Jisas sepei luwaru aꞌi ta au taꞌane sasarisawi.
5
Sosu aꞌi pe saꞌi ei temeniye titaneye su, lowe hare ite tewiye maꞌe iyatuti. Lowe wai saꞌi tewiye maꞌe furi. Omo pani ape maꞌe, iyape Gerasa, wai lowe lo furi. 2 Le wai ape arunatiyewe, awei sahe arowatowe. Witane aꞌi meni ta sepei luwaru aꞌi marepi hepene papu iroteye ape, le maꞌe itero itorai. Meni ape fisiye yo sahe iroteye. 3 Meni ape fisiye yo papu howeinamiteye. Le meni kairefi aꞌi ne. Owe lu tamo ereti lowe wafei kairefi aꞌi se ti tawesirowata. 4 Lowe ereti lowe wafei se ti tawesiye su, le wafei ape ani erau tepaꞌasiye. Lu werese meni ape wafei se ti tawesirowata. Meni kairefi aꞌi ne. 5 Mi mi pasi pasi meni ape, fisiye yo sahe iroteye ape, hare erasi uteye. Le tahe topo lo sahe tapiye se aine touwe. 6 Meni ape Jisas eyeri maꞌe siyerai su, le Jisas maꞌe iterotaiyewe, le maꞌe lowe uporo apeꞌi onuwe. 7-8 Jisas meni ape siyeye su, le sepei luwaru aꞌi maꞌe apou eiye, “Sepei luwaru aꞌi, ne meni ape arunatire. Ne howe maꞌe hene tahesa!” Sosu sepei luwaru aꞌi ape Jisas maꞌe hare erasi uteye, “Jisas, ne Owane Sitewi Pefine lo meni eime aꞌi ne. Ne nomo maꞌe piye irowei awere? Owane Sitewi lo iyape se, ne nomo maꞌe owe ape au luwaruwere.”a 9 Sosu Jisas le maꞌe apou ei toweriye, “Iyape no eiwerou awere?” Sepei luwaru aꞌi le maꞌe itiyaꞌu eiye, “Iyape nomo lo tomu neꞌese aꞌi. Sepei tomu neꞌese meni marepi hepene papu ironamisiya.” 10 Le Jisas maꞌe peri ta ei toweriye, “Ne omo pani nowe maꞌe owe ape eimawesawire!” 11 Sepei luwaru aꞌi ape fe tomu neꞌese omo toꞌu nepesi maꞌe siyeye. Lowe awei peperi ene ateye. 12 Le Jisas maꞌe ei toweriye, “Ne nomo fe tomu neꞌese ape maꞌe eimawesawire. Serai nomo fe papu wirowa.” 13 Jisas lowe maꞌe eiye, “Fene fe ape mo maꞌe ire!” Sepei luwaru aꞌi werese aꞌi meni ape arunatiyewe, fe tomu neꞌese ape papu wiye. Sepei luwaru werese aꞌi fe papu wiri su, fe werese, omo toꞌu nepesi ene ateye ape, omo hi saꞌi maꞌe itero itori. Fe tomu neꞌese (2,000) saꞌi papu tenise temeniyeye. 14 Lu ape, fe au noweinoweiye ape, fe werese lowe lo saꞌi papu tenise temeniyeye su, lowe omo towafi lowe lo maꞌe atoweiye iteroti. Lowe lu taune werese omo tereꞌe tereꞌe maꞌe teꞌe fiyariteye. Sosu lu taune werese fe ape siyeyei ne witane se fai. 15 Lowe Jisas maꞌe henerai. Lowe meni ape sepei luwaru aꞌi, marepi hepene papu iroteye ape wisere aꞌi siyeye. Le Jisas maꞌe atahe aꞌi onuteye. Le ipari tahe ani asiteye. Marepi lo faraꞌu aꞌi toteteye. Lowe etiri werese siyeteye. Serai lowe atoweiye erasi iroteye. 16 Lu tewi ape, fe au noweinoweiteye ape, lowe peri werese lu taune maꞌe au teꞌe fiyariteye. Lowe meni sepei luwaru aꞌi papu iroteye ape ne au teꞌeye. Sosu fe werese ape mo, saꞌi papu tenise temeniyeye ape ne au teꞌe fiyariteye. 17 Lu taune peri lowe lo wanuwe su, lowe Jisas maꞌe peri erasi se eiye, “Ne omo pani nomo lo fu arunatire.” 18 Serai Jisas peri lowe lo wanuwe su, le lu feni mase wai papu arowatowe. Meni tu sepei luwaru aꞌi iroteye ape, le maꞌe peri kairefi se apou ei toweriye, “Ane faraꞌu ne mase irowa awere?” 19 Jisas le maꞌe itiyaꞌu apou eiye, “Ahowa, ne wesi no maꞌe, lu tewi no maꞌe aiwawe aꞌi ire. Ne lowe werese maꞌe teꞌe fiyarire. Meni Owane Pefine lai ne au taꞌane feraferei faraꞌuweye. Ne ferafereiyei lo ape ne au teꞌe fiyariteye.” 20 Sosu meni ape Jisas arunatiyewe, lu taune werese maꞌe omo pani Dekapolis sahe au teꞌe fiyariteye. “Jisas lai ane au taꞌane faraꞌuwe wisereyeye.” Lu taune werese peri lo wanuwe su, lowe hepene se suꞌariye. Lowe Jisas ne marepi erasi aꞌi toteteye.Jisas menitani ta u tahe se au taꞌane faraꞌuweye.
21 Jisas, lu disaipel lo mase, hare ite ponei iyatu toneri. Saꞌi feni maꞌe heneri su, lu taune werese Jisas lo peri wanuwei ne taꞌuwerai. Jisas hare ite tewiye atahe sahe iroteye. 22 Taꞌuweyei wesi meni owane ta Jisas maꞌe henerai. Meni owane lo iyape Jairus. Le Jisas siyeye su, le le maꞌe lowe uporo apeꞌi onuwe. 23 Le Jisas maꞌe peri kairefi se apou ei toweriye, “Owane, eime taune ano u tahe erasi se, temeniyeyei ne ataheyewa. Ne wesi ano aiyere. Ereti no eime taune ano hire maꞌe isawe hetesiyere. Serai u tahe erasi lo ape au taꞌane faraꞌuwere. Sosu le si tame sinerowa.” 24 Sosu Jisas meni ape mase wesi lo maꞌe fi. Lu taune tomu neꞌese lowesi aiwawe moꞌo umasiteye. Lowe Jisas sahe ataheye iteye.
25 Lowe fi su, menitani ta u fisaꞌi weriyei iroteye. Iyu menei ereti feni hesi lowe hesi aꞌi (12) fisaꞌi nowe maꞌe henerai. 26 Menitani ape dokta tomu neꞌese maꞌe siyenari. Lowe le maꞌe fofowei erasi au taꞌane irowe. Le maꞌaru werese lo dokta tomu neꞌese maꞌe au poꞌuteye. Ahowa, fisaꞌi lo weriyei ironamiteye. Menitani lo u tahe erasi aꞌi ironamiteye. Foroꞌowe taꞌame. 27-28 Le Jisas lo peri heneruwe wanuwe su, le lu taune werese ponei sahe meꞌiyeni maꞌe fai. Le apou toteye, “Ane ipari tahe lo sahe ereti se isawe hetesiyerowa su, u tahe ano au taꞌane faraꞌuwerowa.” Serai menitani ape Jisas lo ipari tahe sahe ereti se isawe hetesiyeye. 29 Witane aꞌi se fisaꞌi lo apuwe foroꞌoweye. Menitani ape apou toteye, “Fisaꞌi ano apuwe foroꞌowe tepaꞌasiye. Ane faraꞌu wisere aꞌi ne.” 30 Aiwawe aꞌi witane aꞌi se Jisas apou eiye, “Kairefiyeyei ano tewi aꞌi tahe paꞌare ano arunati.” Le meꞌiyeni maꞌe atati siyeteye. Le apou ei toweriye, “Eiwerai ipari tahe ano sahe isawe hetesiyeye awere?”b 31 Lu disaipel lo apou eiye, “Meni Owane, ne lu taune tomu neꞌese siyesiya awere? Lowe ne maꞌe tei ataheyesiya. Ne piyene apou ei toweriye awere? ‘Eiwerai ipari tahe ano sahe isawe hetesiyeye awere?’” 32 Sosu Jisas atati siye etiye. Le menitani ape siyeye. 33 Ahowa, menitani ape atoweiye erasi irowe. Ereti lowe lo pereꞌeyeye. Le u tahe lo, wisere aꞌi irowe ape, soꞌoruweye tene! Le Jisas maꞌe lowe uporo apeꞌi onuraiyewe, le maꞌe apou eiye, “Ane lai apou toteye, ‘Ane ipari tahe no sahe isawe hetesiyerowa su, u tahe ano faraꞌu wisere aꞌi henerairowa.’” 34 Sosu Jisas le maꞌe itiyaꞌu eiye. “Menitani, ne ane ne tote tawesiye su, tote tawesiyei no lai u tahe no ape au taꞌane faraꞌuwe wisereye tepaꞌasiye. Ne wesi no maꞌe marepi fetane aꞌi se ire!”c
35 Jisas peri ape teꞌe tepaꞌasiye su, lu tamo Jairus maꞌe henerai. Lowe apou eiye, “Eime taune no temeniyeye poꞌuteye. Ne Meni Owane Jisas owe ape heneta.” 36 Ahowa, Jisas peri lowe lo wanuwe su, le taꞌuweyei wesi meni owane maꞌe apou eiye, “Ne atoweiye sawa! Ne ane ne tote tawesire!” 37 Sosu le lu taune werese werese maꞌe apou au amouweye, “Fene ane owe ape umasita. Ane lu feni ano Pita, Jems, Jems lo paꞌise Jon, lowe hesi heta aꞌi lai ane meni Jairus mase aiwawe aꞌi iyei.” 38 Le Jairus lo wesi maꞌe henerai su, le noꞌu erasi wanuwe. Lowe luwei erasi aꞌi wanuteye. 39 Le lu disaipel lo mase wesi papu wiyewe, lowe maꞌe apou eiye, “Fene piyene lusiya awere? Fene noꞌu erasi piyene irosiya awere? Eime taune ape temeniye taꞌame. Le nihe howeisiya.” 40 Lu taune werese wesi papu taꞌuweteye ape, le maꞌe niyeyei irowe. Serai le lowe werese nowe maꞌe eimawesawi. Sosu le eime taune lo aite mai, Pita, Jems, Jon, lowe tewi wesi papu eime taune ape howeiteye ape sahe wiye. 41 Le ereti lo se eime taune ape sahe aniteriyewe, eime taune ape maꞌe eiye, “Talita kum.” Peri ape lo sitewi apou teꞌeye, “Eime taune oso, Ane ne se eiwa. Ne sinere!”d 42 Witane aꞌi eime taune ape sineyewe, uweiteye. Eime taune lo iyu menei apou ereti feni hesi lowe hesi aꞌi ne (12). Lu taune werese eime taune ape uweiyei siyeye su, lowe hepene se suꞌariye. 43 Sosu Jisas lowe werese maꞌe peri kairefi se apou eiye, “Fene werese lu taune werese maꞌe eime taune ape uweiyei lo peri ne owe ape teꞌe fiyarire!” Sosu le eime taune ape lo aite mai maꞌe eiye, “Fenesi eime taune fenesi lo ape ayei ta au are!”