3 Sosu aꞌi pe au heseyei lu owane erasi aꞌi, yaꞌariyei lu tamo, lowe au heseyei meni owane tutawe lo wesi au teꞌe tiyatiyei ne taꞌuwerai. Meni ape lo iyape Kaiafas. 4 Lowe werese taꞌuwerai su, lowe peri teꞌe tiyatiyei ne onuwe. Lowe Jisas ne teꞌe arearerowawe, ereti lowe lo wafei se ti tawesirowa. Sosu lowe faraꞌu aine teraꞌerowa. 5 Lowe apou teꞌe tiyatiteye, “Nomo taꞌuwe hereiyei nomo lo le ereti wafei se ti tawesirowata. Ahowa, nomo le anite tawesiyei su, lu taune werese ai marepi nomo ne toterowa. Serai lowe nomo maꞌe ai atu tiyatirowa.”

6 Sosu aꞌi pe Jisas omo Betani sahe onuteye. Le Saimon lo wesi papu wi onuteye. Jisas tu naifa Saimon lo enite kairefi aꞌi au taꞌane niyemaiyeye. 7 Jisas Saimon lo wesi metei sahe onuteye su, menitani ta tapiye paꞌare ta aniyewe, heneri saꞌi wisere aꞌi ape Jisas lo mato hire au ani terosowe. Menitani ape heneri saꞌi ape maꞌaru tomu neꞌese eteye.^b

8 Ahowa, lu disaipel lo menitani ape siyeye su, lowe ai marepi menitani maꞌe toteye. Lowe apou eiye, “Piyene saꞌi heneri wisere aꞌi au ani terosowe awere? Yo seni ape luwaru aꞌi tene! 9 Nomo faraꞌu saꞌi ape etiri wesi maꞌe fu irorowawe, maꞌaru tomu neꞌese anirowa. Maꞌaru ape lu tamo maꞌaru ariye aꞌi ape aurowa.”

10 Ahowa, Jisas lu disaipel lo peri wanuwe su, le lowe maꞌe eiye, “Fene piyene menitani ape ne marepi luwaru aꞌi totesiya awere? Menitani ape ane maꞌe wiyawi wisere aꞌi taꞌane tepaꞌasiye. 11 Fene mi mi werese lu taune maꞌaru ariye aꞌi ne totesiya. Ahowa, ane fene mase nowe oso aꞌi se irorowa. Nowe meꞌiye su, ane fene aru poꞌutenatirowa.^c 12 Menitani ape saꞌi heneri wisere aꞌi mato hire ano au ani terosowe su, le tahe paꞌare ano fisiye yo sahe taꞌuwe naneiye. 13 Ane fene maꞌe peri pefine aꞌi eisiya! Wanure! Omo omo werese sahe peri ano au teꞌe fiyarirowa su, lu taune werese menitani lo wiyawi ape marepi tote anite tawesirowa. Lowe menitani ape tote iꞌanerowata.”

14 Sosu aꞌi pe Jisas lo meni disaipel ta iyape Judas Iskariot, le Jisas arunatiyewe, Owane Sitewi lo wesi lu owane maꞌe peri ta au teꞌeyei ne fi. 15 Le Owane Sitewi lo wesi lu owane maꞌe heneri su, le lowe maꞌe ei toweriye, “Ane meni Jisas fene maꞌe henetirowa su, piye etiri maꞌaru tamo ane maꞌe aurowa awere?” Owane Sitewi lo wesi lu owane peri lo wanuwe su, lowe maꞌaru tewi tamo au heseye, lowe maꞌaru tau meni ta werese ereti hesi werese le maꞌe au heseye.^d 16 Serai meni ape lai yo ta Jisas lowe maꞌe henetiyei ne nehiteye. Le Jisas areareyei ne toteye.

17 Sosu aꞌi pe taꞌuwe hereiyei, Pasova, lo nowe tutawe henerai su, Jisas lo lu feni le maꞌe teꞌe toweriyei ne fai. “Taꞌuwe hereiyei, Pasova, tutawe ape nomo eiwerou maꞌe ene ayei awere? Nomo etiri werese au taꞌuwe naneiyei.”^e 18 Sosu Jisas lowe maꞌe itiyaꞌu eiye, “Fene omo eire maꞌe ire. Fene meni ta siyeyei. Le maꞌe eire! ‘Atuatu siye meni ne maꞌe eisiya. Nowe ape ane temeniyeyei ape ataheyeyei ne henerairowa. Ane lu feni ano mase taꞌuwe hereiyei, Pasova, ape wesi no sahe ene ayei.’” 19 Sosu lu disaipel lo omo ape maꞌe fi. Jisas lo peri umasiteye. Lowe taꞌuwe hereiyei, Pasova, lo etiri werese au taꞌuwe naneiye.

20 Sosu aꞌi pe nowe neriwei pasi su Jisas lu feni werese lo mase metei sahe ene ayei ne onuteye. 21 Lowe ene ateye su, Jisas lowe maꞌe apou eiye, “Ane peri wiyeme aꞌi fene maꞌe eisiya. Wanure! Meni taꞌi fene mase irosiya ape, le ane lu owane tamo maꞌe etiyei ne henetirowa.” 22 Lu disaipel lo Jisas lo peri wanuwe su, lowe werese marepi orese aꞌi toteteye. Lowe taꞌi taꞌi aꞌi lai le maꞌe apou ei toweriye. “Meni owane, Eiwerai awere? Ane se taꞌama awere?” 23 Sosu Jisas lowe maꞌe itiyaꞌu apou eiye, “Meni ape ane mase ayei fi wisere siye auwe papu iroteye ape, ani teinamiyewe, meni ape lai ane lu owane maꞌe henetirowa.^f 24 Owane Sitewi lo peri ane ne apou teꞌesiya, ‘Meni ape hire maꞌe itorai ape, le temeniyerowa. Ahowa! Meni ape lai le lu owane maꞌe henetirowa ape, meni ape weiyai! Meni ape lo mai le autei taꞌame su, etiri wisere aꞌi tene. Piyene etiri ape wisere aꞌi awere? Mai lo auteiye su, marepi lirewawe luwaru aꞌi papu le maꞌe henerairowa. 25 Sosu meni ape, iyape Judas, le Jisas ne lu owane maꞌe au teꞌe ariariyeye ape, le Jisas maꞌe ei toweriye. “Atuatu siye meni. Pefine, ane lai awere?” Sosu Jisas le maꞌe itiyaꞌu eiye, “Ne lai peri wiyeme aꞌi au teꞌe tepaꞌasiye.”

26 Sosu aꞌi pe lowe ene ateye su, Jisas lai nau taꞌase ereti se aniteyewe, Owane Sitewi maꞌe au teꞌe wisereyeteye. Sosu le nau taꞌase tewi pa tewi ani topotowewe, lu disaipel lo maꞌe au noneye. Le lowe maꞌe apou eiye, “Fene nau taꞌase ape ani ene. Nau taꞌase ape tahe paꞌare ano wou aꞌi ne.” 27 Lowe nau taꞌase ene a tepaꞌasiye su, le wain saꞌi paꞌare ereti aniteyewe, Owane Sitewi maꞌe au teꞌe wisereyeye. Le wain saꞌi paꞌare lu disaipel lo ape maꞌe au noneye. Le apou eiye, “Fene werese wain saꞌi ape ene are. 28 Wain saꞌi ape fisaꞌi ano wou aꞌi ne. Owane Sitewi lai peri heꞌi ariariye irowe. Lowe tahe ano aine tewi narowa. Fisaꞌi ano nowe maꞌe tepiꞌo teroso arosairowa. Fisaꞌi ano lai yo seni luwaru aꞌi ape mo au ani sasari tepaꞌasiyei. Owane Sitewi tai ano, fisaꞌi ano siyeyei su, le yo seni luwaru aꞌi ape tote iꞌane tepaꞌasiyei.^g 29 Ahowa, ane fene maꞌe peri ta eisiya. Ane wain saꞌi ape a tepaꞌasiyei su, ane wain saꞌi tereꞌe tame arowata. Ahowa, nowe yeꞌewi su, ane hi awei maꞌe si tame itorairowa su, ane fene mase faraꞌu wain saꞌi tereꞌe arowa. Nowe ape se ane Tai ano lo lu tewi werese au noweinoweirowa.”

30 Sosu aꞌi pe lowe Owane Sitewi lo omoyawi ahi ta irowe su, lowe wesi ape arunatiyewe, Omo Oliv hire maꞌe yaneye.^h

31 Sosu aꞌi pe Jisas lowe maꞌe eiye, “Wanure! Nowe pasi eite se lu owane lai ane ereti aniteye su, fene werese ane ne meꞌiyeni maꞌe atati arunatirowa. Owane Sitewi lo peri tu naifa weriyei apou teꞌeye,

33 Ahowa, Pita le maꞌe itiyaꞌu eiye, “Wanure! Lu feni tereꞌe no lowe ne ne meꞌiyeni maꞌe atati arunatirowa su, ane lai mi mi werese ne ne meꞌiyeni maꞌe atati arunatirowata.” 34 Sosu Jisas le maꞌe eiye, “Ane peri wiyeme aꞌi ne maꞌe eisiya. Wanure! Pasi eite se ne nowe hesi heta ane ne meꞌiyeni maꞌe atati arunatirowa. Ne yo seni iro tepaꞌasirowa su, ne irowe kakaruk aite peri uterowa ape, wanurowa.”^j 35 Pita le maꞌe itiyaꞌu eiye, “Ahowa! Ane ne ne au temeniyerowa. Ane mi mi weriyei ne ne meꞌiyeni maꞌe atati arunatirowata.” Lu disaipel lo ape werese peri aiwawe aꞌi le maꞌe au teꞌeye.

36 Sosu aꞌi pe Jisas lu disaipel lo mase awei Getsemani maꞌe henerai. Sosu Jisas lu feni lo maꞌe apou eiye, “Fene saro ahe onure. Ane hire yaro maꞌe Owane Sitewi se au teꞌe tiyatiyei ne irowa.” 37 Sosu Pita, Sebedi lo eimane hesi, iyape Jems, Jon, Jisas lai lowe hene yaneye. Jisas marepi orese erasi aꞌi teriteye. Le fofowei erasi lirewawe papu teriteye. 38 Sosu Jisas lowe maꞌe eiye, “Marepi lirewawe ano orese aꞌi irosiya. Ane apou toteye. Ane orese aꞌi ape suterowata. Ane tote temeniyereme. Fene sato onuwewe, etiri siye noweinowei etire. Owane Sitewi maꞌe ane ne au ferafereiyei ne teꞌe towerire.”^k 39 Sosu le lowe arunatiyewe, omo hire oso aꞌi yaneye. Le lowe lo apeꞌi onuwewe, ereme se awei maꞌe winetaiteye. Sosu Owane Sitewi maꞌe ei toweriye. “Tai ano, marepi ano orese aꞌi ne. Ane temeniye wou taꞌama. Ne yo tereꞌe faraꞌu siye nehire. Ahowa, ane lai marepi ano aweraꞌiyenatirowa. Ane lai marepi no umasirowawe, peri no umasirowa.”

40 Nowe oso aꞌi su, le si tame itorai. Lu feni hesi heta lo nihe howeiteye. Sosu le Pita maꞌe eiye, “Fene nowe tewi taꞌi aꞌi ane aiwawe aꞌi tei ninaweteye awere? 41 Fene etiri werese tei siye etinamire. Owane Sitewi maꞌe au teꞌere. Serai fene yo seni luwaru aꞌi irowei ne toterowata. Yo aseyaro ne hepene fene lo marepi kairefi aꞌi tote umasisiya. Ahowa, tahe paꞌare fene lo yo luwaru aꞌi umasiyei ne totenamisiya.”

42 Sosu Jisas lowe hesi heta arunatiyewe, omo hire maꞌe si tame yaneye. Le aite lo maꞌe au teꞌe tiyatiyei ne fi. Le apou eiye. “Tai ano, ane faraꞌu marepi orese aꞌi ape aweraꞌiyenatiyei awere? Ahowa, ane marepi no umasirowa.” 43 Jisas peri teꞌe tepaꞌasiye su, le si tame itorai. Le lu feni hesi heta aiwawe aꞌi nihe howeiteyei siyeye. Nihe lowe lo orese aꞌi ne. 44 Sosu Jisas lowe arunatiyewe, omo hire maꞌe si tame yaneye. Le aite lo maꞌe peri aiwawe aꞌi au teꞌeteye. “Tai ano, ane faraꞌu wiyawi no ne ane maꞌe auwe ape, aweraꞌiyenatirowa awere? Ahowa, ane marepi ano ani fu ararorowa. Ane marepi no umasirowa.”

45 Sosu le aite lo peri teꞌe tepaꞌasiye su, le lu disaipel lo maꞌe si tame itorai. Le lowe maꞌe eiye, “Fene nihe howeisiya awere? Fene tahe fetane aꞌi teritesiya awere? Siyere! Nowe ano ataheyerai tepaꞌasiye. Meni ape ane lu luwaru aꞌi maꞌe henetiyei. 46 Fene sinere! Nomo iyei ne! Meni ape ane ai lu owane maꞌe henetiyei ape fai.”^l

47 Sosu aꞌi pe le peri ape teꞌeye su, siyere! Meni Judas Jisas maꞌe henerai. Le lu disaipel lo (12 disaipel) taꞌi aꞌi ne. Au heseyei lu owane lu tamo, lu owane tereꞌe tamo, lowe lai ai lu tomu neꞌese, lu taune tomu neꞌese Judas mase eimawesawi. Lowe eine inapi, ti, me au aiwawe aꞌi anitetai. 48 Sosu meni Judas Jisas henerai su, le yaru ta lowe maꞌe ariariyeyei au teꞌeye. Le apou eiye, “Ane meni ta yaꞌore erite wisereyeyei su, fene meni ape ereti lo maꞌe anitere.” 49 Sosu Judas Jisas henerai su, le Jisas maꞌe eiye, “Atuatu siye meni, Pasi aꞌi.” Sosu le Jisas yaꞌore erite wisereyeye. 50 Sosu Jisas le maꞌe eiye, “Kaiyemo, Ne ane lu owane maꞌe henetiyei ne fai. Ne witane se aꞌi irore.” Sosu ai lu tamo Jisas lo ereti anite tawesirai.

51 Sosu siyere! Meni taꞌi Jisas mase iroteye ape, le ipari meneꞌe ereti se aniyewe, au heseyei meni owane tutawe lo wiyawi yahowaꞌi siye meni lo apaniye aine tou laꞌeye.^m 52 Sosu Jisas le maꞌe eiye, “Ne ipari meneꞌe no ape si tame fure. Lu werese ipari meneꞌe se ai atu irowei su, lowe lai ipari meneꞌe se aiwawe aꞌi temeniyerowa.ⁿ 53 Piyene ne yo seni ape irowe awere? Ne apou totere. Ane tai ano maꞌe faraꞌu au pati aniyei ne uterowa. Serai le aꞌi lai faraꞌu ipari wisere aꞌi (ensel) tomu neꞌese lo ane maꞌe au ferafereiyei ne eimawe arosairowa. 54 Wanure! Ane Owane Sitewi lo ipari wisere aꞌi (ensel) ape ane fa ferafereiyei ne ute aniyei su, Owane Sitewi lo peri, tu naifa leseye ape, pefine henerairowata.”

55 Sosu Jisas lu werese ape maꞌe apou eiye, “Fene ane ne totesiya awere? Ane taꞌarei siye meni awere? Fene piyene eine inapi, me au, ipari meneꞌe aitaisiya awere? Mi mi werese ane Owane Sitewi lo wesi fene lo maꞌe au teꞌe atuatuwei ne onuteye. Ane sato onuteye su, fene ereti ano anite tawesiye taꞌama.^o 56 Tu naifa weriyei Owane Sitewi lo peri au teꞌe siye lu fene ne leseye. Serai yo seni fene lo fene irowe ape, wiyeme henerai tepaꞌasiye.” Sosu Jisas peri teꞌe tepaꞌasiye su, lu feni werese lo Jisas arunatiyewe, atoweiye iteroti.

57 Sosu aꞌi pe ai lu werese Jisas lo ereti anite tawesiye ape, lowe meni Kaiafas maꞌe heneti. Lu owane tereꞌe Kaiafas lo wesi maꞌe taꞌuweyei. 58 Ahowa, Pita lu werese eyeri maꞌe moꞌo umasiteye. Lowe Jisas Kaiafas lo wesi papu hene wiye su, Pita Kaiafas lo wesi nowe taire maꞌe hene onuri. Ai lu tamo mase onuteye. Le Jisas lo peri etiyei ape siyeyei ne.

59 Kaiafas lo wesi papu, au heseyei lu owane tamo, lu owane tereꞌe tamo, wesi papu taꞌuweye ape, lowe peri wawero au teꞌeteye. Lowe Jisas aine teraꞌeyei ne toteye. 60 Ahowa, lowe yo seni luwaru aꞌi nehirowata. Lu tomu neꞌese Jisas ne peri wawero au teꞌeye. Ahowa, peri werese lowe lo Jisas etirowata. Nowe meꞌiye su, lu hesi ponei sahe au teꞌeyei ne teiteye. 61 Lowesi apou eiye, “Meni ape apou au teꞌeye. Nomo wanuwe. Le apou eiye, ‘Ane faraꞌu Owane Sitewi lo wesi tutawe aine tapeti poꞌuterowa. Sosu nowe hesi heta i tepaꞌasiyei su, ane Owane Sitewi lo wesi eite si tame taꞌanerowa.’”^p

62 Sosu Owane Sitewi lo meni owane tutawe sine teiyewe, Jisas maꞌe eiye, “Ne lu hesi lo peri wanuwe awere? Ne peri ta itiyaꞌu au teꞌerowata awere? Lu hesi piye peri eti ne maꞌe au fu teꞌeye awere?” 63 Ahowa, Jisas peri se taꞌama. Sosu au heseyei meni Owane tutawe le maꞌe ei toweriye, “Ane ne maꞌe ei toweriye. Owane Sitewi norohuwe ironamisiya ape, lo nihe se ne peri pefine nomo maꞌe au teꞌere. Ne Krais awere? Ne meni Owane Sitewi lai, hi awei maꞌe eimawe arosai awere? Ne Owane Sitewi lo meni eime awere?”^q

64 Sosu Jisas le maꞌe eiye, “Peri no wiyeme aꞌi tene! Weiya! Nowe meꞌiye su, ane, meni ape, omo hire maꞌe itorai ape, ane Owane Sitewi kairefiyeyei pefine aꞌi lo ereti eyate feni maꞌe onunamitorowa. Nowe yeꞌewi su, ane niꞌarawe papu itorairowa. Fene werese ane niꞌarawe hire maꞌe siye anirowa.”^r 65 Sosu aꞌi pe au heseyei meni owane tutawe Jisas lo peri wanuwe su, le ipari tahe lo ani erauwiye. Sosu eiye, “Le Owane Sitewi Pefine ne teꞌe naruwe. Nomo lu tereꞌe au teꞌeyei ne ei anirowata. Siyere! Fene werese peri lo ape wanu tepaꞌasiye. Peri lo ape Owane Sitewi ne teꞌe naru tepaꞌasiye.^s 66 Fene piye totesiya awere?” Sosu lowe werese itiyaꞌu uteye. “Le Owane Sitewi maꞌe teꞌe naru tepaꞌasiye. Serai nomo le aine teraꞌerowa.”^t 67 Sosu lu tamo Jisas lo nihari sahe pisaꞌi sineꞌiye. Lowe le maꞌe nihari maꞌe ereti mokumoku se aineye. Lu tamo tereꞌe ereti se aine apasiye.^u

68 Lowe le maꞌe eiye, “Ne meni ape Krais Owane Sitewi lai, hi awei maꞌe eimawe arosai ape, ne nomo maꞌe au teꞌere. Eiwerai ne ereti mokumoku se aineye awere?”

69 Sosu aꞌi pe Pita wesi nowe maꞌe wesi taire onu ninaweteye. Nowe oso aꞌi su, wiyawi yahowaꞌi siye menitani lai Pita maꞌe ei toweriyei ne henerai. Le maꞌe eiye, “Siyere! Ne Jisas mase, Pani Galili maꞌe fai ape, aiwawe aꞌi iroteye.” 70 Ahowa, Pita lowe maꞌe itiyaꞌu eiye, “Wawero aꞌi ne! Ane meni ape mase aiwawe iro taꞌame. Ane peri no soꞌoru taꞌama.” 71 Sosu Pita wesi taire arunatiyewe, nowe maꞌe fi. Sosu Wiyawi yahowaꞌi ani siye menitani tereꞌe ta Pita siyeye. Le lu taune maꞌe eiye, “Meni ape le Jisas omo Nasaret lo meni aiwawe iroteye.” 72 Pita peri lo wanuwe su, le peri kairefi aꞌi se eiye, “Ahowa, ane meni ape soꞌoru taꞌama.” 73 Nowe oso aꞌi su, lu tamo Pita maꞌe teꞌeyei ne henerai. “Pefine aꞌi ne Jisas aiwawe aꞌi iroteye. Ne Jisas lo peri wou aꞌi teꞌesiya.” 74 Sosu Pita peri luwaru aꞌi lowe maꞌe au teꞌeye. “Ahowa! Ane meni ape soꞌoru taꞌama.” Sosu Pita peri ape teꞌe tepaꞌasiye su, irowe kakaruk aite peri erasi uteye. 75 Sosu Pita irowe kakaruk aite lo peri wanuwe su, le Jisas lo peri ne toteye. Jisas nowe tu se apou au teꞌeye, “Ne nowe hesi heta ane ne meꞌiyeni maꞌe atati arurowa. Serai irowe kakaruk aite uterowa su, ne yo seni ape iro tepaꞌasirowa.” Sosu le nowe maꞌe fiyewe, luwei erasi irowe.^v