11 Sosu aꞌi pe lu Farisi tamo Jisas maꞌe ai marepi teꞌeye. Lowe le maꞌe apou teꞌeye, “Ne Owane Sitewi lo omo maꞌe itorai su, ne nomo maꞌe wiyawi erasi pefine aꞌi au atuatu areiyere. Serai nomo lai, ne, Owane Sitewi maꞌe itorai ape, siye soꞌoruwerowa.” 12 Sosu Jisas peri lowe lo wanuwe su, marepi lo orese erasi iroteye. Le heyaneteyewe, lowe maꞌe eiye, “Piyene lu taune werese nowe pereye irosiya ape, Owane Sitewi lo yaru siyereme awere? Ane peri wiyeme aꞌi ta fene maꞌe teꞌesiya, Owane Sitewi lai fene maꞌe wiyawi erasi pefine aꞌi au atuatu areiyerowata.”^b 13 Sosu Jisas lowe arunatiyewe, wai ape si tame arowatowe. Lowe saꞌi feni eire maꞌe iyatu toneri.

14 Sosu aꞌi pe lu disaipel lo nau taꞌase aitaiyei tote iꞌaneye. Lowe nau taꞌase taꞌi aꞌi wai papu aitai. 15 Jisas lowe maꞌe peri kairefi aꞌi au eiye, “Weiyai! Fene Farisi lo wawe saꞌi owe ape totere. Sosu Herot lo wawe saꞌi owe ape totere.”^c 16 Lu disaipel lo teꞌe tiyatiteye, “Nomo nau taꞌase iꞌaneye. Serai nomo lau erasi aꞌi irorowa.” 17 Jisas peri lowe lo teꞌeteye ape wanu soꞌoruwe aꞌi ne. Sosu lowe maꞌe teꞌe toweriye, “Fene piye peri teꞌe tiyatisiya awere? Fene peri ano siye soꞌoru taꞌama awere? Marepi fene lo kairefi aꞌi awere?^d 18 Fene nihe se, fene wiyawi ane taꞌaneye ape, siye taꞌame awere? Fene apaniye se fene peri ano ane teꞌeteye ape, wanu taꞌame awere? Sosu fene etiri werese ane taꞌaneteye ape, tote iꞌaneye awere? 19 Ane nau taꞌase tewi pa tewi aꞌi, ani topotowewe, sosu lu (5,000), none isafiyeye su, ipi eiwerou aꞌi foruwe iroteye awere?” Lowe le maꞌe itiyaꞌu eiye, “Nomo ereti feni hesi werese lowe hesi aꞌi (12) ipi sahe so asiteye.”^e 20 Sosu ane nau taꞌase tewi pa tewi aꞌi lu (4,000) aiwawe aꞌi, none isafiyeye su, eiwerou aꞌi foruwe ipi sahe so asiteye awere? Sosu lowe le maꞌe itiyaꞌu eiye, “Nomo ipi ereti feni werese feni hesi aꞌi foruwe so asiteye.” 21 Sosu le lowe maꞌe apou eiye, “Fene wiyawi ape, ane taꞌaneye ape, siye soꞌoru taꞌama awere?”

22 Sosu lowe omo Betsaida lo yo senitewi maꞌe furi. Lu tamo meni ta, nihe pokowe tawesiye ape, le maꞌe henetai. Lowe le maꞌe apou eiye, “Ne meni ape lo nihe maꞌe isawe hetesiyere. Serai le nihe petenerowa.” 23 Sosu Jisas meni ape ereti se aniteyewe, omo nowe maꞌe heneti. Sosu le pisaꞌi nihe lo maꞌe topohowe. Sosu le ereti lo se meni ape hire maꞌe isawi hetesiyeye. Jisas lai le se peri ta ei toweriye, “Ne etiri ta siyesiya awere? Piyete awere?” 24 Sosu meni ape nihe hire maꞌe siye aroweye. Sosu le apou eiye, “Ane lu tamo siyesiya. Lowe me wou aꞌi uweisiya.” 25 Jisas meni ape lo nihe sahe ereti tame isawe hetesiyeye. Sosu meni ape nihe petaneye su, le siye etiyewe, etiri werese mi amerame aꞌi siyeye. Nihe lo wisere aꞌi ne. 26 Sosu Jisas meni ape wesi topo lo maꞌe eimawesawi su, le maꞌe eiye, “Ne iyei su, ne omo nepawe maꞌe owe ape wire.”

27 Sosu aꞌi pe Jisas lu disaipel lo mase arunatiyewe, Sisaria Filipai lo omo maꞌe yaneri. Lowe, yo sahe iteye ape, Jisas lowe maꞌe ei toweriye, “Lu taune werese ane ne apou tote teꞌesiya awere? Ane eiwerai awere?” 28 Sosu lowe Jisas maꞌe itiyaꞌu eiye, “Lu tewi tamo ne ne apou teꞌesiya, ‘Ne Jon saꞌi au hu siye meni.’ Lu taune tereꞌe tamo ne ne apou teꞌesiya. ‘Ne meni Elaija.’ Lu taune tereꞌe tamo apou teꞌesiya. Ne Owane Sitewi lo peri au teꞌe siye meni.”^f 29 Sosu Jisas lowe maꞌe apou ei toweriye, “Wanure! Fene ane ne apou teꞌere! Ane eiwerai awere?” Sosu Pita le maꞌe itiyaꞌu eiye, “Ne aꞌi lai Krais wiyeme aꞌi tene! Owane Sitewi Tai wiyeme aꞌi lai ne hi awei maꞌe eimawe arosai.”^g 30 Sosu Pita peri ape teꞌe tepaꞌasiye su, Jisas lowe maꞌe eiye, “Fene werese lu taune ane ne owe ape teꞌe areiyete.”

31 Sosu aꞌi pe Jisas lu disaipel lo maꞌe peri tomu neꞌese au atuatu areiyeye. Le lowe maꞌe apou eiye, “Ane, meni ape, Owane Sitewi hi awei maꞌe eimawe arosai ape, fofowei erasi aꞌi teriterowa. Lu owane tomu neꞌese lai ane ne meꞌiyeni maꞌe arunatirowa. Yaꞌariyei lo lu owane tamo, au heseyei lu owane tamo, sosu Owane Sitewi lo peri siye teꞌe eti siye lu owane tamo, lowe lai Jisas ne meꞌiyeni maꞌe atati arunatirowa. Lowe ane aine teraꞌeyei ne toteye. Lowe ane aine teraꞌeyei su, lowe ane fisiye yo maꞌe furowa. Nowe hesi heta i tepaꞌasirowa su, Owane Sitewi lai ane si tame taꞌane norohuwe sinerowa.” 32 Jisas peri ape lowe maꞌe au teꞌe areiyeteye. Sosu Pita Jisas feni maꞌe heneti. Le Jisas maꞌe ai marepi se apou eiye, “Ne peri ape, ne nomo maꞌe au teꞌe areiyeye ape, owe ape teꞌete!” 33 Ahowa, Jisas lu feni werese atati siyeyewe, le Pita maꞌe ai marepi se peri lo ape au teꞌe fareraiyeye. Le Pita maꞌe eiye, “Sepei Satan, ne meꞌiyeni ano maꞌe teire! Ne Owane Sitewi lo marepi tote umasi taꞌame. Mi mi werese ne awei lo yo seni marepi aꞌi tote tawesi umasinamisiya.” 34 Sosu Jisas lu taune werese, lu disaipel lo mase le maꞌe ei aniye. Sosu le lowe maꞌe apou teꞌeye, “Lu taune tamo ane umasiyei ne toteyei su, le marepi topo lo meꞌiyeni maꞌe atati arunatite. Le me tapeꞌi topo lo pei sutete. Sosu yo peri ano pei umasita.^h 35 Lu taune tamo marepi hepene towafi lowe lo mi mi pasi pasi ironamiyei ne toteyei su, lu taune ape mo, mi mi pasi pasi temeniyerowa. Aiwawe aꞌi, lu taune tamo yo seni ano umasirowa, sosu au teꞌe areiyerowa su, sosu lu tamo lowe aine teraꞌerowa su, lowe marepi hepene heꞌi aꞌi mi mi pasi ironamitorowa. 36 Wanure! Meni ta awei lo etiri werese aniyei su, sosu moꞌo le mi mi pasi pasi yehe omo sahe ironamitorowa. Awei lo yo seni ape wisere aꞌi awere? Ahowa! Meni ape temeniyerowa su, etiri werese lo ape aiwawe aꞌi poꞌuterowa. 37 Lu taune tamo marepi hepene heꞌi eteyei ne toteyei su, lowe piye etiri se au eterowa awere? Ahowa, lu taune werese marepi hepene heꞌi aꞌi eterowata. 38 Pereye nowe eite se lu taune yo seni luwaru aꞌi umasinamisiya ape, ane meni ape, Owane Sitewi lai hi awei maꞌe eimawe arosai ape, lowe ane ne neritaseyeyei irorowa. Aiwawe aꞌi lowe peri ano neritaseyeyei irorowa su, nowe yeꞌewi se, ane Tai lo mitaiyeyei erasi mase, Owane Sitewi lo ipari waraꞌi aꞌi (Ensel) tomu neꞌese mase si awei maꞌe tame itorairowa. Ane lai lowe ne neritaseyeyei irorowa.”ⁱ