. Owane Sitewi lo nihe se piye etiri hesi ape tutawe awere? Tapiye wari tutawe awere? Fe sipsip meni ape Owane Sitewi maꞌe aine teraꞌe au hese lei tiseroꞌowei se ape tutawe awere? 20 Serai meni ta Owane Sitewi maꞌe teꞌe naneiyei ta au teꞌe su, le tapiye wari se sosu fe sipsip tapiye wari hire irosiya ape aiwawe aꞌi se au teꞌe naneiyei. 21 Aiwawe aꞌi meni ape Owane Sitewi maꞌe peri teꞌe naneiyei ta Owane Sitewi lo wesi sahe au teꞌe naneiyei su, le peri teꞌe naneiyei Owane Sitewi lo nihe se aiwawe aꞌi peri teꞌe naneiyei. 22 Aiwawe aꞌi meni ta Owane Sitewi lo omo hire maꞌe se Owane Sitewi maꞌe peri teꞌe naneiyei ta au teꞌe areiyeyei su, le Owane Sitewi aiwawe aꞌi, me tutoꞌu lo sahe onunamisiya ape, au teꞌe naneiyei areiyeyei.^g

23 Ane fene maꞌe, lu Farisi, Owane Sitewi lo yo peri soꞌoruwe siye lu, fene marepi hesi totenamisiya. Ane fene maꞌe eiwa. Weiyai! Fene taꞌaneyei awei lo one, sawi, haiye werese wesi fene lo ani fu asiyei. Sosu fene one, sawi, haiye tewi oso aꞌi tamo Owane Sitewi maꞌe itiyaꞌu ani au hese ereirowa. Etiri wisere aꞌi ne. Ahowa, fene Owane Sitewi lo yo peri lo sitewi tote iꞌaneye. Lu taune fene maꞌe marepi orese aꞌi se au hese ereiyei ne aiyerowa su, fene peri lowe lo wanu se taꞌame. Lu taune lau erasi se, fene lowe ne ewite taꞌame. Fene marepi wisere pefine aꞌi tote umasi se taꞌame. Etiri eite mo tutawe ne. Etiri tewi aꞌi ne fene Owane Sitewi maꞌe au hese ereiyei ape etiri ape mo toꞌuresi. Ahowa, fene Owane Sitewi lo yo peri sitewi tote iꞌane tepaꞌasiye.^h 24 Fene yo seni eito eite umasiyei su, fene lu nihe pokoweyei se wou aꞌi ne. Fene yo wisere aꞌi lu taune maꞌe au atuatuwei ne toteyei su, fene yo wisere aꞌi ape siyerowata. Fene neꞌi oso aꞌi siye auwe saꞌi papu siyeyei su, fene neꞌi oso aꞌi ape ani sasarisawiyei. Ahowa, fene etiri erasi aꞌi, fe kamel saꞌi sahe iroteye ape, siyeyei su, fene apou totesiya, ‘Fe kamel saꞌi sahe irosiya. Ane faraꞌu saꞌi fe kamel aiwawe aꞌi amesi arorowa.’

25 Ane fene maꞌe, lu Farisi, Owane Sitewi lo yo peri soꞌoruwe siye lu, fene marepi hesi se totenamisiya. Ane fene maꞌe eisiya. Weiyai! Fene siye auwe, plet aiwawe aꞌi nowe maꞌe au hu noweinoweisiya. Ahowa, siye auwe, plet oroꞌoru papu irosiya ape unouweye. Fene siye auwe, plet wou aiwawe aꞌi ne. Fene ipari tahe, tu nihari ereti lowe tahe au hu noweinoweinamisiya. Lu taune fene siyeyei su, lowe apou toteyei. ‘Lu ape mo wisere aꞌi tene!’ Ahowa! Wawero aꞌi ne! Marepi hepene fene lo yo seni taꞌareiyei aꞌi irosiya. Fene marepi towafi fene lo umasinamisiya.ⁱ 26 Fene Farisi nihe pokoweyei se ne. Fene tu siye auwe, plet papu au hure. Fene siye auwe, plet papu au huwei su, siye auwe, plet nowe maꞌe aseyaro aꞌi iro heneraiyei. Ane fene maꞌe eisiya. Fene marepi hepene towafi fene lo tu au fareraiyere. Marepi hepene fene lo aseyaro aꞌi heneraiyei su, lu taune yo seni fene lo wisere aꞌi siyeyei.

27 Ane fene maꞌe lu Farisi, Owane Sitewi lo yo peri soꞌoruwe siye lu, fene marepi hesi se totenamisiya. Ane fene maꞌe eisiya. Weiyai! Fene fisiye yo wou aꞌi ne. Fene fisiye yo mesu wisere aꞌi nowe maꞌe au leseye. Lu nihe se fisiye yo ape mo wisere aꞌi siyesiya. Ahowa, fisiye yo papu meni tahe, paꞌare aꞌi uwaseye ape, saro irosiya.^j 28 Fene aiwawe aꞌi ne. Lu taune lai yo seni fene lo wisere aꞌi siyesiya. Ahowa! Wawero aꞌi tene! Marepi hepene fene lo hesi aꞌi totenamisiya. Fene yo peri werese arisinamisiya.^k

29 Ane fene maꞌe lu Farisi, Owane Sitewi lo yo peri soꞌoruwe siye lu, fene marepi hesi se totenamisiya. Fene Weiyai! Tu naifa weriyei, yaꞌariyei fene lo lai Owane Sitewi lo peri au teꞌe siye lu aine teraꞌeye. Fene lu ape mo lo fisiye yo maꞌe wisere aꞌi au lesesiya. Lu taune tamo yo seni aseyaro aꞌi iroteye ape, fene fisiye yo lowe lo wisere aꞌi au lesesiya. 30 Sosu fene apou teꞌesiya, ‘Nomo tu naifa iroteye su, nomo yaꞌariyei nomo lo pinasu iro taꞌame. Lowe Owane Sitewi lo peri au teꞌe siye lu aine teraꞌeye. Ahowa, nomo iroteye su, nomo lowe aine teraꞌe taꞌame.’ 31 Serai fene lai yo seni fene lo siye eti ereisiya. Lu tewi ape mo lai Owane Sitewi lo peri au teꞌe siye lu aine teraꞌeye ape, lu tewi ape yaꞌariyei fene lo ne.^l 32 Lu ape mo yaꞌariyei fene lo ne. Serai fene lai orese aꞌi ape marepi fene lo papu ironamisiya. Marepi fene lo papu orese aꞌi ape temeꞌeriyesiya. 33 Fene haru luwaru wou aꞌi ne. Fene hare aimesi weneri wou aꞌi tene! Owane Sitewi lai fene werese yehe omo maꞌe eimawe arosawirowa. Serai fene mi mi pasi pasi yehe omo sahe ironamitorowa.^m

34 Serai ane fene maꞌe Owane Sitewi lo peri au teꞌe siye lu tamo eimawesairowa. Ane lu tamo, marepi wisere aꞌi totesiya ape, fene maꞌe eimawesairowa. Lu soꞌoruwe siye lu tamo ne, ane fene maꞌe eimawesairowa. Lowe fene maꞌe aiyeyei su, lowe Owane Sitewi lo peri au teꞌe siye lu lo fisaꞌi ne fene maꞌe au teꞌe fiyari areiyerowa. Lu tewi tamo fene lai aine teraꞌerowa. Fene lu tamo me tapeꞌi sahe aine teraꞌerowa. Taꞌuweyei wesi fene lo sahe fene lu tamo wafei se ainerowa. Lu tamo fene lai omo omo werese sahe au luwaruwerowa. 35 Lu taune ape mo yo seni aseyaro aꞌi ironamiteye ape, lu tewi ape mo aine teraꞌeye ape, fene orese aꞌi ape ne marepi papu ironamitorowa. Meni ape iyape Abel, Kein lai paꞌise Abel aine teraꞌeye. Fene Abel lo orese aꞌi ne marepi fene lo papu ironamitorowa. Aiwawe aꞌi meni ape Sekaraia fene Owane Sitewi lo wesi nowe maꞌe ponei tapiye wari atahe aꞌi sahe meni ape aine teraꞌeye. Fene meni ape lo temeniyete ape ne marepi fene lo papu ironamitorowa.ⁿ 36 Ane fene maꞌe eisiya. Peri ano wiyeme aꞌi tene! Wanure! Fene werese, pereye nowe irosiya ape, etiri ape mo fene maꞌe henerairowa.

37 Omo Jerusalem, omo Jerusalem fene lu taune saro irosiya ape, fene lai Owane Sitewi lo peri au teꞌe siye lu werese aine teraꞌeye. Owane Sitewi lai lu tamo fene maꞌe peri lo au teꞌeyei ne eimawe arosai su, fene lowe tapiye se aine teraꞌe temeniyeye. Nowe neꞌese ane fene ei taꞌuwe anireme. Apou aiwawe aꞌi kakaruk mai yene lo haipi unahi maꞌe ei taꞌuwe anisiya. Ahowa, fene peri ano wanu arisinamisiya. Fene ane maꞌe aiyeyei wou taꞌama. 38 Wanure! Fene peri ano wanu arisiteyei su, ane lai fene arunatirowa. Serai fene yo seni fene lo umasinamirowa. Sosu fene yehe omo sahe mi mi pasi pasi ironamitorowa.^o 39 Ane fene maꞌe eisiya fene ane tame siyerowata. Fene apou eirowa su,