3 Sosu Jisas wai ta papu wi atowe. Le Saimon lo wai papu aro atowe. Le Saimon maꞌe eiye, “Wai no saꞌi se erou oso aꞌi tewi itesawire.” Wai saꞌi maꞌe tewi itesawi su, le wai pihatu saro onuteye. Le lu taune werese maꞌe Owane Sitewi lo peri au teꞌe atuatuteye.

4 Le peri au teꞌe tepaꞌasiye su, le Saimon maꞌe eiye. “Hare ite ponei maꞌe tewi itesawire. Hare honaiye no saꞌi papu fu arore. Ne hare tomu neꞌese aniyei.”

5 Saimon le maꞌe itiyaꞌu eiye, “Meni Owane, nowe pasiyeye su, nomo hare honaiye saꞌi papu ani fu arowe. Nomo hare tamo ani taꞌame. Nomo wiyawi erasi taꞌane tohoteteye, hare werese ariye. Faraꞌu, nomo peri no umasiyei. Nomo hare honaiye saꞌi papu tame ani fu arowei.”^b

6 Sosu lowe hare honaiye ani fu arowe su, hare tomu neꞌese hare honaiye sahe ti tawesiye. Hare tomu neꞌese honaiye ti tawesiye su, hare honaiye apetiyei wou irowe. 7 Hare honaiye apetiyei ne irowe su, lowe lu disaipel lowe lo ei aniye. Hare honaiye fa niꞌariye wirai ne. Lowe hare honaiye lowe lo arunatiyewe, lowe Saimon lo hare honaiye aiwawe niꞌariye wiraiyei ne fi. Lowe hare tomu neꞌese wai hesi ape papu ani asiye. Hare ani asi tepaꞌasiye su, hare tomu neꞌese lai wai hesi ape temeꞌeriyeye. Hare wai hesi ape temeꞌeriyeye su, wai lowe lo aporu itowei ne ataheyeye.

8 Serai Saimon Pita etiri werese siyeye su, le Jisas maꞌe lowe uporo sahe apeꞌi onuwe. Le Jisas maꞌe eiye, “Meni Owane ano, ane meni luwaru aꞌi ne. Yo seni werese ano unou aꞌi ne. Ne ane pei arunatire.” 9 Le peri ape au teꞌeye su, le hare tomu neꞌese aꞌi, aniye ape ne, toteye. Serai le lu disaipel lo aiwawe aꞌi lowe marepi hepene se suꞌariye. 10 Lu hesi tereꞌe Saimon lo lu disaipel lowesi lo iyape apou aꞌi Jems, paꞌise lo Jon. Lowesi lo tai iyape Sebedi.

Sosu Jisas Saimon maꞌe apou eiye, “Ne taweiru sawa! Ne hare ani siye yo arunatiyei. Ne wiyawi heꞌi aniyei. Ne lu taune ane maꞌe henetainamirowa.” 11 Lowe wai saꞌi tewi maꞌe furi su, lowe etiri werese arunati, Jisas mase umasinamiteye.^c

12 Nowe ta se le omo ta heneri. Omo ape sahe meni ta enite kairefi tomu neꞌese se, iyape lepra, ironamiteye. Meni ape Jisas siyeye su, le Jisas maꞌe lowe uporo apeꞌi onurai. Le Jisas maꞌe apou ei toweriye, “Meni Owane, ne marepi no umasiyei su, ne faraꞌu enite werese ano eite mo au taꞌane niyemaiyere. Serai tahe ano waraꞌi aꞌi heneraiyei.”

13 Serai Jisas meni ape lo peri wanuwe su, le ereti lo se meni ape lo tahe sahe isawe heteye. Le meni ape maꞌe eiye, “Ei! Ane marepi ano umasiyei. Enite kairefi aꞌi no niyemaiyeye.” Jisas peri teꞌe tepaꞌasiye su, pereye aꞌi enite kairefi lo niyemaiye tepaꞌasiye.

14 Sosu Jisas le maꞌe apou eiye, “Ne lu taune werese maꞌe owe ape teꞌere. Ahowa, ne enite werese no, niyemaiyeye ape, au heseyei meni owane maꞌe au atuature. Ne au heseyei meni owane maꞌe iyei su, ne ayei ta Owane Sitewi maꞌe au heseyei ne aiti. Tu naifa weriyei meni Moses Owane Sitewi lo peri apou leseye. Ne Moses lo yo peri umasire.

15 Jisas lo peri heneruwe omo pani werese wanuwe su, lu taune tomu neꞌese Jisas maꞌe peri lo wanuwei ne taꞌuwerai. Lowe lu taune u tahe se Jisas maꞌe fa au taꞌane faraꞌuweyei ne henetai. 16 Lu taune tomu neꞌese Jisas maꞌe tei ataheye teititeye su, nowe tomu neꞌese Jisas eresene aꞌi ipo maꞌe Owane Sitewi maꞌe au teꞌe tiyatiyei ne fi.

17 Nowe ta se Jisas lu taune maꞌe au teꞌe fiyariteye su, au heseyei lu owane tame, lu Farisi tamo, Owane Sitewi lo yo peri soꞌoru siye lu tamo aiwawe aꞌi, lowe lu taune werese mase Jisas lo peri wanuwei ne taꞌuwe onurai. Lowe omo pani werese Galili sahe, omo pani Judia werese, sosu omo Jerusalem maꞌe fai. Lowe lu taune werese mase Jisas lo peri wanuwei ne taꞌuwerai. Owane Sitewi Pefine aꞌi lai Jisas maꞌe kairefiyeyei erasi aꞌi u tahe taꞌane faraꞌuweyei ne auwe. 18 Le lu taune maꞌe au teꞌeteye su, lu tamo meni taꞌi wari se sutaitetai. Meni ape lowe hesi nonoꞌoweyei aꞌi ne. Le uweirowata. Lu ape mo meni ape wari se sutaitetai su, lowe le Jisas maꞌe sutaiterowata. 19 Lu taune tomu neꞌese wesi yo sahe tei tawesiye. Lowe meni ape wesi meꞌiye hire maꞌe sutaite wiye. Lowe wesi otowe meꞌiye ponei tepiꞌowe. Sosu lowe meni ape, wari sahe howeiye ape, wafei se hi ani ararowe. Lowe meni ape ponei sahe Jisas lo nihari maꞌe hi ani ararowe. 20 Sosu Jisas tote tawesiyei lowe lo siyeye su, le meni ape maꞌe apou eiye, “Kaiyemo, ane yo seni luwaru werese aꞌi no au taꞌane sasari pamoweyei.”^d

21 Owane Sitewi lo yo peri soꞌoruwe siye lu, lu owane Farisi aiwawe aꞌi Jisas lo peri wanuwe su, lowe apou teꞌe tiyatiteye. Lowe apou eiye, “Meni ape le Owane Sitewi ne au teꞌe naruwe. Eiwerai awere? Owe meni ta lai yo seni luwaru aꞌi au taꞌane sasarirowata. Owane Sitewi taꞌi aꞌi lai yo seni luwaru aꞌi au taꞌane sasariei.”

22 Jisas marepi lowe lo siye soꞌoruwe tepaꞌasiye su, le lowe maꞌe apou eiye, “Fene piyene marepi totesiya awere? 23 Ane fene maꞌe peri hesi ei toweriye. Ane meni ape maꞌe au teꞌeyei su, ane yo seni luwaru aꞌi werese no au taꞌane sasari pamowesiya. Peri ano ape wiyeme aꞌi awere? Peri wawero aꞌi awere? Fene siye soꞌoruwerowata. Ahowa, ane meni ape maꞌe au teꞌeye su, ‘Meni, sinere! Hese howeiyei tapi no ani woronere.’ Fene peri ano wiyeme aꞌi siyeyei awere? Piyete awere? Marepi ano apou aꞌi totesiya. Meni ape, lowe hesi haroharo aꞌi iroteye ape, uwei yeꞌi sineyei su, fene peri wiyeme aꞌi ano siye soꞌoruwe tepaꞌasiyei. 24 Fene wanure! Fene etiri ta pei siye soꞌoruwere. Ane meni ape, omo hire maꞌe itorai ape, Owane Sitewi lai ane maꞌe kairefiyeyei lo auwe. Owane Sitewi lo kairefiyeyei se ane faraꞌu meni ape lo lowe haroharo hesi aꞌi ape au taꞌane kairefiyerowa.” Sosu ne peri ano wiyeme aꞌi siye soꞌoruwerowa. Serai le meni ape siye etiyewe, le maꞌe eiye, “Meni, ane ne maꞌe eisiya, Sinere! Hawaiye no ani woronere. Wesi no maꞌe ire!”^e

25 Pereye aꞌi meni ape sineye. Le hawaiye lo ani woroneye. Wesi lo maꞌe fi. Le wesi nowe maꞌe heneye su, le Owane Sitewi maꞌe au teꞌe wisereyenamiteye. 26 Lu taune werese Jisas lo peri wanuwe su, lowe marepi hepene se suꞌariye. Lowe werese Owane Sitewi maꞌe au teꞌe wisereyenamiteye. Lowe werese marepi atoweiye aꞌi ne. Lowe peri teꞌe tiyatiteye. “Nowe pereye nomo etiri erasi pefine aꞌi siye areiye tepaꞌasiye.”

27 Le peri teꞌe tepaꞌasiye su, le wesi papu arunatiyewe, nowe maꞌe heneye. Le meni taꞌi iyape Matyu siyeye.^f Le takis lo wesi sahe onuteye. Meni ape lo wiyawi apou aꞌi, takis maꞌaru ani siye meni. Jisas meni ape maꞌe eiye, “Ne ane moꞌo umasita.” 28 Meni ape Jisas lo peri wanuwe su, le etiri werese arunatiyewe, Jisas moꞌo umasiti.

29 Nowe pereye, lowesi Livai lo wesi maꞌe fi. Le Jisas maꞌe ayei erasi taꞌuwe hereiyei au irowe. Lu tomu neꞌese Livai lo wesi sahe ene ayei ne taꞌuwerai. Takis maꞌaru ani siye lu tomu neꞌese, lu tereꞌe tereꞌe tomu neꞌese aiwawe aꞌi ei taꞌuwerai. Lowe werese Jisas mase ene ateye. 30 Lu Farisi tamo, Owane Sitewi lo yo peri lese siye lu tamo, lowe Jisas lo lu feni maꞌe ai peri teꞌeye. Lowe apou teꞌeye, “Fene piyene takis maꞌaru ani siye lu tamo, sosu lu yo seni luwaru aꞌi mase ene asiya awere?”^g

31 Jisas peri lowe lo wanuwe su, le lowe maꞌe itiyaꞌu apou eiye, “Fene u tahe se iroteyei su, fene meni dokta siyenari. Fene tahe u taꞌame su, fene meni dokta siyenarirowata. 32 Ane lu taune werese yo seni waraꞌi aꞌi irosiya ape, ei aniyei ne fai taꞌama. Ahowa, ane lu taune werese yo seni luwaru aꞌi ape ei aniyei ne fai. Lowe, yo seni luwaru aꞌi iroteye ape, meꞌiyeni maꞌe pei atati arunatire.”

33 Sosu lowe Jisas maꞌe eiye, “Jon lo lu feni mi mi werese ayei werese lowe lo siyenamiye. Lowe ayei siyenamiyei su, lowe Owane Sitewi maꞌe au teꞌeyei. Lu Farisi lo lu feni aiwawe aꞌi ironamisiya. Ahowa, siyere! Lu feni no erasi aꞌi ene asiya. Lowe saꞌi tomu neꞌese asiya. Piyene lowe ene asiya awere?”

34 Sosu Jisas lowe maꞌe eiye, “Ane peri anowe ta fene maꞌe au teꞌeyei. Nowe ta se meni ta tani lo naituwei su, lu werese fai ape, marepi wisere aꞌi irowei. Meni ape tani naituwei su, lu werese ayei siyenamirowata.^h 35 Nowe moꞌo ta aiyerowa su, meni ta, tani naituwei ape, lowe le maꞌe henetirowawe, aine teraꞌerowa. Nowe ape se lowe ayei werese siyenamirowa.

36 Ane peri anowe tereꞌe fene maꞌe au teꞌeyei. Meni ta ipari tahe heꞌi aꞌi aniyei su, le tewi aꞌi ani erauwirowata. Sosu ipari tahe weriyei sahe iwisiyei. Ahowa, le ipari tahe heꞌi tewi aꞌi ani tapetiyei su, le ipari tahe heꞌi aꞌi au luwaruweyei. Ipari tahe tewi aꞌi ani erauwirowawe, sosu ipari tahe weriyei maꞌe iwisiyei su, ipari tahe tewi aꞌi ape aiwawe taꞌame. 37 Meni ta wain saꞌi heꞌi aꞌi taꞌaneyei su, le fe meme lo tahe foroꞌo aꞌi papu ani asirowata. Le wain saꞌi heꞌi aꞌi fe meme tahe foroꞌo ani asiyei su, wain saꞌi heꞌi ape fe meme lo tahe perati irowei. Wain saꞌi werese awei sahe teroso itorowa. Aiwawe aꞌi fe meme lo tahe luwaru aꞌi heneraiyei. 38 Ahowa, meni ta wain saꞌi heꞌi aꞌi taꞌaneyei su, le fe meme lo tahe heꞌi aꞌi papu ani asiyei. 39 Meni ta wain saꞌi weriyei ayei su, le wain saꞌi heꞌi ayei onotaꞌano aꞌi ne. Le apou toteyei, wain saꞌi weriyei wisere aꞌi tene!”