Jisas lai meni ta lo lowe nonoꞌoweyei aꞌi au taꞌane faraꞌuweye.
2
Meꞌiye poweiye ta se, Jisas omo Kaperneam maꞌe si tame fi. Jisas wesi ta sahe iroteye. Lu taune tomu neꞌese Jisas, wesi ape sahe iroteye ape, wanunarai. 2 Witane aꞌi lu taune tomu neꞌese wesi ape maꞌe Jisas siyeyei ne taꞌuwerai. Lu taune tomu neꞌese, Jisas iroteye ape, wesi ape papu temeꞌeriyeye. Lu taune tamo wesi nowe maꞌe saro teiteye. Lu tamo wesi yo ape heꞌe tawesiye. Lu tereꞌe tamo wesi ape papu wirowata. Jisas lu taune werese siyeye su, le Owane Sitewi lo peri lowe maꞌe au teꞌe areiyeye. 3 Sosu lu hesiyo hesiyo, lowe meni lowe nonoꞌoweyei aꞌi ape wari se sutaitetai. 4 Lu taune tomu neꞌese yo heꞌe tawesiye. Ahowa, serai lowe meni ape Jisas maꞌe wesi papu sutaite wi taꞌame. Serai lowe meni ape wesi meꞌiye hire maꞌe sutaite wiye. Lowe wesi meꞌiye hire maꞌe yo ta aine apeti toso fuwe. Lowe yo ape aine apeti toso fuwe su, sosu lowe meni lowe nonoꞌoweyei ape wesi papu Jisas onuteye ape sahe, ani arowe. 5 Jisas meni ape siyeye su, le apou toteye, “Lu ape mo Owane Sitewi lo peri tote tawesisiya.” Sosu Jisas meni ereti lowe nonoꞌoweyei aꞌi ape maꞌe eiye, “Meni, ane yo seni luwaru aꞌi no ani sasari pamoweyei.”6 Juda lo lese siye lu tamo Jisas lo peri wanuwe su, lowe apou toteye, 7 “Sawi amou! Meni eite Owane Sitewi Pefine aiwawe aꞌi awere? Wawero! Meni eite meni luwaru aꞌi poto! Owane Sitewi taꞌi aꞌi lai yo seni luwaru aꞌi au taꞌane sasari pamowesiya.” 8 Ahowa, Jisas marepi lowe lo siye soꞌoruweye su, le lowe maꞌe apou ei toweriye, “Fene piyene marepi apou ape totesiya awere? 9 Peri ano au teꞌeye ape, ane wiyawi taꞌane tohoteye awere? Piyete awere? Ane meni ape maꞌe apou au teꞌeye su, ‘Ane yo seni luwaru aꞌi no ani pamoweyei.’ Atu tohoteyei awere? Fetane aꞌi awere? Ane peri ape au teꞌeye su, ane wiyawi orese se taꞌane taꞌame. Ane meni ape maꞌe au teꞌeyei su, ‘Ne hire sine teire! Ne hawaiye no hese howeiteye ape, anirowawe, aiwawe sutetire.’ Peri ape atu tohoteyeisiya awere? Ahowa, fetane aꞌi tene! 10 Serai ane fene maꞌe au soꞌoruwe atuaturowa. Ane aꞌi lai, meni hire maꞌe itorai ne. Ane faraꞌu yo seni luwaru aꞌi ani sasari pamoweyei tene!” 11 Sosu Jisas meni ereti lowe nonoꞌoweyei aꞌi ape maꞌe eiye, “Meni, ne sine teire! Ne hawaiye no, hese howeiteye ape, anirowawe, aiwawe wesi no maꞌe sutetire.” 12 Jisas peri teꞌe tepaꞌasiye su, meni ape witane se sineteye. Le hawaiye lo aniyewe, sosu wesi topo lo maꞌe suteti. Lu taune werese, wesi papu iroteye ape, lowe hepene erasi se suꞌariye. Lowe apou teꞌeye, “Nomo peri wisere aꞌi Owane Sitewi maꞌe au teꞌe wisereyeyei. Tu nomo pe etiri heꞌi apou ape eiwerai siye taꞌame! Nomo heꞌi aꞌi siyeye.”
Jisas meni Matyu ei aniye.
13 Sosu aꞌi pe Jisas hare ite tewiye maꞌe si tame fi. Lu taune tomu neꞌese le maꞌe peri lo wanuwei ne taꞌuwerai. Sosu Jisas lowe maꞌe Owane Sitewi lo peri au teꞌe areiyeteye. 14 Peri teꞌe tepaꞌasiye su, le hare ite tewiye sahe fi. Le meni ta siyeye. Meni ape lo iyape Livai, Alfius lo meni eime. Livai wesi oso aꞌi ape sahe onuteye. Wiyawi lo ape takis maꞌaru aniteye. Meni ape taꞌarei aꞌi meni. Sosu Jisas le maꞌe apou eiye, “Livai, ne ane mase aiyere!” Sosu Livai hire sineyewe, wesi oso lo ape arunatiyewe, Jisas mase fi.
15 Meꞌiye su, Jisas lu disaipel lo mase Livai lo wesi maꞌe ene ayei ne fi. Takis maꞌaru ani siye lu tamo, lu tamo yo seni luwaru aꞌi ironamiteye ape, lowe aiwawe wesi ape sahe iroteye. Jisas lowe mase aiwawe ene ateye. Lowe Jisas mase nati wafei wou ne. 16 Lowe ene a tepaꞌasiye su, lu tamo soꞌoruweyei erasi toteteye ape, lowe Jisas siyenarai. Lu tewi ape Farisi lo yo seni umasiteye. Sosu lu ape mo Jisas lo lu disaipel maꞌe apou teꞌe toweriye, “Piyene Jisas lu luwaru aꞌi ape mase onu ateye awere? Lu ape mo taꞌarei lu ne, lowe yo seni luwaru aꞌi werese ironamisiya.”a 17 Jisas peri lowe lo ape wanuwe su, le lowe maꞌe itiyaꞌu apou eiye, “Ane dokta wou aꞌi ne. Lu ta u tahe se tamo irosiya ape su, ane lowe au taꞌane faraꞌuwerowa. Sosu lu ta u tahe waraꞌi aꞌi ape, lowe dokta maꞌe irowata. Ane lu wisere aꞌi ei aniyei ne fai taꞌama. Ahowa, ane lu taune yo seni luwaru aꞌi ape, ei aniyei ne fai.”
Ayei siyenamiyei lo peri.
18 Sosu aꞌi pe Jon lo lu feni, sosu lu Farisi werese, lowe ene ayei siyenamiye. Lowe Jisas maꞌe heneraiyewe. Peri ta Jisas maꞌe teꞌe toweriyei ne fai. Lowe apou teꞌe toweriye, “Siyere! Jon lo lu feni, lu Farisi werese, lowe ene ayei siyenamisiya. Piyene lu disaipel no ayei werese siyenamiye taꞌame.” 19 Sosu Jisas itiyaꞌu eiye, “Meni ta tani lo naituwei su, lu taune werese taꞌuwerai ape, lowe werese faraꞌu ene arowa. Ayei werese siyenamirowata. Lu tamo meni ape henetisawiyei su, tani lo ape lu taune werese mase ewiteyei erasi teriteyei. Lowe faraꞌu ayei werese siyenamirowa. 20 Nowe ta su meni ape tani lo naituwei ape sato irotorowata. Nowe ape se lu taune werese ayei siyenamirowa.”
21 Sosu Jisas apou teꞌeteye, “Ipari tahe papaꞌu aꞌi irosiya ape, ipari tahe heꞌi tewi se iwisirowata. Ahowa, meꞌiye su ipari tahe papaꞌu aꞌi saꞌi se au huwei. Le ipari tahe ape taitiyei su, ipari tahe apetiyei. Yo erasi heneraiyei. 22 Menitani ta ene towei su, le nau wahu wisere aꞌi se ani asiyei. Menitani nau wahu papaꞌu aꞌi sahe saꞌi ani terosowei su, wahu ape erauwirowawe, nau ape awei peperi maꞌe apaꞌasi itorowa.”
Jisas lai nowe amou (Sabat) ape ne au teꞌe atuatuwe.
23 Sosu aꞌi pe nowe amou (Sabat) se, Jisas lu disaipel lo mase taꞌaneyei awei kewi so sahe iteye. Lowe taꞌaneyei awei sahe iteye su, lu disaipel lo ape kewi so une aniteye, sosu ene ateye. 24 Sosu Jisas lo lu disaipel kewi so tamo ene ateye su, lu Farisi tamo lai lowe maꞌe siyeye. Lowe Jisas maꞌe apou eiye, “Sawi amou! Siyere! Lu disaipel no kewi loꞌu tamo aniyewe, sosu ene ateye. Wiyawi ape nowe amou (Sabat). Nowe poweiye eite se lu taune werese wiyawi taꞌanerowata.”b 25 Sosu Jisas lowe maꞌe itiyaꞌu apou eiye, “Fene etiri ta iꞌanenatiye awere? Meni owane fene lo, iyape Devit, le lau mase iroteye su, le lu disaipel lo mase Owane Sitewi lo wesi papu wiye.c 26 Le lu disaipel lo mase Owane Sitewi lo nau taꞌase amou ateye. Owane Sitewi lai nau taꞌase amou ape lu taune werese maꞌe nau taꞌase lo ape au siyenamiye. Au heseyei lu owane, le taꞌi aꞌi faraꞌu nau taꞌase amou ape ene arowa. Au heseyei lo meni owane tutawe iyape Abiatar.d 27 Nowe amou (Sabat) ape taꞌaneye su, le lu taune ne nowe ape tei fetaneyeyei ne taꞌaneye. Ahowa, nowe ape lai lu taune werese maꞌe au noweinoweirowata.e 28 Ane Meni Owane ape, Owane Sitewi lai hi awei maꞌe eimawe arosai ape, ane aꞌi lai nowe amou (Sabat) ape au noweinoweinamitorowa.”