Maria meni eime Jisas auteiye.
2
Sosu aꞌi pe meni owane wiyeme iyape Sisar Ogastus yo peri ta au teꞌe fiyariteye. Le Rom lo omo pani werese au noweinoweiteye. Yo peri ape apou aꞌi teꞌeye, “Lu taune werese, lowe omo towafi lowe lo maꞌe si tame iyei. Sosu lowe omo towafi lowe lo iyei su, meni owane iyape lowe lo lese aniyei.” 2 Lowe peri soꞌoruweyei tutawe ape au teꞌe fiyariye su, meni owane erasi ta, iyape Kwirinius, le omo pani tewi aꞌi Siria au noweinoweinamiteye.
Luk 2:1-20
3 Sosu lu taune werese omo sitewi towafi lowe lo fi su, omo ape lu owane lai lu taune werese lo iyape lese aniye.
4 Sosu aꞌi pe meni ta iyape Josep omo Nasaret arunatiyewe, omo Betlehem maꞌe yaneye. Omo Nasaret pani tewi Galili sahe iroteye. Sosu omo Betlehem pani tewi Judia sahe iroteye. Piyene Josep omo Betlehem maꞌe yaneye awere? Omo Betlehem yaꞌariyei Devit lo omo sitewi aꞌi ne. Josep Devit lo meni lu teꞌeye. Serai le omo Betlehem maꞌe yaneye. Le menitani ta mase, naituwei ei naneiye ape, omo Betlehem maꞌe yaneye. 5 Lowesi iyape towafi lowesi lo au leseyei ne yaneye. Menitani Maria eime tahe se ne. 6 Lowesi omo Betlehem henerai su, menitani meni eime auteiyei se nowe ataheyerai. Omo ape sahe wesi werese lu taune temeꞌeriyeye. 7 Serai menitani ape fe bulmakau lo wesi sahe meni eime poto auteiye. Le meni eime poto ape ipari tahe se worone tawesiyewe, niye papu ani asiye. Sosu le meni eime lo fe bulmakau lo wahu sahe au howeiye.
Ipari wisere aꞌi ta fe sipsip lu maꞌe au teꞌeye.
8 Nowe pasiyeye su omo nowe maꞌe lu tamo fe sipsip au noweinoweiteye. Sosu lowe fetane aꞌi irowe. 9 Pereye aꞌi Owane Sitewi lo ipari wisere aꞌi ta itorai. Mitaiyeyei erasi mase awei werese maꞌe tewi mitaiye fiyariteye. Lowe mi erasi siyeye su, lowe taweiru aꞌi irowe. 10 Sosu Owane Sitewi lo ipari wisere aꞌi lowe maꞌe apou eiye, “Fene taweiru sawa! Wanure! Ane fene maꞌe peri heneruwe wisere aꞌi au teꞌeyei. Peri heneruwe eite se lu taune werese lo marepi wisere aꞌi au irorowa. 11 Pereye, Devit lo omo sitewi sahe, menitani ta meni eime poto auteiye. Tu naifa weriyei Owane Sitewi lai meni eime poto ape ariariyeye. Meni eime ape lu taune werese lo seni luwaru aꞌi au taꞌane sasarirowa. Le aꞌi lai meni owane Krais. Meni ape Owane Sitewi lai ariariyeye. Fene iyei su, fene meni eime poto faraꞌu siyerowa. 12 Fene meni eime poto nehiyei su, fene meni eime ape siye soꞌoruwerowa. Fene meni eime ipari tahe worone tawesisiya ape, siyerowa. Meni eime ape fe bulmakau lo wahu papu saro howeisiya.”
13 Sosu Owane Sitewi lo ipari wisere aꞌi lo peri au teꞌe tepaꞌasiye. Pereye aꞌi Owane Sitewi lo ipari wisere aꞌi aꞌi tomu neꞌese itorai. Lowe werese Owane Sitewi maꞌe au teꞌe wisereye nineꞌiteye. Ipari werese ape mo Owane Sitewi maꞌe au teꞌe wisereye nineꞌiteye su, lowe apou teꞌeye,
14 “Lu taune werese, fene Owane Sitewi maꞌe peri erasi au teꞌe wisereyete. Sosu lu taune werese, Owane Sitewi lo peri tote umasisiya ape, marepi fetane aꞌi ape lowe maꞌe mi mi weriyei ironamirowa. Owane Sitewi lai lowe ne marepi wisere aꞌi totenamisiya.”
Fe sipsip lo au noweinowei siye lu tamo lai Jisas siyeri.
15 Sosu aꞌi pe Owane Sitewi lo ipari wisere werese aꞌi hire niꞌarawe maꞌe si tame wiye su, fe sipsip noweinowei siye lu, lowe teꞌe tiyatiye. Lowe apou teꞌeye, “Nomo omo Betlehem maꞌe iyei. Nomo etiri ape, Owane Sitewi lai nomo maꞌe au teꞌeye ape, nomo faraꞌu siyenariyei.” 16 Lowe witane aꞌi arunatiyewe fi. Lowe omo Betlehem maꞌe wiye su, lowe menitani Maria, meni lo Josep, sosu meni eime poto siyenari. Meni eime poto fe bulmakau lo wahu papu saro howeiteye. 17 Lowe meni eime siye tepaꞌasiye su, lowe lu taune maꞌe etiri werese, Owane Sitewi lo ipari wisere aꞌi lowe maꞌe au teꞌeye ape, au teꞌe fiyariteye. 18 Sosu lu taune werese peri heneruwe ape wanuwe su, lowe werese hepene se suꞌariye. 19 Sosu menitani Maria etiri werese ape mo marepi topo lo papu tote tawesiye.a 20 Sosu fe sipsip noweinowei siye lu ape mo, lowe fe sipsip maꞌe si tame fiyewe, lowe Owane Sitewi ne au teꞌe wisereye nineꞌiye. Etiri werese lowe wanuwe ape, etiri werese lowe siyeye ape, etiri werese Owane Sitewi lo ipari lowe maꞌe au teꞌeteye ape, pefine aꞌi tene! Serai lowe Owane Sitewi maꞌe au teꞌe wisereye nineꞌiteye.
Lowe meni eime ape iyape Jisas au papowe.
21 Sosu aꞌi pe nowe ereti feni werese feni hesi heta i tepaꞌasiye su, lu tamo meni eime ape wesi towafi lowe lo maꞌe tahe touwe. Lowesi meni eime iyape Jisas au papowe. Tu naifa Owane Sitewi lo ipari Gebriel Maria maꞌe, meni eime lire papu iroteye ape, iyape Jisas au papowe.b
Luk 2:21-52
Jisas lo mai tai le Owane Sitewi lo wesi tutawe maꞌe heneti.
22 Nowe lu hesi werese (40) i tepaꞌasiye su, menitani, sosu meni eime, lowesi Moses lo yo peri umasiye. Lowesi au hu aseyaroweye su, nohuweripi, meni eime lowesi lo omo Jerusalem maꞌe wiyewe, Owane Sitewi maꞌe si auwe.c 23 Moses lo yo peri sahe Owane Wiyeme tame eiye,
“Menitani meni eime poto auteiyei su, le meni eime lo Owane Wiyeme lo ereti maꞌe fu aure. Lowe meni eime ape meni aseyaro pei au ariariyere.” Kis 13:2,12
24 Lowesi Owane Sitewi maꞌe irowe hesi aꞌi fu au hesere. Owane Sitewi lo yo peri apou aꞌi teꞌeye.
“Irowe misate hesi aꞌi, irowe matu yene oture hesi aꞌi, lowesi irowe hesi aꞌi Owane Sitewi maꞌe heneri se pei au itomu hese arowere.” Wkp 12:8
Serai Maria, Josep lowesi lai Moses lo yo peri werese umasiteye.
Meni Simeon meni eime Jisas siyeye.
25 Omo Jerusalem sahe meni ta ironamiteye. Meni lo iyape, Simeon. Meni ape Owane Sitewi lo yo peri umasinamiteye. Yo seni lo aseyaro aꞌi iroteye. Le Owane Sitewi lo teꞌe naneiyei ape tote tawesiteye. Owane Sitewi lo teꞌe naneiyei ape apou aꞌi teꞌeye, “Owane Sitewi lai ai lu werese, Juda lo lu mase ai atuteye ape mo, hi ani fu ararorowa.” Owane Sitewi lo Hepene Waraꞌi aꞌi meni ape sahe ironamiteye. 26 Nowe tu se Owane Sitewi lo Hepene Waraꞌi aꞌi meni ape maꞌe apou eiye, “Ne iꞌero temeniye taꞌame. Ne tu Meni Owane Pefine aꞌi, Owane Sitewi lai hi awei maꞌe eimawe arosairowa ape, iyape Krais siyerowa. Meni Owane Krais, itoraiyei ape, siyerowa su, ne faraꞌu temeniyerowa.” 27 Nowe ape se Josep, Maria aiwawe aꞌi, lowesi meni eime Jisas Owane Sitewi lo wesi maꞌe heneti su, lowesi Owane Sitewi lo yo peri umasiyei ne toteye. Nowe ape se Owane Sitewi lo Hepene Waraꞌi aꞌi meni ape Simeon Owane Sitewi lo wesi maꞌe eimawesawi. 28 Simeon Jisas siyeye su, le meni eime ape ereti se yaꞌoreye. Sosu Owane Sitewi maꞌe au teꞌe wisereyee. Le apou eiye,
29 “Meni Owane, teꞌe naneiyei no wiyeme aꞌi henerai. Ane wiyawi yahowaꞌi siye meni no. Ane Meni Owane Krais siye tepaꞌasiye. Ane marepi fetane aꞌi se faraꞌu temeniyerowa.
30 Meni eime eite lu taune werese maꞌe yo seni, aseyaro au ferafereiyei ape, ane meni eime eite siyeye. Ais 52:10
31 Ne lu taune werese maꞌe meni eime eite wiyawi no taꞌaneyei ne eimawe arosai.
32 Le wiyawi no lu tewi tereꞌe tereꞌe maꞌe au atuatu fiyarirowa. Le mitaiyeyei erasi aiwawe aꞌi henerairowa. Le aiyerowa su, le Juda lo iyape erasi aꞌi ei ani arowerowa.” Ais 42:6; 49:6; 52:10
33 Simeon peri tepaꞌasiye su, Jisas lo aite, mai peri lo ne hepene se suꞌariye. Lowesi peri lo ne marepi erasi aꞌi toteye. 34 Sosu Simeon Owane Sitewi maꞌe lowesi ne apou ei toweriye, “Owane Sitewi, ne lowesi maꞌe au teꞌe wisereyere. Lowesi maꞌe marepi fetane aꞌi aure.” Sosu le menitani Maria meni eime lo mai maꞌe eiye. “Peri ano wanure! Owane Sitewi lai meni eime ape ariariyeye. Lu taune tomu neꞌese peri lo wanurowawe, le maꞌe au teꞌe wisereyeyei. Lu taune tamo peri lo wanu taꞌame. Lowe Owane Sitewi lo peri meꞌiyeni maꞌe atati arunatirowa. Lowe le ne teꞌe narurowa.d 35 Serai lu tewi tamo hesi aꞌi hesi aꞌi lo marepi henerairowa. Lu tewi taꞌi, lowe Owane Sitewi lo peri wanu umasirowa. Lu tewi tereꞌe lowe Owane Sitewi lo peri arisirowa. Owane Sitewi maꞌe ai atu tiyatirowa. Owane Sitewi lai lu taune werese lo marepi ape au atuatu areiyerowa.” Sosu Simeon menitani Maria maꞌe apou eiye, “Meni eime no erasi aꞌi heneraiyei su, ne marepi orese erasi aꞌi teriterowa. Fofowei aꞌi no aiwawe, ipari meneꞌe marepi aine tewi touwei wou aꞌi teriterowa.”
Menitani Ana peri wiyeme aꞌi ta au teꞌeye.
36 Simeon peri tepaꞌasiye su, menitani owane iyape Ana, le Owane Sitewi lo marepi lu taune maꞌe au teꞌeteye. Menitani ape Fanuel lo eime taune. Le lu tewi Aser maꞌe fai. Le yaꞌariyei naihe tani irowe. Tu naifa weriyei le meni ta naitu ene aye. Nowe iyu menei ereti feni werese feni hesi aꞌi i tepaꞌasiye su, meni lo ape temeniyeye. 37 Meni lo temeniyeye su, le Owane Sitewi lo wesi papu wiye. Mi mi weriyei aꞌi le Owane Sitewi lo wesi saro ironamiteye. Iyu menei tomu neꞌese (84 aiwawe aꞌi), le Owane Sitewi lo wesi sahe ironamiteye. Le Owane Sitewi ne marepi erasi aꞌi totenamiteye. Nowe tomu neꞌese se le ayei werese amouweye. Mi mi pasi pasi werese le Owane Sitewi lo iyape ei ani aroweye. Nowe werese le Owane Sitewi lo wiyawi taꞌanenamiye. 38 Nowe ape se Simeon meni eime ereti se yaꞌoreye su, menitani Ana lowesi siyenarai. Le Owane Sitewi maꞌe au teꞌe wisereyeye. Lu taune tomu neꞌese, Owane Sitewi lo teꞌe naneiyei wiyeme aꞌi ninaweteye ape, henerai. Owane Sitewi lo teꞌe naneiyei heneraiyei su, Owane Sitewi lai omo Jerusalem lo ai atu siye lu werese hi ani ararosawiyei. Menitani ape lowe maꞌe meni eime ape ne au teꞌe areiyeye. Meni eime ape Owane Sitewi lo teꞌe naneiyei pefine aꞌi henerai.
Josep omo Nasaret maꞌe si tame fi.
39 Sosu Josep, Maria lowesi Owane Sitewi lo yo peri werese umasiye su, lowesi meni eime aiwawe, pani Galili maꞌe si tame heneti. Omo towafi lowe lo maꞌe Nasaret heneri.e 40 Lowe omo Nasaret saro ironamiteye su, meni eime lowesi lo erasi kairefi aꞌi henerai. Le marepi wisere aꞌi tote ironamiteye. Mi mi weriyei Owane Sitewi lo marepi le maꞌe ironamiteye.
Meni eime Jisas Owane Sitewi lo wesi tutawe maꞌe fi.
41 Nowe iyu menei werese, nowe Pasova se, lowe omo Jerusalem maꞌe Pasova lo sitewi tote tawesiyei ne fi.fg 42 Sosu Jisas iyu menei ereti feni hesi lowe hesi aꞌi (12) i tepaꞌasiye su, lowe omo Jerusalem maꞌe fi. Lowe taꞌuwe hereiyei Pasova ene ayei ne toteye. 43 Taꞌuwe hereiyei a tepaꞌasiye su, lowesi omo towafi lowe lo si tame fi. Meni eime Jisas omo Jerusalem sato iroteye. Aite, mai lowesi eiwerou maꞌe le soꞌoru taꞌama. 44 Lowesi yo sahe itiye su, lowesi apou toteye, “Le kaiyemo tamo mase aiwawe aiyesiya.” Nowe mi taꞌi tepaꞌasiye su, lowesi Jisas kaiyemo tamo se ariye aꞌi teꞌe toweriteye. 45 Lowesi le saro nehi poꞌuteye su, lowesi omo Jerusalem maꞌe si tame nehiyei ne fi. 46 Nowe hesi heta i tepaꞌasiye su, lowesi le Owane Sitewi lo wesi sahe siyeri. Le au heseyei lu owane mase onuteye. Le lu owane lo peri wanu etiteye. Aiwawe aꞌi le lu owane maꞌe etiri tomu neꞌese ei toweriye. 47 Soꞌoru atuatu siye lu owane werese Jisas lo peri wanuwe su, lowe marepi wisere erasi aꞌi toteteye. Le Owane Sitewi lo yo peri werese wanu soꞌoruwe tepaꞌasiye. Le peri itiyaꞌu au teꞌeye su, lowe hepene se suꞌariye. Meni eime etiri werese soꞌoruwe tepaꞌasiye.
48 Lowesi Jisas siyeye su, lowesi tahe auseriye irowe. Sosu mai lo le maꞌe ei toweriye, “Piyene marepi orese aꞌi notosi maꞌe auwe awere? Siyere! Tai no ane aiwawe aꞌi notosi ne nehi poꞌuteteye. Notosi marepi orese aꞌi ne ne teriteteye.” 49 Sosu le lowesi maꞌe itiyaꞌu eiye, “Fenesi piyene ane wesi tereꞌe sahe nehiti awere? Ane tai ano lo wesi sato iroteye. Fenesi soꞌoru taꞌama awere?” 50 Lowesi peri lo sitewi, le lowesi maꞌe au teꞌeye ape, soꞌoru taꞌama. 51 Sosu le lowesi mase omo Jerusalem arunatiyewe, omo Nasaret maꞌe heneri. Nowe mi mi weriyei aꞌi le tai mai lo peri wanu umasinamiteye. Mai lo etiri werese marepi topo lo sahe tote tawesinamiteye.h
52 Sosu aꞌi pe Jisas meni erasi aꞌi henerai. Le nowe iyu menei tomu neꞌese siyeye. Marepi lo wisere erasi aꞌi totenamiteye. Owane Sitewi lai lu taune werese aiwawe aꞌi le ne au teꞌe wisereyeye.i