5 Sosu Jisas lu werese maꞌe ai marepi atati siye etiye. Le ahi tahe tomuwe. Jisas lu ape lo marepi kororu aꞌi siyeye su, le marepi ewiteye erasi aꞌi toteye. Sosu le meni ereti luwaru aꞌi se apou eiye, “Ne ereti tesi fareraiyere!” Sosu meni ereti luwaru aꞌi tesi fareraiyeye su, Jisas ereti luwaru aꞌi ape au taꞌane faraꞌuweye. 6 Lu ape mo siyeye su, lu Farisi werese taꞌuweyei wesi ape arunatiyewe, lowe Herot lo lu feni maꞌe etiyei ne au teꞌeteye. Lowe Jisas aine teraꞌeyei ne toteye.^b

7 Sosu Jisas meni ereti luwaru aꞌi au taꞌane faraꞌuweye su, le lu disaipel lo mase taꞌuweyei wesi ape arunatiyewe, hare ite tewiye maꞌe fi. Lu taune tomu neꞌese Galili lo omo pani sahe le moꞌo fi. Lu taune Judia lo omo pani sahe le moꞌo aiwawe aꞌi fi. 8 Lu taune tomu neꞌese omo pani tereꞌe tereꞌe maꞌe fai ape, lowe Jisas lo wiyawi erasi aꞌi taꞌaneteye ape, wanuwe. Serai lowe Jisas maꞌe siyeyei ne fai. Lu taune tamo omo Jerusalem maꞌe fai. Lu taune omo pani Idumea maꞌe fai. Lowe omo pani Saꞌi Jordan feni eire maꞌe fai. Sosu lu taune omo pani Tair sosu Saidon maꞌe fai. 9 Sosu Jisas lu taune werese siyeye su, le lu disaipel lo maꞌe apou eiye, “Fene wai ta taꞌuwe naneite. Lu taune tomu neꞌese ane maꞌe hare ite sahe ani erete itesawi. Ane wai papu arowatowei su, lu taune werese ape ane maꞌe tei ataheyerairowata.” 10 Mi mi werese Jisas lai lu taune u tahe se au taꞌane faraꞌuweye. Serai lu taune tomu neꞌese u tahe se, enite kairefi aꞌi se lowe lo ereti se Jisas lo tahe sahe anite teriteyei ne aiyeteye.^c 11 Lu taune tomu neꞌese, sepei luwaru aꞌi marepi hepene papu iroteye ape, Jisas siyeye su, lowe awei sahe apeꞌi onuwewe, sosu peri erasi apou hareye, “Jisas, ne aꞌi lai Owane Sitewi lo meni eime wiyeme aꞌi tene!”^d 12 Sosu Jisas sepei luwaru aꞌi maꞌe ai marepi se apou au itawiye, “Peri sawa! Fene iyape ano owe ape teꞌe fiyarite!”^e

13 Sosu aꞌi pe Jisas omo hire ta maꞌe yaneyewe, tapiye sahe onuwe. Le lo lu feni taꞌi taꞌi aꞌi, le lai au ariariyeye ape, ei aniye. Sosu lu disaipel lo ape le maꞌe wanuwei ne fai. 14 Sosu le lu ereti feni hesi lowe hesi aꞌi (12 disaipel) ei ariariyeye. Lowe lai le mase ironamiteyei. Lowe peri lo wanu umasiteyei su, lowe lu taune werese maꞌe peri lo ape au teꞌe areiye fiyarirowa. 15 Lowe meni ta, sepei luwaru aꞌi marepi hepene papu iroteye ape, siyeyei su, lowe kairefiyeyei lo aniyewe, sepei luwaru aꞌi werese ape mo au taꞌane sasarirowa. 16 Le lu disaipel lo ereti feni hesi lowe hesi aꞌi (12) au ariariyeye. Iyape lowe lo apou aꞌi ne. Meni ta Saimon. Jisas meni ape iyape tereꞌe au eiye, Pita.^f 17 Meni tereꞌe lo iyape Jems, Sebedi lo meni eime. Jems lo paꞌise, Jon. Jisas lai lowesi iyape tereꞌe au eiye, Boanerges. Iyape ape lo si tewi apou ape, pesiyei lo eimane.^g 18 Lu tereꞌe le lai ei ariariyeye, Andru, meni tereꞌe Filip, meni tereꞌe Bartolomyu, meni tereꞌe Matyu, meni tereꞌe Tomas, meni tereꞌe Jems, Jems lo aite Alfius. Meni tereꞌe iyape Tadius, meni tereꞌe lo iyape Saimon. Meni ape omo Selot lo meni owane. Le Rom lo lu owane ai atuwei ne tiyatiteye. 19 Sosu le Judas Iskariot ei ariariyeye. Meni ape lai Jisas ai lu tamo maꞌe areare henetirowa.

20 Sosu aꞌi pe Jisas lu disaipel lo mase omo hi maꞌe itorai wesi ta maꞌe fi. Lu taune tomu neꞌese le maꞌe peri lo wanuwei ne taꞌuwerai. Serai Jisas lu disaipel lo mase piye nowe se ene arowata. 21 Sosu lu tewi topo lo tamo omo Nasaret maꞌe fai ape, etiri werese wanuwe su, lowe Jisas ne apou toteye, “Jisas lo marepi meremereye irowe. Nomo le omo sitewi topo lo maꞌe henetiyei.” 22 Lu tamo, Owane Sitewi lo yo peri siye soꞌoruwe etiteye ape, lowe omo Jerusalem arunatiyewe, Jisas maꞌe itorai. Lowe apou toteye, “Sepei luwaru iyape Belsebul^h Jisas lo marepi hepene papu ironamisiya. Le Belsebul lo kairefiyeyei se sepei luwaru aꞌi au taꞌane sasarisawisiya.”ⁱ 23 Sosu Jisas lu tewi ape le maꞌe ei aniye. Le lowe maꞌe peri anowe se au teꞌeye. Le lowe maꞌe apou eiye, “Fene eiwerou totesiya awere? Sepei luwaru, Satan lai faraꞌu le taꞌu marepi hepene papu au taꞌane sasarirowa awere?” 24 Omo ta lo lu owane, lowe ai atu tiyatiyei su, omo ape tei kairefiyerowata. 25 Aiwawe aꞌi meni owane lai eimane lo maꞌe ai atu tiyatiyei su, lowe werese tei kairefi irorowata. 26 Sosu aiwawe aꞌi sepei luwaru aꞌi, Satan le aꞌi lai sepei luwaru aꞌi tereꞌe tereꞌe se ai atu tiyatiyei su, marepi lowe lo ponei erauwiyei. Serai le tei kairefiyerowata. Ahowa, le sepei luwaru aꞌi (Satan) lo aiwawe aꞌi poꞌuterowa. 27 Wanure! Meni ta lai meni kairefi lo wesi maꞌe etiri ta taꞌarei aniyei ne toteyei su, le tu meni kairefi aꞌi wafei se ereti lowe ti tawesirowa. Serai le wesi lo ape papu wirowawe, etiri werese lo taꞌarei anirowa. 28 Peri ano wiyeme aꞌi tene. Wanure! Yo seni luwaru werese aꞌi, lu taune irowei ape, Owane Sitewi lai au taꞌane sasarirowa. Aiwawe aꞌi lu taune peri naruwe Owane Sitewi tai nomo lo maꞌe au teꞌe naruwei su, Owane Sitewi lai yo seni luwaru aꞌi ape au taꞌane sasarirowa. 29 Ahowa, lu taune tamo Owane Sitewi lo Hepene Waraꞌi maꞌe au teꞌe naruwei su, Owane Sitewi lai yo seni luwaru aꞌi lowe lo au taꞌane sasarinamirowata. Serai lowe yehe omo maꞌe mi mi pasi pasi ironamitorowa. 30 Lu tewi ape mo peri ape apou teꞌeye, “Jisas sepei luwaru aꞌi marepi hepene papu ironamisiya.” Serai Jisas peri ape ne au teꞌe areiyeye.

31 Sosu aꞌi pe Jisas lo mai, paꞌise werese lo aiwawe aꞌi wesi maꞌe henerai. Sosu lowe wesi nowe maꞌe teiteye su, lowe peri ta le maꞌe teꞌesawi.^j 32 Lu taune tamo Jisas atahe aꞌi onuteye ape, lowe Jisas maꞌe eiye, “Wanure! Mai no, paꞌise no, einei werese no, lowe nowe maꞌe irosiyawe, ne maꞌe peri teꞌeyei ne fai.” 33 Sosu Jisas lowe maꞌe itiyaꞌu eiye, “Mai ano, paꞌise ano, einei ano, eiwerai awere?” 34 Sosu Jisas lu taune werese, onuwe ape, atahe aꞌi yose siye etiye. Sosu le apou eiye, “Siyere! Lu taune eite mo, lowe werese mai ano, paꞌise ano, einei ano wiyeme aꞌi tene! 35 Lu taune ape mo peri werese ano wanu tote tawesi umasiyei su, lowe mai ano, lowe paꞌise ano, lowe einei ano wiyeme aꞌi tene!”