10 Sosu aꞌi pe lu taune werese omo towafi lowe lo maꞌe fiyariti. Jisas lu disaipel lo, sosu lu taune tamo le mase iroteye. Lowe le maꞌe peri anowe lo sitewi ne apou teꞌe towerirai, “Peri anowe ape, ne lu taune werese maꞌe au teꞌeye ape, piye peri lo sitewi teꞌesiya awere?” 11 Jisas itiyaꞌu eiye, “Owane Sitewi lo marepi werese ape, ane lu taune maꞌe peri anowe se au teꞌe fiyariye. Ane pereye fene maꞌe au teꞌe areiyerowa. Lu taune tereꞌe tereꞌe peri anowe lo sitewi wanu soꞌoruwerowata. 12 Tu naifa meni ta apou leseye.

13 Sosu le lowe maꞌe apou ei toweriye, “Peri anowe lo sitewi fene wanu soꞌoruweye awere? Ane fene maꞌe peri anowe tamo au teꞌeyei su, fene peri anowe lo sitewi werese wanu soꞌoruweyei awere? 14 Wanure! Ane peri anowe lo sitewi ape fene maꞌe au teꞌe areiyerowa. Meni ape me so taꞌaneyei awei maꞌe, ani teroso fiyariteye ape, me so ape mo Owane Sitewi lo peri aiwawe aꞌi au teꞌe fiyarisiya. 15 Me so tamo yo mai tewiye maꞌe winetaiyei su, apou wou aꞌi lu taune tamo Owane Sitewi lo peri wanuwei. Sepei luwaru aꞌi (Satan) lu taune ape mo maꞌe witane aꞌi aiyeye su, Owane Sitewi lo peri ani tepaꞌasi anirowa. Serai lowe Owane Sitewi lo peri wanu tote tawesi umasirowata. 16 Aiwawe aꞌi me so tamo awei tapiye sahe winetaiyei su, apou wou aꞌi ne. Lu taune tamo Owane Sitewi lo peri wanuwei. Lowe Owane Sitewi lo peri wanuwei su, lowe marepi wisere aꞌi se wanu toteyei. 17 Sosu nowe meꞌiye su etiri luwaru aꞌi lowe maꞌe heneraiyei, lu tamo yo seni luwaru aꞌi lowe maꞌe irowei su, lowe Owane Sitewi lo peri arunatirowawe, lowe yo seni luwaru ape maꞌe si tame umasirowa. 18 Me so tamo wafei saneyei niꞌari aꞌi ponei sahe winetaiyei apou wou aꞌi ne. Owane Sitewi lo peri lu taune tamo maꞌe au teꞌe fiyariyei su, lowe Owane Sitewi lo peri ape wanu toteyei. 19 Sosu awei lo yo seni tamo marepi hepene werese lire papu wirowa. Lowe maꞌaru lo marepi, arearesiya ape, erasi aꞌi toterowa. Awei lo etiri tereꞌe tereꞌe lai lu taune ape mo papu wirowa. Serai awei lo yo seni, maꞌaru lo marepi, sosu etiri tereꞌe tereꞌe, lowe lai Owane Sitewi lo peri napetu leyau tepaꞌasirowa. Serai lu taune ape mo Owane Sitewi lo peri wanu tote tawesi umasirowata. Sosu lowe tei kairefiyerowata.^c 20 Me so tamo awei wisere aꞌi maꞌe winetaiyei apou wou aꞌi ne. Lu taune tomu neꞌese Owane Sitewi lo peri wanuwei su, lowe peri ape wanu tote tawesi umasinamirowa. Lowe Owane Sitewi lo marepi ape se tei kairefiyerowa. Serai lowe Owane Sitewi lo wiyawi werese irorowa. Lu taune tamo Owane Sitewi lo wiyawi oso aꞌi anirowa. Lu taune tamo Owane Sitewi lo wiyawi erasi aꞌi anirowa. Aiwawe aꞌi lu taune tamo Owane Sitewi lo wiyawi erasi pefine aꞌi au taꞌanerowa.”

21 Sosu Jisas lowe maꞌe apou ei toweriye, “Fene yehe lam taiso fu mitaiyeyei su, fene wahu ta unahi papu fu fareyareyei awere? Ahowa, fene wari unahi fu fareyareyei awere? Ahowa, fene yehe lam taiso fu mitaiyeyei su, fene hire amerame aꞌi au teire. Serai lu taune werese wesi papu iroteye ape, yehe mitaiyeyei amerame aꞌi siyerowa.^d 22 Lu taune tamo etiri ta fareyareyei ne toteyei su, Owane Sitewi lai etiri ape amerame aꞌi au atuatu areiyerowa. Aiwawe aꞌi lu taune tamo peri teꞌe fareyareyei ne toteyei su, Owane Sitewi lai peri ape amerame aꞌi au teꞌe fiyarirowa.^e 23 Lu taune apaniye se, fene peri ano ape fa wanu tawesire.” 24 Sosu le lowe maꞌe apou au teꞌeye, “Weiyai! Fene peri tereꞌe tereꞌe tamo wanuwei ape, fene peri ape tote etire. Peri tamo wisere aꞌi ne. Peri tamo luwaru aꞌi ne. Fene peri luwaru aꞌi owe ape tote umasire. Fene lu taune lo yo seni siye eti tiyatiyei su, Owane Sitewi lai yo seni fene lo siye etirowa. Sosu Owane Sitewi yo seni fene lo luwaru aꞌi siye soꞌoruweyei su, le etiri orese erasi aꞌi fene maꞌe aurowa.^f 25 Lu taune tamo Owane Sitewi lo marepi erasi aꞌi tote tawesiyei su, Owane Sitewi lai lowe maꞌe yo seni aseyaro lo erasi aꞌi aurowa. Lu taune tamo Owane Sitewi lo marepi meꞌiyeni maꞌe atati aruwei su, Owane Sitewi lai etiri werese lowe lo ani tepaꞌasi anirowa.”^g

26 Sosu aꞌi pe Jisas peri anowe ta lowe maꞌe apou au teꞌeye. “Owane Sitewi lo marepi apou wou aꞌi ne. Meni ta me so tamo taꞌaneyei awei maꞌe fu ani teroso fiyarisawirowa. 27 Le me so ape awei sahe aine teroso fiyarisawirowa su, le wesi topo lo maꞌe pasi aꞌi nihe howeiyei ne irowa. Nowe meꞌiye su me so ape perati wirairowa, wamu hire maꞌe wirairowa. Me so perati wirairowa ape, meni ape eiwerou toterowa awere? Le soꞌoru taꞌama. 28 Awei ape lai me so ape perati wiyei ne irorowa. Tu me so ape peratirowa. Sosu wamu lo ape hire maꞌe wirairowa. Meꞌiye su, me so tei kairefiyerowa. Sosu erasi teirowa su, me so ape erasi aꞌi taꞌerowa. 29 Me so ayei siyeyei su, meni ape ipari meneꞌe lo me so lo meni patiye papaꞌu foroꞌoweyei ape, aine tou fusawirowawe me so ape mo wesi maꞌe aitirowa.”^h

30 Sosu aꞌi pe le apou teꞌeye, “Owane Sitewi lo marepi, eiwerou ane fene maꞌe au teꞌe atuaturowa awere? Piye peri anowe ta ane au teꞌe atuaturowa awere? Serai fene Owane Sitewi lo marepi amerame aꞌi wanu tote areiyerowa. 31 Owane Sitewi lo marepi saiyoho so wou aꞌi ne. Saiyoho so taꞌaneyei awei sahe ani teroso fiyariyei su, me so ape oso oso aꞌi ne. Me so tereꞌe werese erasi aꞌi ne. 32 Saiyoho so ape awei sahe ani terosowei su, le perati wirairowa. Saiyoho lo meni patiye erasi aꞌi teirowa. Saiyoho nei erasi aꞌi irorowa. Serai irowe tamo nei lo sahe onurowa. Aiwawe aꞌi lowe uri lowe lo saiyoho nei ape sahe taꞌanerowa.”

33 Sosu aꞌi pe Jisas lowe maꞌe peri anowe tomu neꞌese au teꞌe fiyariteye. Le Owane Sitewi lo peri, peri anowe se au teꞌeye. 34 Le lowe maꞌe au teꞌeye su, le peri anowe aꞌi au teꞌeye. Le peri amerame aꞌi au teꞌe taꞌame. Sosu Jisas lu disaipel lo mase aꞌi iroteye su, le peri anowe lo sitewi lowe maꞌe au teꞌe areiyeteye.

35 Jisas peri anowe teꞌe tepaꞌasiye su, neriwei aꞌi le lu disaipel lo maꞌe apou eiye, “Nomo hare ite tewiye feni maꞌe iyatutiyei.” 36 Lowe lu taune werese hare ite tewiye sahe arunatiyewe, hare ite ponei maꞌe iyatuti. Jisas wai si maꞌe onuwe. Wai tereꞌe tereꞌe aiwawe aꞌi lowe mase saꞌi ape maꞌe iyatuti. 37 Lowe saꞌi ponei sahe iroteye su, fiyari erasi ta henerai. Saꞌi ei erasi aꞌi wai ani awetu awetowe. Saꞌi erasi aꞌi wai papu temeꞌeriyeye. 38 Sosu Jisas wai si maꞌe me tutoꞌu sahe nihe howeiteye. Lowe saꞌi ei erasi siyeye su, lowe atoweiye erasi aꞌi irowe. Lowe le eisoweye, apou eiye, “Meni Owane, saꞌi ei lai nomo ani aporuwa. Ne nomo werese ne ewite se taꞌama awere? Nomo temeniye ataheyewa.” 39 Sosu Jisas nihe lo petaneye su, le fiyaru, saꞌi ei erasi maꞌe apou eiye, “Fiyaru, saꞌi ei titanere.” Pereye aꞌi fiyaru saꞌi ei titane temeniyeye. 40 Sosu Jisas lowe maꞌe eiye, “Fene piyene atoweiyesiya awere? Fene Owane Sitewi lo marepi tote tawesi se taꞌama awere?” 41 Lowe peri lo wanuwe su, lowe marepi atoweiye erasi irowe. Lowe aꞌi lai apou teꞌe tiyatiteye. “Meni eite eiwerai awere? Fiyaru, saꞌi ei eite peri lo wanu umasiye.”