Lu tamo taꞌaneyei awei au noweinoweiteye.
12
Sosu aꞌi pe Jisas au heseyei lu owane maꞌe peri anowe tamo au teꞌeteye. Le lowe maꞌe apou eiye, “Meni ta taꞌaneyei awei taꞌaneteye. Le taꞌaneyei awei lo tewiye maꞌe tapiye fisahe yose taꞌaneye. Meni ape taꞌaneyei awei ape papu awei fisiye yo ta horuseye. Awei fisiye yo ape wiyawi lu tamo wafei wain so papu fu arowe lowe wafei so ape me au se hire aine tapoteye. Sosu le tapiye wesi ta pite aꞌi taꞌaneye. Wiyawi lo taꞌaneye tepaꞌasiye su, le wiyawi lu tamo au noweinoweiyei ne eteye. Sosu meni ape omo pani eyeri maꞌe sewiyeyei ne fi.a 2 Sosu nowe ape se wafei so ape werese pereꞌeyeye ape, meni ape wiyawi meni yahowaꞌi taꞌaneyei awei maꞌe wafei ape lo so saꞌi tewi aꞌi aniyei ne eimawesawi. 3 Wiyawi lu ape mo wiyawi meni yahowaꞌi siye aniye su, lowe meni ape me au se aineyewe, omo topo lo maꞌe ariye aꞌi si eimawesawi. 4 Sosu meni owane ape wiyawi meni yahowaꞌi tereꞌe taꞌaneyei awei maꞌe wafei ape lo so saꞌi aniyei ne eimawesai. Wiyawi lu ape mo meni ape siye aniye su, lowe meni ape lo mato me au se aine tepiꞌowe. Lowe tahe paꞌare lo fofowei aꞌi au luwaruweye. Meni ape neritase erasi aꞌi irowe. 5 Meni owane ape meni tereꞌe lowe maꞌe eimawesawi. Lowe lai meni ape aine teraꞌeyewe, taꞌaneyei awei nowe maꞌe fu arowe. Sosu meni ape wiyawi lu tereꞌe tamo lowe maꞌe wafei so saꞌi aniyei ne eimawesawi. Lu ape mo lai wiyawi tamo me au se aineye. Wiyawi lu tereꞌe tamo aine teraꞌeye. 6 Meni owane ape marepi erasi aꞌi toteye. ‘Ane meni yeꞌewi taꞌi aꞌi lowe maꞌe eimawesawi papa. Ane meni eime ano taꞌi aꞌi eimawesawirowa. Meni eime taꞌi ano, ane lai erasi aꞌi totenamisiya ape, lowe lai meni eime ano wisere aꞌi au noweinowei irorowa.’ 7 Ahowa, wiyawi lu ape mo, meni eime ape siye aniye su, lowe apou tote teꞌe tiyatiteye, ‘Siyere! Meni owane lo meni eime taꞌi aꞌi ape, nomo maꞌe fai ape, siye aniye. Meni owane nomo lo ape temeniyeyei su, meni eime ape lai taꞌaneyei awei eite tesi au noweinoweirowa.’ Wanure! Nomo meni eime ape aine teraꞌeyei. Serai nomo lai taꞌaneyei awei ape tesi au noweinoweirowa. 8 Sosu lowe meni eime ape aine teraꞌeye su, lowe tahe paꞌare lo taꞌaneyei awei nowe maꞌe ani fu arosawi.b 9 Meni owane ape, le taꞌaneyei awei lo wiyawi lu ape maꞌe eiwerou irorowa awere? Wanure! Le lai aiyerowawe, wiyawi lu ape mo werese aine teraꞌerowa. Sosu le wiyawi lu tereꞌe tamo taꞌaneyei awei ape au noweinoweiyei su, ane lu tereꞌe heꞌi ape au eterowa. 10 Fene Owane Sitewi lo peri one towe sahe siye teꞌeteye awere? Wanure!‘Me tou ape wiyawi lu werese lai ani nowe maꞌe ani fusawi. Me tou ape tutawe wesi sahe henerairowa.
11 Meni Owane pefine aꞌi lai etiri ape au taꞌane irowe. Nomo etiri ape siyeye su, nomo marepi erasi aꞌi toteteye.’” Sng 118:22-23
12 Au heseyei lu owane tamo lai lowe Jisas maꞌe ereti wafei se ti tawesiyewe, kalabus maꞌe henetiyei ne toteye. Ahowa, lowe lu taune werese lo ai peri atoweiyeye Jisas peri anowe ape teꞌeye su, le au heseyei lu owane ne au teꞌe areiyeteye. Serai lowe le arunatiyewe fi.
Nomo takis maꞌaru awei meni owane maꞌe auwei awere? Piyete awere?
13 Au heseyei lu owane tamo lai lu Farisi tamo awei meni owane Herot lo lu tewi tamo Jisas maꞌe eimawesawi. Lowe Jisas maꞌe peri wawero wanuwei ne fai. Lowe peri wawero ta Jisas au teꞌeyei su, lowe Jisas etiyei ne toteye.c 14 Sosu lowe Jisas maꞌe peri ta teꞌe toweriyei ne fai. Lowe apou teꞌe toweriye, “Atuatu siye meni Owane, nomo ne meni waraꞌi pefine aꞌi tene! Aiwawe aꞌi lu tereꞌe tamo lai marepi no eterowata. Ne etiri erasi aꞌi ta nati wafei no au heserowata. Ahowa, ne Owane Sitewi lo peri wiyeme aꞌi lu taune werese maꞌe au teꞌe areiyeteye. Ne peri ta nomo maꞌe itiyaꞌu au teꞌesa. Nomo yo peri umasiyei ne totesiya. Nomo faraꞌu takis maꞌaru awei meni owane Sisar auwei awere? Piyete awere? 15 Nomo awei meni owane maꞌe maꞌaru tewi ta auwei awere? Piyete awere?” Jisas marepi luwaru aꞌi lowe lo siye soꞌoruwe tepaꞌasiye. Sosu le lowe maꞌe eiye, “Piyene fene peri ano au areareyei ne totesiya awere? Fene ane maꞌaru tau ausa. Ane siyereme.” 16 Sosu lowe maꞌaru tau Jisas maꞌe aitai. Sosu le lowe maꞌe ei toweriye, “Nihari hepene eiwerou lo awere? Peri ta leseye ape eiwerou lo awere?” Sosu lowe le maꞌe itiyaꞌu eiye, “Nihari hepene ape, Sisar lo ne.” 17 Sosu Jisas lowe maꞌe itiyaꞌu eiye, “Wiyeme tene! Serai fene meni Sisar lo etiri werese ape mo, fene awei meni owane Sisar si tame aure. Sosu aiwawe aꞌi Owane Sitewi lo etiri werese ape mo fene Owane Sitewi maꞌe si aure.” Lu werese ape mo Jisas lo peri wanuwe su, lowe hepene se suꞌariye.d
Lu Sadusi Jisas maꞌe peri ta teꞌe toweriyei ne fai.
18 Sosu lu owane tereꞌe iyape Sadyusi Jisas maꞌe peri ta teꞌe toweriyei ne fai. Lowe apou toteye. “Lu taune werese temeniyeyei su, lowe si norohuwe sinerowata.” Lowe Jisas maꞌe teꞌe toweriye.e 19 “Atuatu siye meni owane, meni Moses yo peri ta apou leseye,
‘Meni ta tani lo naituwe. Nowe meꞌiye, meni ape temeniyeye. Lowesi eimane werese se taꞌama. Serai meni ape lo paꞌise tani lo naiturowa. Sosu lowesi eimane auteirowa. Eimane werese ape meni tu temeniyeye ape lo ne.’ Lo 25:5
20 Lu nairipi ereti feni werese feni hesi aꞌi iroteye. Meni eime poto tani lo naituwe. Nowe meꞌiye ta se meni eime poto temeniyeye. Eimane se taꞌama. 21 Sosu meni eime pafe lai airu lo menitani weiname naituwe. Meꞌiye su pafe temeniyeye. Eimane autei taꞌame. Aiwawe aꞌi pafe lo tani weiname, Henei lai tame naituwewe, sosu temeniyeye. 22 Aiwawe aꞌi lu nairipi werese ape lai tani taꞌi ape aꞌi naituwe. Lu nairipi werese temeniyeye. Sosu menitani ape aiwawe aꞌi temeniyeye. 23 Nowe yeꞌewi se lu taune si norohuwe sinerowa su, lu nairipi werese ape, eiwerai menitani naiturowa awere? Awei sahe lu nairipi werese lai menitani ape naituwe ape, tepaꞌasiye.” 24 Sosu Jisas lowe maꞌe itiyaꞌu eiye, “Fene Owane Sitewi lo peri lo sitewi werese soꞌoru taꞌama. Marepi fene lo luwaru aꞌi irosiya. Fene Owane Sitewi lo kairefi pefine aꞌi soꞌoru taꞌama. 25 Lu taune werese si norohuwe sinerowa su, lu werese taune tamo naiturowata. Aiwawe aꞌi taune werese lu tamo naitu ene arowata. Ahowa, lowe werese Owane Sitewi lo ipari wisere wou aꞌi (ensel) irotorowa. 26 Fene lu taune, si norohuwe sinerowa ape, lo peri totere! Meni Moses one towe sahe leseye. Owane Sitewi lai Moses maꞌe ipo me oso poꞌo yehe lai ti etineye ape teꞌeye. Owane Sitewi lai Moses maꞌe apou eiye,
‘Ane lai Abraham lo Owane Sitewi Pefine aꞌi tene! Ane lai aiwawe aꞌi Aisak lo Owane Sitewi Pefine aꞌi tene! Sosu ane Jekop lo Owane Sitewi Pefine aꞌi tene.’” Kis 3:6
27 Jisas apou eiye, “Le, lu taune temeniyeye ape, lo Owane Sitewi taꞌama. Ahowa, le aꞌi lai lu taune werese, norohu irosiya ape, lo Owane Sitewi pefine aꞌi tene!”
Owane Sitewi lo yo peri tutawe aꞌi ne.
28 Sosu aꞌi pe Owane Sitewi lo peri soꞌoruwe siye meni ta Jisas lo peri wanuwe su, le Jisas maꞌe henerai. Le Jisas maꞌe apou eiye, “Ne lu ape mo lo peri wiyeme aꞌi itiyaꞌu teꞌe areiyeteye. Sosu ane peri ta ne maꞌe ei toweriyei. Owane Sitewi lo yo peri tutawe ne piye peri teꞌesiya awere?”f 29 Sosu Jisas le maꞌe itiyaꞌu eiye, “Owane Sitewi lo yo peri tutawe apou aꞌi teꞌesiya.
‘Israel lo lu taune werese, Peri ano wanu etire! Owane Sitewi Pefine aꞌi nomo lo ne. Le Owane Sitewi Meni Owane Pefine taꞌi aꞌi tene!’ Lo 6:4-5
30 Serai fene Owane Sitewi Pefine aꞌi fene lo ape marepi erasi aꞌi tote wawesiyenamite. Fene lai marepi werese se, hepene werese se, sosu kairefi werese se Owane Sitewi, Meni Owane Pefine aꞌi maꞌe marepi erasi aꞌi tote wawesiyenamite. 31 Owane Sitewi lo yo peri toꞌuresi apou wou aꞌi ne.
‘Fene lu taune tereꞌe tereꞌe maꞌe marepi erasi aꞌi tote wawesiyenamite.’ Wkp 19:18
Owane Sitewi lo yo peri ape mo lowe hesi erasi pefine aꞌi tene. Yo peri tereꞌe lai lowesi maꞌe unahi irosiya.” 32 Sosu Owane Sitewi lo peri soꞌoruwe siye meni ape le maꞌe itiyaꞌu eiye, “Atuatu siye meni owane, peri no wiyeme aꞌi tene! Ne peri ano ane maꞌe wiyeme aꞌi teꞌe areiyeye. Ei, Owane Sitewi, Owane Pefine taꞌi aꞌi ironamisiya. God tereꞌe tereꞌe werese ape mo lowe areareyei ne. 33 Lu taune werese Owane Sitewi Pefine aꞌi maꞌe marepi erasi aꞌi tote wawesiyenamite! Lowe marepi lowe lo werese se, marepi soꞌoruwe werese lowe lo se, kairefi lowe lo werese se, lowe lai Owane Sitewi maꞌe marepi erasi aꞌi tote wawesiyenamite. Sosu aiwawe aꞌi lowe lu taune tereꞌe tereꞌe maꞌe marepi wisere erasi aꞌi tote wawesiyenamite. Apou wou aꞌi lowe tahe paꞌare towafi lowe lo au noweinoweinamisiya. Owane Sitewi lo yo peri hesi aꞌi ape lowe hesi lai Owane Sitewi lo yo peri tutawe aꞌi tene! Lu taune Owane Sitewi lo yo peri hesi ape umasiyei su, lowe fe sipsip Owane Sitewi maꞌe auwei ne aine teraꞌerowata. Aiwawe aꞌi lowe etiri tamo Owane Sitewi maꞌe au heseyei ne aitairowata.”g 34 Sosu Jisas peri ape wanuwe su, le meni ape maꞌe itiyaꞌu eiye, “Ne marepi wisere aꞌi tote teꞌeye. Ne Owane Sitewi lo marepi ataheye henerai.” Sosu lu tereꞌe werese Jisas maꞌe peri ta teꞌe toweri taꞌame. Lowe Jisas lo peri ne atoweiyeye.
Meni ape, Owane Sitewi ariariyeye ape, eiwerai awere?
35 Sosu Jisas lu taune maꞌe Owane Sitewi lo wesi pefine aꞌi papu peri ta au teꞌe areiyeteye. Owane Sitewi lo peri soꞌoruwe siye lu tamo lowe apou au teꞌeye. “Meni Krais ape le Yaꞌariyei nomo lo Devit lo meni eime tene! 36 Yaꞌariyei nomo lo Devit, Owane Sitewi lo Hepene Waraꞌi aꞌi se apou teꞌeye.
‘Meni Owane Pefine aꞌi lai meni owane ano apou eiye, ne ereti eyate feni ano se onura. Ane lai airame werese no ape kairefiyeyei no unahi ani furowa.’ Sng 110:1
37 Meni Devit aꞌi lai meni ape apou eiye, ‘Ne Meni Owane Sitewi ano.’ Serai piyene meni owane ape Devit lo meni eime teꞌesiya awere?” Lu taune werese Jisas lo peri wanuteye su, lowe marepi wisere aꞌi iroteye.
Lu ape mo yo peri au teꞌe atuatuteye ape, fene weiyaiya.
38 Sosu aꞌi pe Jisas lu taune maꞌe peri ta au teꞌe atuatuteye. Le lowe maꞌe eiye, “Fene weiyai! Owane Sitewi lo peri siye soꞌoruweyei siye lu ape mo ne, lowe ipari tahe pitase wisere aꞌi ani asiteye. Lowe maket lo nepawe sahe uweisiya su, lowe lu taune werese iyape lowe lo teꞌe aroweyei ne wanuwei ne totesiya. 39 Lowe Owane Sitewi lo wesi papu sahe me toꞌu tutawe sahe onuwei ne toteye. Lowe taꞌuwe hereiyei ape lo ene ayei me toꞌu tutawe sahe onuwei ne toteye. 40 Lowe taune weiname maꞌe peri wawero ta au teꞌeye. Sosu lowe taune weiname ape lo etiri werese, wesi papu iroteye ape, taꞌarei anisiya. Aiwawe aꞌi lowe Owane Sitewi maꞌe peri pitase aꞌi au teꞌe areareteye. Owane Sitewi lai lu ape mo maꞌe fofowei erasi pefine aꞌi aurowa.”
Menitani weiname ta Owane Sitewi maꞌe maꞌaru tewi oso poꞌo auwe.
41 Sosu aꞌi pe Jisas maꞌaru paꞌare atahe aꞌi sahe onuteye. Le lu taune, Owane Sitewi maꞌe maꞌaru towafi lowe lo auwe ape, siyeyei ne onuteye. Lu taune tamo, maꞌaru tomu neꞌese iroteye ape, lowe maꞌaru tomu neꞌese maꞌaru paꞌare papu futeye. 42 Sosu menitani weiname ta maꞌaru paꞌare maꞌe henerai su, le maꞌaru tewi oso oso poꞌo hesi papu fuwe. Aiwawe aꞌi maꞌaru tau taꞌi aꞌi ne. 43 Sosu Jisas lu disaipel lo le maꞌe ei aniye. Le lowe maꞌe apou eiye, “Ane fene maꞌe peri wiyeme aꞌi au teꞌesiya. Weiname tani ape, le maꞌaru erasi pefine aꞌi Owane Sitewi maꞌe auwe. Lu taune tereꞌe tereꞌe werese Owane Sitewi lo nihe se maꞌaru oso oso aꞌi auwe.h 44 Lu taune tereꞌe tereꞌe ape mo lowe maꞌaru tomu neꞌese irosiya. Serai lowe maꞌaru tewi oso poꞌo Owane Sitewi maꞌe auwe. Ahowa, weiname tani ape maꞌaru werese werese aꞌi lo Owane Sitewi maꞌe auwe. Maꞌaru werese lo poꞌuteye. Le etiri ta piye maꞌaru se eterowata.”