3 Serai ai atu siye meni Jisas omo ape heneraiyei wanuwe su, le Juda lo lu owane tamo Jisas maꞌe eimawesawi. Lowe Jisas maꞌe heneri su, lowe le maꞌe apou teꞌe toweriye, “Ne ai atu siye meni lo wiyawi meni yahowaꞌi aꞌi au pati taꞌane faraꞌuwera.” 4 Lowe Jisas maꞌe heneri su, lowe Jisas maꞌe peri kairefi aꞌi se teꞌe toweriye, “Ai atu siye meni ape meni waraꞌi aꞌi ne. Serai ne meni ape pei au ferafereire! 5 Meni ape Juda lo lu taune werese ne marepi erasi aꞌi tote wawesiyenamisiya. Meni ape taꞌuweyei wesi nomo lo taꞌaneteye. Meni ape meni waraꞌi wisere aꞌi ne. Serai ne faraꞌu meni ape au ferafereire!” 6 Jisas peri lowe lo wanuwe su, le lowe mase aiwawe aꞌi fi.

Lowe ai atu siye meni lo wesi maꞌe atahe aꞌi heneri su, meni ape kaiyemo tamo Jisas maꞌe eimawesai. Lowe le maꞌe peri ta apou au teꞌesai, “Meni Owane, ane meni yahowaꞌi aꞌi ne. Ne Meni Owane Pefine aꞌi ne. Ne wesi ano wirowata. Wesi ano luwaru aꞌi ne. 7 Serai ane aꞌi lai ne maꞌe aiyerowata. Sosu ane lu owane ne maꞌe ei aniyei ne eimawesawi. Ane meni yahowaꞌi aꞌi ne. Ne peri teꞌeyei su, wiyawi meni yahowaꞌi aꞌi ano u tahe poꞌuteyei. 8 Wanure! Ane meni owane taꞌi unahi irosiya. Ane peri lo wanu umasiyei. Ane ai atu siye meni owane ne. Ane ai atu siye lu tomu neꞌese au noweinoweisiya. Ane ai atu siye meni ta maꞌe eiyei su, ‘Ne ire!’ Meni ape peri ano wanu umasiyei. Ane meni tereꞌe maꞌe apou eiyei su, ‘Ne aiya!’ Meni ape peri ano wanu umasiyei. Aiwawe aꞌi ane wiyawi yahowaꞌi aꞌi meni ano maꞌe eiyei su, ‘Ne wiyawi ape taꞌanere!’ Wiyawi yahowaꞌi aꞌi meni ano peri ano wanu umasiyei. Serai ane fene maꞌe apou eisiya, ne wiyawi yahowaꞌi meni ano au taꞌane faraꞌuwere!”

9 Serai Jisas peri ape wanuwe su, le meni ape ne apou eiye, “Wisere aꞌi ne!” Sosu le ai atu siye meni ape ne marepi erasi aꞌi tote wawesiyenamiteye. Le lu taune werese maꞌe moꞌo umasiteye ape, apou eiye, “Wanure! Ane fene maꞌe eisiya, meni ape lo tote tawesiyei erasi aꞌi irosiya. Le lu taune werese lo tote tawesiyei pani Israel sahe hi ani ararosiya!” 10 Serai lu tewi ape mo, ai atu siye meni owane Jisas maꞌe eimawesai ape, lowe Jisas arunatiyewe, ai atu siye meni lo wesi si tame fi su, lowe wiyawi yahowaꞌi aꞌi siye meni lo u tahe poꞌute siyeye.

11 Nowe meꞌiye su, Jisas, lu disaipel lo aiwawe aꞌi, omo Nain maꞌe fi. Lu taune tomu neꞌese aiwawe aꞌi Jisas mase moꞌo umasitai. 12 Sosu lowe omo ape lo yo tewiye ahi taꞌo heneri su, lu tamo meni temeniyeye ape, omo nowe maꞌe fisiye yo papu fuwei ne sutaiteti. Menitani weiname lu taune tomu neꞌese aiwawe aꞌi fai. Meni temeniyeye ape ne, menitani weiname meni eime taꞌi aꞌi auteiye. 13 Jisas menitani weiname siyeye su, le weiname ape ne marepi erasi aꞌi ewiteye. Le le maꞌe eiye, “Luwei sawa!”

14 Sosu le meni ape lo wari maꞌe atahe aꞌi teiye. Le ereti lo wari sahe fuwe. Lu ape mo, wari sutaitetai ape saro aꞌi teiteye. Jisas meni maꞌe, temeniyeye ape, apou eiye, “Yoꞌorei meni, ane ne maꞌe eisiya. Ne si sinere!” 15 Serai meni ape si sine onuwewe, lowe maꞌe teꞌeteye. Sosu Jisas meni eime ape mai lo maꞌe si tame auwe.^a

16 Lu taune werese etiri ape siyeye su, lowe marepi atoweiye irowe. Lowe Owane Sitewi maꞌe au teꞌe wisereyenamiteye. Lowe apou au teꞌeteye, “Owane Sitewi lo au teꞌe siye meni erasi nomo mase henerai tepaꞌasiye. Owane Sitewi lai lu taune werese lo maꞌe au ferafereiyei ne itorai.”^b 17 Lowe Jisas ne peri heneruwe omo pani werese Judia maꞌe au teꞌe fiyariteye. Omo pani tereꞌe maꞌe lowe peri heneruwe au teꞌe fiyariteye.

18 Jon lo lu feni tamo le maꞌe Jisas ne peri heneruwe au teꞌeye. 19 Meni Jon Jisas lo peri heneruwe wanuwe su, le lu feni hesi aꞌi lo ei aniye. Le lowesi Owane Jisas maꞌe peri ta teꞌe toweriyei ne eimawesawi. Lowesi le maꞌe apou teꞌe toweriyei, “Owane Sitewi lai meni owane hi awei maꞌe eimawe arosairowa. Ne meni ape awere? Nomo meni tereꞌe siye nehi ninaweteyei awere?”

20 Sosu lowesi Jisas maꞌe henerai su, lowesi Jisas maꞌe apou teꞌe toweriye, “Ne meni ape, Owane Sitewi, hi awei maꞌe eimawe arosaiyei ape, awere? Piyete awere? Nomo meni tereꞌe ninaweteyei awere?”^c

21 Nowe ape se Jisas lu taune lo u tahe tomu neꞌese au taꞌane faraꞌuweteye. Le lu taune lo marepi orese aꞌi au fareraiyeteye. Sosu le sepei luwaru aꞌi tomu neꞌese au taꞌane sasariteye. Sosu lu taune tamo nihe pokowe tawesiyei se, le nihe lowe lo au ani petaneteye. 22 Serai le lowe maꞌe itiyaꞌu eiye, “Fenesi Jon maꞌe si tame ire. Le maꞌe peri heneruwe ano au teꞌere, ‘Notosi peri lo wanuteye, sosu wiyawi lo siyeteye. Lu tamo nihe pokowe tawesiyei ape mo, le nihe lowe lo au taꞌane petaneye. Lu tamo lowe, haroharo aꞌi iroteye ape mo, le lowe haroharo aꞌi lowe lo au taꞌane kairefiyeteye. Lu taune tamo, enite kairefi aꞌi iroteye ape, le enite werese lowe lo au taꞌane niyemaiyeteye. Lu apaniye wiyapuweye se, le apaniye lowe lo au taꞌane faraꞌuweteye. Serai lowe peri amerame aꞌi wanuwe. Lu tamo temeniyeye ape, le lowe si tame hene sineteye. Lu taune maꞌaru ariye aꞌi se, le peri heneruwe wisere aꞌi lowe maꞌe au teꞌeteye.^d 23 Meni ta ane ne marepi hesi se tote taꞌame su, marepi lo wisereye nineꞌinamisiya.’”

24 Lu hesi, Jon Jisas maꞌe eimawesawi ape, lowesi Jisas lo peri wanuwe su, lowesi Jon maꞌe si tame fi. Lowesi si fi su, Jisas lu taune werese maꞌe Jon ne au teꞌeye. Le apou eiye, “Fene pani ariye aꞌi maꞌe fi su, fene piye etiri siyeyei ne toteye awere? Meni Jon menei wou fiyaru lai au ani aunariyeye awere? 25 Ahowa, le menei wou taꞌama. Fene piye siyeyei ne fi awere? Meni taꞌi ipari tahe wisere aꞌi ani asiye awere? Ahowa, wanure! Lu werese ipari tahe wisere aꞌi ani asinamiye ape, lowe owane lo wesi wisere aꞌi saro onusiya. Lowe werese etiri tomu neꞌese ironamisiya. 26 Ahowa, fene piye siyeyei ne fi awere? Owane Sitewi lo peri au teꞌe siye meni awere? Ei, ane fene maꞌe eisiya! Meni ape Owane Sitewi lo peri au teꞌe siye lu werese hi ani ararowe.^e 27 Tu naifa weriyei meni ta Owane Sitewi lo one towe sahe meni ape ne apou leseye, Owane Sitewi Meni Owane Krais maꞌe apou eiye,

29 Sosu lu taune werese, lu tamo takis maꞌaru ani siye ape, aiwawe aꞌi lowe Jisas lo peri wanuwe su, lowe apou eiye, “Owane Sitewi lo yo seni wisere aꞌi ne.” Lu tewi ape mo tu naifa Jon lai lowe maꞌe saꞌi se au huteye.^f 30 Ahowa, lu Farisi tamo, Owane Sitewi lo yo peri ani soꞌoru siye lu tamo, lowe Owane Sitewi lo marepi lo sitewi arisiye. Jon lai lowe maꞌe saꞌi se au hu taꞌame.^g

31 Serai Jisas lowe ne apou au teꞌeye, “Lu tewi ape ne ane piye peri anowe wou au teꞌe areiyeyei awere? Lu tewi ape ne, nowe eite se irosiya ape, lowe piye yo seni wou aꞌi awere? 32 Farisi lu tewi apou wou aꞌi, lowe eimane wou aꞌi ne. Eimane ape lai taꞌuweyei pani tewi maꞌe taꞌuwe onurai. Lowe teꞌe tiyatiye apou eiye, ‘Nomo fene ne meneꞌe fateye su, fene unei apeꞌi te taꞌame. Nomo lu soposopowei ewite irowe su, fene lu taꞌame.’ 33 Meni ape Jon, saꞌi au hu siye meni, le fai su, le nau taꞌase, wain saꞌi a taꞌame. Fene meni ape siyeye su, fene le ne apou teꞌeye. ‘Sepei luwaru aꞌi meni ape papu ironamisiya.’ 34 Sosu ane, meni hire maꞌe itorai ape, ane ene ayei ataiteye, wain saꞌi ataiteye su, fene ane ne apou teꞌeye. ‘Meni ape ayei ahi aꞌi meni. Le meremereye aꞌi meni. Le lai takis maꞌaru ani siye lu werese, lu taune seni luwaru aꞌi ironamisiya ape, le lowe mase ironamiteye.’^h 35 Ahowa, lu taune werese Owane Sitewi lo peri wanu umasisiya ape, lowe Owane Sitewi ne tote teꞌesiya, ‘Etiri werese, ane irosiya ape, etiri ape mo lai ane meni pefine aꞌi ne au atuatusiya.’”

36 Sosu aꞌi pe Jisas peri tepaꞌasiye su, Farisi meni ta Jisas maꞌe ei toweriyei ne fai. “Ne wesi ano sahe ane mase ayei ne aiya!” Serai Jisas lu disaipel lo aiwawe aꞌi Farisi meni ape mase aiwawe fi. Lowe wesi papu wiye su, metei sahe ene ayei ne onuwe. 37 Lowe metei ene ayei onuwe su, menitani ta, wesi omo ape sahe le yo seni luwaru aꞌi ironamiteye. Le Jisas Farisi lo wesi sahe wiyei wanuwe su, le tapiye paꞌare saꞌi heneri wisere aꞌi Jisas maꞌe aitai.ⁱ 38 Menitani ape Jisas lo lowe maꞌe apeꞌi onuwewe, le nihe saꞌi se Jisas lo lowe saꞌi au huteye. Saꞌi au hu tepaꞌasiye su, le mato towe lo, lowe sahe au ani teine foroꞌoweye. Le Jisas lo lowe maꞌe au nineꞌiteye. Le saꞌi heneri aꞌi Jisas lo lowe sahe au ani teineye.

39 Meni Farisi ape Jisas le mase aiwawe aꞌi ei aniye ayei ne ei toweriye ape, le menitani ape siyeye su, le marepi topo lo sahe apou toteye, “Meni ape Owane Sitewi lo peri au teꞌe siye meni taꞌama. Ahowa, meni ape Owane Sitewi lo peri au teꞌe siye meni su, le menitani lowe lo teriteye ape, siye soꞌoruweye. Menitani ape lo yo seni luwaru aꞌi ironamisiya.”

40 Jisas Farisi meni lo marepi siye soꞌoruweye su, le meni ape maꞌe apou eiye, “Saimon, ane peri ta ne maꞌe au teꞌeyei.” Farisi meni le maꞌe itiyaꞌu eiye, “Atuatu siye meni, ne ane maꞌe au teꞌere!”

41 Serai Jisas le maꞌe peri anowe ta au teꞌeye, “Meni owane ta lu hesi maꞌe maꞌaru neri aꞌi auwe. Nowe meꞌiye su, le lu hesi ape ei aniye. Le lowesi maꞌe eiye, ‘Fenesi maꞌaru ano itiyaꞌu tame aure.’ Meni taꞌi maꞌaru tomu neꞌese aniye. Meni tereꞌe maꞌaru tewi oso aꞌi aniye. 42 Nowe meꞌiye su, meni owane maꞌaru lo si itiyaꞌu fu auwei ne ei aniye. Lowesi maꞌaru ape mo si itiyaꞌu aurowata. Meni owane ape lowesi maꞌe apou eiye, ‘Faraꞌu aꞌi ne. Ane maꞌaru neri aꞌi aꞌi ano fu arosawinamiyei. Fenesi ane maꞌe owe ape itiyaꞌu aure.’ Ane ne maꞌe ei towerisiya, Piye lu hesi owane ne marepi erasi pefine aꞌi totesiya awere?” 43 Sosu Saimon le maꞌe itiyaꞌu eiye, “Marepi ano apou aꞌi totesiya. Meni ape maꞌaru tomu neꞌese aniye ape, le meni owane ne marepi erasi wiyeme aꞌi totesiya.” Sosu Jisas itiyaꞌu eiye, “Ei, ne marepi no wiyeme aꞌi tote fareraiyeye.”

44 Serai Jisas menitani ape maꞌe atati siyeye. “Saimon, ne menitani eite siyere! Ane wesi no wirai su, ne saꞌi ta lowe ano sahe au hu taꞌame. Ahowa, menitani ape nihe saꞌi topo lo se lowe ano au huteye. Moꞌo su, le mato towe topo lo, lowe ano au ani teine foroꞌoweteye. 45 Ane wesi wiye su, ne lowe ano maꞌe au nineꞌi taꞌame. Ahowa, ane wesi no fai su, menitani eite lowe ano maꞌe aunamiteye. 46 Ne mato ano sahe saꞌi au fu taꞌame. Menitani eite lowe ano sahe saꞌi heneri wisere aꞌi au ani teroso teineteye. 47 Serai ane ne maꞌe apou eisiya, ane menitani eite lo yo seni luwaru tomu neꞌese iroteye ape, ane lai au taꞌane sasari pamowe tepaꞌasiye. Serai menitani eite ane aꞌi marepi erasi pefine aꞌi tote nineꞌinamisiya. Ahowa, meni tereꞌe ta, yo seni luwaru oso aꞌi iroteye ape, sosu Owane Sitewi lai meni ape lo yo seni luwaru aꞌi ani pamoweye su, meni ape Owane Sitewi ne marepi tewi oso aꞌi totesiya.”

48 Sosu le menitani maꞌe apou eiye, “Menitani, ane yo seni luwaru werese aꞌi no au taꞌane sasari pamowe tepaꞌasiye.”

49 Lu tamo le mase metei ene ayei ne onuwe ape, lowe apou toteye, “Meni ape eiwerai awere? Meni ape yo seni luwaru aꞌi au taꞌane sasariteye awere?”

50 Serai le menitani maꞌe apou eiye, “Tote tawesiyei no erasi aꞌi ne. Ane yo seni luwaru no au taꞌane sasari pamoweye. Serai ne menitani aseyaro aꞌi henerai. Ne marepi fetane aꞌi mase ire.”^j