Lowe Jisas awei meni owane Pailat maꞌe heneti.
15
Esi pasi aꞌi su au heseyei lu owane, yaꞌariyei lu owane tamo, sosu Owane Sitewi lo yo peri soꞌoruwe siye lu tamo, lu owane tereꞌe lowe wesi erasi ape sahe taꞌuwerai. “Etiri lowe irowei ape, tote teꞌe eti tiyatiye. Nomo eiwerou irowei awere?” Sosu lowe Jisas lo ereti wafei se ti tawesiyewe, awei meni owane, iyape Pailat, maꞌe eimawesawi.a 2 Sosu Pailat Jisas maꞌe apou ei toweriye, “Ne Juda lo meni owane tutawe aꞌi awere?” Jisas le maꞌe itiyaꞌu eiye, “Ne peri pefine aꞌi teꞌeye.” 3 Sosu au heseyei lu owane tamo lowe Jisas peri wawero au teꞌe areareye. 4 Sosu Pailat le maꞌe eiye, “Ne peri ape wanu taꞌame awere? Ne peri ta lowe maꞌe itiyaꞌu au teꞌe taꞌame awere? Lowe ne maꞌe peri tomu neꞌese fu teꞌesiya. Ne peri lowe lo wanu taꞌame awere?” 5 Ahowa, Jisas peri ta lowe maꞌe itiyaꞌu ei taꞌame. Serai Pailat peri ape ne hepene se suꞌariye.bPailat apou teꞌeye, “Fene Jisas me tapeꞌi sahe aire tawerere!”
6 Sosu aꞌi pe Pailat marepi erasi aꞌi toteteye. Nowe taꞌuwe hereiyei henerai su, meni Pailat meni taꞌi, kalabus wesi sahe iroteye ape, erau arosawirowa. 7 Meni ta iyape Barabas kalabus wesi sahe iroteye. Meni ape lu tewi lo mase awei lu owane maꞌe ai atu tiyatiteye. Serai ai lu tamo meni ape kalabus wesi sahe hene fu arowe. Meni ape lai lu tereꞌe tamo aine teraꞌeye. 8 Sosu lu taune tomu neꞌese Pailat maꞌe meni ta teꞌe toweriyei ne fi. Lowe le maꞌe apou teꞌe toweriye, “Iyu menei werese werese ne meni ta, kalabus wesi iroteye ape, ani erau arosaire.” 9 Sosu Pailat lowe maꞌe itiyaꞌu eiye, “Ane Juda lo meni owane tutawe aꞌi faraꞌu ani erau arosairowa awere?” 10 Au heseyei lu owane tamo Jisas meni Pailat maꞌe heneti su, lowe lo ai marepi luwaru aꞌi Jisas maꞌe totenamiteye. Serai Pailat lu taune werese maꞌe ei toweriye, “Ane faraꞌu Jisas ani erau arosairowa awere?” 11 Ahowa, au heseyei lu owane lu taune werese maꞌe ai marepi teꞌe tataiteye. Serai lu taune werese Pailat maꞌe apou uteye. “Ne meni Barabas ani erau arosaire!”c 12 Sosu Pailat lowe maꞌe itiyaꞌu eiye, “Sosu ane meni Jisas ne eiwerou irowei awere? Le lai Juda lo meni owane tutawe aꞌi tene!” 13 Sosu lowe le maꞌe itiyaꞌu uteye, “Meni eite me tapeꞌi ape sahe aine teraꞌere!” 14 Ahowa, Pailat lowe maꞌe itiyaꞌu ei toweriye, “Piyene awere? Le piye yo seni luwaru aꞌi irowe awere?” Ahowa, lu taune werese peri erasi aꞌi tame hare uteye, “Me tapeꞌi ape sahe aine teraꞌere!” 15 Sosu Pailat lu taune maꞌe marepi wisereyeyei ne toteye. Serai le meni Barabas kalabus wesi sahe ani erau arosai. Barabas kalabus wesi ani erau arosawi su, Pailat ai lu tamo maꞌe eiye, “Fene Jisas henetirowawe, meꞌiyeni lo maꞌe wafei se ainere!” Jisas lo meꞌiyeni maꞌe aineye su, le ai lu maꞌe me tapeꞌi sahe aine teraꞌeyei ne heneti.
Ai lu tamo lai Jisas maꞌe peri teꞌe naruwe.
16 Sosu aꞌi pe ai lu tamo Jisas wesi erasi maꞌe heneti. Sosu lowe ai lu werese wesi papu ei aniye. 17 Lowe Jisas lo ipari tahe ani erauwe. Sosu ipari tahe loꞌu aꞌi le maꞌe au ani asiye. Lowe wafei tohu niꞌari ape se ani apeꞌiye taꞌaneyewe, Jisas lo mato sahe ti atati asi arowe. 18 Sosu lowe peri erasi apou eiye, “Ei, Jisas, ne Juda lo meni owane tutawe aꞌi tene!” 19 Sosu lowe Jisas lo mato sahe menei meni patiye se aineteye. Lowe Jisas maꞌe sineꞌi teꞌe naruwe. Lowe le maꞌe lowe uporo apeꞌi onu areareteye. 20 Sosu lowe Jisas peri teꞌe naru tepaꞌasiye su, lowe ipari tahe loꞌu aꞌi ani erauwewe, ipari tahe lo si tame au ani asiye. Sosu lowe le omo Jerusalem nowe maꞌe me tapeꞌi sahe aine teraꞌe tawesiyei ne heneti.
Lowe Jisas me tapeꞌi sahe aine tawereye.
21 Sosu aꞌi pe lowe omo nowe maꞌe fi su, lowe meni ta iyape Saimon ereti aniteye. Meni ape omo Sairini maꞌe fai. Meni ape Aleksander, sosu Rufus lo aite. Lowe Saimon apou eiye, “Ne Jisas lo me tapeꞌi omo hire maꞌe sutetire!”d
22 Sosu aꞌi pe lowe Jisas Omo Golgota maꞌe heneti. Golgota lo iyape sitewi apou wou aꞌi “Mato Paꞌare lo Omo”. 23 Sosu lowe Jisas maꞌe wain saꞌi ta au ayei ne toteye. Ahowa, Jisas a taꞌame. 24 Sosu lowe Jisas me tapeꞌi sahe niꞌari se aine tawereyewe, hire maꞌe au ani sineteye. Ipari tahe lo ape aniye ape, lowe tapiye oso ani fu arosawi. Eiwerai ipari tahe aniyei awere?e 25 Lowe me tapeꞌi hire maꞌe au ani sineteye su, nowe ape esi ponei aꞌi. 26 Lowe etiye lo peri ta metei sahe apou leseye. Lowe apou leseye,
Juda lo meni owane tutawe tene.
27 Lowe taꞌarei lu hesi ta Jisas mase aiwawe aꞌi me tapeꞌi sahe aine teraꞌe tawesiteye. Meni ta eyate feni maꞌe me tapeꞌi se aine tawereteye. Meni ta opi feni se aine tawereye. 28 {Sosu Owane Sitewi lo one towe sahe pefine aꞌi henerai. Apou aꞌi leseye,
Meni ape lu luwaru aꞌi mase nawiteye.}f Ais 53:12
29 Lu taune tamo Jisas lo me tapeꞌi aweraꞌiyenati ape, lowe Jisas maꞌe peri luwaru aꞌi teꞌe naruwe. Mato paꞌare lowe lo peipaiyeye, sosu teꞌeye, “Ne Owane Sitewi lo wesi tutawe aine tapeti fu arosawirowa awere? Sosu nowe hesi heta si tame au taꞌanerowa awere? Peri wawero aꞌi tene!g 30 Ne taꞌu au ferafereire! Me tapeꞌi hire maꞌe arunatirowawe, si hi awei sahe itora!” 31 Sosu aiwawe aꞌi au heseyei lu owane, sosu Owane Sitewi lo peri soꞌoruwe siye lu tamo lowe le maꞌe peri teꞌe naruwe. Lowe teꞌe tiyatiteye. Lowe apou eiye, “Le lu taune tereꞌe au taꞌane ferafereiteye. Ahowa, le taꞌu au ferafereirowata. 32 Ne meni ape, Owane Sitewi lai awei hi maꞌe eimawe arosai ape, sosu Juda lo meni owane tutawe aꞌi su, nomo ne maꞌe eisiya, ne me tapeꞌi hire arunatirowawe, hi awei maꞌe itora! Ne hi awei maꞌe itoraiyei su, nomo peri no tote tawesirowa. Peri wawero aꞌi tene!” Taꞌarei lu hesi aiwawe aꞌi Jisas mase me tapeꞌi sahe iroteye ape, lowe lai le maꞌe peri luwaru aꞌi au teꞌe naruteye.
Jisas temeniyeye.
33 Sosu aꞌi pe poweiye ponei aꞌi se, pasi aꞌi awei pani werese napetuwe. Poweiye wati su, pasi aꞌi tepaꞌasiyewe, sosu mitaiyeye si tame henerai. 34 Sosu poweiye wati su, Jisas peri erasi aꞌi hare uteye,
Eloi, Eloi, lama sabaktani? Peri ape lo sitewi apou wou aꞌi ne, “Owane Sitewi ano, Owane Sitewi ano, piyene ne ane ne meꞌiyeni maꞌe atati arunati awere?” Sng 22:1
35 Lu taune tamo peri ape wanuwe su, lowe apou eiye, “Wanure! Le meni Elaija ei aniye!” 36 Meni ta witane aꞌi se wain saꞌi luwaru aꞌi ipari tahe se ausi aniyewe, me pite aꞌi sahe wafei se ti tawesiye. Sosu le Jisas maꞌe saꞌi ape au aye. Sosu le apou eiye, “Weiya! Nomo meni Elaija itorairowa awere? Le Jisas lo tahe paꞌare hi awei maꞌe ani itorairowa awere?”h 37 Sosu Jisas peri erasi aꞌi tame hare uteye. Sosu Jisas lo hepene fi. 38 Jisas temeniyeye su, ipari tahe erasi pite aꞌi Owane Sitewi lo wesi tutawe papu heriteye ape, Owane Sitewi lai ipari tahe ape hire maꞌe ponei ani tou apeti itorai. 39 Ai lu owane Jisas atahe aꞌi teiye ape, le Jisas lo temeniyeyei siyeye su, le apou eiye, “Peri wiyeme aꞌi ne. Meni ape Owane Sitewi lo meni eime tene!” 40 Taune tamo eyeri oso aꞌi maꞌe teiteye ape, lowe Jisas temeniyeyei siyeye. Lowe lo iyape apou aꞌi ne, Maria, omo pani Makdala maꞌe fai, Maria tereꞌe, Jems, sosu Josep lo mai, sosu menitani tereꞌe Salome.i 41 Jisas omo pani Galili maꞌe iroteye su, taune ape mo lowe Jisas moꞌo umasiteye. Lowe etiri ta le maꞌe au pati aniteye. Taune tomu neꞌese tereꞌe tamo lowe Jisas mase omo Jerusalem maꞌe yaneye.
Jisas lo tahe paꞌare tapiye fisiye yo papu funari.
42-43 Nowe neriwei tase, meni ta Josep, omo Arimatea maꞌe fai ape, le marepi lo au iro kairefiyeyewe, sosu awei meni owane Pailat maꞌe Jisas lo tahe paꞌare aniyei ne ei toweriye. Meni ape Juda lo meni owane. Le Jisas lo peri wanu tote tawesi umasiteye. Sosu nowe amou (Sabat) lo omo hire maꞌe ninaweteye. Nowe ape se Juda lo lu taune etiri werese taꞌuweye. Sosu nowe meꞌiye su nowe Sarere henerairowa. Nowe amou (Sabat) Juda lo lu taune wiyawi taꞌanerowata. 44 Sosu Josep meni Pailat Jisas lo tahe paꞌare ei toweriyei ne henerai su, Pailat apou toteye, “Jisas temeniyeye awere?” Sosu le ai lu meni owane ei aniyewe, apou ei toweriye, “Jisas temeniyeye awere? Piyete awere?” 45 Ai lu meni owane ape Pailat maꞌe itiyaꞌu eiye, “Pefine aꞌi Jisas temeniyeye.” Sosu Pailat Josep maꞌe eiye, “Ne faraꞌu Jisas lo tahe paꞌare aitire! 46 Sosu Josep ipari tahe wapo pite aꞌi eteye. Le Jisas lo tahe paꞌare me tapeꞌi hire sahe hi awei maꞌe erau ani itorai. Le Jisas lo tahe paꞌare ipari tahe ani noweri fuwewe, tapiye fisiye yo, lu tamo horuseye ape, papu funari. Tahe paꞌare ape fisiye yo papu fuwe su, le tapiye erasi fisiye yo hire fu tawesiye. 47 Taune hesi Maria, omo Makdala maꞌe fai ape, sosu Maria tereꞌe, Josep lo mai, lowesi Jisas lo fisiye yo siyenari.