Jon lu taune maꞌe au teꞌe fiyariteye.
3
Awei meni Owane iyape Taiberias Sisar, Rom lo omo pani werese au noweinoweiteye. Le meni owane tutawe. Iyu menei ereti feni hesi lowe feni taꞌi (15) i tepaꞌasiye su, awei lu owane tamo pani tewi aꞌi tewi aꞌi au noweinoweiteye. Meni owane Pontius Pailat, le omo pani Judia au noweinoweiteye. Meni owane Herot omo pani Galili au noweinoweiteye. Herot lo paꞌise Filip pani Ituria, omo pani Trakonitis aiwawe aꞌi, au noweinoweiteye. Meni owane Lisanias omo pani Abilene au noweinoweiteye. 2 Nowe ape se au heseyei lu owane hesi aꞌi iyape Anas, sosu Kaiafas, lowesi Owane Sitewi lo wesi tutawe au noweinoweiteye.Sosu aꞌi pe Owane Sitewi lai meni Jon maꞌe peri ta au teꞌeye. Jon Sekaraia lo meni eime pani ariye aꞌi saro howeiteye.
Luk 3:1-4:13
3 Le Owane Sitewi lo peri wanuwe su, le pani ariye aꞌi arunatiyewe, Saꞌi Jordan tewiye feni maꞌe fi. Le lu taune werese maꞌe apou eiye, “Fene werese yo seni luwaru aꞌi fene lo meꞌiyeni maꞌe atati arunatire. Owane Sitewi maꞌe si tame atati awetotire. Fene Owane Sitewi maꞌe si tame atati awetotiyei su, ane fene werese saꞌi se au huwei. Owane Sitewi lai yo seni luwaru werese aꞌi fene lo au sasari pamoweyei.”a 4 Owane Sitewi lo peri au teꞌe siye meni ta iyape, Aisaia, le meni Jon ne apou leseye.
“Meni ta peri erasi pani ariye aꞌi sahe apou au uterowa. Apou au uterowa, ‘Fene werese Meni Owane Pefine lo yo mai aiyeyei ape au ariariye naneire. Yo mai lo au toso fareraiyere.
5 Nepesi werese awei horuse fu temeꞌeriyere. Omo werese horuse fiyarisawire. Omo werese yo mai lo, onu tawesisiya ape, horuse fiyarisawire. Yo mai, apeꞌi apeꞌiyei ape, fene fareraiyere. Yo tapiye aꞌi se, fene tapiye werese horuse sasarire. Serai yo mai ape lo potu wisere aꞌi heneraiyei.
6 Meni ape aiyerowa su, le lu taune werese, yo seni luwaru aꞌi iroteye ape, ete hene anirowa. Le yo seni luwaru werese aꞌi au sasari tepaꞌasirowa. Lu taune werese werese Owane Sitewi lo kairefiyeyei siyerowa.’” Ais 40:3-5
7 Serai meni Jon lu taune, le maꞌe ani huwei ne fai ape, le lowe maꞌe apou teꞌeye, “Fene haru aimesi lo yene, fene piyene fai awere? Eiwerai fene maꞌe au teꞌeye, ‘Fene etiri luwaru aꞌi irowei su, Owane Sitewi lai etiri luwaru aꞌi itiyaꞌu auwei. Serai fene ane maꞌe saꞌi ani huwei ne fai.’b 8 Serai fene ane maꞌe saꞌi ani huwei ne aiyeyei su, fene yo seni luwaru aꞌi werese fene lo arunatire. Marepi fene lo Owane Sitewi maꞌe si tame atati awetore. Fene apou owe ape teꞌere. ‘Meni Abraham yaꞌariyei nomo lo ne. Nomo Owane Sitewi lo nihe se lu taune aseyaro aꞌi ne.’ Wawero tene! Ane fene maꞌe au teꞌesiya. Owane Sitewi Pefine aꞌi, le aꞌi lai tapiye eite mo se Abraham lo eimane au taꞌane heneraiyei.c 9 Owane Sitewi lo peri ape apou wou aꞌi teꞌesiya, ‘Me ta me so wisere aꞌi taꞌe taꞌame su, lu tamo lai me ape ourowawe, yehe maꞌe fusawirowa.’”d
10 Lu taune werese peri lo wanuwe su, mi mi werese lowe le maꞌe teꞌe toweriteye. “Nomo eiwerou irowei awere?”
11 Le lowe maꞌe itiyaꞌu eiye, “Meni ta ipari tahe hesi irosiya ape, le meni ariye aꞌi ape maꞌe ipari tahe taꞌi aure. Meni ta ene ayei tamo futeyei su, le meni, lau aꞌi irosiya ape, meni ape maꞌe nonere.”
12 Nowe ta se Takis maꞌaru ani siye lu tamo lowe meni Jon maꞌe saꞌi au ani huwei ne fai. Lowe le maꞌe teꞌe toweriye, “Atuatu siye meni, nomo eiwerou irowei awere?”e
13 Sosu le lowe maꞌe itiyaꞌu eiye, “Fene lu taune werese maꞌe owe ape arearere. Fene lowe lo maꞌaru owe ape taꞌarei anire. Awei meni owane takis maꞌaru tewi aꞌi ariariyeye. Takis maꞌaru ape aꞌi anire. Maꞌaru tereꞌe tomu neꞌese owe ape taꞌarei anite.”
14 Ai atu siye lu tamo le maꞌe teꞌe toweriyei ne fai. Lowe apou ei toweriye, “Ne nomo ne totere. Nomo eiwerou irowei awere?” Sosu le lowe maꞌe itiyaꞌu eiye, “Fene lu ta lo maꞌaru owe ape ai atu taꞌarei anite. Fene peri meꞌiyeni maꞌe tiyati owe ape teꞌe narute. Maꞌaru towafi fene lo, fene aniyei ape, fene marepi fetane aꞌi totete.”
15 Lu taune tomu neꞌese Jon ne marepi erasi aꞌi tote tiyatiteye. “Meni Jon eiwerai awere? Meni ape Krais awere? Le meni ape Owane Sitewi lai ariariyeye ape awere? Piyete awere? Tu naifa Owane Sitewi lai yaꞌariyei nomo lo maꞌe peri teꞌe naneiyei ta auwe. Nomo, meni ape lo aiyeyei ape ne, ninawesiya.” 16 Sosu Jon peri lowe lo wanuwe su, le lowe maꞌe itiyaꞌu eiye, “Fene ane maꞌe siyere. Ane meni Krais se taꞌama. Ane saꞌi waraꞌi aꞌi se fene au huwei ne fai. Meni ta ane moꞌo aiyeyei ape, le Meni Owane Pefine aꞌi ne. Ane meni yahowaꞌi aꞌi ne. Ane lowe tahe lo wafei ani tahe eraurowata. Meni ape aiyeyei su, le fene maꞌe Owane Sitewi lo Hepene Waraꞌi aꞌi se au huwei. Yehe aiwawe aꞌi se au hu-wei.f 17 Meni ape aiyeyei su, le meni ta wou aꞌi nau teineyei ne fi. Le nau hamei teineyei su, nau fi leꞌiye papu itorowa. Nau hamei seni ani fusawiyei. Nau teine tepaꞌasiyei su, le nau motowe se weniyei. Wesi sahe fuwei. Nau hamei seni foroꞌo aꞌi su, le yehe sahe fusawiyei. Yehe ape noruwerowata.” 18 Serai Jon lu taune werese maꞌe Owane Sitewi lo peri heneruwe wisere aꞌi peri morose se au teꞌe atuatu fiyariye.
Jon lai Jisas saꞌi au huwe.
19-22 Nowe ta se Jon lu taune tamo maꞌe saꞌi se au huteye su, meni Jisas Jon maꞌe saꞌi se ani huwei ne fai. Sosu, Jisas Owane Sitewi maꞌe au teꞌeye su, Owane Sitewi lai niꞌarawe aine erauwiye. Owane Sitewi lo Hepene Waraꞌi aꞌi le maꞌe irowe sapuwe wou aꞌi iyoꞌo sahe sine onurai. Peri ahi morose erasi aꞌi hire maꞌe itorai. Jisas maꞌe apou eiye, “Wanure! Ne meni eime ano ne! Ane ne ne marepi erasi aꞌi tote wawesiyenamisiya. Etiri werese no, ne iroteye ape, ane ne ne au wisereye nineꞌisiya.”
Herot lai Jon kalabus wesi maꞌe ani fu arowe.
Nowe moꞌo ta se Jon meni Jisas saꞌi au hu tepaꞌasiye su, le awei Owane Herot maꞌe apou eiye, “Ne yo seni luwaru aꞌi irowe. Ne paꞌise no lo tani Herodias tafaꞌe yo seni luwaru aꞌi iroteye. Yo seni werese no luwaru aꞌi ne.” Herot Jon lo peri wanuwe su, le Jon maꞌe ai marepi erasi aꞌi toteye. Le Jon kalabus wesi maꞌe hene fu arunari.g
Jisas lo yaꞌariyei lo lu tewi aꞌi ne.
23 Sosu aꞌi pe Jisas nowe iyu menei meni ta werese, meni tereꞌe ta ereti feni hesi aꞌi (30) iroteye. Nowe ape se le wiyawi tutawe lo taꞌaneye. Lu taune tamo le ne apou toteye, “Meni ape Josep lo meni eime awere?”
24 Eli, Matat lo meni eime.
Matat, Livai lo meni eime.
Livai, Melki lo meni eime.
Melki, Janai lo meni eime.
Janai, Josep lo meni eime.
25 Josep, Matatias lo meni eime.
Matatias, Amos lo meni eime.
Amos, Nahum lo meni eime.
Nahum, Esli lo meni eime.
Esli, Nagai lo meni eime.
26 Nagai, Mat lo meni eime.
Mat, Matatias lo meni eime.
Matatias, Semen lo meni eime.
Semen, Josek lo meni eime.
Josek, Joda lo meni eime.
27 Joda, Joanan lo meni eime.
Joanan, Resa lo meni eime.
Resa, Serubabel lo meni eime.
Serubabel, Sealtiel lo meni eime.
Sealtiel, Neri lo meni eime.
28 Neri, Melki lo meni eime.
Melki, Adi lo meni eime.
Adi, Kosam lo meni eime.
Kosam, Elmadam lo meni eime.
Elmadam, Er lo meni eime.
29 Er, Josua lo meni eime.
Josua, Elieser lo meni eime.
Elieser, Jorim lo meni eime.
Jorim, Matat lo meni eime.
Matat, Livai lo meni eime.
30 Livai, Simeon lo meni eime.
Simeon, Juda lo meni eime.
Juda, Josep lo meni eime.
Josep, Jonam lo meni eime.
Jonam, Eliakim lo meni eime.
31 Eliakim, Melea lo meni eime.
Melea, Mena lo meni eime.
Mena, Matata lo meni eime.
Matata, Natan lo meni eime.
Natan, Devit lo meni eime.
32 Devit, Jesi lo meni eime.
Jesi, Obet lo meni eime.
Obet, Boas lo meni eime.
Boas, Salmon lo meni eime.
Salmon, Nason lo meni eime. Rut 4:17-22
33 Nason, Aminadap lo meni eime.
Aminadap, Atmin lo meni eime.
Atmin, Arni lo meni eime.
Arni, Hesron lo meni eime.
Hesron, Peres lo meni eime.
Peres, Juda lo meni eime.
34 Juda, Jekop lo meni eime.
Jekop, Aisak lo meni eime.
Aisak, Abraham lo meni eime.
Abraham, Tera lo meni eime.
Tera, Nahor lo meni eime.
35 Nahor, Seruk lo meni eime.
Seruk, Reu lo meni eime.
Reu, Pelek lo meni eime.
Pelek, Eber lo meni eime.
Eber, Sela lo meni eime.
36 Sela, Kainan lo meni eime.
Kainan, Arpaksat lo meni eime.
Arpaksat, Siem lo meni eime.
Siem, Noa lo meni eime.
Noa, Lamek lo meni eime. Stt 11:10-26
37 Lamek, Metusela lo meni eime.
Metusela, Enok lo meni eime.
Enok, Jaret lo meni eime.
Jaret, Mahalalel lo meni eime.
Mahalalel, Kainan lo meni eime.
Kainan, Enos lo meni eime.
38 Enos, Set lo meni eime.
Set, Adam lo meni eime.
Adam, Owane Sitewi lo meni eime. Owane Sitewi lai Adam awei peperi se taꞌaneye. Stt 4:25-26