3 Sosu aꞌi pe Jisas lu disaipel lo mase Omo Oliv hire maꞌe yaneye. Le awei sahe onuwewe, Owane Sitewi lo wesi tutawe siyeteye. Sosu lu feni tamo Pita, Jems, Jon, sosu Andru, lowe Jisas maꞌe eresene aꞌi apou teꞌe toweriye. 4 Lowe apou teꞌe toweriye, “Ne nomo maꞌe etiri tamo, meꞌiye heneraiyei ape, nomo maꞌe au teꞌe areiyere! Piye nowe se etiri ape henerairowa awere? Piye yaru nomo siyerowa awere? Serai etiri ape henerairowa.” 5 Sosu Jisas lowe maꞌe peri ta itiyaꞌu au teꞌeye. “Fene Weiyai! Lu tamo lai fene maꞌe peri wawero au teꞌe areareyei ne toterowa. Fene peri wawero lowe lo ape owe wanute! 6 Lu neꞌese iyape ano se aiyerowawe, apou au teꞌeyei, ‘Ane aꞌi lai meni ape tene! Owane Sitewi lai ane fene maꞌe eimawesai.’ Peri ape wawero aꞌi tene! Lowe lu taune tomu neꞌese maꞌe au teꞌe arearerowa. 7 Fene ai atuwei lo peri wanurowa. Ai atuwei lo peri heneruwe wanurowa su, fene owe ape atoweiyere! Etiri werese ape, tu henerairowa. Ahowa, nowe yeꞌewi ape iꞌero henerairowata. 8 Omo ta lo ai lu, omo tereꞌe lo ai lu se ai atu tiyatirowa. Lu tewi ta ai lu tewi tereꞌe se ai atu tiyatirowa. Auwe erasi omo pani tereꞌe tereꞌe werese auseriyerowa. Nowe ape se lau erasi teriterowa. Etiri ape mo tu henerairowa. Menitani ta meni eime auteiyei su, le fofowei erasi teriteyei. Etiri ape mo aiwawe aꞌi ne. Orese nowe ape tu henerairowa.

9 Fene weiyai! Lu tamo fene awei meni owane maꞌe etiyei ne henetirowa. Lowe meꞌiyeni fene lo maꞌe wafei se Owane Sitewi lo wesi papu ainerowa. Fene peri ano wanu umasirowa su, lowe fene awei lu owane tamo maꞌe au teirowawe, fene lowe maꞌe peri ano au teꞌe areiyerowa.^b 10 Serai peri werese ano omo omo pani werese au teꞌe fiyari areiyerowa. 11 Ai lu tamo fene ereti lowe wafei se ti tawesirowawe, lu owane maꞌe henetirowa su, fene owe ape atoweiyere! Nowe ape se fene peri teꞌe areiyere. Owane Sitewi lai fene maꞌe peri lo ape au teꞌerowa. Fene peri towafi fene lo au teꞌe taꞌame. Ahowa, Owane Sitewi lo Hepene Waraꞌi aꞌi lai peri ape lowe maꞌe au teꞌe areiyerowa.^c 12 Meni ta paꞌise lo etiyei ne henetirowawe, aine teraꞌeyei ne toterowa. Meni ta meni eime topo lo ape aine teraꞌeyei ne henetirowa. Meni eime ta lai aite mai topo lo maꞌe ai atu tiyatirowawe, sosu aine teraꞌeyei ne henetirowa.^d 13 Iyape ano fene sahe irorowa su, lu werese fene maꞌe ai marepi luwaru totenamirowa. Ahowa, fene iyape ano se tei kairefiyerowa su, nowe yeꞌewi se fene marepi hepene heꞌi aꞌi ironamirowa.^e

14 Wanure! Fene, peri ape siye teꞌeyei ape, Weiyai! Fene peri ano siye soꞌoruwere” Sosu Jisas lowe maꞌe au teꞌe areiyeye, “Fene etiri luwaru aꞌi, Owane Sitewi lo wesi tutawe papu au teirowa ape, siyerowa su, lu taune werese, omo pani Judia irorowa ape, omo hire maꞌe fareyareyei ne iteroti. Etiri luwaru aꞌi ape lai Owane Sitewi lo wesi tutawe ne au teꞌe naruwei ne au irowe.^f 15 Nowe ape se lu taune tamo wesi hire sahe irorowa ape, lowe wesi papu etiri tamo si aniyei ne wirowata.^g 16 Aiwawe aꞌi lu taune tamo taꞌaneyei awei maꞌe, taꞌaneyei ape mo, lowe wesi towafi lowe lo maꞌe etiri aniyei ne si irowata. 17 Ahowa, taune eime tahe se, sosu taune, eimane towafi lowe lo moꞌu au arowa ape, lowe weiyai! Lowe fofowei erasi teriterowa.^h 18 Sosu fene Owane Sitewi maꞌe teꞌe towerite, ‘Nowe ape se nowe naretei aꞌi owe ape heneraite.’ 19 Nowe ape se etiri orese aꞌi omo pani werese napeturowa. Etiri orese aꞌi ape eito eite, tu naifa weriyei Owane Sitewi lai etiri werese taꞌaneye ape, lu taune werese siye taꞌame. Nowe pereye eite se lu taune werese etiri orese aꞌi eito eite ape siye taꞌame. Aiwawe aꞌi nowe meꞌiye su etiri orese aꞌi ape eito eite lu taune werese siyerowata.ⁱ 20 Sosu aiwawe nowe orese aꞌi ape se, Meni Owane Pefine aꞌi lai nowe teꞌe oso aꞌi ariariye taꞌame su, lu taune werese temeniyerowa. Ahowa, lu taune werese, Owane Sitewi lai ariariyeye ape, lowe Owane Sitewi lo yo umasinamirowa su, le nowe orese aꞌi ape teꞌe oso aꞌi ariariyerowa. 21 Sosu meni ta lai fene maꞌe apou eiyei su, ‘Siyere! Meni ape Owane Sitewi lai hi awei maꞌe eimawe arosai ape, irosiya. Aiwawe aꞌi siyere! Meni ape yaro maꞌe irosiya ape, meni ape, Owane Sitewi lai awei hi maꞌe eimawe arosai ape, irosiya.’ Wanure! Peri ape wawero aꞌi tene! Fene peri ape owe ape wanu umasite! 22 Lu tamo apou eiyei su, ‘Ane meni ape, Owane Sitewi lai lu taune maꞌe hi awei maꞌe eimawe arosai.’ Peri wawero! Lu tereꞌe tamo apou eiyei su, ‘Owane Sitewi lai ane etiri tamo nowe meꞌiye su henerairowa ape, au teꞌe fiyariyei ne ariariyeye.’ Peri ape wawero aꞌi tene! Lowe lu taune iyape towafi lowe lo se u tahe se au taꞌane faraꞌuwerowa. Serai lowe Owane Sitewi lo lu feni yo luwaru aꞌi maꞌe henetirowa.”^j 23 Sosu Jisas apou eiye, “Fene weiyai! Wanure! Ane fene maꞌe etiri werese, meꞌiye heneraiyei ape, au teꞌe areiyesiya.”

24 Sosu aꞌi pe Jisas apou au teꞌeye,

28 Sosu aꞌi pe Jisas peri anowe ta au teꞌeye. Le apou eiye, “Fene peri anowe ape wanure! Fene me owarape aiwawe aꞌi totere! Fene me owarape towe soꞌoruwe heneye su, fene apou totere. Nowe lo me so taꞌeyei henerairowa. 29 Sosu aiwawe aꞌi fene etiri orese aꞌi, nowe meꞌiye su henerairowa ape, siyeyei su, fene apou fa totere. Nowe ape se Owane Sitewi lo meni eime heneraiyei, ataheyewa. Yo tewiye sahe tei ataheyeraiwa. 30 Ane fene maꞌe peri wiyeme aꞌi teꞌesiya. Wanure! Lu taune tamo, pereye nowe eite se irosiya ape, lowe temeniyeyei taꞌama. Ahowa, lowe etiri ape mo heneraiyei siyerowa. 31 Etiri werese, niꞌarawe hire maꞌe irosiya ape, sosu etiri werese, hi awei maꞌe irosiya ape, lowe werese poꞌuterowa. Ahowa, peri wiyeme aꞌi ano weriyei weriyei ironamitorowa.

32 Eiwerou su etiri werese ape henerairowa awere? Lu taune werese soꞌoru taꞌama. Aiwawe aꞌi Owane Sitewi lo ipari wisere aꞌi (ensel), lowe nowe ape soꞌoru taꞌama. Owane Sitewi lo meni eime aiwawe aꞌi, nowe ape soꞌoru taꞌama. Owane Sitewi taꞌi aꞌi lai nowe ape soꞌoruwesiya tene!

33 Serai ane fene maꞌe au teꞌesiya. Fene weiyai! Ane si tame itorairowa. Serai fene tote etite. Fene werese nowe ape soꞌoru taꞌama. 34 Ape peri anowe ta wou aꞌi ne. Meni ta omo pani eyeri maꞌe iyei ne totesiya. Le wiyawi meni yahowaꞌi werese ei aniye. Le lowe maꞌe apou eiye, ‘Ane omo pani eyeri maꞌe iyei ne. Fene etiri werese ano au noweinoweite.’ Sosu le meni wesi yo au noweinoweisiya ape maꞌe apou eiye, ‘Ne wesi yo ano siye etite.’” 35 Sosu le lowe werese maꞌe eiye, “Serai ane fene maꞌe aiwawe aꞌi au teꞌesiya. Fene etiri werese siye etite! Meni Owane fene lo si tame aiyerowa su, fene nowe tewi aꞌi ape soꞌoru taꞌama. Le nowe neriwei su aiyerowa awere? Nowe pasi po su aiyerowa awere? Nowe mitaiyeye su aiyerowa awere? Nowe esi aꞌi su aiyerowa awere?^m 36 Meni Owane fene lo aiyerowa su, le fene nihe howeiteyei siyerairowa awere? Le fene howeiteyei, siyeyei su, le fene maꞌe fofowei orese erasi aꞌi aurowa.” 37 Sosu Jisas lu disaipel lo maꞌe apou eiye, “Peri werese ape, ane fene maꞌe eisiya ape, ane lu taune werese maꞌe eisiya. Weiyai! Fene etiri werese siye etite!”