3 Sosu aꞌi pe Jisas lu disaipel lo mase omo Betani sahe onuteye. Meni ta iyape Saimon tu naifa Jisas enite kairefi aꞌi, iyape lepra, au taꞌane niyemaiyeye. Jisas lu disaipel lo mase Saimon lo wesi sahe onuteye. Lowe metei sahe ene aye su, menitani ta wesi ape papu wiye. Le saꞌi heneri wisere aꞌi ape tapiye paꞌare papu aitai. Saꞌi heneri ape maꞌaru tomu neꞌese se eteye. Menitani ape tapiye paꞌare aine towesiyewe, saꞌi werese Jisas lo mato hire maꞌe ani teroso arowe.^a 4 Lu tamo menitani ape siyeye su, lowe le ne ai marepi aꞌi teꞌe tiyatiye. Lowe apou teꞌeye, “Menitani ape piyene saꞌi heneri aꞌi ape ani terososawi awere? 5 Nomo saꞌi ape meni ta maꞌe au eteyei su, nomo maꞌaru tomu neꞌese anirowawe, lu taune maꞌe, maꞌaru ariye ape, aurowa. Lowe menitani ape ne ai peri teꞌe tiyatiteye.” 6 Ahowa, Jisas lowe maꞌe apou eiye, “Fene menitani ape maꞌe ai marepi owe ape totere! Fene piyene le maꞌe au luwaruweyei ne totesiya awere? Menitani ape ane maꞌe wiyawi wisere aꞌi au taꞌaneye. 7 Fene lu taune, maꞌaru ariye aꞌi ape, mi mi weriyei totenamisiya. Fene lowe ferafereiyei ne toteyei su, fene faraꞌu maꞌaru tamo aure. Ahowa, ane fene mase nowe oso aꞌi irorowa. Ane fene mase weriyei iro taꞌame.^b 8 Menitani ape ane maꞌe etiri wisere aꞌi au taꞌaneye. Le temeniyeyei ano totesiya. Serai le saꞌi heneri wisere aꞌi tahe paꞌare ano sahe ani teroso arowe. Meꞌiye su, ane fisiye yo maꞌe funarirowa.^c 9 Ane fene maꞌe peri pefine aꞌi au teꞌesiya. Omo omo werese sahe peri ano au teꞌe fiyariyei su, lu taune werese, menitani ape lo etiri irowe ape, teꞌenamirowa. Sosu lowe menitani ape ne marepi papu lowe lo wanu tote tawesinamirowa.”

10 Sosu aꞌi pe Jisas lo lu disaipel ta iyape Judas Iskariot au heseyei lu owane tamo maꞌe fi. Le Jisas au heseyei lu owane lo ereti se henetiyei ne toteye. 11 Au heseyei lu owane Judas lo peri ape wanuwe su, lowe marepi nineꞌi erasi aꞌi toteye. Lowe maꞌaru tamo le maꞌe auwei ne teꞌe naneiye. Serai Judas lai Jisas lowe maꞌe henetiyei ne toteye. Le lowe maꞌe eiye, “Ane yo ta fene maꞌe le henetiyei ne nehirowa.”

12 Sosu aꞌi pe taꞌuwe hereiyei nowe tutawe, iyape Pasova, henerai su, Juda lo lu fe sipsip tamo aine teraꞌeyei ne toteyewe, Owane Sitewi maꞌe aurowa. Nowe ape se Jisas lo lu disaipel le maꞌe apou eiye, “Ne eiwerou totesiya awere? Nomo eiwerou maꞌe ene ayei etiri taꞌuweyei awere? Sosu ne taꞌuwe hereiyei ape arowa.”^d 13 Sosu Jisas lu feni hesi aꞌi lo ei aniye. Le lowesi maꞌe eiye, “Fenesi omo weniyei maꞌe ire. Fenesi meni ta saꞌi paꞌare erasi iyoꞌo hire suteyei, siyere! Fenesi meni ape moꞌo umasitire. 14 Meni ape wesi papu wirowa su, fenesi wesi ape se meni topo maꞌe apou teꞌe towerire! ‘Atuatu siye meni owane le maꞌe ei toweriye. Tewi wesi ape eiwerou, irosiya awere? Serai ane lu feni ano mase taꞌuwe hereiyei ape ene ayei ne.’ 15 Sosu wesi se meni topo tewi wesi erasi, hire maꞌe irosiya ape, fenesi maꞌe atuaturowa. Etiri werese taꞌuwe tepaꞌasiye. Tewi wesi ape sahe fenesi taꞌuwe hereiyei ene ayei ape au taꞌuwere! Serai nomo tewi wesi ape papu ene arowa.” 16 Lu disaipel lo hesi ape arunatiyewe, omo weniyei ape maꞌe heneri. Peri werese, Jisas au teꞌeye ape, lowesi siye tepaꞌasiye. Serai lowesi tewi wesi ape wiyewe, taꞌuwe hereiyei lo ene ayei au fu taꞌuwe naneiye.

17 Nowe neriwei su, Jisas lu disaipel lo mase tewi wesi maꞌe taꞌuweyei ne fai. 18 Sosu Jisas lu feni werese lo mase metei sahe ene ayei ne onuwe su, Jisas lowe maꞌe eiye, “Ane peri pefine aꞌi fene maꞌe eisiya. Wanure! Meni ta, nomo ponei sato onusiya ape, ereti ano wafei se ti tawesirowawe, au heseyei lu owane maꞌe henetirowa. Meni ape nomo ponei sato ene asiya.”^e 19 Lu feni werese lo peri ape wanuwe su, lowe marepi hepene orese aꞌi teriteye lowe taꞌi taꞌi aꞌi le maꞌe teꞌe toweriteye, “Ne ane ne teꞌesiya awere?” 20 Sosu Jisas lowe maꞌe itiyaꞌu eiye, “Meni ape lu feni ano, meni ta lai nau taꞌase wahu papu ane aiwawe aꞌi furowawe, sosu arowa. 21 Owane Sitewi lo meni eime temeniyerowa. Owane Sitewi lo one towe sahe tu naifa apou teꞌeye, ‘Meni ape Owane Sitewi lai, hi awei maꞌe eimawe arosairowa ape, temeniyerowa.’ Ahowa, meni ape Owane Sitewi lo meni eime ai lu owane tamo maꞌe ereti ti tawesirowawe, aine teraꞌeyei ne henetirowa su, meni ape weiyai! Mai lo autei taꞌame su, meni ape ane maꞌe au luwaruwe irorowata. Serai wisere aꞌi ne. Ahowa, mai lo meni ape autei tepaꞌasiye su, Owane Sitewi lai le maꞌe etiri luwaru aꞌi au irorowa.”

22 Sosu aꞌi pe lowe taꞌuwe hereiyei ape ene aye su, Jisas nau taꞌase ereti se aniteyewe, Owane Sitewi maꞌe teꞌe wisereyeye. Sosu le nau taꞌase tewi pa tewi ani topoto noneye. Sosu le lowe maꞌe apou eiye, “Fene nau taꞌase anire! Nau taꞌase ape tahe paꞌare ano ne.” 23 Sosu aiwawe aꞌi le siye auwe ereti se aniteyewe, Owane Sitewi maꞌe ei wisereyeye. Sosu lowe maꞌe auwe. Sosu lowe werese saꞌi ape ene aye. 24 Sosu le lowe maꞌe eiye, “Saꞌi ape fisaꞌi ano ne. Ane fisaꞌi ano lu taune ne au ani terosorowa. Ane lowe maꞌe peri teꞌe naneiyei heꞌi aꞌi ano au ferafereiyei ne aurowa.^f 25 Ane fene maꞌe peri wiyeme aꞌi au teꞌesiya. Wanure! Ane wain saꞌi tereꞌe tame arowata. Ane Owane Sitewi lo kairefiyeyei mase si tame itorairowawe, lu taune werese au noweinoweirowa su, ane faraꞌu wain saꞌi heꞌi aurowa.”

26 Sosu aꞌi pe lowe ene a tepaꞌasiye su, lowe Owane Sitewi lo iyape se yakowei ahi teꞌe ani aroweteye. Sosu lowe tewi wesi nowe maꞌe arunatiyewe, Omo Oliv maꞌe yaneye.

27 Sosu Jisas lu disaipel lo maꞌe apou eiye, “Tote tawesiyei fene lo tote iꞌane poꞌuterowa. Tu naifa Owane Sitewi lo one towe sahe apou teꞌesiya.

32 Sosu aꞌi pe Jisas lu disaipel lo mase taꞌaneyei awei maꞌe iyape Getsemani, heneri. Sosu Jisas lowe maꞌe eiye, “Fene sato onure. Ane yaro ahe Owane Sitewi maꞌe au teꞌerowa.”ⁱ 33 Sosu le lu hesi heta, Pita, Jems, Jon ei aniye. “Fene ane aiwawe iyei.” Lowe yaro ahe fi su, Jisas marepi orese aꞌi teriteteye. 34 Sosu le lowe maꞌe eiye, “Hepene ano orese aꞌi ironamisiya. Ane temeniye ataheyewa. Fene sato irote. Fene etiri werese siye etite.”^j 35 Sosu le eyeri oso poꞌo maꞌe fi. Le awei sahe winetaiyewe, Owane Sitewi maꞌe au teꞌe tiyatiteye. Le apou eiye, “Ne yo tereꞌe irosiya su, ane yo eite feni se aweraꞌiyenatirowa. Serai ane nowe luwaru aꞌi ape se aweraꞌiyenatirowa.” 36 Le apou ei toweriye, “Tai ano, etiri werese eite ne, ne faraꞌu irorowa. Serai ane ne maꞌe apou tame ei towerisiya. Ne faraꞌu wiyawi no ane auwe eite, ani sasarire! Ahowa, ane marepi ano umasirowata. Ane marepi no aꞌi tote umasinamirowa.”^k 37 Jisas peri tepaꞌasiye su, le lu feni hesi heta maꞌe si tame fi. Le lowe nihe teiteyei siyeri. Le Pita maꞌe apou ei toweriye, “Saimon, ne nihe howeisiya awere? Ne nowe tewi ta piyene etiri werese ape ne siye eti se taꞌama awere? 38 Fene etiri werese luwaru ape ne siye etinamite. Sosu fene Owane Sitewi maꞌe teꞌe towerite! Serai fene yo seni luwaru aꞌi ta fene maꞌe henerairowata. Hepene fene lo kairefi aꞌi ne, Ahowa, tahe fene lo pereꞌe aꞌi ne.” 39 Sosu le lowe arunatiyewe, yaru tewi ta sahe fiyewe, Owane Sitewi maꞌe au teꞌe tiyatiteye. Le peri tu Owane Sitewi maꞌe teꞌeteye ape, le peri aiwawe aꞌi teꞌeye. 40 Le Owane Sitewi maꞌe peri teꞌe tepaꞌasiye su, le lu feni hesi heta si tame siyeri. Lowe nihe teiteyei tame siyeri. Nihe lowe lo orese aꞌi ne. Lowe neritase teriteye. Serai lowe le maꞌe peri se taꞌama. 41 Sosu le yaru tewi ta sahe si tame fi, Owane Sitewi maꞌe peri aiwawe aꞌi au teꞌe tepaꞌasiye su, le lu disaipel lo maꞌe si tame fai. Sosu le lowe maꞌe eiye, “Fene nihe teinamiteye awere? Tahe fene lo onotaꞌano aꞌi awere? Faraꞌu. Nowe ano henerai tepaꞌasiye. Siyere! Meni ape Owane Sitewi lo meni eime ereti wafei se ti tawesiyei ne fai. Le ane lu luwaru aꞌi maꞌe henetirowa. 42 Sinere! Nomo iyei ne. Siyere! Meni ape ane lu luwaru aꞌi maꞌe henetiyei ne ataheyewa.”

43 Sosu Jisas peri ape teꞌeye su, meni Judas, Jisas lo lu disaipel ta, le maꞌe henerai. Le ai lu tomu neꞌese mase fai. Lowe meneꞌe, me au tamo Jisas maꞌe aitai. Au heseyei lu owane, sosu Owane Sitewi lo peri soꞌoruwe siye lu tamo, lowe ai lu werese Jisas maꞌe ereti wafei se ti tawesiyei ne eimawesai. 44 Sosu Judas ai lu owane maꞌe apou eiye, “Ane meni ape, Jisas, lo ahi si maꞌe ahi tahe se teꞌe wisereyeyei. Ane meni ape ariariyeyei su, fene ereti wafei se ti tawesire! Ereti wafei se ti tawesiyei su, fene au heseyei lu owane maꞌe henetire!” 45 Sosu Judas Jisas maꞌe henerai su, le Jisas apou eiye, “Meni Owane Pefine.” Sosu le Jisas lo ahi si maꞌe ahi tahe lo se teꞌe ani ime wisereyeye. 46 Ai lu werese Judas lo yaru siyeye su, lowe Jisas lo ereti wafei se ti tawesiye. 47 Sosu meni ta Jisas mase teiteye su, le ipari meneꞌe pite aꞌi ereti lo se aniteyewe, wiyawi yahowaꞌi aꞌi meni lo apaniye aine tou laꞌeye. Wiyawi yahowaꞌi meni ape Owane Sitewi lo wesi au heseyei lo meni owane erasi lo ne. 48 Sosu Jisas lowe maꞌe itiyaꞌu eiye, “Fene ipari meneꞌe, me au se ane maꞌe ereti wafei se ti tawesiyei ne heneti awere? Ane taꞌarei meni wou aꞌi awere? 49 Mi mi werese ane Owane Sitewi lo wesi tutawe sahe Owane Sitewi lo peri au teꞌe areiyeye su, ane fene mase iroteye. Ahowa, fene ereti ano wafei se ti tawesirowata. Tu naifa weriyei Owane Sitewi lo one towe sahe peri ape au teꞌe areiyeye. Pereye, peri ape wiyeme aꞌi henerai tepaꞌasiye.”^l 50 Jisas lo lu disaipel werese le aꞌi arunatiyewe, atoweiye iteroti.

51 Yoꞌorei meni ta Jisas moꞌo umasiti ape, le watipi sahe ipari tahe wapo aꞌi ani asiteye. Sosu ai lu tamo meni ape ereti aniteye. 52 Ahowa, meni ape ipari tahe erau fu arowe, liye paꞌare ariye aꞌi iteroti.

53 Sosu lowe aniteyewe Jisas au heseyei meni owane maꞌe, heneti. Au heseyei lu owane tamo, yaꞌariyei lu owane tamo, sosu Owane Sitewi lo peri siye soꞌoruwe erasi siye lu tamo wesi erasi ape sahe taꞌuwerai. 54 Lowe Jisas heneti su, Pita eyeri maꞌe Jisas moꞌo umasiti. Le au heseyei meni owane lo wesi nepawe papu wiye. Wesi nepawe ape papu ai lu tamo mase yehe atahe sahe umerisiyeyei ne onuteye. 55 Sosu au heseyei lu owane tamo, awei lu owane tamo, lowe lu tamo ei aniye. Jisas lo yo seni iroteye ape, fu teꞌe areiyeye ne. Piye yo seni luwaru aꞌi ta Jisas iroteye awere? Ahowa, lowe Jisas lo yo seni luwaru aꞌi ta wanu taꞌame. Lowe Jisas aine teraꞌerowata. 56 Lu tomu neꞌese peri wawero le ne fu teꞌeye. Peri towafi lowe lo marepi taꞌi aꞌi se aiwawe taꞌame. 57 Lu tamo sineteyewe, lowe peri wawero Jisas ne fu teꞌeye, Lowe apou eiye, 58 “Nomo le peri ape teꞌeye ape, wanuwe, Owane Sitewi lo wesi tutawe ape tu lu lai taꞌaneye ape, ane lai aine tapeti poꞌuterowa. Sosu ane lai poweiye hesi heta Owane Sitewi lo wesi heꞌi aꞌi taꞌanerowa. Ane ereti ano se au taꞌanerowata.”^m 59 Peri lowe lo peri wawero aꞌi tene! Lowe werese peri aiwawe aꞌi taꞌama. 60 Sosu au heseyei meni owane sineteyewe, Jisas maꞌe teiteye. Le Jisas maꞌe apou ei toweriye, “Peri ape lu ne ne fu teꞌe areiyeye ape, ne piyene peri ta itiyaꞌu teꞌeyei taꞌama awere?” 61 Ahowa, Jisas peri moꞌuwei aꞌi irowe. Le peri itiyaꞌu ei taꞌame. Sosu au heseyei meni owane ape le maꞌe si tame ei toweriye, “Ne meni ape Owane Sitewi lai hi awei maꞌe lu taune au ferafereiyei ne eimawesai awere? Ne Owane Sitewi Pefine aꞌi lo meni eime awere? Piyete awere?” 62 Sosu Jisas le maꞌe apou eiye, “Ane aꞌi lai tene! Nowe meꞌiye su, fene Owane Sitewi lo meni eime Owane Sitewi lo kairefiyeyei pefine aꞌi lo ereti eyate feni se onunamitorowa. Aiwawe aꞌi fene, ane niꞌarawe maꞌe itoraiyei ape, siye anirowa.” 63 Au heseyei meni owane peri ape wanuwe su, le ipari tahe lo ani apeti tepetowe. Sosu eiye, “Wanure! Nomo lu tereꞌe tamo ei anirowata. 64 Fene peri lo wanu tepaꞌasiye. Le Owane Sitewi Pefine aꞌi teꞌe naruwe. Fene eiwerou totesiya awere?” Lu werese lai peri taꞌi aꞌi uteye, “Meni ape fa temeniyere!”ⁿ 65 Lu tamo lai Jisas maꞌe pisaꞌi sineꞌiye. Lowe ipari tahe se nihari lo ti tawesiyewe, sosu lowe le maꞌe ereti ani amoꞌowe, sosu ereti se aineye. Lowe le aineye su, lowe le maꞌe teꞌe toweriye, “Ne nomo maꞌe peri pefine au teꞌere! Eiwerai nihari no aineye awere?” Ai lu owane lai le maꞌe nihari lo sahe aineteye.

66 Sosu aꞌi pe Pita wesi nepawe hi maꞌe onuteye. Wiyawi yahowaꞌi menitani ta wesi nepawe maꞌe fai. Menitani ape au heseyei meni owane lo ne. 67 Menitani wesi nepawe maꞌe fai su, le Pita yehe sahe tahe onu umerisiyeteye. Le apou ei toweriye, “Ne lai Jisas, omo Nasaret maꞌe fai ape, aiwawe aꞌi iroteye.” 68 Ahowa, Pita itiyaꞌu eiye, “Wawero aꞌi ne! Peri ape, ne eiye ape, ane soꞌoru taꞌama.” Sosu le wesi nepawe nowe maꞌe fi. Sosu irowe kakaruk peri uteye. 69 Nowe maꞌe hene fi su, wiyawi menitani ape Pita tame siyeye. Le lu tamo maꞌe apou eiye, “Wanure! Meni ape Jisas lo lu disaipel tene!” 70 Pita itiyaꞌu eiye, “Ahowa, ane meni ape soꞌoru taꞌama.” Nowe meꞌiye oso aꞌi lu tamo Pita atahe aꞌi teiteye ape, lowe maꞌe eiye, “Peri pefine, ne lai meni ape lo lu feni tene! Ne omo pani Galili aiwawe aꞌi fai. Peri no aiwawe aꞌi ne.” 71 Ahowa, Pita lowe maꞌe peri luwaru aꞌi au teꞌeye, sosu eiye, “Meni ape fene au teꞌesiya ape, ane le ne soꞌoru taꞌama.” 72 Pita apou eiye su, witane aꞌi irowe kakaruk peri meꞌiye toꞌuresi tame uteye. Sosu Pita irowe kakaruk lo peri wanuwe su, le Jisas lo peri ape ne tame tote ewiteye. Tu Jisas le maꞌe eiye, “Ne irowe kakaruk peri hesi uteyei wanuwei su, ne nowe hesi heta ane ne meꞌiyeni maꞌe atati arurowa.” Sosu Pita luwei erasi aꞌi irowe.