Sosu aꞌi pe Jisas omo sitewi lo arunatiyewe, le omo tereꞌe tereꞌe maꞌe Owane Sitewi lo peri au teꞌe fiyari. 7 Sosu Jisas lu disaipel lo le maꞌe ei aniye. “Ane fene hesi aꞌi hesi aꞌi lu taune maꞌe Owane Sitewi lo peri au teꞌe fiyariyei ne eimawesawire. Ane fene maꞌe kairefi erasi aꞌi ano aurowa. Meni ta sepei luwaru aꞌi iroteyei ape, fene kairefi ano se sepei ape au taꞌane sasarisawire. 8 Fene iyei su, fene etiri tomu neꞌese owe ape aitire. Ahowa, fene ayei tamo mase owe ape aitire. Niye fene lo werese, maꞌaru werese owe ape aitire. Fene me epi taꞌi taꞌi aꞌi faraꞌu anitetire. 9 Lowe tahe taꞌi aꞌi faraꞌu ani asitire. Fene ipari tahe hesi se owe ape ani asire.” 10 Sosu le lowe maꞌe eiye, “Fene wesi ta wiyei su, fene wesi taꞌi aꞌi ape sahe irore. Fene wesi tereꞌe tereꞌe owe ape ire. 11 Fene omo ta Owane Sitewi lo peri au teꞌe fiyariyei ne iyei su, lu taune ape mo peri fene lo wanu taꞌame, fene omo ape arunatire. Omo nowe maꞌe iyei su, fene awei peperi lowe tahe sahe iroteyei ape ani ato periperenatiyei su, lu taune werese etiri ape siye soꞌoruwerowa. Owane Sitewi lai lowe maꞌe ai marepi erasi aꞌi totesiya.”^c 12 Jisas lowe maꞌe teꞌe tepaꞌasiye su, lowe hesi aꞌi hesi aꞌi fi. Lowe lu taune werese maꞌe apou au teꞌe fiyariteye, “Fene awei lo yo seni luwaru aꞌi arunatire. Sosu Owane Sitewi lo marepi ne tote tawesi umasire!” 13 Lowe lu taune tamo sepei luwaru aꞌi iroteye ape, lowe sepei werese ape mo au taꞌane sasarisawiteye. Lowe lu taune u tahe se iroteye ape, lowe u tahe lowe lo au taꞌane faraꞌuweye. Lu taune enite se lowe me mapu lo fito wapo se enite sahe ani teroso arowewe, enite werese au taꞌane niyemaiyeye.^d

14 Nowe meꞌiye ta se Herot wiyawi erasi pefine aꞌi, Jisas taꞌaneteye ape, wanuwe su, le lu tewi owane tamo lo maꞌe ei toweriye, “Meni ape, lu taune u tahe se au taꞌane faraꞌuweteye ape, eiwerai awere?” Lu owane tamo le maꞌe itiyaꞌu eiye, “Meni ape Jon saꞌi au hu siye meni. Ne meni ape lo mato aine tou aniye. Sosu Owane Sitewi lai meni ape si taꞌane norohuwe sineye. Serai le lai wiyawi erasi pefine aꞌi ape mo au taꞌaneteye.”^e 15 Lu tereꞌe tamo Meni ape ne teꞌeye, “Meni ape Elaija.” Lu tereꞌe apou teꞌeye, “Meni ape Owane Sitewi lo peri au teꞌe siye meni. Le Owane Sitewi lo peri au teꞌe siye lu, tu naifa iroteye ape, wou aꞌi ne.” 16 Ahowa, Herot Jisas lo wiyawi erasi pefine aꞌi ne taꞌaneye wanuwe su, le apou toteye, “Wiyeme aꞌi meni ape Jon saꞌi au hu siye meni tene! Ane lai Jon lo mato aine tou teraꞌeye tene. Sosu Owane Sitewi lai le au taꞌane norohuwe si sineye.” Sosu Herot marepi erasi aꞌi atoweiyenamiteye. 17 Serai Jon lai Herot maꞌe apou eiye su, “Ne paꞌise Filip lo naituwei au luwaruweye.” Herot ai atu siye lu tamo Jon maꞌe eimawesawiyewe, ereti lo wafei kairefi aꞌi se ti tawesiye. Sosu lowe Jon kalabus wesi pani maꞌe hene arunari.

18 Sosu aꞌi pe Jon saꞌi au hu siye meni awei lo meni owane Herot maꞌe apou eiye, “Ne paꞌise Filip lo tani naituwe su, ne yo seni luwaru aꞌi irowe. Ne paꞌise lo naituwe ape au luwaruweye. Ne aiwawe aꞌi Owane Sitewi lo yo seni ape wanu arisiye.”^f 19 Serai menitani ape, Filip lo tani iyape Herodias, Jon ne ai marepi erasi aꞌi totenamiteye. Le Jon aine teraꞌeyei ne toteye. Ahowa, menitani ape Jon aine teraꞌerowata. 20 Herot Jon lo yo seni aseyaro aꞌi siyeye. Le Jon, Owane Sitewi lo yo seni waraꞌi aꞌi umasinamiteye ape, siye soꞌoruweyei ne toteteye. Serai le Jon kalabus sahe owe ape au luwaruwe irore. Nowe mi mi tomu neꞌese Herot Jon kalabus sahe peri lo wanuwei ne itori. Herot Jon lo peri wanuwe su, marepi lo orese erasi aꞌi toteteye. Ahowa, le peri lo ne marepi wisere aꞌi wanuteye. 21 Nowe meꞌiye ta se Herot ene a hereiyei erasi ta, nowe ape mai le auteiye ape, au hereiye. Le awei lu owane werese, ai atu siye lu owane tamo, sosu Galili lu owane tamo le lowe werese wesi lo sahe ei taꞌuwe aniye. 22 Sosu menitani Herodias lo eime taune lowe maꞌe yakowei wisere aꞌi iroteye. Eime taune ape yakowei wisereye iroteye su, Herot lu owane werese aiwawe aꞌi marepi wisere aꞌi toteteye. Yakowei ape tepaꞌasiye su, Herot eime taune ape ei aniye, apou eiye, “Ane yakowei no siyeye su, marepi ano wisereyeteye. Serai ane ne se eiye, ‘Ne etiri ta ane maꞌe ei toweriyei su, ane lai ne maꞌe aurowa.’” 23 Sosu le menitani ape maꞌe peri kairefi aꞌi se tame eiye, “Wanure! Ane ne se tame eiye, Ne ane maꞌe etiri ta ei toweriyei su, ane lai wiyeme aꞌi ne maꞌe aurowa. Marepi no apou aꞌi totereme su, ‘Ane awei pani ponei tewi aꞌi no aniyei.’ Wiyeme aꞌi ane lai awei pani ponei tewi aꞌi ano ne maꞌe aurowa.” 24 Sosu eime taune ape ene a hereiyei arunatiyewe, mai lo maꞌe ei toweriyei ne fi. Le mai lo maꞌe apou ei toweriye, “Ane piye aniyei ne ei toweriyei awere?” Sosu Herodias itiyaꞌu apou eiye, “Ne Herot maꞌe Jon lo mato aine touwei ne ei toweriyei.” 25 Sosu menitani ape owane Herot maꞌe witane aꞌi se si fiyewe, le maꞌe ei toweriye, “Jon saꞌi au husiye meni, kalabus irosiya ape, pereye aꞌi ane meni ape lo mato aine tou anirowawe, wahu sahe fuwei ne aitaire.” 26 Herot eime taune lo peri wanuwe su, le marepi orese erasi aꞌi toteye. Ahowa, le eime taune ape maꞌe peri teꞌe naneiyei, lu owane lo nihe se, au teꞌeye su, le apou toteye, “Ane peri ano fu umasirowa.” 27 Serai Herot meni ta kalabus maꞌe eimawesawi. Le meni ape eiye, “Ne Jon lo mato aine toure.” Sosu meni ape kalabus maꞌe fiyewe, Jon lo mato aine tou poꞌuteye. Le Jon lo mato wahu papu fuwe. 28 Sosu Jon lo mato wahu papu fuwe su, le eime taune ape maꞌe aiti. Sosu eime taune ape wahu ape, Jon lo mato papu iroteye ape mai maꞌe auwe. Herodias apou eiye, “Wisere aꞌi tene! Ane pereye etiri eite siye soꞌoruwesiya. Jon saꞌi au hu siye meni temeniyeye.” 29 Sosu Jon lo lu feni peri ape wanuwe su, lowe kalabus maꞌe fiyewe, Jon lo tahe paꞌare aniyewe, fisiye yo maꞌe towasinari.

30 Sosu aꞌi pe Jisas lo lu disaipel si tame fai. Lowe Jisas maꞌe taꞌuwerai su, wiyawi ape mo ne lowe taꞌaneye ape, lowe peri Jisas maꞌe au teꞌeye.^g 31 Lu taune tomu neꞌese Jisas maꞌe taꞌuwerai. Jisas lowe maꞌe wiyawi erasi pefine aꞌi au taꞌaneteye. Lowe ene ayei nowe se taꞌama. Serai Jisas lu disaipel lo ei aniyewe lowe maꞌe eiye, “Nomo pani lu taune ariyeye ape maꞌe irowawe, nomo saro ahe onu fetaneyeteyei” 32 Sosu lowe lu taune werese arunatiyewe, hare ite maꞌe itori. Lowe wai papu arowatowe su, saꞌi feni maꞌe iyatu toneri. Lowe aꞌi lai onu fetaneyeteye. 33 Lu taune tomu neꞌese lowe, siyesawi su, lowe apou toteye, “Lowe saꞌi feni eire maꞌe iyatutisiya.” Serai lowe omo towafi lowe lo arunatiyewe, Jisas moꞌo hare ite tewiye maꞌe iteroti. Lowe saꞌi feni eire maꞌe tu heneri. 34 Jisas lu disaipel lo mase wai yo seni tewi furi su, lowe lu taune tomu neꞌese siyeye. Le lowe siyeye su, le lowe ne marepi erasi aꞌi ewiteye. Lowe fe sipsip wou aꞌi ne. Lowe meni owane ta lowe au noweinoweiyei se taꞌama. Serai le lowe werese maꞌe Owane Sitewi lo peri au teꞌe areiyeteye.^h 35 Nowe neriwei su Jisas lowe maꞌe au teꞌe fiyariteye su, Jisas lo lu disaipel le maꞌe peri ta teꞌeyei ne fai, “Meni Owane, pani eite ariye aꞌi ne. Poweiye itori tepaꞌasiye.ⁱ 36 Ne lu taune werese omo towafi lowe lo maꞌe eimawesawire. Serai lowe ayei tamo faraꞌu etere.” 37 Ahowa, Jisas lowe maꞌe itiyaꞌu eiye, “Fene lowe werese ayei tamo au are.” Lu disaipel lo le maꞌe itiyaꞌu eiye, “Nomo omo ta irowawe, 200 Denarai^j se nau taꞌase eteyei awere? Sosu nomo lowe maꞌe ene ayei au ayei awere?” 38 Sosu Jisas lowe maꞌe apou ei toweriye, “Fene nau taꞌase eiwerou aꞌi irosiya awere? Fene irowawe, nehi siyere.” Lowe siye tepaꞌasiye su, lowe Jisas maꞌe si faiyewe, apou teꞌeye, “Nomo nau taꞌase ereti feni werese, sosu hare oso hesi aꞌi irosiya.” 39 Sosu le lu taune werese maꞌe apou eiye, “Fene werese senarepe saro onuti. Fene lu taune tewi aꞌi tewi aꞌi sato onura. Lu taune tewi aꞌi tewi aꞌi yaro maꞌe onuri.” 40 Lu taune weneri tewi tamo apou onuwe. Lu taune weneri tamo (100) ne. Lu taune weneri tamo (50) ne. 41 Sosu Jisas nau taꞌase ereti feni aiwawe ape aniye. Hare oso hesi aꞌi ape aniye. Le Owane Sitewi lo omo maꞌe aute siyeye, sosu nau taꞌase hare oso hesi ape Owane Sitewi maꞌe au teꞌe wisereyeye. Moꞌo su, le nau taꞌase tewi oso oso aꞌi ani topotowe. Sosu lu disaipel lo maꞌe auwe. Lowe lu taune werese maꞌe au none isafiyeteye. Sosu le hare oso hesi aꞌi ape ani topotowewe, sosu lu disaipel lo maꞌe au none isafiyeteye. 42 Lu taune werese ene a tepaꞌasiye su, lire lowe lo temeꞌeriyeye. Serai lowe marepi wisere aꞌi toteye. 43 Lu taune werese ene a tepaꞌasiye su, lu disaipel lo nau taꞌase hare tewi aꞌi ipi sahe foruwe iroteye. Lowe ipi ereti feni hesi lowe hesi aꞌi (12 disaipel) nau taꞌase hare tewi aꞌi foruwe irowe ape, si ani asiteye. 44 Lu (5,000) nawiteye ape, nau taꞌase hare tewi aꞌi ene aye.

45 Pereye aꞌi se, Jisas lu feni maꞌe apou eiye, “Fene wai papu arowatore. Fene omo Betsaida feni eire maꞌe iyatu tonere. Ane lu taune werese omo towafi lowe lo maꞌe eimawesawirowa. Sosu moꞌo ane fene umasitairowa.” 46 Sosu Jisas lu taune werese eimawesawi tepaꞌasiye su, le lu disaipel lo wai se iyatuti ape, siyesawi. Sosu Jisas omo hire maꞌe yaneyewe, Owane Sitewi maꞌe peri au teꞌeteye.^k 47 Nowe pasiyeye su, wai ape hare ite ponei sahe iyatuteye. Jisas hare ite tewiye sahe iroteye. 48 Fiyaru erasi aꞌi hare ite sahe henerai. Jisas saꞌi ei wai pihatu maꞌe apaꞌasiye siyeye. Saꞌi ei ape lai lowe ani torutoro awetu awetowe. Lu werese wai papu iroteye ape, lowe wai ape iyatu tohoteye. Esi pasi su lowe wai se iyatuteye. Lowe yo senitewi maꞌe iyatu furi taꞌame. Sosu Jisas hare ite hire awesetaiteye. Le wai ape aweraꞌiyenatiyei ne toteye. 49 Ahowa, lu ape mo meni ape siyeye su, lowe atoweiye erasi iroteye. Lowe meni ape sepei siye toteye.^l 50 Lu werese ape meni ape siyeyewe, marepi atoweiye erasi irowe. Ahowa, Jisas witane aꞌi lowe maꞌe apou eiye, “Fene taweiru sawa! Ane lai ne. Marepi kairefiyere!” 51 Sosu Jisas wai papu arowatowe su, fiyaru erasi aꞌi temeniye poꞌuteye. Serai lowe werese marepi erasi aꞌi hepene se suꞌariye.^m 52 Jisas nau taꞌase lu taune werese maꞌe isafiye noneye su, lu disaipel lo Jisas lo kairefi tote iꞌaneye. Marepi lowe lo kairefiye luwaruweye. Serai lowe marepi erasi aꞌi hepene se suꞌariye.

53 Sosu aꞌi pe lowe wai iyatu toneriyewe, omo pani Genesaret lo yo senitewi maꞌe furi. 54 Jisas lu fene lo mase wai arunatiyewe, hare ite tewiye maꞌe teiteye, lu taune werese lowe siye soꞌoruweye. 55 Witane aꞌi lowe omo omo lu taune u tahe se ape mo me wari se Jisas maꞌe sutaitetai. 56 Jisas omo omo werese maꞌe fi su, lu tamo lai lu taune, u tahe se ape, lowe taꞌuweyei ponei tewi amerame aꞌi ta sahe sutaite fuwe. Lowe Jisas maꞌe teꞌe toweriye, “Faraꞌu lu taune werese u tahe se ape, ipari tahe tewi aꞌi no ereti lowe lo se isawe hetesiyeyei awere?” Serai lowe ipari tahe tewi no maꞌe isawe hetesiyeye su, u tahe lowe lo au taꞌane faraꞌuweye.