2 Nowe poweiye ereti feni werese feni taꞌi aꞌi i tepaꞌasiye su, Jisas lu disaipel lo hesi heta, Pita, Jems, Jon, le lowe omo hire maꞌe hene yaneye. Lu hesiyo hesiyo ape lowe aꞌi omo hire maꞌe iroteye. Sosu lowe omo hire maꞌe iroteye su, Owane Sitewi lai Jisas lo nihari mitaiyeyei erasi au iro tewi mitaiyeye. 3 Jisas lo ipari tahe aiwawe aꞌi wapo mitaiyeyei erasi aꞌi irowe. Lu werese ipari tahe wapo aꞌi apou wou aꞌi saꞌi au hurowata. 4 Sosu lu hesi Owane Sitewi lo omo maꞌe itoraiyewe, Jisas mase teiteye. Lu hesi lo iyape Elaija, sosu Moses. Lowesi Jisas mase teꞌe tiyateye. 5 Sosu Pita Jisas maꞌe apou eiye, “Atuatu siye meni owane, nomo lai ne mase irosiya. Eite wisere aꞌi ne. Nomo ipo wesi hesi heta taꞌaneyei. Wesi no taꞌi au taꞌaneyei, Wesi taꞌi Moses lo au taꞌaneyei, sosu wesi taꞌi Elaija lo au taꞌaneyei.” 6 Pita peri ape teꞌeye su, le marepi topo lo ape soꞌoru taꞌama. Lowe werese atoweiye erasi iroteye. 7 Pita peri lo ape teꞌe tepaꞌasiye su, niꞌarawe erasi aꞌi itorai. Niꞌarawe ape lowe werese napetuwe. Sosu peri noꞌu erasi aꞌi niꞌarawe sahe apou teꞌeye, “Meni ape lai meni eime pefine aꞌi ano ne! Peri lo wanu tote tawesi umasire.”^b 8 Peri noꞌu teꞌe tepaꞌasiye su, niꞌarawe ape hire maꞌe perati fiyari poꞌuteye. Sosu Jisas lu disaipel lo hesi heta aꞌi (8) sato teiteye. Lu hesi ape Owane Sitewi lo omo hire maꞌe si wiye.

9 Sosu aꞌi pe Jisas lu disaipel lo ape omo hi maꞌe itorai. Jisas lowe maꞌe peri kairefi aꞌi se apou eiye, “Fene lu taune werese etiri ape, ne fene siyeye ape, owe ape au teꞌe fiyarite. Meni ape, Owane Sitewi lai hi awei maꞌe eimawe arosai ape, ane temeniyerowa, sosu si tame taꞌane norohuwe sinerowa su, fene faraꞌu lu taune maꞌe au teꞌe fiyaritowa.” 10 Lu disaipel lo peri ape wanuwe su, lowe peri ape ne teꞌe tiyatiteye, “Peri ape lo sitewi eti si tame taꞌane norohuwe sinerowa. Piye peri lo sitewi teꞌesiya awere?” 11 Sosu lowe le maꞌe apou teꞌe toweriye. “Owane Sitewi lo peri teꞌe eti siye lu owane tamo, lowe apou teꞌeteye, ‘Meni Elaija tu henerairowa.’ Lowe piyene peri ape au teꞌeteye awere?” 12 Sosu Jisas lowe maꞌe itiyaꞌu eiye, “Peri lowe lo wiyeme aꞌi ne. Meni Elaija tu henerairowa. Le henerairowa su, le etiri werese au fareraiyerowa. Sosu aiwawe aꞌi ane meni ape, Owane Sitewi lai hi awei maꞌe eimawe arosai ape, ane fofowei tomu neꞌese teriterowa. Lu owane werese ane ne meꞌiyeni maꞌe atati arunatirowa. Piyene lowe peri ape leseye awere?^c 13 Ahowa, ane fene maꞌe eisiya, meni Elaija fai. Lu tewi ape le maꞌe marepi lowe lo se au luwaruweye. Tu naifa weriyei meni ta Elaija ne apou ape leseye.”^d

14 Sosu aꞌi pe lowe lu disaipel lo maꞌe si tame itori. Lowe lu taune tomu neꞌese lu disaipel lo maꞌe taꞌuweraiyei siyeye. Owane Sitewi lo peri siye teꞌe eti siye lu tamo lowe Jisas lo lu disaipel maꞌe ai peri erasi teꞌe tiyatiteye. 15 Pereye aꞌi lu taune werese Jisas aiyeyei siyeye. Lowe hepene se suꞌariye. Lowe le maꞌe itape iterotiyewe, lowe le maꞌe au teꞌe wisereyeye. 16 Sosu Jisas lowe maꞌe apou ei toweriye. “Fene ai peri ta lowe maꞌe teꞌe tiyatisiya awere?” 17 Sosu meni ta le maꞌe itiyaꞌu eiye, “Atuatu siye meni owane, ane meni eime ano lu disaipel no maꞌe henetai. Meni eime ano sepei luwaru aꞌi lire papu irosiya. Sepei luwaru aꞌi ape lai meni eime ano lo ahi ani tomoꞌuteye. 18 Sosu sepei ape meni eime wi yaꞌoreye su, sepei ape le hi awei maꞌe fu arowe. Le ahi pisaꞌi wapo aꞌi heneraiteye. Meni eime pi taꞌani fekeke tawesiye. Tahe paꞌare lo kairefi nonoꞌoweye. Ane lu disaipel no maꞌe apou ei toweriye, ‘Sepei luwaru aꞌi, meni eime ano papu irosiya ape, fene sepei luwaru aꞌi ape au taꞌane sasarire. Lowe au taꞌane sasarirowata.’” 19 Sosu le lowe maꞌe itiyaꞌu eiye, “Fene, pereye irosiya ape, fene Owane Sitewi lo yo seni werese wanu tote tawesi taꞌame. Piye nowe ta se ane fene arunatiyei awere? Nowe tomu neꞌese ane marepi orese aꞌi fene lo teriteye. Piye nowe ta se fene kairefi aꞌi teiyei awere? Meni eime ape, sepei luwaru aꞌi papu irosiya ape, ane maꞌe heneta.” 20 Sosu lowe meni eime ape Jisas maꞌe henetai. Sepei luwaru ape Jisas siyeye su, witane se aꞌi le meni eime ape hi awei sahe fu arowe. Sepei ape lai meni eime ape meremereyeyei au irowe. Le awei sahe howei nowerititeye. Sosu le pisaꞌi wapo aꞌi ahi yo maꞌe topoho arosaiteye. 21 Sosu Jisas meni eime ape lo aite maꞌe apou ei toweriye, “Eiwerou su u tahe ape henerai awere?” Aite lo itiyaꞌu eiye, “Meni eime oso aꞌi iroteye su, sepei luwaru aꞌi ape lai papu wiye. 22 Nowe tomu neꞌese sepei luwaru aꞌi ape lai meni eime ano yehe, saꞌi sahe fu arowe. Sepei luwaru aꞌi ape lai meni eime aine teraꞌeyei ne toteye. Ne nomo au tote ferafereiyei su, ne sepei luwaru aꞌi ape au taꞌane sasarisawire!” 23 Sosu Jisas le maꞌe itiyaꞌu eiye, “Ne Owane Sitewi ne tote tawesiyei su, ne aꞌi lai sepei luwaru aꞌi ape au taꞌane sasarisawirowa. Lu taune werese Owane Sitewi ne tote tawesiyei su, lowe etiri werese werese au taꞌanerowa.”^e 24 Witane aꞌi meni eime lo aite Jisas maꞌe peri erasi apou uteye, “Ane Owane Sitewi ne tote tawesiye. Tote tawesiyei ano oso aꞌi su, ne lai tote tawesiyei ano au kairefiyere.” 25 Sosu Jisas lu taune tomu neꞌese witane aꞌi taꞌuweraiyei siyeye su, le sepei luwaru aꞌi ape maꞌe ai peri eiye, “Ne sepei luwaru aꞌi ahi tomoꞌute tawesiye ape, apaniye teꞌene tawesiye ape, ne meni eime ape arunatirowawe, nowe maꞌe henera. Ne meni eime ape papu si tame owe ape wire.” 26 Sepei luwaru aꞌi ape hareyei erasi uteye su, le meni eime hi awei sahe fu arowewe, nowe maꞌe henerai. Meni eime ape hi awei sahe howeiteye, temeniyeyei wou aꞌi ne. Lu taune tamo apou teꞌeye, “Meni eime ape pefine temeniyeye.”^f 27 Ahowa, Jisas meni eime ereti se aniteyewe, si au taꞌane norohuwe sineye. Sosu meni eime sineteye. 28 Sosu Jisas lu taune werese arunatiyewe, wesi ta papu wiye. Nowe meꞌiye su, Jisas lo lu disaipel le maꞌe peri ta apou teꞌe toweriye, “Piyene nomo lai sepei luwaru ape au taꞌane sasarisawi taꞌame awere?” 29 Sosu Jisas lowe maꞌe itiyaꞌu eiye, “Fene sepei luwaru aꞌi apou ape au taꞌane sasarisawiyei ne Owane Sitewi maꞌe teꞌe towerite.”

30 Sosu aꞌi pe Jisas lu disaipel lo aiwawe wesi ape arunatiyewe, lowe omo pani Galili maꞌe fi. Lowe eresene fareyare aꞌi fi. Le lowe maꞌe eiye, “Fene lu taune werese maꞌe, ane eiwerou maꞌe irosiya ape, peri owe ape teꞌe fiyarite.”^g 31 Sosu Jisas lu disaipel lo maꞌe apou au teꞌe atuatuteye, “Meni ape, Owane Sitewi lai hi awei maꞌe eimawesai ape, meni ta lai ane awei lu owane maꞌe etiyei ne henetirowa. Lowe ane aine teraꞌeyei ne toterowa. Lowe ane aine teraꞌerowawe, lowe ane fisiye yo papu furowa. Ane fisiye yo papu nowe hesi heta sato howei tepaꞌasirowa su, Owane Sitewi lai ane si taꞌane norohuwe sinerowa.”^h 32 Ahowa, lu disaipel lo peri sitewi ape soꞌoru taꞌama. Lowe le maꞌe teꞌe toweriyei ne atoweiyeye.ⁱ

33 Sosu aꞌi pe lowe omo Kaperneam maꞌe henerai. Lowe wesi tereꞌe ta wiye su, Jisas lu disaipel lo maꞌe apou ei toweriye, “Fene piye peri teꞌe tiyatiteye awere?” 34 Ahowa, lowe werese peri se taꞌama. Lowe peri ta apou teꞌe tiyatiteye, “Eiwerai meni tutawe heneraiyei awere?” 35 Sosu Jisas me tutoꞌu sahe onuwewe, lu disaipel lo werese maꞌe ei aniye. Le lowe maꞌe eiye, “Meni ta tutawe heneraiyei ne toteyei su, le yaru yeꞌewi maꞌe henerairowa. Le lu taune werese maꞌe wiyawi yahowaꞌi aꞌi henerairowa.”^j 36 Sosu le meni eime oso ta ereti se aniteyewe, lowe ponei sahe au teiye. Le meni eime oso ereti se yaꞌoreteye su, lowe maꞌe eiye, 37 “Lu taune ta meni eime eito eite iyape ano se au isafiye wisereyeyei su, le lai ane au isafiye wisereyeyei. Meni ape ane ne au isafiye wisereyeyei su, le tai ano maꞌe aiwawe aꞌi au isafiye wisereyeyei. Tai ano lai ane hi awei maꞌe eimawe arosai.”^k

38 Sosu aꞌi pe Jon lai Jisas maꞌe eiye, “Atuatu siye Meni Owane, nomo meni ta iyape no se sepei luwaru au taꞌane sasarisawiyei siyeye. Nomo meni ape einamiye. Le nomo mase umasi taꞌame.” 39 Ahowa, Jisas le maꞌe itiyaꞌu eiye, “Fene meni ape owe ape einamite. Meni ta iyape ano se wiyawi erasi pefine aꞌi taꞌaneyei su, le ane ne peri au teꞌe narurowata. 40 Meni ta nomo maꞌe ai aturowata, le nomo mase ironamitorowa.^l 41 Ane fene maꞌe peri wiyeme aꞌi au teꞌesiya. Meni ta fene yo peri ano umasiteye ape, le saꞌi naretei fene maꞌe au ayei su, Owane Sitewi lai le maꞌe etiri wisere aꞌi ta aurowa.^m

42 Meni eime oso eito eite, yo peri ano umasiteye ape, lu taune tamo meni eime ta yo seni luwaru aꞌi au atuatuwei su, Owane Sitewi lai meni ape ai marepi erasi aꞌi toterowa. Owane Sitewi lo ai marepi apou wou aꞌi ne. Lu tamo meni ape tapiye erasi aꞌi pereꞌi sahe wafei se ti tawesirowawe, saꞌi papu fusawirowa. 43 Aiwawe aꞌi ereti fene lo lai yo seni luwaru aꞌi ta maꞌe au irowei su, fene ereti ape aine tou fusawire. Fene Owane Sitewi lo omo hire maꞌe ereti taꞌi aꞌi se wirowa. Eite wisere aꞌi ne. Fene yehe omo maꞌe ereti hesi aꞌi se yo seni luwaru aꞌi ta maꞌe au irowei. Eite luwaru aꞌi ne. 44 {Yehe omo sahe iꞌere oso oso aꞌi weriyei weriyei ironamitorowa. Sosu yehe ape weriyei weriyei ironamitorowa.}^no 45 Aiwawe aꞌi lowe fene lo lai yo seni luwaru aꞌi ta maꞌe au irowei su, fene lowe ape aine tou fusawire. Fene Owane Sitewi lo omo hire maꞌe lowe taꞌi aꞌi se wirowa. Eite wisere aꞌi ne. Fene yehe omo maꞌe lowe hesi aꞌi se yo seni luwaru aꞌi ta maꞌe au irowei. Ape luwaru aꞌi tene! 46 {Yehe omo sahe iꞌere oso oso aꞌi weriyei weriyei ironamitorowa. Sosu yehe ape weriyei weriyei ironamitorowa.}^p 47 Sosu aiwawe aꞌi nihe fene lo lai yo seni luwaru aꞌi ta maꞌe au irowei su, fene nihe ape ani tahe ani fusawire. Fene Owane Sitewi lo omo hire maꞌe nihe taꞌi aꞌi fa irote. Ape wisere aꞌi ne. Fene yehe omo maꞌe nihe hesi aꞌi se yo seni luwaru aꞌi au irowei su, ape luwaru aꞌi tene!^q