Owane Sitewi lai Jisas si tame taꞌane norohuwe sineye.
16
Sosu aꞌi pe nowe amou (Sabat) tepaꞌasiye su, taune hesi heta, Maria, omo Makdala maꞌe fai ape, Maria, Jems lo mai, sosu Salome, lowe saꞌi heneri wisere aꞌi se Jisas lo tahe paꞌare sahe au ani imeyei ne aiti. 2 Esi pasi henerai su, lowe Jisas lo tapiye fisiye yo maꞌe fi. 3 Lowe aꞌi lai teꞌe tiyatiteye, “Tapiye erasi hire fusiya ape, eiwerai tapiye fisiye yo nowe tewiye maꞌe ani nowerisawirowa awere?” 4 Lowe fisiye yo ape heneri su, lowe tu nihari hire siye ani aroweye. Sawi amou! Tapiye erasi ape nowe tewiye maꞌe ani nowerisawi tepaꞌasiye. Tapiye ape erasi pefine aꞌi tene! 5 Sosu lowe tapiye fisiye yo papu wiye. Meni ta, ipari tahe wapo pefine aꞌi ani asiye ape ereti eyate feni se onuteye. Lowe meni ape siyeye su, lowe hepene se suꞌari atoweiyeteye. 6 Sosu le lowe maꞌe eiye, “Fene atoweiye sawa! Ne Jisas, omo Nasaret maꞌe fai ape, nehisiya awere? Lowe le me tapeꞌi sahe tawere aine teraꞌeye. Ahowa, le si tame norohuwe sine tepaꞌasiye. Le sato ariye. Siyere! Lowe tahe paꞌare lo yaro ahe au howeiteye. Siyere! Le sato ariye. 7 Sosu fene lu disaipel lo maꞌe, Pita aiwawe aꞌi, peri heneruwe ape au teꞌeri! Fene lowe maꞌe apou au teꞌere, ‘Jisas omo pani Galili maꞌe tu irowa.’ Fene omo pani ape heneriyei su, fene le saro siyerirowa. Tu naifa Jisas lai peri ape fene maꞌe au teꞌe areiyeteye.”a 8 Sosu taune ape tapiye fisiye yo nowe maꞌe itero heneye. Tahe lowe lo auseriyeye. Lowe hepene erasi Lowe atoweiye aꞌi irowe.Peri eite (16:9-20) irosiya ape, peri eite piye meni lai leseye awere? Lu soꞌoru siye tamo lowe soꞌoru taꞌama. Yaꞌariyei one towe tomu tamo sahe peri eite iro te taꞌame. One towe tereꞌe tamo sahe peri eite iroteye.
Maria, omo Makdala maꞌe fai ape, Jisas siyeye.
{ 9 Sosu aꞌi pe nowe tutawe se Jisas si tame sine norohuweye. Le menitani ta Maria, omo Makdala maꞌe fai ape aꞌi se suꞌari yaꞌoreye. Ahowa, lowe lu taune werese maꞌe peri ape au teꞌe areiye taꞌame. Tu naifa Jisas menitani ape sepei luwaru aꞌi ereti feni werese feni hesi aꞌi (7) au taꞌane sasarisawi. 10 Sosu menitani ape Jisas arunatiyewe, lu taune, le mase iroteye ape, au teꞌe areiyeteye. Lu taune ape mo Jisas lo temeniyeyei ewite luwei erasi irowe. 11 Menitani ape peri heneruwe au teꞌeye su, lu taune werese tote tawesiye taꞌama.
Lu hesi lai Jisas yo mai sahe siyeye.
12 Sosu aꞌi pe lu hesi omo Jerusalem arunatiyewe, yo mai iteye su, Jisas nihari tereꞌe se lowesi yo mai sahe naitu siyeye. 13 Sosu Jisas lowesi arunatiyewe fi su, lu hesi Jisas lo lu disaipel maꞌe peri ape au teꞌe areiyeyei ne fi. Ahowa, lowe peri ape wanuwe su, lowe peri ape wanu tote tawesi taꞌame.
Jisas lu disaipel lo maꞌe wiyawi lowe lo taꞌaneyei ne au teꞌeye.
14 Sosu aꞌi pe Jisas lo lu disaipel wesi papu iroteye. Lowe metei sahe taꞌuwe ene ateye. Sosu Jisas wesi papu wiye su, le lu disaipel lo werese siyeye. Le lowe maꞌe ai peri eiye, “Marepi fene lo kairefi luwaru aꞌi ne. Fene piyene peri ano wanu tote tawesi taꞌame awere? Lu taune tamo, ane si sine norohuwe ape, siyeye su, fene peri lowe lo wanu tote tawesi taꞌame.”b 15 Sosu Jisas lowe maꞌe eiye, “Fene lu taune werese omo werese maꞌe peri ano au teꞌe fiyariyei ne ire!c 16 Lu taune tamo peri ano wanu tote tawesiyei su, fene lowe faraꞌu saꞌi se au hure. Serai ane lowe maꞌe marepi hepene heꞌi aꞌi weriyei weriyei aurowa. Lu taune tamo peri ano wanu tote taꞌame su, Owane Sitewi lai lowe yehe omo maꞌe weriyei weriyei eimawe arosawirowa.d 17 Lu taune werese peri ano wanu tote tawesi umasiyei su, fene marepi hepene heꞌi aꞌi lowe lo siyeye. Lowe lu taune lo sepei luwaru aꞌi au taꞌane sasarirowa. Aiwawe aꞌi lowe peri tereꞌe heꞌi aꞌi se lu taune maꞌe au teꞌe areiyerowa.e 18 Lowe haru luwaru aꞌi ereti se aniteyewe, sosu lowe saꞌi luwaru aꞌi ayei su, lowe faraꞌu teirowa. Lowe temeniyerowata. Lowe lu taune u tahe se ereti hire maꞌe isawe hetesiyewe, fene u tahe lowe lo au taꞌane faraꞌuweye.”f
Jisas Owane Sitewi lo omo hire maꞌe wiye.
19 Sosu aꞌi pe Jisas peri ape teꞌe tepaꞌasiye su, Owane Sitewi lai le omo hire maꞌe hene ani wiye. Le Owane Sitewi lo ereti eyate feni maꞌe onuri.g 20 Sosu Jisas lo lu disaipel wesi ape arunatiyewe, omo omo werese lu taune maꞌe au teꞌe fiyariteye. Sosu lowe wiyawi erasi pefine aꞌi lu taune maꞌe au taꞌane wisereyeteye. Lu taune werese wiyawi lowe lo ape siyeye su, lowe Owane Sitewi lo peri pefine aꞌi siye soꞌoruweteye.}h