3 Meni ape Judas Jisas lo etiyei siyeye su, le marepi orese aꞌi teriteteye. Serai le maꞌaru tau meni ta werese ereti hesi werese au heseyei lu owane yaꞌariyei lu owane maꞌe si tame aiti. Judas Jisas Owane Sitewi lo wesi lu owane maꞌe heneti. 4 Le lowe maꞌe eiye, “Ane Owane Sitewi maꞌe yo seni luwaru aꞌi irowe. Meni ape yo seni werese lo waraꞌi aꞌi ne.” Ahowa, lowe le maꞌe itiyaꞌu eiye, “Etiri ape ne irowe ape, ne lai marepi no umasi tepaꞌasiye. Nomo ne maꞌe yo seni ape irowei ne teꞌeye. Marepi nomo lo yahowaꞌi totesiya. Etiri ape ne ewiteyei no aꞌi lai.” 5 Judas peri lowe lo wanuwe su, le maꞌaru werese fiyafe maꞌe ani fu arowewe, wesi nowe maꞌe fi. Nowe meꞌiye su, Judas lai wafei se pereꞌi topo lo sahe ti tawesiyewe, me nei sahe heri teraꞌeye.^a

6 Judas taꞌuwe wesi nowe maꞌe fi su, Owane Sitewi lo wesi lu owane maꞌaru werese ani taꞌuwe fuwe. Sosu lowe apou eiye, “Nomo maꞌaru eite Owane Sitewi lo wesi lo paꞌare papu au furowata. Maꞌaru eite nomo meni ta lo temeniyeyei ape, ete tepaꞌasiye. Maꞌaru eito eite nomo Owane Sitewi maꞌe siye maꞌaru paꞌare papu au furowata.” 7 Serai lowe peri ta teꞌe tiyatiteye. Teꞌe tepaꞌasiye su, lowe maꞌaru ape taꞌaneyei awei ta eteye. Taꞌaneyei awei ape meni topo peperi paꞌare taꞌaneteye ape. Piyene lowe awei tewi ape eteye awere? Lowe lu taune pani eyeri maꞌe fai ape, temeniyeyei su, lowe tahe paꞌare lowe lo fisiye yo maꞌe funarirowa. 8 Serai lowe awei tewi ape eteye su, lowe iyape tereꞌe au papowe, “Fisaꞌi lo Awei Tewi.” Iyape ape mi mi werese ironamitorowa. 9-10 Sosu tu naifa weriyei Owane Sitewi lo peri au teꞌe siye meni Jeremaia apou leseye,

11 Sosu aꞌi pe Owane Sitewi lo wesi lu owane lai Jisas awei meni owane tutawe maꞌe au teiyei ne heneti. Meni owane ape Jisas maꞌe peri ta ei toweriye. Le apou ei toweriye, “Ne Juda lo meni owane tutawe awere?” Jisas le maꞌe itiyaꞌu eiye, “Ei! Ne peri wiyeme aꞌi au teꞌeye.” 12 Sosu au heseyei lu owane tamo awei lu owane tamo peri luwaru aꞌi Jisas maꞌe au teꞌeteye. Ahowa, Jisas peri ta itiyaꞌu teꞌe taꞌame.^b 13 Sosu Pailat le maꞌe eiye, “Ne lowe lo peri werese wanu taꞌame awere? Lowe etiri luwaru aꞌi tomu neꞌese ne maꞌe au fu teꞌeteye.” 14 Ahowa, Jisas peri werese lowe lo itiyaꞌu teꞌe taꞌame. Serai Pailat Jisas ne hepene se suꞌariye.

15 Taꞌuwe hereiyei iyape Pasova, iyu menei weriyei weriyei sahe awei meni owane lai meni ta, kalabus wesi sahe iroteye ape, nowe maꞌe hene arosairowa. Meni ape Israel lo lu taune lai ariariyerowa. 16 Meni luwaru aꞌi ta kalabus wesi papu ironamiteye, iyape Barabas. Meni ape yo seni luwaru aꞌi ironamiteye. 17 Serai lu taune tomu neꞌese meni Pailat maꞌe taꞌuwerai. Sosu le lowe maꞌe apou ei toweriye. “Ane meni taꞌi, kalabus wesi papu iroteye ape, nowe maꞌe henerowa. Fene eiwerai ane nowe maꞌe fa henerowa awere? Fene eiwerou totesiya awere? Ane meni Barabas nowe maꞌe henerowa awere? Jisas nowe maꞌe henerowa awere? Meni ape Jisas Owane Sitewi lai hi awei maꞌe eimawe arosai.” 18 Awei meni owane ape peri ape au teꞌeye su, le apou toteye. “Juda lo lu tewi ape Jisas maꞌe marepi luwaru aꞌi totenamiteye. Lowe le ne marepi afofo aꞌi totenamisiya. Serene lowe lai Jisas ane maꞌe etiyei ne henetai.”^c 19 Awei meni owane ape etiyei lo me toꞌu onuteye su, tani lo le maꞌe peri ta le maꞌe apou teꞌesai, “Meni ape waraꞌi wisere aꞌi tene! Ne etiri luwaru aꞌi ta le maꞌe owe ape irore! Liyewe pasi ane le ne suwou ta siyeye. Ane marepi orese erasi aꞌi teriteteye.”

20 Ahowa, au heseyei lu owane tamo, awei yaꞌariyei lu tamo, lowe lu taune werese maꞌe peri kairefi aꞌi au teꞌeye, “Fene meni Barabas kalabus wesi nowe maꞌe ei ani heneraire! Fene awei meni owane maꞌe Jisas aine teraꞌeyei ne au teꞌere.” 21 Awei meni owane lowe maꞌe itiyaꞌu eiye, “Fene eiwerou aꞌi lu hesi ape ne totesiya awere? Jisas nowe maꞌe ani arosaiyei awere? Barabas ani arosaiyei awere?” Lowe le maꞌe itiyaꞌu eiye, “Ne meni Barabas ani arosaire!” 22 Sosu Pailat lowe maꞌe ei toweriye. “Meni Jisas, Owane Sitewi lai eimawe arosai ape, ane le maꞌe eiwerou irowei awere?” Lowe le maꞌe itiyaꞌu eiye, “Meni eite me tapeꞌi sahe aine teraꞌere!” 23 Sosu Pailat lowe maꞌe itiyaꞌu eiye, “Piyene awere? Meni ape yo seni luwaru aꞌi iro taꞌame.” Ahowa, lu taune werese peri kairefi erasi aꞌi uteye, “Meni eite me tapeꞌi sahe aine teraꞌere.”

24 Meni ape, Pailat peri lowe lo wanuwe su, le apou toteye. Lu taune ape mo marepi luwaru aꞌi toteteye. Lowe ai atuwei lo marepi toteye. Serai le saꞌi tewi ta ei aniteye. Saꞌi tewi ta aitai su, le ereti aiyawe lo saꞌi au huwewe, lowe maꞌe eiye, “Ereti hesi ano saꞌi se au huwe su, ane fene maꞌe apou au atuatusiya, ane yo seni luwaru aꞌi siye taꞌame. Ane le maꞌe aine teraꞌerowata. Fene le maꞌe aine teraꞌereme su, fene aꞌi lai le me tapeꞌi sahe aine teraꞌere.”^d 25 Sosu lu taune werese le maꞌe apou uteye. “Ei, nomo meni ape me tapeꞌi sahe aine teraꞌerowa. Nomo orese aꞌi eite teriterowa. Eimane nomo lo aiwawe aꞌi orese aꞌi eite teriterowa.”^e 26 Sosu Pailat peri lowe lo wanuwe su, le meni Barabas kalabus wesi papu irote ape, nowe maꞌe ani arosaiyewe, lu taune maꞌe heneti. Sosu moꞌo le ai lu tamo Jisas lo meꞌiyeni maꞌe wafei se aineyei ne eimawesawi. Sosu lowe maꞌe me tapeꞌi sahe aine teraꞌeyei ne heneti.

27 Sosu aꞌi pe awei meni owane lo ai lu tamo Jisas taꞌuweyei wesi erasi papu hene wiye. Lowe ai lu werese Jisas maꞌe ei taꞌuwerai. 28 Sosu lowe ipari tahe werese lo ani erauwewe, sosu lowe ipari tahe loꞌu aꞌi ape se au ani asiye.^f 29 Lowe wafei tohu niꞌari ape se tuhe wou ani apeꞌiye taꞌaneyewe, Jisas lo mato sahe au ti atati asi arowe. Lowe me epi ta ereti saꞌonare eyate feni lo se au aniteye. Lowe le maꞌe lowe uporo apeꞌi onuwewe, lowe le maꞌe peri ta apou teꞌe naruteye. Lowe apou teꞌeye, “Siyere! Juda lo meni owane tutawe.” 30 Lowe pisaꞌi le maꞌe seneꞌiye. Lowe me epi lo aniyewe, mato lo maꞌe aineye.^g 31 Lowe le maꞌe peri teꞌe naru tepaꞌasiye su, lowe ipari tahe loꞌu aꞌi le ani asiteye ape si tame au ani erauwewe, sosu ipari tahe lo, tu tame ani asiye ape, le maꞌe si tame au ani asiye. Lowe taꞌuwe wesi nowe maꞌe me tapeꞌi aine teraꞌe ti tawesiyei ne heneti.

32 Sosu aꞌi pe lowe taꞌuwe wesi erasi nowe maꞌe heneye su, lowe meni ta iyape Saimon omo Sairini maꞌe fai ape, lowe meni ape maꞌe eiye, “Ne Jisas lo me tapeꞌi omo hire maꞌe sute yanere!”

33 Lowe omo ta iyape Golgota Jisas hene yaneye. Omo ape lo peri sitewi apou ne. “Mato Paꞌare lo Omo.” 34 Sosu lowe Jisas maꞌe wain saꞌi horuse luwaru aꞌi ape Jisas au aye. Ahowa, Jisas saꞌi tewi aꞌi asiyei irowewe, sosu saꞌi ape a taꞌame.^h 35 Sosu lowe Jisas me tapeꞌi sahe aine teraꞌe ti tawesi heriye su, lowe tapiye tamo ipari tahe lo aniyei ne ani fu arosawi. Tapiye ape mo ai lu ta ipari tahe lo aniyei ne ariariyeye. Serai ai lu ape tapiye ariariyeye ape, le lai Jisas lo ipari tahe anirowa.ⁱ 36 Sosu lowe paꞌeye tepaꞌasiye su, lowe senarepe sahe onuwewe, le maꞌe siye ninaweteye. 37 Sosu lowe metei sahe apou leseye,

38 Nowe ape se taꞌarei lu hesi Jisas mase me tapeꞌi sahe aine ti tawesiye. Taꞌarei meni ta Jisas lo eyate feni maꞌe au ti tawesiye. Taꞌarei meni tereꞌe ta opi feni maꞌe au ti tawesiye.^j

39 Sosu aꞌi ape lu tamo Jisas maꞌe atahe aꞌi teiteye su, lowe peri luwaru aꞌi le maꞌe au teꞌe naruwe. Lowe le se niyeyeiteye.^k 40 Lowe le maꞌe eiye, “Ne tu apou eiye, ‘Ane Owane Sitewi lo wesi tutawe aine tapeti fiyariyei. Sosu nowe hesi heta ane si tame taꞌanerowa.’ Ne iyape no ei ani aroweye. Serai ne Owane Sitewi lo meni eime su, ne faraꞌu topo ne au si anire! Ne me tapeꞌi hire saro arunatirowawe, hi eito itora!”^l 41 Owane Sitewi lo wesi lu owane tamo, Owane Sitewi lo peri ani soꞌoruwe siye lu tamo, lowe aiwawe aꞌi Jisas maꞌe peri luwaru aꞌi teꞌe naru niyeyeiteye. Lowe le ne eiye, 42 “Meni ape lu taune tereꞌe tamo maꞌe si tame au hene aniteye. Ahowa, le topo aꞌi lai si anirowata. Le Juda lo meni owane tutawe pefine su, le faraꞌu me tapeꞌi hire arunatirowawe, hi awei maꞌe itorairowa. Le hi awei maꞌe itoraiyei su, nomo faraꞌu le ne aꞌi tote tawesinamirowa. 43 Meni ape Owane Sitewi pefine aꞌi ne tote tawesiyei su, sosu Owane Sitewi le ne marepi erasi aꞌi totenamisiya su, Owane Sitewi le maꞌe au ferafereirowa. Meni ape topo le ne apou eiye, ‘Ane aꞌi lai Owane Sitewi lo meni eime pefine aꞌi ne!’”^m 44 Taꞌarei lu hesi me tapeꞌi sahe le mase ti tawesiteye ape, lowesi le maꞌe au teꞌe naru niyeyeiteye.

45 Sosu aꞌi pe poweiye ponei se nowe pasi aꞌi ito henerai, awei pani werese napetuwe. Sosu poweiye neriwei aiwawe aꞌi se pasi poꞌuteye. Nowe neriwei aiwawe aꞌi poweiye si tame tewi mitaiye fiyarirai. 46 Sosu nowe neriwei (3 klok) Jisas peri kairefi erasi aꞌi apou uteye,

50 Sosu Jisas peri kairefi erasi aꞌi tame uteye. Sosu hepene lo fi. Le temeniyeye.

51 Ipari tahe erasi aꞌi Owane Sitewi lo wesi tutawe, papu hire heriteye ape, hire maꞌe ani erauwiye. Owane Sitewi lai ipari tahe ape hire maꞌe ponei ani tou apeti itorai. Auwe erasi aꞌi awei pani werese tei auseriyeye. Tapiye erasi aꞌi tamo aine erauwiye.^o 52 Fisiye yo werese toso tepaꞌasiye. Lu taune tomu neꞌese, Owane Sitewi lo yo umasinamiteye ape, tu temeniyeye ape, Owane Sitewi lai lowe fisiye yo sahe si tame au norohuwe sineye. 53 Nowe meꞌiye se Owane Sitewi lo kairefi se Jisas fisiye sahe si tame au norohuwe sineye su, lu taune ape mo Owane Sitewi lo omo waraꞌi aꞌi wiri. Lu taune tomu neꞌese lowe siyeye. 54 Sosu ai lu lo meni owane, ai lu tamo le mase iroteye ape, lowe Jisas au tei siyeteye ape, lowe auwe lo etiri werese auwe erasi tei auseriyeyei erasi teriteyei siyeteye. Lowe marepi atoweiye erasi aꞌi toteye. Lowe apou eiye, “Wanure! Wiyeme aꞌi, meni ape Owane Sitewi lo meni eime tene!”

55 Taune tomu neꞌese Jisas lo me tapeꞌi eyeri sahe tei ninaweteye. Lowe tu pani Galili sahe Jisas mase iroteyewe, le maꞌe au noweinoweiteye.^p 56 Menitani ta iyape Maria, omo pani Makdala maꞌe fai. Menitani tereꞌe ta iyape Maria. Menitani ape Jems, Josep lo mai. Sosu menitani tereꞌe ta, Jems, Jon lo mai, Sebedi lo eimane hesi.

57 Nowe neriwei pasi se meni ta maꞌaru tomu neꞌese iroteye ape, iyape Josep, omo Arimatea maꞌe fai. Le tu naifa Jisas lo peri tote tawesi umasinamiteye. 58 Le Pailat, awei meni owane, maꞌe ei toweriyei ne henerai. Le apou ei toweriyei, “Ane faraꞌu Jisas lo tahe paꞌare ani itorairowawe, fisiye yo papu maꞌe furowa awere?” Sosu Pailat ai lu lo maꞌe eiye, “Ne Jisas lo tahe paꞌare ape ani itorowawe, Josep maꞌe aure!”^q 59 Sosu Josep lai Jisas lo tahe paꞌare aniye. Sosu le ipari tahe aseyaro aꞌi aniyewe, tahe paꞌare lo sahe au napetu ti tawesiye. 60 Le Jisas lo tahe paꞌare au napetu ti tawesi tepaꞌasiye su, le fisiye yo heꞌi aꞌi topo lo papu maꞌe fuwe. Fisiye yo ape tapiye erasi aꞌi papu horuseye. Jisas lo tahe paꞌare fisiye yo papu maꞌe fuwe su, le tapiye erasi ta fisiye yo hire au onu tawesiye. Le tapiye erasi fisiye yo hire noweri onuwe su, le wesi topo lo maꞌe fi.^r 61 Sosu taune hesi iyape Maria omo Makdala maꞌe fai ape, sosu Maria tereꞌe lowesi fisiye atahe aꞌi yo sahe onuteye.

62 Sosu aꞌi pe nowe moꞌo se taꞌuwe hereiyei lo etiri taꞌuwe tepaꞌasiye su, au heseyei lu owane tamo, Farisi lu tamo, lowe awei meni owane tutawe Pailat maꞌe taꞌuwerai. 63 Lowe le maꞌe eiye, “Meni owane Jisas lai peri wawero teꞌenamiteye. Nomo peri lo wanuwe. Sosu nomo peri lo ape tote tawesiye. Le sato iroteye su, le apou eiye, ‘Ane temeniyeyei su, nowe hesi heta ane si tame norohuwe sinerowa.’^s 64 Serai ne ai lu maꞌe apou au teꞌere, ‘Fene Jisas lo fisiye yo tei siyete.’ Serai lu tamo Jisas lo tahe paꞌare taꞌarei ani tahe anirowata. Nowe hesi heta i tepaꞌasiyei su, ai lu werese faraꞌu wesi towafi lo maꞌe irowa. Jisas lo lu disaipel lai tahe paꞌare lo taꞌarei ani tahe aniyei su, lowe lu taune werese maꞌe apou eiyei, ‘Jisas si tame norohuwe sineye.’ Lowe lu taune maꞌe au teꞌe fiyariyei su, peri wawero ape lai peri wawero tereꞌe ape ani fu ararorowa.” 65 Sosu Pailat lowe maꞌe itiyaꞌu eiye, “Ane ai lu tamo fene maꞌe auwei. Fene ire! Ai lu werese fisiye yo maꞌe henetire! Lowe faraꞌu fisiye yo ape sahe tei siyeterowa. Fene fisiye yo ape au kairefiyere!” 66 Sosu lowe ai lu ape mo fisiye yo maꞌe tei siyeyei ne heneti. Lowe fisiye yo sahe wafei tepi ani ti tawesirowawe, owe meni ta wafei ape owe ape ani eraure. Sosu lowe fisiye arunatiyewe, omo towafi lowe lo fi.