3-4 Sosu Jisas lowe maꞌe itiyaꞌu eiye, “Fene Owane Sitewi lo peri siye teꞌeye taꞌama awere? Nowe ta se yaꞌariyei meni owane nomo lo, Devit, lau erasi iroteye. Le Owane Sitewi lo wesi tutawe papu wiri. Le nau taꞌase amou aniyewe aye. Le lu tewi lo maꞌe nau taꞌase amou ape lowe aiwawe ene ateye. Lu yahowaꞌi aꞌi werese nau taꞌase amou ape ene arowata. Amou tene! Au heseyei lu owane lowe aꞌi lai nau taꞌase amou ape faraꞌu ene arorowa. Fene nowe amou ape lo sitewi soꞌoru taꞌama.”^c 5 Le lowe maꞌe eiye, “Ane, meni hire maꞌe itorai ape, ane nowe amou lo Meni Owane Pefine aꞌi ne. Ane etiri ta nowe amou ape se taꞌaneyei ne toterowa su, ane etiri faraꞌu taꞌanerowa.”

6 Sosu aꞌi pe nowe amou tereꞌe nowe meꞌiye henerai su, le lu disaipel lo aiwawe aꞌi taꞌuweyei wesi papu wiri. Le lu taune maꞌe Owane Sitewi lo peri au teꞌe fiyariteye. Meni ta taꞌuweyei wesi sahe ereti eyate feni lo nonoꞌoweye aꞌi iroteye. 7 Lu Farisi tamo, Owane Sitewi lo peri lese siye lu tamo, lowe Jisas siye etinarai. Le nowe amou ape su meni ape, ereti nonoꞌoweye aꞌi ape, au taꞌane faraꞌuweyei awere? Piyete awere? Marepi lowe lo apou aꞌi toteye, “Jisas poweiye amou eite se meni ape au taꞌane faraꞌuweyei su, nomo le awei lo meni owane maꞌe etiyei ne henetiyei.” 8 Ahowa, Jisas marepi lowe lo siye soꞌoruwe tepaꞌasiye. Serai le meni ape ereti nonoꞌoweye aꞌi ape ei aniye. Le meni ape maꞌe apou eiye, “Ne sinere! Ane maꞌe aiya!” Serai meni ape sineyewe, Jisas maꞌe fai. 9 Sosu le lowe maꞌe apou eiye, “Fene ane maꞌe peri ta itiyaꞌu teꞌere. Ane peri ta fene maꞌe ei towerisiya. Nowe amou se, ane wiyawi wisere aꞌi taꞌaneyei su, ane Moses lo yo peri arisiyei awere? Piyete awere? Ane etiri luwaru aꞌi irowei su, ane yo peri ape arisiyei awere? Ane meni u tahe erasi se ape taꞌane faraꞌuweyei awere? Nowe amou se ane meni ape au taꞌane faraꞌuweyei awere? Ane yo peri ta arisiyei awere? Ane meni ta aine teraꞌeyei su, ane yo peri ta arisiyei awere? Fene peri ano ane maꞌe itiyaꞌu teꞌere.” 10 Jisas peri teꞌe tepaꞌasiye su, le lowe werese maꞌe siye etiye. Sosu le meni ape maꞌe apou eiye, “Ereti no au tesi fareraiyere.” Meni ape Jisas lo peri wanuwe su, ereti lo tesi fareraiyeye. Ereti tesi fareraiyeye su, ereti lo kairefi aꞌi henerai. 11 Lu Farisi meni ape lo ereti kairefi aꞌi siyeye su, lowe Jisas ne ai marepi erasi aꞌi toteye. Lowe apou teꞌe tiyatiye. “Nomo Jisas eiwerou irowei awere?”

12 Sosu nowe ape se, le taꞌuweyei wesi arunatiyewe, omo ta yaneye. Le omo ape sahe Owane Sitewi maꞌe au teꞌeyei ne yaneye. Nowe pasi werese se le Owane Sitewi maꞌe au teꞌe tiyatiteye. 13 Nowe esi mitaiyeye su, le lu disaipel lo ei aniye. Le lu disaipel ereti feni hesi lowe hesi aꞌi (12) ariariyeye. Lu ereti feni hesi lowe hesi aꞌi ape le lowe maꞌe iyape aposel au teꞌe ariariyeye.^d 14 Lu disaipel lo iyape apou aꞌi ne, Meni Saimon, Jisas meni ape iyape tereꞌe au eiye, Pita. Meni Andru, Saimon lo paꞌise, nairi hesi lo iyape Jems, Jon, Meni Filip, Meni Bartolomyu, 15 Meni Matyu, meni Tomas, meni tereꞌe Jems, le Alfius lo meni eime. Meni tereꞌe Saimon. Le Rom lo lu owane maꞌe ai atu tiyatiteye. 16 Meni Judas, le Jems lo meni eime, meni Judas Iskariot. Nowe meꞌiye su le Jisas Rom lo ai atu siye lu maꞌe henetirowa.

17 Sosu Jisas lu disaipel lo aiwawe aꞌi omo ape hi maꞌe itorai. Lowe nepawe potu aꞌi heneri. Lu taune tomu neꞌese Jisas lo peri wanuwei ne taꞌuweye. Lu taune tomu neꞌese omo pani Judia maꞌe fai ape, lu taune tomu neꞌese omo Jerusalem maꞌe fai ape, aiwawe aꞌi lu taune tomu neꞌese omo Saidon, omo Tair maꞌe fai ape, 18 Lowe werese Jisas lo peri wanuwei ne taꞌuwerai. Lu taune u tahe se lowe Jisas maꞌe au taꞌane faraꞌuweyei ne henetai. Lu taune tamo, sepei luwaru aꞌi lire papu iroteye ape, Jisas sepei luwaru werese aꞌi au taꞌane sasarisawi. 19 Lu taune tomu neꞌese apou aꞌi toteye, “Ane meni ape hetesiyeyei su, u tahe ano waraꞌi heneraiyei.” Meni ta Jisas lo ipari tahe isawe hetesiyeyei su, Jisas lo kairefi meni ape lo u tahe au taꞌane faraꞌuweye.

20 Serai Jisas lu disaipel lo maꞌe atati siyeteye. Lowe maꞌe apou eiye,

27 Ahowa, ane fene maꞌe eisiya. Peri ano wanure! Lu tamo fene maꞌe au luwaruweyei su, fene lowe maꞌe marepi erasi aꞌi itiyaꞌu au tote wawesiyenamite! Aiwawe aꞌi lu tamo ai marepi fene maꞌe totenamiyei su, fene etiri wisere aꞌi lowe maꞌe itiyaꞌu pei atuatute. 28 Lu tamo fene maꞌe peri luwaru aꞌi au teꞌe naruwei su, fene lowe maꞌe au teꞌe wisereyete. Lu ape mo fene maꞌe au luwaruweyei su, fene Owane Sitewi maꞌe lowe ne au teꞌe towerite. 29 Meni ta ahi si eyate feni maꞌe fene lo ereti se aineyei su, fene ahi si feni tereꞌe maꞌe fene lo atati teite. Serai le ahi si feni tereꞌe maꞌe faraꞌu ereti se aineyei. Meni ta fene maꞌe ipari tahe ta fene maꞌe ei toweriyei su, fene le maꞌe ipari tahe hesi aꞌi fene lo aiwawe aꞌi aure. 30 Meni ta fene maꞌe etiri ta ei toweriyei su, fene etiri ape le maꞌe aure. Meni ta lai etiri fene lo taꞌarei aniyei su, fene etiri ape ne si itiyaꞌu owe ape ei towerire. 31 Fene apou aꞌi toteyei su, ‘Lu taune werese ane ne yo seni wisere aꞌi au iroreme.’ Fene apou aꞌi toteyei su, fene lowe maꞌe yo seni wisere aꞌi aiwawe irore.^f

32 Fene lu tewi fene lo aꞌi marepi erasi aꞌi tote wawesiyenamiyei su, etiri ape yahowaꞌi aꞌi ne. Lu taune luwaru aꞌi, lowe lu tewi lowe lo maꞌe marepi erasi aiwawe aꞌi tote wawesiyenamiyei. 33 Meni ta etiri wisere aꞌi fene maꞌe irowei su, sosu fene le maꞌe etiri wisere aꞌi itiyaꞌu irowei su, yo seni ape yahowaꞌi aꞌi ne. Lu taune luwaru aꞌi yo seni aiwawe aꞌi irowei. Lowe etiri wisere aꞌi itiyaꞌu irowei. 34 Fene apou toteyei su, “Ane kaiyemo ano maꞌe etiri ta auwei su, le etiri ta ane maꞌe itiyaꞌu aurowa. Marepi fene lo luwaru aꞌi ne. Yo seni yahowaꞌi aꞌi ne. Lu taune luwaru aꞌi lowe lu taune tereꞌe luwaru aꞌi maꞌe etiri ta auwei. Lowe etiri ta auwei su, lowe etiri aiwawe aꞌi itiyaꞌu aniyei ne toteyei. 35 Ane fene maꞌe eisiya. Lu taune tamo fene maꞌe au luwaruweyei su, fene lowe ne marepi wisere aꞌi totenamire. Fene lowe maꞌe etiri wisere aꞌi irore. Lowe fene maꞌe etiri ta ei toweriyei su, fene lowe maꞌe etiri ape aure. Sosu fene lowe maꞌe itiyaꞌu owe ape ei towerire. Fene yo seni ape umasiyei su, Owane Sitewi lai nowe yeꞌewi se fene maꞌe etiri wisere neri aꞌi aurowa. Fene Owane Sitewi Pefine aꞌi lo eimane henerairowa. Le aꞌi lai lu taune luwaru aꞌi maꞌe ferafereiyei lo auwe. Le aiwawe aꞌi lu taune tamo, marepi luwaru aꞌi irosiya ape, maꞌe ferafereiyei lo auwe. 36 Tai wiyeme fene lo lai lu taune werese maꞌe au ferafereinamisiya. Serai fene ferafereiyei lo yo seni aiwawe aꞌi umasite. Fene lu taune werese maꞌe au ferafereite.

37 Fene lu taune tereꞌe lo yo seni owe ape hese ereite. Fene lu taune tereꞌe lo yo seni hese ereirowa su, Owane Sitewi lai yo seni fene lo ape au hese ereirowa. Serai fene lu taune tereꞌe lo yo seni owe ape hese ereite. Fene lu taune tamo apou owe ape teꞌere, ‘Fene yehe omo maꞌe ire.’ Fene lu taune tamo yehe omo maꞌe teꞌe eimawesawiyei su, Owane Sitewi lai fene aiwawe aꞌi yehe omo maꞌe eimawesawirowa. Meni ta fene maꞌe au luwaruweyei su, fene meni ape lo yo seni tote iꞌane arunatite. Fene lu taune lo yo seni tote iꞌane arunatiyei su, Owane Sitewi lai yo seni luwaru aꞌi fene lo tote iꞌane arunatirowa.^g 38 Fene lu taune maꞌe etiri ta auwei su, Owane Sitewi lai fene maꞌe etiri ta itiyaꞌu auwei. Le fene maꞌe niye erasi aꞌi itiyaꞌu auwei. Le etiri erasi aꞌi fene maꞌe niye fene lo papu suꞌari ani teroso asi arowe. Fene lu taune maꞌe etiri oso aꞌi auwei su, Owane Sitewi lai aiwawe aꞌi fene maꞌe etiri oso aꞌi ta auwei.”^h

39 Jisas lowe maꞌe peri anowe ta au teꞌeteye, le apou au eiye, “Meni ta nihe lo pokowe tawesiyei su, le meni tereꞌe, nihe pokowe tawesiye ape, hene ani uweiterowata. Ahowa, lowesi afofoweyei. Lowesi yo mai sahe papu ninapune winetairowa.ⁱ 40 Eimane tamo lai meni owane towafi lowe lo ape eiwerou hi ani ararorowata. Ahowa, meni eime ta etiri werese siye soꞌoruweyei su, le meni owane lo wou heneraiyei.^j 41 Fene piyene kaiyemo ta lo nihe oroꞌoru tewi oso aꞌi siyeyei awere? Fene me meni erasi nihe towafi fene lo papu siyerowata. 42 Fene kaiyemo maꞌe owe ape teꞌere, ‘Ane faraꞌu oroꞌoru tewi oso aꞌi nihe no ani tahe aniyei.’ Ahowa, fene me meni erasi nihe towafi fene lo papu irosiya su, fene kaiyemo lo oroꞌoru tewi oso aꞌi nihe papu irosiya ape, ani tahe aniyei ne siyerowata. Fene marepi hesi aꞌi siye lu ne, fene tu me meni erasi, nihe towafi fene lo papu irosiya ape, ani tahe fusawire. Sosu fene me meni erasi, nihe fene lo sahe irosiya ape, ani tahe fusawi tepaꞌasiyei su, fene faraꞌu kaiyemo lo oroꞌoru tewi oso aꞌi nihe sahe irosiya ape, siye ani tahe fusawirowawe, siye etirowa.”

43 “Fene wanure! Me wisere aꞌi so luwaru aꞌi taꞌerowata. Sosu aiwawe aꞌi me luwaru aꞌi ta so wisere aꞌi taꞌeyerowata. 44 Fene me so siyeyei su, fene me so eiwerou aiwawe aꞌi siyerowawe, meni ta momo, niꞌari wafei se ani taꞌe anirowata. Aiwawe aꞌi meni ta patiyawe so, me owapiyo ani taꞌeye anirowata. 45 Meni wisere aꞌi marepi wisere aꞌi lo se toteyei su, le yo seni waraꞌi aꞌi ironamiyei. Aiwawe aꞌi meni luwaru aꞌi ta marepi luwaru aꞌi topo lo se toteyei su, le yo seni luwaru aꞌi ironamiyei. Lu taune werese peri ta au teꞌeyei su, lowe marepi lowe lo se au teꞌeyei.”

46 “Fene tomu neꞌese ane maꞌe apou teꞌesiya ape, ‘Ne Meni Owane Pefine aꞌi nomo lo ne.’ Ahowa, fene peri ano wanu umasi se taꞌame.^k 47 Lu taune ane maꞌe aiyerowawe, sosu peri ano wanu umasiyei su, lowe meni ta wesi taꞌaneyei lu wou aꞌi ne. 48 Lowe meni ta wou aꞌi wesi heꞌi taꞌanesiya. Meni ape wesi heꞌi taꞌaneyei su, le awei yo erasi horuseye itowei. Sosu le me neꞌise tou opo asi arowei. Le tapiye aine leyau tawesi kairefiyeyei. Le me neꞌise opo asi arowei su, le faraꞌu wesi hire maꞌe taꞌaneyei. Serai saꞌi erasi itoraiyei su, saꞌi ei erasi wesi ape aine towesi narowata. Ahowa, wesi ape lo me neꞌise kairefi aꞌi teinamiyei. 49 Ahowa, meni tereꞌe ta peri ano wanu arisiyei su, le meni tereꞌe wou aꞌi ne. Meni ape wesi heꞌi taꞌaneyei su, le me pereꞌe oso aꞌi eneri sahe horuse opo asi arowei. Sosu wesi heꞌi me pereꞌe hire maꞌe taꞌaneyei. Serai saꞌi erasi itoraiyei su, saꞌi ei erasi aꞌi wesi ape lo aine towesi naroweyei. Sosu wesi ape lo towesi toꞌute naroweyei.”