6 Ahowa, pasi ponei su, lowe peri erasi aꞌi wanuwe. ‘Mao! Naituwei lo meni owane ataheyewa. Fene le nowe maꞌe siyeyei ne aiya.’ 7 Taune werese peri ape wanuwe su, lowe witane aꞌi sineyewe, yehe erei ani taꞌuwe naneiteye. 8 Sosu taune ereti feni werese marepi luwaru aꞌi toteye ape, lowe taune tereꞌe, marepi wisere aꞌi toteye ape, maꞌe teꞌe toweriyei ne fai. ‘Fene yehe erei tewi aꞌi fene lo nomo maꞌe ausa! Yehe erei nomo lo ti teꞌeye poꞌuteye.’ 9 Ahowa, taune marepi wisere aꞌi toteye ape, lowe maꞌe itiyaꞌu eiye, ‘Piyete! Yehe omo erei tewi aꞌi feni maꞌe auwei su, yehe erei nomo lo aiwawe aꞌi teꞌeye poꞌuteyei. Fene ipo maꞌe yehe erei nehiyei ne ire!’ 10 Sosu taune marepi luwaru aꞌi ipo maꞌe yehe erei heꞌi aꞌi nehiyei ne fi. Lowe fi su, naituwei meni owane witane aꞌi fai. Taune marepi wisere aꞌi toteye ape, lowe meni owane ape mase wesi papu taꞌuwe hereiyei ene ayei ne wiye. Lowe werese wesi papu wiye su, lowe wesi yo ti tawesiye. 11 Nowe meꞌiye su, taune marepi luwaru aꞌi se si tame fai. Lowe wesi ape yo sahe aineye. Apou uteye, ‘Owane, Nomo si tame fai. Yo ape tosore!’^b 12 Ahowa, meni owane lowe maꞌe itiyaꞌu eiye, ‘Ane fene maꞌe eisiya. Ane fene soꞌoru taꞌama. Fene ire!’^c 13 Sosu ane fene maꞌe eisiya. Fene werese siye ninawe noweinoweite. Nowe ape se ane si tame aiyerowa su, fene soꞌoru taꞌama.^d

14 Fene peri anowe tereꞌe wanure! Meni owane ta omo pani eyeri maꞌe iyei ne toteye. Le wiyawi yahowaꞌi ani siye lu werese ei aniye. Le lowe maꞌe eiye, ‘Fene etiri werese ano au noweinoweite.’ 15 Le wiyawi meni taꞌi ne apou toteye, ‘Meni ape marepi wisere aꞌi totenamisiya. Ane meni ape maꞌaru ereti feni werese le maꞌe auwei.’ Le wiyawi ani siye meni tereꞌe ape ne apou toteye, ‘Meni ape marepi kairefi se taꞌame. Ane meni ape maꞌe maꞌaru hesi aꞌi auwei.’ Sosu le wiyawi ani siye meni tereꞌe ei aniye. Le meni ape ne apou toteye. ‘Meni ape marepi onotaꞌano aꞌi ne. Ane maꞌaru taꞌi aꞌi le maꞌe auwei.’ Sosu le maꞌaru werese wiyawi ani siye lu maꞌe au tepaꞌasiye su, le omo pani eyeri maꞌe fi.^e 16 Sosu wiyawi ani siye meni, maꞌaru ereti feni werese aniye ape, le wiyawi tohote aniteye. Serai maꞌaru lo ereti feni werese tereꞌe aniye. Serai le maꞌaru ereti feni hesi werese anite tepaꞌasiye. 17 Sosu aiwawe aꞌi wiyawi ani siye meni tereꞌe maꞌaru hesi aꞌi aniye ape, le maꞌaru hesi aꞌi wiyawi ani tohoteye. Sosu meni ape maꞌaru hesi aꞌi tereꞌe aniyei. Serai meni ape maꞌaru hesiyo hesiyo ereti anite tepaꞌasiye. 18 Ahowa, wiyawi ani siye meni tereꞌe, maꞌaru taꞌi aꞌi aniye ape, le apou toteye, ‘Ane maꞌaru taꞌi aꞌi auwei yo papu horuse fareyareteye. Serai meni owane ano si tame aiyerowa su, ane maꞌaru lo le maꞌe si tame aurowa.’

19 Sosu aꞌi pe wiyawi ani siye lu lo meni owane si tame fai. Le wiyawi ani siye lu werese ei aniye. Le maꞌaru lo siye etiyei ne toteye. 20 Sosu le wiyawi ani siye meni maꞌaru ereti feni werese aniye ape, ei aniye. Meni ape meni owane lo maꞌe henerai su, le le maꞌe eiye, ‘Siyere! Ane maꞌaru ereti feni werese no aitiyewe, wiyawi ani tohoteteye. Serai ane maꞌaru ereti feni werese tereꞌe anitesiya. Ne maꞌe si auwei.’ 21 Sosu meni owane le maꞌe itiyaꞌu eiye, ‘Pefine aꞌi tene. Ne meni wisere aꞌi tene! Ne etiri oso aꞌi ano au noweinowei tepaꞌasiye. Serai ane ne maꞌe etiri tomu neꞌese ano au noweinoweiyei ne auwei. Serai notosi marepi wisere aꞌi ironamitorowa.’^f

22 Sosu meni owane ape wiyawi ani siye meni tereꞌe, maꞌaru hesi aꞌi auwe ape, ei aniye. Wiyawi ani siye meni ape henerai su, le owane lo maꞌe eiye, ‘Meni owane, Siyere! Ne maꞌaru hesi aꞌi ane maꞌe auwe. Ane maꞌaru no aitiyewe, wiyawi ani tohoteye. Sosu ane maꞌaru hesi tereꞌe ne maꞌe auwei ne fai.’

23 Sosu meni owane lo le maꞌe itiyaꞌu eiye, ‘Pefine aꞌi tene! Ne meni wisere aꞌi tene! Ne etiri oso aꞌi ano au noweinowei tepaꞌasiye. Serai ane ne maꞌe etiri tomu erasi ano au noweinoweiyei ne auwei. Serai notosi marepi wisere aꞌi ironamitorowa.’

24 Sosu moꞌo meni owane ape wiyawi ani siye meni tereꞌe ei aniye. Meni ape meni owane lo maꞌe henerai su, le, le se eiye, ‘Meni owane, ane marepi no soꞌoruwe tepaꞌasiye. Ne meni marepi kairefi luwaru aꞌi ne. Ne etiri tomu neꞌese taꞌaneyei awei tereꞌe maꞌe ani taꞌuwerai. Ne lu tereꞌe lo me so asiye. Ane ne ne atoweiyesiya. 25 Serai ane ne ne erasi aꞌi atoweiye. Sosu ane maꞌaru taꞌi aꞌi no awei yo papu horuse fareyareye. Siyere! Ane maꞌaru taꞌi aꞌi no ne maꞌe si tame auwei ne fai.’

26 Ahowa, meni owane ape itiyaꞌu eiye. ‘Piyene awere? Ne meni luwaru aꞌi tene! Ne meni onotaꞌano aꞌi tene! Ne marepi ano soꞌoruwe tepaꞌasiye. Ane etiri tomu neꞌese taꞌaneyei awei tereꞌe maꞌe ani taꞌuwerai. Ane lu tereꞌe lo me so asiya. 27 Sosu ne piyene maꞌaru taꞌi aꞌi ano maꞌaru wesi papu aiti taꞌame awere? Serai ane si tame aiyeyei su, ane maꞌaru tewi oso aꞌi tereꞌe anirowa.

28 Serai ane maꞌaru taꞌi aꞌi ano aniyei. Ane wiyawi ani siye meni, ereti feni hesi (10) werese aniteye ape, le maꞌe auwei.’ 29 Lu taune tamo wiyawi ani tohoterowa ape, lowe etiri maꞌaru tereꞌe tamo ani taꞌuwerowa. Serai lowe etiri maꞌaru tomu neꞌese irorowa. Ahowa, lu taune tamo onotaꞌano aꞌi ape, etiri lowe lo ape irosiya ape, ane etiri lowe lo ape mo aniyewe, lu taune tereꞌe maꞌe aurowa.^g 30 Meni onotaꞌano aꞌi ape omo pasi wiyeme aꞌi maꞌe ani fu arosawire. Omo ape sahe lu taune werese luwei erasi aꞌi ironamitorowa. Lowe fofowei erasi luwaru aꞌi teriterowawe, lowe pi towafi lo taꞌani fekekeniye ironamitorowa.”^h

31 “Ahowa, ane, meni hi awei maꞌe itorai ape, mitaiyeyei erasi se si tame itorairowa. Ane Owane Sitewi lo ipari wisere aꞌi (ensel) mase aiwawe itorairowa. Ane aꞌi lai meni owane tutawe lo me toꞌu onunamitorowa.ⁱ 32-33 Lu taune werese omo werese sahe le maꞌe taꞌuwerowa. Le aꞌi lai lowe ponei teiyewe, lowe maꞌe au hese ereirowa. Lu taune werese Jisas lo iyape umasinamiteye su, lowe ereti eyate feni maꞌe au ei teirowa. Lu taune werese lo yo seni luwaru aꞌi ironamiteye ape, le lowe ereti opi feni maꞌe au ei teirowa. Le apou aꞌi irorowa. Fe sipsip aiwawe aꞌi ereti eyate feni maꞌe ani furowa. Sosu fe meme ape aiwawe aꞌi ereti opi feni maꞌe ani furowa.^j

34 Sosu meni owawe tutawe lu taune maꞌe ereti eyate feni sahe irorowa ape, lowe maꞌe eirowa, ‘Fene Owane Sitewi lai marepi wisere aꞌi fene maꞌe iroteye ape, fene werese ane maꞌe aiya! Tu naifa weriyei weriyei le aꞌi lai awei pani fene ne au taꞌane taꞌuweye. Serai fene lu taune werese, awei pani irorowa ape, au noweinoweitorowa. 35 Ane lau erasi aꞌi iroteye su, fene lai ane au aye. Ane saꞌi wawe teriteye su, fene lai ane saꞌi au aye. Ane meni omo tereꞌe se omo wesi fene lo maꞌe henerai su, fene lai ane wesi fene lo papu fa isafiyeyei ne heneti.^k 36 Ane ipari tahe ariye aꞌi iroteye su, fene lai ipari tahe fene lo ane se auwe. Ane u tahe se iroteye su, fene lai ane se sewiyeteye. Ane kalabus wesi sahe iroteye su, fene lai ane au ferafereiteye.’

37 Sosu lu taune yo seni aseyaro aꞌi irorowa ape, lowe maꞌe teꞌe toweriye, ‘Meni owane, eiwerou su nomo ne lau erasi se siyeteye awere? Eiwerou su nomo ne au aye awere? Eiwerou su nomo ne saꞌi wawe teriteye awere? Serai nomo saꞌi ne maꞌe au aye awere? 38 Eiwerou su ne omo eyeri maꞌe fai awere? Serai nomo ne maꞌe wesi nomo lo papu au isafiyeyei ne heneti awere? Eiwerou su ne ipari tahe ariye aꞌi iroteye awere? Serai nomo ipari tahe nomo lo ne maꞌe auwe. 39 Eiwerou su ne u tahe se iroteye awere? Eiwerou su ne kalabus wesi sahe iroteye awere? Serai nomo ne sahe sewiyeyei ne aiyete awere?’

40 Sosu meni owane tutawe lai lu taune lowe maꞌe itiyaꞌu eirowa, ‘Ane fene maꞌe peri wiyeme aꞌi au eisiya! Wanure! Fene wiyawi ape lu feni pefine ano maꞌe au iroteye su, fene ane se aiwawe aꞌi iroteye. Fene lu feni yahowaꞌi ano au iroteye su, fene aiwawe aꞌi ane se au iroteye.’^l

41 Sosu meni owane ape lu taune ereti opi feni sahe iroteye ape, le lowe maꞌe eirowa, ‘Fene werese ane arunatire. Fene maꞌe ire. Fene lu taune luwaru aꞌi ne. Fene Owane Sitewi lo yo pefine aweraꞌiyenati. Serai Owane Sitewi lo ai marepi fene maꞌe ironamitorowa. Fene maꞌe weriyei weriyei tinamitorowa ape, Owane Sitewi lai au taꞌane taꞌuweye. Sosu sepei Satan lu feni werese lo aiwawe aꞌi maꞌe tinamitorowa.^m 42 Ane lau erasi iroteye su, fene ane maꞌe au a taꞌame. Ane saꞌi wawe teriteye su, fene ane saꞌi au a taꞌame! 43 Ane omo eyeri maꞌe fai su, fene ane mase aiwawe isafiye taꞌame. Ane ipari tahe ariye aꞌi iroteye su, fene ane ipari tahe au taꞌame. Ane u tahe iroteye su, kalabus wesi sahe iroteye su, fene ane se sewiyenarai taꞌame!’

44 Sosu lu taune ape mo meni owane ape maꞌe itiyaꞌu eiye, ‘Meni owane, eiwerou su ne lau erasi aꞌi iroteye awere? Eiwerou su ne saꞌi wawe iroteye awere? Eiwerou su ne ipari tahe ariye aꞌi iroteye awere? Eiwerou su ne u tahe se kalabus wesi sahe iroteye awere? Serai nomo ne au noweinowei taꞌame. Nomo ne siye taꞌame.

45 Sosu meni owane ape lowe maꞌe itiyaꞌu eirowa, Ane fene maꞌe peri pefine aꞌi au eisiya. Wanure! Fene lu feni yahowaꞌi ano au feraferei taꞌame su, fene ane aiwawe aꞌi au feraferei taꞌame.’

46 Serai lu taune werese yo ano umasi taꞌame ape, ane lowe maꞌe weriyei weriyei ani fu arosawirowa. Lowe weriyei weriyei yehe maꞌe tinamitorowa. Aiwawe aꞌi lu taune werese yo ano umasinamiteye ape, ane lowe Owane Sitewi lo omo maꞌe henetirowa. Sosu lowe mi mi pasi pasi Owane Sitewi lo omo sahe ironamitorowa.”ⁿ