10 Sosu Jisas peri teꞌe tepaꞌasiye su, le lu disaipel lo mase wesi papu wiye. Lu disaipel lo le maꞌe peri ape lo sitewi ne teꞌe toweriye. 11 Jisas lowe maꞌe itiyaꞌu eiye, “Meni ta tani lo aite mai maꞌe eimawesawirowawe, menitani tereꞌe naituwei su, meni ape tafaꞌe yo seni luwaru aꞌi tani heꞌi aꞌi lo maꞌe irowei.^a 12 Sosu aiwawe aꞌi menitani ape meni heꞌi aꞌi lo arunatirowawe, meni tereꞌe naituwei su, menitani ape tafaꞌe yo seni luwaru aꞌi meni lo maꞌe irowei.”

13 Sosu aꞌi pe lu taune tomu neꞌese eimane oso oso aꞌi Jisas maꞌe ereti lo se fa isawe hetesiyeyei ne henetai. Jisas lo lu disaipel lowe maꞌe ai marepi se einamiteye. 14 Jisas etiri ape siyeye su, le lu disaipel lo maꞌe ai peri erasi apou eiye, “Eimane oso ape ane maꞌe henetaire. Fene lowe ane maꞌe aiyeyei ne owe ape einamire. Owane Sitewi lo marepi eimane eitou eite wou aꞌi totesiya. 15 Peri ano wiyeme aꞌi tene! Wanuwe! Ane fene maꞌe eisiya, meni ta Owane Sitewi lo omo hire maꞌe wiyei ne toteyei su, le eimane wou aꞌi Owane Sitewi lo marepi tote tawesi umasirowa. Meni ta eimane wou aꞌi Owane Sitewi lo marepi tote tawesi taꞌame su, le Owane Sitewi lo omo hire maꞌe wirowata.”^b 16 Sosu le eimane werese ereti lo se yaꞌoreyewe, lowe maꞌe ereti lo se isawe hetesiyeye. Le lowe maꞌe au teꞌe wisereyeteye.

17 Sosu aꞌi pe Jisas lowe werese arunatiyewe, omo pani maꞌe fi. Meni ta Jisas siyeye su, le Jisas maꞌe iterotai. Le Jisas maꞌe lowe uporo apeꞌi onuwewe, le maꞌe ei toweriye, “Atuatu siye meni wisere aꞌi ne, Ane mi mi pasi pasi ironamiyei ne toteyei. Ane eiwerou irowei su, weriyei weriyei iroteyei awere?” 18 Sosu Jisas le maꞌe itiyaꞌu eiye, “Ne piyene ane meni wisere aꞌi teꞌeye awere? Owane Sitewi taꞌi aꞌi wisere aꞌi tene! 19 Ne Owane Sitewi lo yo peri soꞌoruwesiya tene!

23 Sosu Jisas lu taune maꞌe atati siye etiye. Le lu disaipel lo maꞌe apou eiye, “Meni ta maꞌaru tomu neꞌese iroteyei su, le Owane Sitewi lo omo hire ape eiwerou wirowa awere? Meni ta maꞌaru topo lo marepi erasi aꞌi toteteyei su, le Owane Sitewi lo omo hire maꞌe wirowata.” 24 Lu disaipel lo Jisas lo peri wanuwe su, lowe hepene se suꞌariye. Ahowa, Jisas lowe maꞌe itiyaꞌu tame eiye, “Fene eimane wou aꞌi ne! Meni ta etiri maꞌaru tomu neꞌese irosiya ape, Owane Sitewi lo omo hire maꞌe wiyei ne toteyei su, le omo hire maꞌe wirowata. 25 Fene faraꞌu fe kamel ta niꞌari lo yo papu feni maꞌe niꞌariye ani tahe aniyei awere? Ahowa! Meni ta fe kamel ape niꞌari lo yo papu feni maꞌe niꞌariye ani tahe anirowata. Sosu aiwawe aꞌi meni ta lai, maꞌaru, etiri tomu neꞌese irosiya ape, Owane Sitewi lo omo hire maꞌe wirowata.” 26 Lu disaipel lo maꞌe hepene erasi aꞌi se suꞌariye. Lowe le maꞌe teꞌe toweriye, “Eiwerai Owane Sitewi lo omo hire maꞌe wirowa awere? Eiwerai marepi hepene heꞌi weriyei weriyei irotorowa awere?” 27 Jisas lowe maꞌe siye etiyewe, lowe maꞌe itiyaꞌu eisiya. “Lu taune werese marepi towafi lowe lo umasiyei su, lowe aꞌi lai omo hire maꞌe wirowata. Ahowa, owe etiri ta Owane Sitewi aꞌi lai faraꞌu au taꞌanerowata.” Owane Sitewi lai kairefiyeyei lo se etiri werese aꞌi faraꞌu taꞌanerowa. 28 Sosu Pita le maꞌe eiye, “Siyere! Nomo etiri werese nomo lo arunatiyewe, ne moꞌo umasiteye.” 29 Sosu Jisas apou eiye, “Wanure! Peri ano wiyeme aꞌi tene! Ane fene maꞌe eisiya. Lu taune tamo wesi towafi lowe lo, einei, airu, paꞌise towafi lowe lo, aite mai towafi lowe lo, eimane, taꞌaneyei awei towafi lowe lo arunatirowawe, sosu Owane Sitewi lo peri lu taune tereꞌe maꞌe au teꞌe fiyariyei ne iyei su, 30 lowe etiri werese lowe lo arunatiyei ape, nowe pereye ape se lowe etiri tomu neꞌese anirowa. Wesi tomu neꞌese, einei, airu, paꞌise tomu neꞌese, aite, mai, eimane tomu neꞌese, taꞌaneyei awei tomu neꞌese, lowe etiri tomu neꞌese ape anirowa. Lu tamo lowe maꞌe au luwaruwerowa su, sosu nowe yeꞌewi se, lowe mi mi pasi pasi ironamitorowa. 31 Ahowa, lu taune tamo yaru tutawe heneraiyei ne toteyei su, lowe yaru yeꞌewi maꞌe teitorowa. Sosu aiwawe aꞌi lu taune tamo yaru yeꞌewi irorowa su, lowe yaru tutawe maꞌe irotorowa.”^c

32 Sosu aꞌi pe lowe lu taune werese arunatiyewe, omo Jerusalem maꞌe fi. Jisas yo ape sahe tu fi. Sosu lu disaipel lo moꞌo umasiteye. Lowe marepi hepene se suꞌariye. Lu taune ape mo Jisas moꞌo umasiteye ape, lowe marepi atoweiyeye. Sosu Jisas lu disaipel lo feni eire maꞌe henetiyewe, lowe maꞌe etiri werese le maꞌe heneraiyei ape, au teꞌe areiyeteye. 33 Le lowe maꞌe eiye, “Wanure! Nomo omo Jerusalem maꞌe yaneyei. Meni ape, Owane Sitewi lai hi awei maꞌe eimawe arosai ape, lu tamo ane ereti wafei se ti tawesirowawe, au heseyei lu owane tamo maꞌe henetirowa. Au heseyei lu owane, sosu Owane Sitewi lo peri soꞌoruwe siye lu owane tamo, lowe ane etiyei ne henetirowa. Lowe ane ne apou teꞌerowa, ‘Meni ape fa temeniyere.’ Sosu lowe ane awei lo lu owane maꞌe henetirowa. 34 Lu ape mo lai ane maꞌe teꞌe narurowa. Lowe ane maꞌe pisaꞌi topoho seneꞌirowa. Lowe wafei se meꞌiyeni ano maꞌe ainerowa. Sosu lowe ane aine teraꞌerowa. Ane fisiye yo papu poweiye hesi heta howei tepaꞌasirowa su, ane si norohuwe sinerowa.”^d

35 Sosu aꞌi pe Jems, sosu paꞌise Jon, Sebedi lo eimane hesi, lowesi Jisas maꞌe peri ta teꞌe toweriyei ne fai. Lowesi le maꞌe teꞌeye, “Atuatu siye Meni Owane, notosi ne maꞌe peri ta teꞌe toweriyei, Ne faraꞌu etiri ta notosi maꞌe fa aure.” 36 Jisas lowesi maꞌe itiyaꞌu eiye, “Fenesi piye etiri ta ane fenesi maꞌe auwei awere?” 37 Sosu lowesi le maꞌe apou teꞌe toweriye, “Ne Meni Owane Pefine mitaiyeyei erasi aꞌi se heneraiyei su, ne notosi ereti eyate feni maꞌe, ereti opi feni maꞌe onuwei ne aure. Notosi kairefi no se papu irotorowa.” 38 Ahowa, Jisas lowesi maꞌe itiyaꞌu eiye, “Fenesi peri ape lo si tewi soꞌoru taꞌama. Fenesi faraꞌu siye awe ano se saꞌi ayei awere? Ane saꞌi se au huwei su, fenesi faraꞌu saꞌi ape se ani huwei awere?”^e 39 Sosu lowesi le maꞌe itiyaꞌu eiye, “Ei, notosi siye awe no se saꞌi ayei. Sosu notosi saꞌi no se aiwawe aꞌi ani huwei.”^f 40 “Owane Sitewi aꞌi lai ereti eyate feni, ereti opi feni maꞌe ano ariariye tepaꞌasiye. Eiwerai ereti eyate feni, ereti opi feni maꞌe onurowa awere? Etiri ape ane lai au ariariyerowata.” 41 Lu feni tereꞌe werese lo peri lowesi lo wanuwe su, lowe Jems, Jon ne ai peri erasi toteye. 42 Sosu Jisas lu feni werese lo le maꞌe ei aniyewe, lowe maꞌe eiye, “Awei lo lu owane werese, lowe lu taune lowe lo maꞌe kairefi se au noweinowei te taꞌame. Lu taune werese ape mo lowe lai lu owane lowe lo se ai peri ape wanuwe su, lowe marepi hepene tahe lowe lo orese erasi aꞌi teriteteye.^g 43 Ahowa, fene awei lo lu owane lo yo seni luwaru aꞌi wou umasi taꞌame. Meni ta meni owane erasi aꞌi heneraiyei ne toteyei su, le lu taune maꞌe wiyawi yahowaꞌi pei henerairowa.^h 44 Lu taune tamo tutawe heneraiyei ne toteyei su, lowe wiyawi yahowaꞌi ani siye lu fa heneraire! 45 Peri ano wiyeme aꞌi tene! Meni ape, Owane Sitewi lai hi awei maꞌe eimawe arosai ape, ane lai meni owane pefine aꞌi heneraiyei ne fai taꞌama. Opiya! Ane lu taune maꞌe wiyawi yahowaꞌi irowei ne fai. Ane lai marepi hepene ano lu taune tomu neꞌese ne temeniyerowa. Ane lai lu taune werese si tame ete hene anirowawe, sosu lowe maꞌe marepi hepene heꞌi aseyaro aꞌi aurowa.”

46 Sosu aꞌi pe Jisas lu disaipel lo mase omo Jeriko maꞌe henerai. Lowe lu taune tomu neꞌese mase omo Jeriko nowe maꞌe arunatiyewe fi su, meni ta nihe pokowe nisoꞌuwe tawesiteye ape, yo mai tewiye sahe onuteye. Meni ape iyape Bartimeus. Aite lo iyape Timeus. Le yo tewiye sahe lu taune lo maꞌaru yahowaꞌi ei aniyei ne onuteye. 47 Meni ape peri noꞌu erasi wanuwe su, le apou ei toweriye, “Eiwerai aiyesiya awere?” Lowe apou itiyaꞌu le maꞌe eiye, “Meni ape Jisas omo Nasaret maꞌe fai ape, aiyesiya.” Le peri erasi Jisas maꞌe hare uteye, “Jisas ne yaꞌariyei Devit lo meni eime, ne ane ne ferafereire!” 48 Lu taune tomu neꞌese meni ape lo peri wanuwe su, lowe meni ape maꞌe ai peri se eiye, “Ne peri sawa!” Ahowa, meni ape peri erasi tame hare uteye, “Yaꞌariyei Devit lo meni eime, ne ane ne ferafereire!” 49 Sosu Jisas peri lo wanuwe su, le meni ape ei aniye. Lu tamo meni ape maꞌe eiye, “Marepi no tote kairefiyere! Sinere! Le ne ei aniye.” 50 Meni ape peri lowe lo wanuwe su, le ipari tahe lo ani tahe fusawiyewe, itero sineteyewe, Jisas maꞌe fi. 51 Sosu Jisas le maꞌe apou ei toweriye, “Ane ne maꞌe eiwerou irowei ne totesiya awere?” Sosu meni ape nihe pokowe tawesiye ape, le maꞌe itiyaꞌu eiye, “Atuatu siye meni owane, ane etiri werese aꞌi siyeyei ne totesiya.” 52 Sosu Jisas le maꞌe eiye, “Ne wesi no ire! Tote tawesiyei no lai nihe no au petane tepaꞌasiye.” Witane aꞌi meni ape lo nihe petene tepaꞌasiye. Sosu le Jisas moꞌo umasiti.ⁱ