Owane Sitewi lo yo peri yaꞌariyei lo peri ani ararowe.
7
Sosu aꞌi pe lu Farisi tamo, sosu lu owane, Owane Sitewi lo yo peri siye teꞌe etiteye ape, lowe omo Jerusalem arunatiyewe, Jisas maꞌe taꞌuwerai. 2 Lowe Jisas lo lu disaipel ereti unou aꞌi se ene ayei siyeye. Lowe ereti lowe lo saꞌi au hu taꞌame.a 3 Lu Farisi werese, sosu Juda lo lu taune werese ene ayei su, lowe yaꞌariyei lo peri umasiteye. Lowe ereti lowe lo saꞌi sahe au ani taine huwe. 4 Sosu aiwawe aꞌi lowe ayei lo maket pani amerame aꞌi maꞌe fai su, lowe tepi tahe werese lowe lo saꞌi sahe au huwe sasariye. Sosu moꞌo lowe faraꞌu ene ayei. Lowe yaꞌariyei lo peri werese umasiteye. Lowe saꞌi paꞌare oso tapiye paꞌare erasi, etiri tereꞌe tereꞌe saꞌi au huteye.b 5 Sosu lu Farisi ape, Owane Sitewi lo peri siye teꞌe eti siye lu ape mo, lowe Jisas maꞌe peri ta apou teꞌe toweriye, “Lu disaipel no piyene lowe nomo lo yaꞌariyei lo yo peri ape umasi taꞌame awere? Lowe ereti unou aꞌi se ene aye.” 6 Sosu Jisas lowe maꞌe itiyaꞌu eiye, “Fene marepi hesi aꞌi tote siye lu ne. Tu naifa weriyei meni ta, iyape Aisaia peri wiyeme aꞌi fene ne one towe ta au leseye. Le peri pefine aꞌi apou leseye.‘Lu taune tewi ape mo ane maꞌe ahi aꞌi se au teꞌe wisereyesiya. Ahowa, marepi hepene lowe lo ane ne eyeri maꞌe irosiya.
7 Lowe ane maꞌe au teꞌe wisereyesiya su, lowe marepi yahowaꞌi se au teꞌe wisereyesiya. Lowe lu taune werese maꞌe awei lo marepi au teꞌe atuatu areiyeteye.’ Ais 29:13
8 Fene Owane Sitewi lo peri wiyeme aꞌi arisiye. Sosu fene yaꞌariyei lo peri umasinamiteye.” 9 Sosu le lowe maꞌe peri tereꞌe ta apou eiye, “Fene Owane Sitewi lo yo peri wiyeme aꞌi werese aru fareyareteye. Serai fene yaꞌariyei lo yo peri umasinamiteye. 10 Meni tereꞌe ta, iyape Moses, one towe sahe apou leseye,
‘Fene aite, mai fene lo iyape lowesi lo ei ani arowere. Sosu peri lowesi lo wanu umasire. Meni ta aite mai lo maꞌe au luwaruweyei su, lowe lai meni ape pei aine teraꞌe temeniyerowa.’ Kis 20:12; 21:17; Lo 5:16
11 Fene apou au teꞌeye, ‘Meni ta aite mai maꞌe apou au teꞌeyei, ane maꞌaru tamo eite Owane Sitewi maꞌe auwei ne totesiya. Serai ane fenesi maꞌe au pati anirowata.’ Fene lai yo seni ape wisere aꞌi totesiya. 12 Fene meni ape aite mai lo maꞌe etiri ta au pati taꞌaneyei ne einamisiya. 13 Fene yaꞌariyei lo peri umasiye su, fene Owane Sitewi lo peri wiyeme aꞌi au yahowaꞌi iro tepaꞌasiye. Fene yaꞌariyei lo peri lu eimane yoꞌorei maꞌe au teꞌe atuatu areiyeteye. Sosu fene yaꞌariyei lo yo seni tomu neꞌese au teꞌe areiyeye ape, fene yo seni werese ape umasi tepaꞌasiye.”
Jisas lai meni eime sepei luwaru aꞌi ape au taꞌane sasarisawi.
14 Sosu aꞌi pe Jisas lu taune werese le maꞌe ei taꞌuwerai. Sosu le lowe maꞌe apou eiye, “Fene werese peri ano wanure! Sosu peri lo sitewi wanu soꞌoruwere. 15-16 Etiri werese lu taune tamo ene ayei su, ayei ape lire papu wirowa. Ayei werese ape lire maꞌe unou aꞌi au irorowata. Ahowa, etiri werese, marepi papu irosiya ape, ahi nowe maꞌe heneraiyei su, etiri ape mo lai meni ape au luwaru unouwerowa.”c 17 Sosu Jisas peri ape teꞌe tepaꞌasiye su, le lu disaipel lo mase lu taune werese arunatiyewe, wesi ta papu wiye. Wesi ta papu wiye su, lowe le maꞌe peri anowe lo ape ne teꞌe toweriye. 18 Sosu Jisas lowe maꞌe apou itiyaꞌu eiye, “Fene peri anowe lo sitewi soꞌoru taꞌama awere? Ayei werese ape lo meni ta papu wiyei su, ayei ape lire maꞌe unouwerowata. Fene peri ape soꞌoru taꞌama awere? 19 Ayei werese fene ene ayei ape, lire fene lo papu wiyei. Ayei werese apou ape mo marepi papu wirowata. Ahowa, ayei werese lire papu wiyei su, sosu nowe maꞌe li se tu funarirowa.” Serai Jisas apou au teꞌe areiyeye, ayei werese wisere aꞌi ene arowa. 20 Jisas lowe maꞌe apou teꞌeye, “Etiri werese ape mo marepi nowe maꞌe henerowa. Etiri werese ape mo lai meni ape au luwaru unouwerowa. 21 Etiri tomu neꞌese, marepi sahe irosiya ape, sosu ahi nowe maꞌe henerowa su, etiri ape mo lai lu taune werese au luwaru unouwerowa. Marepi luwaru aꞌi toteyei, tafaꞌe yo seni luwaru aꞌi toteyei, etiri taꞌarei aniyei ne toteyei, meni ta aine teraꞌeyei marepi toteyei. Naituwei au luwaruweyei. 22 Etiri tamo nihe siye wisereyeyei, yo seni luwaruweyei, peri wawero aꞌi teꞌeyei, lu tamo taune siye wisereyeyei, meni iyape se lo yaru aniyei ne toteyei, teꞌe naru tiyatiyei, ane aꞌi tote wisereyesiya, marepi luwaru tote meremereyeyei. 23 Etiri luwaru werese aꞌi ape, marepi papu irosiya ape lai, ahi nowe maꞌe heneraisiya. Etiri werese ape mo lai lu taune werese au luwaruwe unouwesiya.”
Menitani omo Fonisia sahe Jisas ne wanu tote tawesiteye.
24 Sosu aꞌi pe Jisas lu disaipel lo mase wesi ape arunatiyewe, omo pani Taia maꞌe fi. Omo Tair maꞌe henerai su, lowe wesi ta eresene fareyareyei aꞌi wiyei ne toteye. Ahowa, lu taune tomu neꞌese lowe wesi ape wiyei siyeye. 25 Sosu menitani ta Jisas wesi tereꞌe ape wiyei wanuwe su, le wesi ape papu wiye. Witane aꞌi Jisas maꞌe lowe uporo apeꞌi onuri. Menitani ape lo eime taune oso ape sepei luwaru aꞌi lire papu iroteye. 26 Menitani ape lu tewi tereꞌe maꞌe fai. Nihari lo tereꞌe iyape Saria Fonisia. Menitani ape Juda lo yo peri umasi taꞌame. Sosu menitani ape Jisas maꞌe apou ei toweriye, “Ne sepei luwaru aꞌi ape eime taune ano, marepi hepene papu irosiya ape, au taꞌane sasarisawire!” 27 Jisas le maꞌe itiyaꞌu eiye, “Ane tu wiyawi ano eimane werese maꞌe Juda lo yo peri wanu umasisiya ape, au taꞌaneyei. Meni ta eimane lo nau taꞌase anirowawe, sosu you ape maꞌe fu arosawirowa. Yo seni ape luwaru aꞌi ne.” 28 Ahowa, menitani ape le maꞌe itiyaꞌu eiye, “Wiyeme aꞌi! Meni Owane, eimane tamo nau taꞌase ene ayei su, you werese, metei unahi iroteye ape, nau taꞌase tewi oso aꞌi ape, fiyafe sahe winetaiye ape, faraꞌu arowa.” 29 Sosu Jisas le maꞌe itiyaꞌu eiye, “Ne peri ape wiyeme aꞌi teꞌeye. Ne wesi no maꞌe ire! Ane sepei luwaru aꞌi eime taune no lo marepi hepene, papu iroteye ape, au taꞌane sasari tepaꞌasiye.” 30 Menitani Jisas arunatiyewe wesi topo lo maꞌe fi. Wesi lo ape wiye su, le eime taune lo wari sahe howeiteyei siyeye. Sepei luwaru aꞌi lai eime taune lo marepi hepene arunatiyewe, fi.
Jisas lai meni ta apaniye wiyapu, ahi tomute aiwawe aꞌi au taꞌane faraꞌuweye.
31 Sosu aꞌi pe Jisas omo Tair arunatiyewe, omo Saidon maꞌe yaneri. Sosu le omo Saidon arunatiyewe, Hare ite Galili maꞌe heneri. Le Hare Ite Galili arunatiyewe, omo pani Dekapolis heneri. 32 Lu tamo meni apaniye, wiyapu irowe ape Jisas maꞌe henetai. Meni ape lo sorowe peri luwaru aꞌi teꞌeteye. Lowe Jisas maꞌe apou teꞌe toweriye, “Ne ereti no se meni ape hire maꞌe isawe hetesiyere.” 33 Sosu Jisas meni ape pani ariye aꞌi heneti. Le ereti saꞌonare hesi lo se meni ape lo apaniye hesi papu tewi teꞌeniye. Sosu Jisas pisaꞌi ereti saꞌonare sahe tepehowewe, meni ape lo sorowe maꞌe isawe fuwe. 34 Sosu Jisas Owane Sitewi lo omo hire maꞌe siye auweye. Le marepi orese teriteye, heyaneteyei erasi aꞌi irowewe, meni ape maꞌe eiye, “Efata.” Peri si tewi eti lo apou aꞌi ne, “Apaniye tosore!” 35 Pereye aꞌi meni ape lo apaniye toso tepaꞌasiye. Etiri sorowe sahe iroteye ape, tepaꞌasiye. Serai le peri aꞌi teꞌe areiyeteye. 36 Jisas meni ape au taꞌane faraꞌuwe tepaꞌasiye su, le lowe maꞌe apou eiye, “Fene lu taune werese maꞌe owe ape au teꞌe areiyere.” Ahowa, lowe lai peri erasi aꞌi lu taune werese maꞌe au teꞌe areiye fiyariteye.d 37 Lu taune Jisas lo wiyawi erasi pefine aꞌi ape siyeye su, lowe hepene se suꞌariye. Lowe apou au teꞌeye. “Etiri werese lo le taꞌane ape, wisere aꞌi taꞌaneye. Lu tamo apaniye wiyapuweye ape, au taꞌane tosowe. Lu tamo ahi sorowe luwaru aꞌi ape, au taꞌane wisereyeye. Serai lowe peri au teꞌe areiyeteye.”e