2 Tu naifa weriyei meni ta Owane Sitewi lo peri leseye. Meni ape, iyape Aisaia, one towe ta se apou leseye,

5 Lu taune tomu neꞌese, omo pani Judia maꞌe fai ape, sosu omo weniyei Jerusalem, iroteye ape, arunatiyewe, meni ape wanunarai. Lowe Jon lo peri wanuwe su, lowe taꞌu yo seni luwaru aꞌi lowe lo ape au teꞌe areiyeye. Lowe yo seni luwaru aꞌi ape mo arunati su, Jon lai lowe Saꞌi Jordan sahe au ani huwe.

6 Meni ape Jon fe kamel lo tahe towe tou aniyewe, ipari tahe lo iwisiye. Le awiye moꞌune tahe watipi sahe ti tawesiye. Le yaꞌe timene ateye. Le ineniye saꞌi ateye.^b 7 Serai le lu taune maꞌe apou au teꞌe areiyeye, “Meni erasi ta iyape se nowe ataheyewa. Ane meni yahowaꞌi ne. Meni ape iyape erasi aꞌi se. Ane lowe uporo apeꞌi onurowata. Ane lowe tahe wafei lo ape au ani erau taꞌama.^c 8 Ane fene saꞌi sahe au ani husiya. Meni Owane Pefine aꞌi lai lu taune werese maꞌe Owane Sitewi lo Hepene Waraꞌi aꞌi se au ani hurowa.”

9 Sosu aꞌi pe Jisas omo Nasaret Galili lo pani sahe arunatiyewe, Saꞌi Jordan maꞌe itorai. Sosu Jon lai meni ape saꞌi sahe au ani huwe. 10 Jisas saꞌi ani hu tepaꞌasiye su, le saꞌi papu wirai. Le saꞌi papu arunatiyewe, wirai su, niꞌarawe hire maꞌe ponei erauwiye. Niꞌarawe ponei erauwiye su, Owane Sitewi lo Hepene Waraꞌi aꞌi irowe sapuwe wou hire maꞌe itoraiyewe, Jisas lo iyoꞌo hire sahe onurai. 11 Sosu peri erasi ta niꞌarawe maꞌe apou teꞌe areiyeye, “Ne aꞌi lai meni eime ano taꞌi pefine aꞌi ne. Ane ne aꞌi tote wawesiyenamisiya.”^d

12 Sosu Owane Sitewi lo Hepene Waraꞌi aꞌi Jisas maꞌe apou eiye, “Pani ariye aꞌi maꞌe ire!” Sosu Jisas pani ariye aꞌi maꞌe fiyewe, onuteye. Le onuteye su, pani ape sahe iroteye. You erawe, fe erawe, tomu neꞌese pani ape mase iroteye. 13 Jisas pani ariye ape sahe poweiye pasi lu hesi ereti lowe werese woto aꞌi iroteye. Jisas le aꞌi lai woto aꞌi iroteye su, sepei luwaru aite iyape Satan, Jisas maꞌe teꞌenarai. Le Jisas maꞌe peri ta teꞌe areareyei ne toteye. Le apou eiye, “Jisas, ne lau erasi irosiya. Serai ne peri ano wanu umasire. Ne ayei etiri ta faraꞌu taꞌanere, sosu ne are!” Ahowa, Jisas lai le maꞌe itiyaꞌu eiye. “Ahowa, ane peri no wanu umasirowata.” Owane Sitewi lo ipari wisere aꞌi (Ensel) Jisas maꞌe itorai. Lowe Jisas maꞌe au noweinoweiteye.^e

14 Sosu aꞌi pe nowe meꞌiye su, ai atu siye lu tamo, Jon ereti lowe lo wafei se ti tawesiyewe, kalabus wesi papu maꞌe ani fu arosawi. Sosu Jisas omo pani Galili sahe lu taune maꞌe Owane Sitewi lo peri au teꞌe areiye fiyarinarai.^f 15 Le apou au teꞌeye, “Nowe ape henerai tepaꞌasiye Owane Sitewi lai, lu taune werese ne au noweinoweiyei ape, ataheyewa. Fene werese yo seni luwaru aꞌi fene lo fu arunatire. Fene Owane Sitewi lo peri werese wanu tote tawesi umasire.”^g

16 Sosu aꞌi pe Jisas hare ite Galili tewiye sahe iteye su, le lu hesi, hare honaiye fu aro ape, siyeye. Lu hesi ape lo iyape Saimon, sosu paꞌise lo iyape Andru. 17 Jisas lowesi maꞌe apou eiye, “Fenesi ane mase aiyere! Ane fenesi maꞌe wiyawi heꞌi aꞌi ta aurowa. Wiyawi ape fenesi taꞌaneyei ape, fenesi lu taune werese Owane Sitewi maꞌe hene anirowa. Ane lai yo ape fenesi maꞌe au atuaturowa.” 18 Sosu pereye aꞌi lowesi hare honaiye arunatiyewe, lowesi Jisas aiwawe aꞌi fi. 19 Yo sahe tewi oso ape iteye su, sosu le lu hesi tereꞌe siyeye. Lu hesi ape iyape Jems, sosu paꞌise lo iyape Jon. Lu hesi ape Sebedi lo eimane hesi. Lowesi hare honaiye lo yo ape ti iwisiteye. 20 Jisas lowesi maꞌe apou eiye, “Fenesi ane mase aiyere!” Sosu lowesi lo aite ape, Sebedi lu tereꞌe tamo mase wai sahe arunatiyewe, lowesi Jisas aiwawe aꞌi fi.

21 Jisas lu hesiyo hesiyo mase omo Kaperneam maꞌe heneri. Nowe amou (Sabat) se Jisas taꞌuweyei wesi papu wiri. Saro ahe Jisas lu taune werese maꞌe Owane Sitewi lo peri au teꞌe areiyeye. 22 Lu taune peri ape wanuwe su, lowe hepene se suꞌariye, lowe apou teꞌe tiyatiteye, “Meni ape lu owane, one towe leseteye ape, wou taꞌame. Peri lo ape tu nomo soꞌoru taꞌama. Le meni owane wou aꞌi peri ape au teꞌe areiyeye. Meni iyape se.”^h

23 Sosu aꞌi pe meni ta sepei luwaru aꞌi lire papu iroteye ape, le Owane Sitewi lo taꞌuweyei wesi ape papu wirai. Le hareyei erasi irowe. Apou hareye, 24 “Jisas, Ne piyene fai awere? Ne Jisas omo Nasaret lo meni tene! Ne nomo aine teraꞌeyei ne fai awere? Nomo ne siye soꞌoruweteye. Ne aꞌi lai Owane Sitewi lo meni eime pefine aꞌi tene!”ⁱ 25 Sosu Jisas sepei luwaru aꞌi maꞌe apou eiye, “Peri sawa! Meni eite arunatire.” 26 Jisas sepei luwaru aꞌi maꞌe teꞌeye su, sepei luwaru aꞌi ape hareyei erasi irowe. Le meni ape lo tahe erasi aꞌi auseriye irowe, meni ape arunati fi.^j 27 Lu taune, etiri ape siyeye su, lowe hepene se suꞌariye. Lowe apou peri ta teꞌe tiyatiteye, “Sawi Amou! Meni ape peri heꞌi aꞌi au teꞌe atuatusiya. Le iyape erasi se. Sepei luwaru aꞌi ape peri lo ape wanuwe su, le peri lo umasiye.” 28 Sosu witane aꞌi lu taune werese Galili lo pani sahe peri heneruwe ape wanuwe.^k

29 Nowe moꞌo su Jisas lu feni hesi lo, Jems, Jon, lowe Owane Sitewi lo taꞌuweyei wesi arunatiyewe, Jisas lu feni werese lo aiwawe aꞌi, lowe Saimon, sosu paꞌise lo Andru lo wesi maꞌe fi. 30 Wesi ape maꞌe henerai su, Saimon lo mai pape tahe umeri aꞌi iroteye. Lu taune tamo wesi papu iroteye ape, Jisas maꞌe apou teꞌeye, “Menitani eite tahe umeri aꞌi irosiya.” 31 Sosu Jisas menitani ape maꞌe fi. Le menitani ape lo ereti sahe isawi hetesiyewe apou eiye, “Ne sine teire!” Sosu Jisas peri ape teꞌeye su, menitani ape lo tahe umeri aꞌi faraꞌuweyewe, arunati.

32 Sosu aꞌi pe Jisas lo peri heneruwe omo pani werese au teꞌe fiyarisawi. Serai nowe neriwei su lowe lu taune tomu neꞌese u tahe se wesi ape sahe henetai. Lu taune u tahe se ape, lu taune sepei luwaru aꞌi lire papu iroteye ape mo, lowe aiwawe aꞌi lu taune werese wesi maꞌe henetai. 33 Lu taune tomu neꞌese omo pani werese ape sahe iroteye ape mo, lowe wesi ape yo tewiye sahe taꞌuwerai. 34 Serai Jisas lu taune tomu neꞌese u tahe se ape mo au taꞌane faraꞌuweye. Le sepei luwaru tomu neꞌese aꞌi au taꞌane sasarisawi. Sosu sepei luwaru aꞌi lu taune arunati su, le lowe werese maꞌe apou eiye, “Fene ane ne owe ape teꞌe fiyarire!” Piyene awere? Sepei luwaru aꞌi ape mo Jisas ne soꞌoruweteye tene! Serai Jisas lowe lo peri au teꞌe amouweye.^l

35 Esi pasi su Jisas woto aꞌi wesi ape arunatiyewe, ipo lu taꞌama ape maꞌe fi. Owane Sitewi maꞌe peri au teꞌeyei ne fi.^m 36 Nowe meꞌiye su, Saimon, lu tamo mase le ani nehiyei ne fi. 37 Lowe Jisas siyeye su, lowe le maꞌe eiye, “Owane, lu taune werese ne ne ei toweriyei ne fai.” 38 Sosu Jisas lowe maꞌe itiyaꞌu eiye, “Nomo omo eite arunatirowawe, omo tereꞌe maꞌe iyei. Peri heneruwe wisere aꞌi ape lu taune werese maꞌe au teꞌe fiyariyei.” 39 Serai le omo taꞌi taꞌi aꞌi maꞌe omo pani Galili sahe Owane Sitewi lo taꞌuweyei wesi papu wiye. Le lu taune werese maꞌe Owane Sitewi lo peri au teꞌe areiyeye. Le lu taune sepei luwaru aꞌi marepi hepene papu iroteye ape, au taꞌane sasarisawiteye.ⁿ

40 Sosu aꞌi pe meni ta enite kairefi aꞌi tomu neꞌese se Jisas maꞌe lowe uporo apeꞌi onurai Sosu le apou eiye, “Ne ane ne marepi erasi aꞌi ferafereiyei su, ne enite kairefi werese ano faraꞌu au taꞌane niyemaiyere.” 41 Sosu Jisas meni ape ne marepi ferafereiyei ne toteye. Serai le ereti tesisawiyewe, meni ape hire maꞌe fuwe. Sosu le maꞌe eiye, “Ane ne ne au ferafereisiya. Ane enite kairefi werese no au taꞌane niyemaiyerowa.” 42 Sosu Jisas meni ape enite tahe hire lo sahe fuwe su, enite kairefi aꞌi werese niyemaiyeye. 43 Jisas meni ape peri kairefi aꞌi se apou eiye, “Ne lu taune werese maꞌe ane ne owe ape teꞌete. Ne Juda lo meni owane maꞌe enite kairefi werese no au atuatuwei ne ire. Ne iyei su, etiri tamo meni ape maꞌe au heseyei ne aitire.” 44 Tu naifa weriyei meni ta iyape Moses peri ta apou leseye, “Enite kairefi aꞌi no niyemaiyeyei su, etiri ta Juda lo meni owane maꞌe au heseyei ne aitire. Serai lu taune werese enite kairefi aꞌi niyemaiyeyei ape siyerowa.” Sosu Jisas le maꞌe apou tame eiye, “Ne lu taune werese ane ne maꞌe owe ape teꞌete!”^o 45 Meni ape Jisas arunatiyewe, fi su, le lu taune werese au teꞌe fiyariteye. Le apou eiye, “Jisas aꞌi lai enite kairefi aꞌi ano au taꞌane niyemaiyeye.” Serai lu taune werese peri lo ape wanuwe su, lowe Jisas maꞌe siyenarai. Lowe werese Jisas maꞌe henerai su, Jisas omo tereꞌe tereꞌe maꞌe i taꞌame. Lu taune tomu neꞌese yo lo ape au einamiye. Serai le omo nowe maꞌe iroteye. Lu taune tomu neꞌese omo pani tereꞌe tereꞌe maꞌe fai ape, Jisas maꞌe siyenarai.