Owane Sitewi lai Jisas si tame norohuwe sineye.
28
Sosu aꞌi pe nowe amou (Sabat) i tepaꞌasiye. Nowe poweiye tutawe esi pasi ape henerai su, taune hesi, Maria omo Makdala maꞌe fai ape, Maria tereꞌe ta lowesi Jisas lo fisiye yo maꞌe siyeyei ne fi. 2 Siyere! Nowe ape se auwe erasi omo awei werese auseriyeye. Owane Sitewi lo ipari hire maꞌe arunatiyewe, hi awei fisiye yo maꞌe itorai. Le tapiye erasi ape, fisiye yo ti tawesiye ape, fisiye yo tewiye maꞌe ani nowerisawi. Owane Sitewi lo ipari wisere aꞌi ape tapiye erasi hire maꞌe onuteye. 3 Taune hesi ape Owane Sitewi lo ipari ape siyeye. Nihari lo yehe erasi tei mitaiyeyei siyeye. Ipari tahe lo ape niꞌarawe mi wapo wou aꞌi asiteye. 4 Ai lu ape mo Owane Sitewi lo ipari siye itorai. Lowe le siye itorai su, lowe atoweiye erasi iroteye. Tahe lowe lo auwe wou aꞌi auseriyeye. Lowe werese awei sahe winetai temeniyeye wou irowe.5 Sosu aꞌi pe taune hesi fisiye yo maꞌe henerai su, Owane Sitewi lo ipari lowesi maꞌe apou eiye, “Fenesi atoweiye sawa! Fenesi meni Jisas, me tapeꞌi sahe temeniyeye ape, siyeyei ne fai. Ane marepi fenesi lo soꞌoruwe tepaꞌasiye. 6 Siyere! Le lai sato ariye. Tu naifa le fenesi maꞌe apou eiye, ‘Ane si tame norohuwe sinerowa.’ Peri lo ape wiyeme aꞌi henerai. Owane Sitewi lai le si tame norohuwe sine tepaꞌasiye. Fenesi aiya! Fenesi fisiye yo yaru wari siyera! Le sato ariye.a 7 Fenesi witane se aꞌi Jisas lo lu disaipel maꞌe au teꞌeyei ne ire! Lowe maꞌe apou au teꞌere! ‘Jisas si tame norohuwe sine tepaꞌasiye. Wanure! Le omo pani Galili maꞌe tu fi. Omo pani ape sahe fene le siyerirowa.’ Wanure! Ane fenesi au teꞌeyei ne fai.”
8 Sosu lowesi marepi hesi aꞌi teriteye. Lowesi Owane Sitewi lo ipari siyeye su, lowesi marepi atoweiye erasi teriteye. Sosu lowesi peri lo ape wanuwe su, lowesi marepi wisere aꞌi tote nineꞌinamiteye. Serai lowesi Jisas lo fisiye yo witane se aꞌi arunatiyewe, lu disaipel lo maꞌe peri heneruwe au teꞌeyei ne iteroti. 9 Taune hesi ape fisiye yo ape arunati su, Jisas yo sahe siye naituri. Le lowesi maꞌe peri eriteye. Lowesi le siyeye su, lowesi Jisas lowe sahe apeꞌi onuri. Lowe lo ereti anite tawesiye. Lowesi le maꞌe au teꞌe wisereyeteye. 10 Sosu Jisas lowesi maꞌe apou eiye, “Fenesi atoweiye sawa! Fenesi kaiyemo ano maꞌe peri ta au teꞌetire. Lowe omo pani Galili maꞌe fu ire! Omo ape sahe lowe ane faraꞌu siyerowa.”b
Au heseyei lu owane peri wawero ta au teꞌe fiyariye.
11 Sosu aꞌi pe taune hesi ape omo ape fi su, ai lu ape mo au heseyei lu owane maꞌe peri werese au teꞌe areiyeri. 12 Owane Sitewi lo wesi lu owane peri lowe lo wanuwe su, lowe Owane Sitewi lo wesi lu yaꞌariyei owane werese ei taꞌuwerai. Lowe werese taꞌuwerai su, lowe ai lu werese ape mo maꞌaru tomu neꞌese auwe. 13 Lowe ai lu maꞌe apou eiye, “Fene peri wiyeme aꞌi owe ape au teꞌere. Ahowa, fene apou au teꞌere, ‘Nowe pasiyeye su nomo nihe teiye su, Jisas lo lu disaipel fisiye yo papu wiyewe, tahe paꞌare lo taꞌarei ani tahe aiti.’ 14 Sosu awei meni owane peri ape wanurowa su, fene maꞌe au luwaruwe irowei ne toterowa su, nomo le maꞌe peri ape au fareraiyerowa. Serai le fene ne etirowata.”
15 Sosu aꞌi pe ai lu ape mo maꞌaru aniyewe, Owane Sitewi lo wesi arunati. Lowe au heseyei lu owane lo peri wanu umasiteye. Lowe Juda lo lu taune werese werese maꞌe peri wawero yaꞌariyei lu ape au teꞌeye ape, teꞌe fiyariteye. Peri wawero ape lowe au teꞌe fiyariteye ape, ironamisiya.
Jisas lu disaipel lo maꞌe peri yeꞌewi au teꞌeye.
16 Sosu aꞌi pe Jisas lo lu disaipel ereti feni hesi lowe taꞌi aꞌi (11) omo Jerusalem arunatiyewe, omo pani Galili maꞌe fi. Lowe omo ape, Jisas tu ariariyeye ape, le maꞌe yane siyeri.c 17 Sosu lowe le siyeye su, lowe le maꞌe au teꞌe wisereyeteye. Ahowa, lu tamo marepi hesi iroteye. 18 Sosu Jisas lowe maꞌe henerai su, le lowe maꞌe apou eiye, “Owane Sitewi lai ane maꞌe kairefi erasi aꞌi auwe. Kairefiyeyei werese hire maꞌe irosiya ape, le ane maꞌe au tepaꞌasiye. Aiwawe aꞌi kairefiyeyei werese hi awei sahe irosiya ape, le ane maꞌe au tepaꞌasiye.d 19 Serai ane fene maꞌe au teꞌesiya. Fene omo omo werese maꞌe ire. Fene lu taune werese peri ano au teꞌe fiyarite! Lowe peri ano wanu tote tawesirowa su, lowe faraꞌu lu feni ano henerairowa. Lowe lu feni ano henerairowa su, fene faraꞌu lowe saꞌi se au hurowa. Fene Owane Sitewi Tai Pefine lo iyape se, meni eime lo iyape se, Hepene lo waraꞌi aꞌi se, lowe maꞌe saꞌi se au hurowa.e 20 Fene lu taune werese maꞌe peri werese ano au teꞌe atuatu areiyete! Serai lowe peri werese ano wanu umasinamirowa. Wanure! Ane aꞌi lai fene mase ironamitorowa. Nowe yeꞌewi ape henerairowa, ane fene mase ironamitorowa.”