Satan Jisas areareyei ne toteye.
4
Owane Sitewi lo Hepene Waraꞌi aꞌi Jisas lo marepi papu temeꞌeriyeye. Jisas Saꞌi Jordan arunati su, Owane Sitewi lo Hepene Waraꞌi aꞌi lai le pani ariye aꞌi maꞌe heneti. 2 Nowe mi pasi lu hesi werese (40) Satan Jisas lo marepi luwaruweyei ne toteye. Nowe werese ape Jisas etiri werese ene a taꞌame. Nowe werese ape i tepaꞌasiye su, le lau erasi mase teriteteye. 3 Sosu sepei Satan le maꞌe eiye, “Ne Owane Sitewi lo meni eime pefine aꞌi su, ne tapiye eite maꞌe apou eire, ‘Tapiye, ne nau taꞌase wou aresaiye heneraire.’” 4 Jisas le maꞌe itiyaꞌu eiye, “Wanure! Owane Sitewi lo peri sahe meni ta apou leseye,‘Lu werese nau taꞌase aꞌi ene arowata.’” Lo 8:3
5 Serai sepei Satan lai Jisas omo erasi aꞌi hire maꞌe hene yaneye. Le Jisas omo pani werese werese nowe witane se aꞌi au atuatu areiyeye. 6-7 Sosu sepei Satan le maꞌe eiye, “Ne ane maꞌe lowe uporo apeꞌi onurowawe, ane maꞌe au teꞌe wisereyeyei su, ane ne maꞌe omo pani werese werese aꞌi aunamiyei. Owane Sitewi lai tu naifa weriyei awei pani werese werese ane maꞌe auwe. Serai ane marepi ano umasiyei. Ane faraꞌu meni ta maꞌe tewi aꞌi auwei.” 8 Sosu Jisas le maꞌe itiyaꞌu eiye, “Owane Sitewi lo peri sahe meni ta apou leseye,
‘Fene Owane Sitewi Pefine aꞌi maꞌe au teꞌe wisereye nineꞌite. Fene le maꞌe lowe uporo apeꞌi onute.’” Lo 6:13-14
9 Serai sepei Satan lai Jisas omo Jerusalem maꞌe si tame heneti. Le Jisas Owane Sitewi lo wesi tutawe meꞌiye maꞌe hene wiye. Le Jisas maꞌe eiye, “Ne Owane Sitewi lo meni eime pefine aꞌi su, ne topo ne hi maꞌe fu yeꞌi arore.” 10 Piyene awere? “Owane Sitewi lo peri sahe apou leseye,
‘Le ipari werese lo le ne au noweinoweiyei ne eimawe arosaiyei.’”
‘Owane Sitewi lai ipari tamo lo le maꞌe eimawe arosaiyei. Lowe le maꞌe ereti se anite tawesirowa. Serai tapiye werese lowe no tewirowata.’ Serai ne Owane Sitewi lo wesi meꞌiye hi maꞌe winetaiyei su, Owane Sitewi lai ipari werese lo ne maꞌe au noweinoweiyei ne eimawe arosairowa.” Sng 91:11-12
12 Sosu Jisas le maꞌe itiyaꞌu eiye, “Owane Sitewi lo peri apou teꞌeye.
‘Ne Owane Sitewi Pefine aꞌi no owe ape teꞌe arearete.’” Lo 6:16
13 Sepei Satan Jisas lo marepi memeꞌiyei ne tote tepaꞌasiye su, le Jisas arunatiyewe fi. Nowe moꞌo ta se le Jisas lo marepi si tame memeꞌirowa.a
Jisas wiyawi lo pani Galili maꞌe au taꞌaneteye.
14 Owane Sitewi lo Hepene Waraꞌi aꞌi lo kairefiyeyei Jisas mase ironamiteye. Jisas omo pani Galili si tame fi. Pani Galili maꞌe heneri su, lu taune tomu neꞌese omo omo werese sahe Jisas fai ape ne, peri heneruwe lo wanuwei ne taꞌuwerai.
Luk 4:14-44
15 Sosu le taꞌuweyei wesi werese papu wiye su, le Owane Sitewi lo peri lu taune maꞌe au teꞌe fiyariye. Lowe peri lo wanuwe su, lowe le maꞌe au teꞌe wisereyeye.
Nasaret lo lu tamo Jisas ne ai marepi toteteye.
16 Le Omo Nasaret maꞌe omo sitewi lo heneri. Owane Sitewi lo nowe amou (Sabat) ariariyeye ape se, le taꞌuweyei wesi papu Owane Sitewi lo peri au teꞌeyei ne wiye. Nowe ape se Juda lo lu taune Owane Sitewi maꞌe au teꞌe wisereye nineꞌiteye. Le taꞌuweyei wesi papu wiye. Le ponei sahe teiyewe, Owane Sitewi lo peri one towe sahe siye teꞌeye. 17 Meni ta, one towe Aisaia leseye ape, Jisas maꞌe siye teꞌeyei ne auwe. Jisas one towe aniye su, le peri ta siye nehiteye. Peri ta siyeye su, le apou siye teꞌeye. “Owane Sitewi lo peri sahe apou leseye.
18 ‘Meni Owane Pefine lo Hepene ane mase ironamisiya. Le ane lu taune maꞌe etiri ariye aꞌi irosiya ape, Owane Sitewi lo peri au teꞌeyei ne ariariyeye. Le ane maꞌe apou teꞌeye. Ne kalabus lo wesi maꞌe ire. Lu taune werese, kalabus wesi irosiya ape, maꞌe eire, fene werese kalabus wesi fu arunatire. Le ane lu taune werese nihe pokowe se maꞌe eimawesawi. Ane maꞌe apou eiye, Ne lu taune nihe pokowe se werese nihe lowe lo au petanere. Ai atu siye lu tamo lu taune maꞌe au luwaruweyei su, ne lowe maꞌe au pati taꞌaneyei ne ire.
19 Owane Sitewi lo Hepene Waraꞌi aꞌi ane maꞌe tame eiye, ne lu taune werese maꞌe apou au teꞌerire. Nowe moꞌo ta se Meni Owane Pefine aꞌi lai au pati taꞌane siye meni fene maꞌe eimawesairowa.’” Ais 61:1-2
20 Jisas siye teꞌe tepaꞌasiye su, le one towe ape ti tawesiye. Meni ta maꞌe si tame auwe. Le one towe si tame au tepaꞌasiye su, le saro onuwe. Lu taune werese taꞌuweyei wesi sahe le maꞌe siye etiye. 21 Sosu le lowe maꞌe au teꞌeye, “Pereye Owane Sitewi lo peri fene wanuwe ape, le ane ne au teꞌeye. Serai ane fene maꞌe henerai paite.”
22 Lowe werese peri lo wanuwe su, lowe le ne marepi wisere aꞌi toteye. Lowe apou toteye, “Meni ape Josep lo meni eime awere? Peri ape, le nomo maꞌe au teꞌeye ape, wisere aꞌi ne.”b
23 Sosu le lowe maꞌe eiye, “Atu, fene ane maꞌe peri ta apou eiyei, ‘Dokta, ne u tahe topo lo au taꞌane faraꞌuwere.’ Fene ane maꞌe au teꞌeyei, ‘Etiri werese omo Kaperneam sahe, ne irowe ape, ne omo sitewi no Nasaret sahe aiwawe aꞌi fa irote.’”
24 Sosu le lowe maꞌe tame eiye, “Peri ano wiyeme aꞌi, ane fene maꞌe eisiya, lu taune werese Owane Sitewi lo peri au teꞌe siye meni lo omo sitewi irosiya ape, lowe le maꞌe au wisereye taꞌame.c 25 Ahowa, ane fene maꞌe peri wiyeme aꞌi se eisiya, tu naifa weriyei nowe Elaija se taune weiname tomu neꞌese pani Israel sahe iroteye. Nowe ape se, Owane Sitewi lai niꞌarawe werese ti tawesinamiye. Nowe iyu menei hesi heta (3) yame ereti feni werese, feni taꞌi aꞌi (6) saꞌi ito taꞌame. Lu taune werese lau erasi aꞌi henerai. Pani werese sahe ayei werese ariye.d 26 Owane Sitewi lai meni Elaija Israel lo taune weiname eimawesawi taꞌame. Ahowa, le menitani weiname omo Sarafat, omo pani Saidon sahe eimawesawi.e 27 Aiwawe aꞌi Elisa lo nowe se Owane Sitewi lo peri au teꞌe siye meni, lu taune tomu neꞌese enite kairefi aꞌi, iyape lepra, pani Israel sahe iroteye. Meni taꞌi aꞌi iyape Naman enite kairefi aꞌi ape niyemaiye poꞌuteye. Le pani Siria saro iroteye. Lowe werese Israel sahe enite kairefi aꞌi lepra ironamiteye ape, enite kairefi aꞌi lowe lo ironamiteye.”f
28 Jisas Owane Sitewi lo wesi tutawe sahe peri ape au teꞌeteye su, lu taune tomu neꞌese le ne ai marepi erasi toteteye. 29 Lowe ai marepi se sineyewe, Jisas maꞌe omo nowe maꞌe hene ani fu arosawi. Lowe le omo nipe ta maꞌe heneti. Omo nipe ape sahe lowe omo Nasaret taꞌaneye. Lowe Jisas omo nipe topoꞌo hi maꞌe ani fu arowei ne toteye. 30 Ahowa, le lowe werese ponei sahe aweraꞌiyenatiyewe fi.
Jisas sepei luwaru aꞌi ta au taꞌane sasarisawi.
31 Sosu aꞌi pe le lowe aweraꞌiyenatiyewe fi su, le omo Kaperneam, hi maꞌe itori. Omo Kaperneam, Galili lo pani tewi aꞌi ne. Sosu le lu taune werese maꞌe Owane Sitewi poweiye amou werese au teꞌe fiyariteye. Poweiye ape se Juda lo lu taune werese Owane Sitewi maꞌe au teꞌe wisereye nineꞌiteye. 32 Le peri werese lo au teꞌeye su, le peri lo kairefi aꞌi au teꞌeteye. Lu taune werese peri lo wanuwe su, lowe peri ape ne hepene se suꞌariye.g
33 Nowe ta se le Owane Sitewi lo wesi sahe le meni ta, sepei luwaru aꞌi ironamiteye ape, siyeye. Meni ape Jisas maꞌe peri morose erasi uteye, 34 “Jisas, Nasaret lo meni, ne piyene fai awere? Ne sepei werese aine teraꞌeyei ne fai awere? Ane ne soꞌoruwesiya tene! Ne Owane Sitewi lo meni waraꞌi aꞌi ne. Ne Owane Sitewi maꞌe itorai ne.”
35 Sosu Jisas sepei luwaru aꞌi maꞌe peri lo einamiye. Le maꞌe eiye, “Peri sawa! Ne meni ape nowe maꞌe henera!” Sepei luwaru aꞌi lai meni ape hi awei maꞌe ani fu arowe. Sosu le meni ape arunatiyewe, nowe maꞌe henerai. Le meni ape si tame au luwaruweyei ne wi taꞌame.
36 Lu taune werese etiri ape siyeye su, lowe werese hepene se suꞌariye. Lowe taꞌu teꞌe tiyatiteye. “Piye peri ape lo sitewi awere? Meni ape kairefi erasi aꞌi irosiya. Le sepei luwaru aꞌi maꞌe au teꞌeye su, lowe werese peri lo wanu umasisiya.” 37 Lu taune werese omo pani werese werese aꞌi Jisas lo peri heneruwe ape wanuwe.
Jisas Pita lo mai pape u se ape au taꞌane faraꞌuweye.
38 Sosu aꞌi pe Jisas Owane Sitewi lo wesi arunatiyewe fi. Le meni Saimon lo wesi maꞌe fi. Saimon lo mai pape tahe umeri aꞌi iroteye. Lu tamo Jisas maꞌe menitani ape ne teꞌe toweriye, “Ne faraꞌu menitani lo tahe umeri aꞌi au taꞌane sasariyei awere?” 39 Sosu le menitani atahe aꞌi teiye su, le tahe umeri ape maꞌe apou eiye, “Tahe umeri ape, menitani ape sahe arunatire.” Peri lo teꞌe tepaꞌasiye su, tahe umeri aꞌi ape arunati faraꞌuweye. Le sineyewe, ene ayei tamo lowe au ene aye.
Jisas lu taune u tahe se ape mo au taꞌane faraꞌuweteye.
40 Nowe neriwei poweiye itori su, lu tamo, lu taune tomu neꞌese u tahe tereꞌe tereꞌe se ape mo Jisas maꞌe henetai. Le lowe werese maꞌe ereti topo lo se fuwe. Serai lowe werese u tahe ape au taꞌane faraꞌuweye. 41 Aiwawe aꞌi le lu taune tomu neꞌese sepei luwaru aꞌi iroteye ape, le ipari werese lowe nowe maꞌe naꞌari sasarisawi. Sepei lowe nowe maꞌe henerai su, lowe hare erasi uteye, “Ne Owane Sitewi lo meni eime ne.” Sosu le peri lowe lo werese einamiye. Lowe werese Jisas ne soꞌoruweteye tene! Lowe apou toteye, “Owane Sitewi lai Jisas lu taune werese lo yo seni luwaru aꞌi au sasariyei ne eimawesai. Serai Jisas peri werese lowe lo einamiye.”h
Jisas omo tereꞌe tereꞌe maꞌe uweiteye.
42 Nowe esi pasi su, le Saimon lo wesi arunatiyewe, pani lu taꞌama ape maꞌe fi. Lu taune tomu neꞌese Jisas nehitiye. Lowe le siyeye su, lowe le maꞌe einamiyei ne toteye. Le lowe mase weriyei weriyei fa ironamite. Serai lowe le ne einamiyei ne toteye. 43 Serai le lowe maꞌe eiye, “Ane Owane Sitewi lo peri werese lu taune omo omo tereꞌe maꞌe fa au teꞌe fiyariyei. Owane Sitewi lai ane wiyawi ape au teꞌeyei ne eimawe arosai.” 44 Sosu le mi mi werese taꞌuweyei wesi werese sahe, pani Judia iroteye ape, lu taune werese maꞌe au teꞌe fiyari areiyenamiteye.i