Jisas omo Jerusalem maꞌe meni owane tutawe wou wiye.
11
Sosu aꞌi pe Jisas lu feni mase lu taune tomu neꞌese, lowe omo Jerusalem atahe maꞌe henerai. Lowe omo Betfage, sosu omo Betani iroteye su, le lu disaipel lo hesi aꞌi omo ta eimawesawi. Lowe Omo Oliv atahe aꞌi iroteye. 2 Sosu le lowesi maꞌe eiye, “Fenesi omo feni eire maꞌe ire. Sosu wesi ta omo maꞌe heneri su, fenesi fe donki yene yoꞌorei aꞌi wesi sahe siyerowa. Fe donki ape wafei se ti tawesi teisiya. Fe donki ape tu naifa meni ta lai onu taꞌame. Sosu wafei ape eraurowawe, fe donki ape aiwawe heneta. 3 Meni ta fenesi maꞌe apou ei toweriyei su, ‘Fene piyene fe donki ape wafei erausiya awere?’ Fenesi lowe maꞌe itiyaꞌu teꞌere! ‘Meni Owane nomo lo fe donki ape anireme.’ Sosu witane aꞌi le fe donki fenesi mase eimawesawiyei.” 4 Sosu lowesi Jisas arunatiyewe, wesi omo maꞌe heneri. Lowe fe donki ta yo mai sahe siyeye. Fe donki ape wesi me tau sahe wafei se ti tawesiteye. Sosu lowesi fe donki lo wafei ani erauwe. 5 Sosu lu tamo saro atahe teiteye ape, lowesi maꞌe teꞌe toweriye, “Fenesi piyene fe donki ape lo wafei erausiya awere?” 6 Sosu lowesi Jisas lo peri ape lowe maꞌe apou eiye, “Meni Owane nomo lo fe donki ape aniyei ne totesiya.” Lowe peri ape wanuwe su, lowe apou eiye, “Ei, faraꞌu fe donki ape henetire.” 7 Sosu lowesi fe donki ape Jisas maꞌe heneti. Lowe ipari tahe lowe lo fe donki lo meꞌiyeni maꞌe fu arowe. Sosu Jisas fe donki lo meꞌiyeni hire sahe onuteye. 8 Lu taune tomu neꞌese ipari tahe lowe lo yo mai saro ani tahe lotowe. Lu taune tereꞌe tamo taꞌaneyei awei maꞌe fiyewe, siye towe tamo aniyewe, lowe yo mai sahe lotowe. 9 Sosu lu taune tomu neꞌese tutu iteye, sosu lu taune tamo meꞌiye aiyeteye. Lowe werese peri erasi aꞌi hare uteye,“Meni Owane Pefine aꞌi aiyesiya. Fene werese meni ape maꞌe, Meni Owane Pefine aꞌi lo iyape se aiyesiya ape, au teꞌe wisereye nineꞌite.
10 Fene Owane Sitewi Pefine aꞌi maꞌe au teꞌe wisereyere! Nowe ape se le lai lu taune werese au noweinoweinamirowa ape, aiyesiya. Yaꞌariyei meni owane Devit lo niyene aiyesiya. Meni Owane Pefine aꞌi aiyesiya. Fene iyape lo hire teꞌe ani arowete.” Sng 118:25-26
11 Sosu aꞌi pe Jisas omo Jerusalem maꞌe heneri. Le Owane Sitewi lo wesi tutawe papu wiyewe, etiri werese siyeteye. Sosu le Owane Sitewi lo wesi tutawe arunatiyewe fi. Nowe neriwei su, le lu disaipel lo mase omo Betani maꞌe iyei ne toteye.
Jisas me owarape maꞌe au teꞌe luwaruweye.
12 Nowe moꞌo su, lowe omo Betani arunatiyewe, lowe omo Jerusalem maꞌe fi. Yo mai sahe Jisas lau erasi teriteye. 13 Sosu Jisas me owarape ta eyeri maꞌe teteye ape siyeye. Motowe tomu neꞌese iroteye. Le me owarape ape maꞌe so siyeyei ne fi. Me si sahe teirai su, so werese ariye. Motowe aꞌi iroteye. Me owarape lo nowe, so taꞌesiya ape, henerai se taꞌame.a 14 Sosu le me owarape ape maꞌe apou teꞌeye, “Mi mi weriyei me so werese owe ape taꞌere. Lu taune werese me so no ene arowata.” Lu disaipel lo peri lo wanu tote tawesiye.
Jisas lai lu tamo Owane Sitewi lo wesi tutawe nowe maꞌe ani sasarisawi.
15 Sosu aꞌi pe lowe omo Jerusalem maꞌe heneri. Le Owane Sitewi lo wesi tutawe papu wiye. Le lu tomu neꞌese etiri tamo metei sahe futeyewe, lu taune tamo lai ete aiseraiteye. Jisas metei werese ani aweto terosowewe, lu werese ape mo Owane Sitewi lo wesi tutawe nowe maꞌe ani au sasarisawi. Lu tamo maꞌaru tamo, hese erei tiyatiye ape, le metei lo ani aweto terosowe. Lu tamo irowe sapuwe ereti aniteye ape le me toꞌu werese lowe lo ani aweto terosowe. 16 Lu taune werese, etiri tamo Owane Sitewi lo wesi tutawe papu suteteye ape, le lowe werese wesi ape papu einamiye. 17 Sosu le lowe maꞌe Owane Sitewi lo peri au atuatu teꞌe areiyeye, “Owane Sitewi lo one towe sahe apou leseye,
‘Wesi ano lu taune omo werese ape mo Owane Sitewi maꞌe au teꞌe wisereyeyei ne faraꞌu fa taꞌuweraite. Ahowa, fene Owane Sitewi lo wesi ape taꞌarei wesi wou au iro henerai ne.’” Ais 56:7; Jer 7:11
18 Sosu au heseyei lu owane, sosu Owane Sitewi lo peri soꞌoruwe siye lu owane tamo, lowe Jisas lo peri ape wanuwe su, lowe ai marepi erasi aꞌi Jisas ne toteteye. Serai lowe Jisas aine teraꞌeyei ne toteye. Ahowa, lowe Jisas lo peri ne atoweiyeteye. Lu taune werese Jisas lo peri ape ne, lowe hepene se suꞌariye.b
19 Nowe neriwei su, Jisas lu disaipel lo mase omo Jerusalem arunatiyewe, fi.
Me owarape ape iriyaiyeye.
20 Sosu aꞌi pe nowe moꞌo esi aꞌi su, Jisas lu disaipel lo mase si omo Jerusalem maꞌe fi. Lowe me owarape ape iriyayeyei siyere. Me owarape ape napi, tahe, motowe werese foroꞌowe tepaꞌasiye. 21 Sosu Pita me owarape ape siyeye su, le Jisas lo peri ape ne tote tawesiye. Le Jisas maꞌe apou eiye, “Atuatu siye meni owane, me owarape ape siyere! Ne liyewe me ape maꞌe eiye, ‘Me ape lo so fa luwaruwere!’ Pereye me ape iriyayeye.” 22 Sosu Jisas lowe maꞌe itiyaꞌu eiye, “Fene Owane Sitewi ne tote tawesire. 23 Peri wiyeme aꞌi ano ane fene maꞌe teꞌe areiyesiya. Meni ta faraꞌu omo ape maꞌe apou eiyei su, ‘Ne sinere! Ne hare ite erasi maꞌe yeꞌi arore.’ Meni ape marepi erasi aꞌi se tote tawesiyei su, sosu marepi hesi se tote taꞌame su, le apou toteye, ‘Etiri ape wiyeme aꞌi henerairowa. Ane soꞌoruwesiya tene!’ Serai Owane Sitewi lai etiri ape au irowei ne.c 24 Serai ane fene maꞌe eisiya, fene etiri ta, fene Owane Sitewi maꞌe teꞌe toweriyei ape, fene Owane Sitewi ne tote tawesiyei su, Owane Sitewi lai etiri ape fene maꞌe aurowa.d 25 Sosu aiwawe aꞌi, fene Owane Sitewi maꞌe sine teirowawe, Owane Sitewi maꞌe au teꞌe wisereyeyei su, fene marepi erasi totere! Meni ta lai fene maꞌe au luwaruweye su, fene meni ape lo yo seni luwaru aꞌi fene maꞌe irowe ape, tote iꞌanere! Fene yo seni luwaru aꞌi, meni ta fene maꞌe irowe ape, tote iꞌaneyei su, aite fene lo, omo hire sahe irosiya ape, yo seni luwaru aꞌi fene lo tote iꞌanerowa.”e 26 {Fene yo seni luwaru aꞌi, meni tereꞌe ta fene maꞌe irowe ape, tote iꞌane taꞌame su, Tai fene lo, omo hire maꞌe irosiya ape, yo seni fene lo tote iꞌanerowata.}f
Lu tamo Jisas lo kairefi ne teꞌe toweriye.
27 Sosu aꞌi pe lowe omo Jerusalem maꞌe si tame henerai. Le Owane Sitewi lo wesi tutawe papu wiye su, au heseyei lu owane tamo, sosu Owane Sitewi lo peri soꞌoruwe siye lu tamo, lowe Jisas maꞌe peri ta teꞌe toweriyei ne fai. 28 Lowe le maꞌe apou teꞌe toweriye, “Wiyawi erasi pefine aꞌi no ne, ne etiri ape mo ne iroteye ape, eiwerai ne irowei ne eimawesai awere? Eiwerai kairefi no auwe awere? Eiwerai kairefiyeyei ape ne maꞌe auwe awere?” 29 Sosu Jisas lowe maꞌe itiyaꞌu apou eiye, “Ane peri ta fene maꞌe itiyaꞌu ei towerisiya. Fene ane maꞌe peri wiyeme aꞌi itiyaꞌu au teꞌeyei su, ane faraꞌu fene maꞌe kairefiyeyei ano, ane lu taune maꞌe au taꞌane atuatuteye ape, teꞌe areiyerowa. 30 Jon saꞌi au hu siye meni lu taune maꞌe saꞌi au huteye su, fene eiwerou totesiya awere? Owane Sitewi lai Jon maꞌe au ariariyeye awere? Lu tamo lai au ariariyeye awere? Fene ane maꞌe itiyaꞌu au teꞌe areiyere!” 31 Sosu lowe aꞌi lai apou teꞌe teꞌe tiyatiteye, “Nomo apou teꞌeyei su, Owane Sitewi lai meni ape ariariyeye. Serai le nomo maꞌe itiyaꞌu eiyei, ‘Serai fene piyene meni ape ne tote tawesiteye awere?’ 32 Ahowa, nomo apou eiyei su, ‘Lu tamo meni ape ariariyeye.’ Lu taune werese nomo maꞌe ai peri erasi toteyei. Lu taune werese lai Jon ne Owane Sitewi lo peri au teꞌe siye meni pefine aꞌi ne.” 33 Sosu lowe Jisas maꞌe apou itiyaꞌu eiye, “Nomo soꞌoru taꞌama.” Sosu Jisas lowe maꞌe itiyaꞌu apou eiye, “Ane aiwawe aꞌi, ane fene maꞌe eiwerou au teꞌe areiyerowata. Ane kairefiyeyei ano eiwerai auwe awere? Serai ane wiyawi ape au taꞌaneteye.”