3 Sosu aꞌi pe Jisas Omo Oliv maꞌe yaneye. Le saro onuwe su, lu disaipel lo eresene aꞌi se le maꞌe peri ta teꞌe toweriyei ne fai. Lowe apou teꞌe toweriye, “Meni owane, Ne peri ape nomo maꞌe itiyaꞌu eire! Eiwerou su etiri ape henerairowa awere? Ne si tame aiyerowa su, piye yaru nomo siyerowa awere? Nowe yeꞌewi aiyerowa su, piye yaru nomo siyerowa awere? Eiwerou su awei eite poꞌuterowa awere?” 4 Sosu Jisas lowe se itiyaꞌu eiye, “Fene Weiyai! Lu tamo fene owe ape arearere! 5 Lu tomu neꞌese iyape ano se aiyerowa. Lowe apou au teꞌe fiyarirowa, ‘Ane aꞌi lai meni tutawe, Owane Sitewi hi awei maꞌe eimawe arosai.’ Lowe lu taune tomu neꞌese au arearerowa. Lu taune peri lowe lo wanurowa su, lowe lu ape mo tote umasirowa.^b 6 Fene ai atuwei erasi aꞌi lo noꞌu wanurowa. Omo tereꞌe tereꞌe ape sahe, fene ai atuwei lo peri heneruwe wanurowa. Fene etiri ape mo wanurowa su, fene owe ape atoweiyere. Nowe yeꞌewi ataheye se taꞌama. Etiri ape mo ai atuwei erasi aꞌi ai atuwei lo noꞌu lu tamo iyape ano se lu taune au arearerowa ape tu henerairowa. 7 Pani tewi lo ai atu siye lu, lowe pani tewi tereꞌe lo ai atu siye lu maꞌe ai atu tiyatinamirowa. Lu tewi tamo lu tewi tereꞌe maꞌe ai atunamirowa. Omo tereꞌe tereꞌe sahe ene ayei werese ariye poꞌuterowa. Omo tomu neꞌese sahe awe erasi aꞌi omo werese auseriyerowa. 8 Ahowa, fene etiri ape mo siyerowa su, fene etiri ape apou siye soꞌoruwerowa. Nowe yeꞌewi ataheyerowa. Apou wou aꞌi ne, menitani ta eime lo autei ataheyeyei su, le lire papu fofowei erasi teriteyei. 9 Lu tamo fene maꞌe au luwaruweyei ne henetirowa. Lowe fene tamo aine teraꞌerowa. Fene iyape ano anite tawesi umasisiya su, lu taune tomu neꞌese omo omo werese sahe fene maꞌe ai marepi totenamirowa.^c 10 Nowe ape se lu taune tomu neꞌese iyape ano umasiteye ape, lowe marepi orese aꞌi teriterowa su, lowe peri ano arisiterowawe, ane maꞌe meꞌiyeni atati arurowa. Lowe lu feni ano lu owane maꞌe etiyei ne henetirowa. Lowe lu feni werese ano ai marepi totenamirowa. 11 Peri wawero aꞌi au teꞌe siye lu tomu neꞌese henerairowa. Lowe lai lu taune tomu erasi au teꞌe arearerowa. Lu taune tomu neꞌese peri wawero aꞌi ape wanurowa su, lowe peri ape wanu tote umasirowa.^d 12 Nowe ape se lu taune werese werese yo seni luwaru aꞌi ironamirowa. Serai lowe lu taune tereꞌe maꞌe tote wawesiyerowata. 13 Ahowa, lu taune iyape ano meꞌiyeni maꞌe atati arunati taꞌame su, mi mi werese kairefi aꞌi teinamirowa su, nowe ape se tai ano lowe ferafereirowawe, omo lo maꞌe henetirowa.^e 14 Sosu lu feni ano lai peri heneruwe wisere aꞌi ano omo omo werese maꞌe au teꞌe fiyari areiyerowa. Lowe peri ano lu taune maꞌe omo omo werese sahe irorowa ape, lowe ane ne au teꞌe fiyari areiye tepaꞌasirowa su, meꞌiye su, nowe yeꞌewi henerairowa.”^f

15 “Serai meni luwaru pefine aꞌi henerairowa. Meni ape henerairowa su, le etiri luwaru aꞌi pefine Owane Sitewi lo wesi sahe au teirowa. Meni ape etiri ape Owane Sitewi lo wesi sahe au teirowa su, fene etiri ape siyerowa. Tu naifa weriyei Owane Sitewi lo peri au teꞌe siye meni iyape Daniel meni ape ne leseye. Fene peri ape siye teꞌeyei su, fene etiri ape ne wanu soꞌoruweyei.^g 16 Etiri ape henerairowa su, lu taune werese omo pani Judia irorowa ape, witane aꞌi se omo hire maꞌe itero yanerowa. 17 Lu taune tamo naretei wesi aꞌi sahe onu fetane irotorowa su, lowe witane se iteroti. Lowe wesi towafi lowe lo papu etiri taꞌuweyei ne wi taꞌame.^h 18 Lu taune tamo taꞌaneyei awei sahe taꞌaneteyei su, lowe wesi towafi lowe lo ipari tahe lowe lo aniyei ne si tame iro taꞌame. 19 Taune tamo, eimane tahe se irorowa ape, fene marepi orese erasi aꞌi teriterowa. Fene Weiyai! Taune tamo, eimane maꞌe moꞌu au arowa ape, fene weiyai! Fene marepi orese aꞌi teriterowa. 20-21 Nowe ape se fofowei luwaru erasi aꞌi henerairowa. Tu naifa weriyei weriyei lu taune werese fofowei luwaru erasi aꞌi eito eite terite taꞌame. Fofowei luwaru erasi ape etiri fofowei werese tereꞌe ani fu araronamiteye. Nowe meꞌiye su, fofowei eito eite tame irotorowata. Serai fofowei luwaru erasi ape henerairowa su, fene Owane Sitewi maꞌe apou teꞌe towerire! ‘Owane Sitewi ne fofowei erasi ape Owane Sitewi lo nowe waraꞌi aꞌi se, nowe naretei aꞌi se owe ape au arosa.’ Nowe amou (Sabat) se, nowe naretei aꞌi se henerairowa su, nomo witane aꞌi iterotirowata.ⁱ 22 Nowe ape se Owane Sitewi lai fofowei luwaru aꞌi erasi aꞌi einami taꞌame su, lu taune eimane werese temeniyerowa. Serai Owane Sitewi lu taune lo ariariyeye ape ne, le lai fofowei erasi ape einamirowa.

23 Sosu lu taune tamo fene maꞌe apou teꞌerowa su, ‘Siyere! Meni ape Krais Owane Sitewi lai hi awei maꞌe eimawe arosai ape irosiya.’ Wawero aꞌi tene. Fene peri lowe lo owe ape tote umasire.^j 24 Lu tomu neꞌese fene maꞌe henerairowa. Lowe peri wawero aꞌi apou au teꞌe fiyarirowa, ‘Ane meni ape, Krais, Owane Sitewi hi awei maꞌe eimawe arosai.’ Peri wawero aꞌi au teꞌe siye lu tomu neꞌese henerairowa. Lowe wiyawi erasi pefine aꞌi lu taune maꞌe au atuaturowa. Lowe yaru erasi pefine aꞌi lu taune maꞌe au atuaturowa. Lowe lu taune tomu neꞌese au teꞌe arearerowa. Lu feni ano Owane Sitewi tu naifa ariariyeye ape, lowe lai marepi lowe lo tore tatai anirowawe, lowe lu feni ano areareyei ne toterowa. Fene wiyawi lowe lo siyerowa su, fene peri lowe lo owe ape umasire.^k

25 Fene peri ano wanu etire! Ane pereye nowe fene maꞌe etiri ape mo ne au teꞌe tepaꞌasiye. Etiri ape mo henerai se taꞌame ne. Nowe meꞌiye su, etiri werese ape mo wiyeme aꞌi henerairowa. 26 Serai lu tamo fene maꞌe teꞌeyei su, ‘Siyere! Meni ape Owane Sitewi ariariye eimawe arosai ape, le ipo maꞌe irosiya.’ Fene le ipo maꞌe nehiyei ne owe ape ire! Aiwawe aꞌi lowe fene maꞌe apou teꞌeyei su, ‘Siyere! Meni ape wesi papu onusiya!’ Weiyai! Fene peri lowe lo owe ape tote tawesi umasire.^l 27 Ane meni ape hire maꞌe itorai ape, si tame aiyerowa su, ane eresene fareyareye aꞌi itoraiyei taꞌama. Ahowa, ane si tame itorairowa su, ane pesiyei meraꞌo wou aꞌi itorairowa. Lu taune werese meraꞌo erasi hire maꞌe siyerowa. Meraꞌo ape omo pani werese werese tei mitaiyerowa. Ane aiwawe aꞌi ne. Ane si tame itorairowa su, lu taune werese omo werese sahe ane se siye soꞌoruwerowa.” Sosu Jisas peri anowe ta apou teꞌesiya.^m 28 “Fene irowe yaruwapi totere. Meni ta ipo sahe temeniyeyei su, irowe yaruwapi meni ape lo heneri somu siyerowa. Lowe werese meni ape ene ayei ne taꞌuwe sine itorairowa.”ⁿ

32 Sosu aꞌi pe Jisas lu feni lo maꞌe apou eiye, “Fene me owarape lo peri anowe wanure. Fene peri anowe lo sitewi wanu soꞌoruwere. Me owarape lo me nei heꞌi aꞌi siyeyei su, towe lo ataheyewa. Fene towe heꞌi aꞌi siyeyei su, fene apou totesiya. Nowe ape se me ape so atahe aꞌi taꞌeyei. 33 Aiwawe aꞌi ne. Fene etiri werese, ane fene maꞌe au teꞌe areiyeye ape, siyeyei su, fene siye soꞌoruwe tepaꞌasiye. Ane yo maꞌe tei ataheyewa. Nowe ape se ataheye heneraiwa. 34 Ane fene maꞌe apou teꞌesiya. Wanure! Juda lo lu tewi ape tamo, sato irosiya ape, lowe temeniyerowata. Ahowa, tu etiri werese ape, ane fene maꞌe au teꞌeteye ape, henerairowa su, sosu moꞌo lu tewi ape tamo faraꞌu temeniyerowa.^q 35 Etiri werese, hire sahe irosiya ape, etiri werese, omo pani sahe irosiya ape, etiri werese ape mo poꞌuterowa. Ei etiri werese ape mo poꞌuterowa. Ahowa, peri werese ano poꞌuterowata. Ahowa, peri ano mi mi pasi pasi ironamitorowa.^r

36 Eiwerou su nowe ape henerairowa awere? Lu taune werese werese soꞌoru taꞌama. Aiwawe aꞌi Owane Sitewi lo ipari wisere aꞌi (ensel), hire sahe irosiya ape, lowe aiwawe aꞌi nowe ape soꞌoru taꞌama. Ane Owane Sitewi lo meni eime aiwawe aꞌi nowe ape soꞌoru taꞌama. Tai pefine taꞌi aꞌi le nowe ape soꞌoruwesiya tene!^s 37-38 Fene meni Noa totere! Nowe ape se tu naifa weriyei, lu taune werese ene ateye, saꞌi ateye, lowe taune naituwe, taune lu naitu ene a wisereyeteye. Sosu nowe ta se meni Noa wai wesi erasi papu wiri. Meni ape wai wesi papu wiye su, Owane Sitewi lai aitu werese au peratiye. Mi pasi tomu neꞌese (40) saꞌi itorai. Omo awei pani werese ani aporuwe. Aiwawe aꞌi ane, meni ape hire maꞌe itorai ape, si tame itorairowa su, lu taune werese yo seni apou ape aiwawe aꞌi ironamirowa. Ane witane aꞌi itorairowa.^t 39 Nowe ape se lu taune werese Owane Sitewi lo peri siye soꞌoru taꞌama. Saꞌi omo pani ani aporu poꞌuteye su, lowe siye soꞌoruweye. Saꞌi ei erasi ape lu taune eimane werese aiti. Lowe saꞌi atenise temeniyeye. Aiwawe aꞌi ane meni ape hire maꞌe itorai ape, si tame itorairowa su, nowe ape aiwawe wou aꞌi ne.^u 40 Sosu lu hesi taꞌaneyei awei sahe iroteyei su, Owane Sitewi lai meni taꞌi hene ani wirowa. Heta awei saro arunatirowa. 41 Taune hesi tamo nau taineteyei su, Owane Sitewi lai menitani taꞌi hene ani wirowa. Menitani taꞌi saro arunatirowa. 42 Serai fene werese nowe ape se ane, Meni Owane Pefine fene lo si tame itorairowa su, fene siye ninawe etinamite. Le si tame itorairowa su, nowe ape fene soꞌoru taꞌama.^v 43 Fene taꞌarei meni ne totere. Eiwerou su taꞌarei meni wesi tapeti wiyei su, meni owane ape wesi topo lo siye noweinowei etirowa. Meni owane ape wesi topo lo au noweinoweiteye su, taꞌarei meni ape wesi ape ani tapeti wirowata.^w 44 Serai fene aiwawe aꞌi fu au noweinoweinamite. Ane, meni ape hire maꞌe itorai ape, si tame itorairowa su, eiwerou su itorairowa awere? Lu taune werese soꞌoru taꞌama.

45 Sosu aꞌi pe Jisas peri anowe ta apou teꞌeye. Le apou au teꞌeye. Meni owane ta omo pani eyeri maꞌe iyei ne toteye. Le wiyawi yahowaꞌi aꞌi siye meni marepi wisere aꞌi se au ariariyeye. Le maꞌe eiye, ‘Ne lu taune werese wesi ano howeisiya ape au noweinoweite. Ne ene ayei mi mi werese taꞌuwere. Lowe maꞌe au ene are!’ 46 Meni owane si tame aiyeyei su, Wiyawi ani siye meni peri lo wanu umasinamirowa. Le lu tewi owane lo au noweinoweinamiteye. Wiyawi ani siye meni marepi wisere aꞌi totenamirowa. 47 Peri ano pefine aꞌi tene! Ane fene maꞌe au teꞌesiya. Meni owane wiyawi ani siye meni siyeyei su, le le maꞌe apou eiye, ‘Ne lu taune, wesi ano howeiteye ape, au noweinowei tepaꞌasiye su, ane etiri werese werese ano ne maꞌe au noweinoweiyei ne aurowa.’^x 48 Fene wiyawi ani siye meni luwaru aꞌi ne totere. Wiyawi ani siye meni luwaru aꞌi apou toteyei, ‘Meni owane ano omo pani eyeri maꞌe fi. Le witane aꞌi se si tame aiyerowata.’ 49 Serai wiyawi ani siye meni ape le wiyawi ani siye lu tereꞌe maꞌe wafei se aineye. Le lu luwaru aꞌi mase ene ateye, lowe mase saꞌi meremereye aꞌi ateye. 50 Nowe ta se meni owane lo si tame aiyerowa su, le wiyawi ani siye meni luwaru aꞌi siyerowa. Eiwerou su, meni owane lo si tame aiyerowa awere? Le nowe ape meni owane si tame aiyerowa ape soꞌoru taꞌama. Meni owane eresene aꞌi se si tame aiyerowa. 51 Meni owane si tame aiyerowa su, le wiyawi siye meni luwaru aꞌi maꞌe fofowei erasi aꞌi aurowa. Le meni ape yehe omo maꞌe lu taune marepi hesi aiwawe aꞌi ironamirowa ape, eimawe arosawirowa. Le omo ape sahe lu taune werese fofowei erasi aꞌi teriterowa. Lowe luwei erasi aꞌi ironamirowa. Lowe ahi pi fekeke ne tawesinamitorowa.”