4 Sosu aꞌi pe lu taune tomu neꞌese Jisas lo peri wanuwei ne taꞌuwerai. Lu taune tamo omo omo eyeri maꞌe fai. Lu taune le maꞌe taꞌuwerai su, le lowe maꞌe peri anowe ta au teꞌeye. 5 “Meni ta taꞌaneyei awei maꞌe me so lo yehe sameyei ne fi. Le kewi so ani teroso fiyarisawi su, kewi so tamo yo mai tewi maꞌe winetaiye. Lu taune tamo yo sahe uweitaiteye su, lowe kewi so hire ato teiteye. Kewi so tamo irowe lai oruwe sowateye. 6 Kewi so tamo awei tewi tapiye aꞌi sahe winetaiye. Nowe meꞌiye su, kewi so peratiyewe wamu witane aꞌi wirai. Poweiye ponei su, kewi wamu poweiye tewi haroharoweye. Kewi napi saꞌi tore anirowata. 7 Kewi so tereꞌe tamo wafei niꞌari ponei sahe winetaiye. Kewi wamu wirai su, wafei niꞌari kewi wamu napetu tawesiteye. Serai kewi wamu wirowata. 8 Kewi so tereꞌe tamo awei wisere aꞌi sahe winetaiye. Nowe meꞌiye su, kewi so peratiyewe, wamu erasi aꞌi wirai. Kewi erasi wirai tepaꞌasiye su, kewi so tomu neꞌese taꞌeyei su, wahu 100 tamo se kewi so ani asi temeꞌeriyeye.”

Sosu Jisas peri anowe au teꞌe tepaꞌasiye su, le lowe maꞌe apou uteye. “Lu taune ta peri ano wanuwe su, lowe peri ano umasire.”

9 Sosu aꞌi pe Jisas lo lu disaipel le maꞌe apou teꞌe toweriye, “Peri anowe ape, piye sitewi lo teꞌesiya awere?” 10 Jisas lowe maꞌe itiyaꞌu eiye, “Owane Sitewi lai fene maꞌe peri anowe lo sitewi au atuatu areiyerowa. Owane Sitewi fene maꞌe nowe ape se, le lu taune werese au noweinoweirowa ape, peri pefine aꞌi au atuatu areiyerowa. Lu taune tereꞌe ane lai Owane Sitewi lo marepi fareyare aꞌi au teꞌerowata. Ane lowe maꞌe peri anowe aꞌi au teꞌerowa. Ane lowe maꞌe peri anowe se au teꞌeyei su, lowe etiri ta siyeye.

11 Peri anowe ape apou teꞌesiya. Kewi so Owane Sitewi lo peri aiwawe aꞌi ne. 12 Kewi so ape mo yo mai tewiye maꞌe winetaiye ape, lowe lu taune wou aꞌi ne. Lowe Owane Sitewi lo peri wanuwe su, sepei Satan witane aꞌi Owane Sitewi lo peri marepi lowe lo sahe tore aniye. Serai lowe Owane Sitewi lo peri wanu umasirowata. Sosu lowe hepene heꞌi wisere aꞌi anirowata. 13 Kewi so ape mo, awei tapiye aꞌi sahe winetaiye ape, lowe lu taune wou aꞌi ne. Lowe Owane Sitewi lo peri wisere aꞌi wanuwe su, lowe kairefi aꞌi tote tawesiye se taꞌame. Etiri yo seni luwaru aꞌi lowe maꞌe heneraiyei su, yo seni luwaru aꞌi ape lai tote tawesiyei lowe lo tore aniyei. Lowe lo tote tawesiyei lo sitewi kairefiyeyei se taꞌama. Serai lowe tote tawesiyei lowe lo arunatiyei. 14 Kewi so ape mo wafei niꞌari ponei sahe winetaiye ape, peri ape lo sitewi apou wou aꞌi ne. Lu taune Owane Sitewi lo peri wanuwe su, lowe marepi wisere aꞌi toteye. Ahowa, lowe etiri werese lowe lo ironamiye su, lowe awei lo yo seni umasinamiteye. Marepi orese aꞌi teriteyei, maꞌaru lo yo seni awei lo yo seni marepi toteyei umasiyei, etiri ape mo tote tawesiyei lowe lo napetu ti tawesinamiteyei. Serai lowe tote tawesiyei lowe lo lu taune maꞌe au teꞌerowata. 15 Kewi so ape mo awei wisere aꞌi sahe winetaiye ape, peri ape lo sitewi apou aꞌi teꞌesiya, lu taune Owane Sitewi lo peri marepi wisere aꞌi se, marepi farere aꞌi se wanu tote tawesi umasinamiteye. Serai lowe tote tawesiyei lowe lo lu taune maꞌe au teꞌe tote iꞌaneteyei.

16 Sosu aꞌi pe meni ta yehe lam taiso fu mitaiyeye su, le lam ape wahu papu owe ape au onu fareyarere. Le wari unahi hi maꞌe owe ape fu fareyarere. Ahowa, le wesi ponei sahe wafei se ti tawesi tewi mitaiyerowa. Serai lu taune wesi ape wirai su, lowe yehe lo tewi mitaiyeyei faraꞌu siyeyei.^b 17 Etiri werese ape mo lu taune lai au fareyareteye ape, Owane Sitewi lai etiri werese ape mo lowe amerame aꞌi au atuatu areiyerowa. Meni ta yo seni, fareyareye irowei ape, yo seni werese lo ape lu taune werese lai amerame aꞌi siyerowa.^c 18 Serai weiyai! Peri ano wanu etire! Lu taune tamo Owane Sitewi lo peri marepi wisere aꞌi se wanu tote tawesi umasinamiteyei su, Owane Sitewi lai tote tawesiyei lowe lo, erasi aꞌi au kairefiyerowa. Ahowa, lu taune tamo Owane Sitewi lo peri wanu arisiyei su, Owane Sitewi lai tote tawesiyei lowe lo tore ani ararowei. Lu taune tamo marepi wawero aꞌi toteyei su, ‘Nomo tote tawesiyei erasi irosiya.’ Owane Sitewi lai marepi lowe lo siyeyewe, tote tawesiyei lowe lo hi ani ararowei.”^d

19 Wesi papu sahe Jisas lu taune tomu neꞌese maꞌe au teꞌe fiyariye su, mai lo, paꞌise lo aiwawe aꞌi lowe le maꞌe peri ta au teꞌeyei ne toteye. Ahowa, lowe Jisas maꞌe ataheyerairowata. Lu taune werese wesi yo tewiye sahe tawesi teiye. 20 Serai meni ta Jisas maꞌe apou eiye, “Wanure! Mai no, paꞌise werese no nowe maꞌe teisiya. Lowe ne maꞌe peri ta au teꞌeyei ne totesiya.”

21 Jisas peri ape wanuwe su, le itiyaꞌu eiye, “Mai ano, paꞌise ano, eiwerai awere? Mai ano, paꞌise ano apou wou aꞌi ne. Lu taune werese Owane Sitewi lo peri wanu tote tawesi umasinamisiya ape, lowe mai ano, lowe paꞌise werese ano ne.”

22 Sosu aꞌi pe nowe meꞌiye su, Jisas, lu disaipel lo aiwawe aꞌi, hare ite Galili maꞌe si tame fi. Lowe wai papu awetowe. Le lowe maꞌe eiye, “Nomo hare ite feni eire maꞌe iyatu toneriyei.” Sosu lowe wai saꞌi ponei maꞌe tewi itesawi. 23 Lowe wai saꞌi ponei maꞌe iyatutiye su, Jisas wai lo si sahe nihe howeiteye. Jisas nihe howeiteye su, fiyaru erasi aꞌi hare ite ponei sahe henerai. Saꞌi ei erasi aꞌi wai ani awetu awetowe. Lowe saꞌi ei lai wai lowe lo ape ani aporuwei ne ataheyeye. 24 Lowe werese saꞌi ei erasi aꞌi ape ne atoweiyeye. Serai lowe Jisas eisowe sineye. Lowe le maꞌe eiye, “Meni Owane, Meni Owane! Wai nomo lo eite saꞌi ei lai ani aporuwei ne ataheyewa. Nomo werese saꞌi papu itowa. Ne nomo au ferafereire!” Serai Jisas sineyewe, le fiyaru, saꞌi ei erasi maꞌe eiye, “Titanere!” Pereye aꞌi fiyaru saꞌi ei titane poꞌuteye. Saꞌi werese titane temeniyeye. 25 Serai saꞌi ei temeniyeye su, Jisas lowe maꞌe eiye, “Tote tawesiyei fene lo, oso aꞌi awere?” Lowe marepi atoweiye hepene se suꞌariye. Lowe teꞌe tiyatiteye, “Meni ape eiwerai awere? Le fiyaru, saꞌi ei maꞌe eiye su, lowesi peri lo wanu umasiye. Serai lowesi temeniyeye.”

26 Sosu lowe omo pani Gerasa maꞌe iyatutiteye. Lowe omo pani Galili maꞌe arunatiyewe, omo Gerasa feni eire maꞌe iyatutiteye. 27 Lowe wai hare ite senitewi sahe furi su, meni ta sepei luwaru tomu neꞌese aꞌi yaꞌoreteye ape, wai senitewi aro teiteye. Le nowe tomu neꞌese aꞌi liye paꞌare ariye aꞌi ironamiteye. Le pasi pasi werese wesi sahe howeirowata. Ahowa, le tapiye fisiye maꞌe howeinamiteye. 28 Meni ape Jisas siyeye su, le Jisas maꞌe winetairai, meni ape Jisas maꞌe peri hare uteyei erasi irowe, “Jisas, ne piyene ane maꞌe au luwaruwenamisiya awere? Ne Owane Sitewi, Tai Pefine aꞌi lo meni eime ne. Ne ane maꞌe owe ape au luwaruwere!” 29 Sepei luwaru aꞌi werese meni ape sahe mi mi pasi pasi weriyei yaꞌorenamiteye. Lu tamo lai meni ape lo ereti, lowe wafei tepi tahe se au ti tawesiye su, sepei luwaru aꞌi lai wafei tepi tahe ape au ani erau sasarisawi. Lu tamo meni ape au noweinoweiteye su, lowe atoweiye iteroti. Meni ape wafei tepi tahe ani erauwe su, sepei luwaru aꞌi lai meni ape pani lu ariye aꞌi maꞌe heneti. Jisas peri ape wanuwe su, le sepei luwaru werese aꞌi meni ape lo au sasariye.

30 Serai Jisas le maꞌe ei toweriye, “Iyape no eiwerou awere?” Sepei luwaru aꞌi le maꞌe itiyaꞌu eiye, “Iyape nomo lo tomu neꞌese ne!” Ipari tomu neꞌese meni ape papu yaꞌorenamiteye. 31 Serai sepei luwaru aꞌi werese le maꞌe teꞌe toweriye, “Ne nomo fisiye yo maꞌe, sitewi taꞌame ape, owe ape eimawesawire.”

32 Omo tewi maꞌe, iroteye ape, fe tomu neꞌese awei maꞌe horuse ene ateye. Sosu sepei luwaru aꞌi fe ape mo siyeye. Lowe Jisas maꞌe teꞌe toweriye, “Ne faraꞌu nomo werese fe papu eimawesawire.” Jisas lowe maꞌe eiye, “Ire!” 33 Serai sepei luwaru aꞌi meni ape arunatiyewe, fe werese papu wiye. Sepei luwaru aꞌi fe papu wiye su, fe werese omo hire itero itoriyewe, saꞌi hi maꞌe papu wi tenise poꞌuteye.

34 Lu werese, fe ape mo au noweinoweiteye ape, lowe omo lowe lo maꞌe iteroti. Lowe lu taune werese omo pani maꞌe peri heneruwe ape au teꞌe fiyarisawi. 35 Serai lu taune peri heneruwe wanuwe su, lowe etiri ape siyeyei ne fai. Lowe Jisas maꞌe henerai su, lowe meni ape, Jisas sepei luwaru aꞌi au sasariye ape, lowe meni marepi wisere aꞌi se siyerai. Le ipari tahe ani asiteye Jisas lo lowe sahe peri lo onu wanuteye. Lowe werese meni ape siyeye su, lowe marepi atoweiye irowe. 36 Lu tamo Jisas sepei luwaru aꞌi au sasariye ape, siyeye su, lowe peri heneruwe lowe maꞌe au teꞌe fiyariye. Lowe apou au teꞌeye, “Meni Jisas sepei luwaru aꞌi meni ape lo au sasariye su, le ipari werese fe nomo lo papu eimawesawi. Serai fe werese omo maꞌe itori saꞌi papu fi. Le lai meni eite au taꞌane faraꞌuweye.” 37 Lu taune werese, omo pani Gerasa iroteye ape, peri heneruwe wanuwe su, lowe le maꞌe teꞌe toweriye, “Ne omo pani nomo lo eite arunatirowawe ire.” Lowe werese marepi erasi aꞌi atoweiyenamiteye. Serai Jisas lu disaipel lo aiwawe aꞌi wai papu awetowewe, hare ite ponei tewi aꞌi iyatutiteye.

38 Meni ape Jisas sepei luwaru aꞌi au sasariye ape, le maꞌe ei toweriye, “Ane faraꞌu fene mase aiwawe iyei awere?” Jisas le omo topo lo maꞌe eimawesawi apou itiyaꞌu eiye, 39 “Ahowa, ne wesi no ire. Ne lu taune werese maꞌe apou au teꞌere. “Peri ano wanure! Meni ape, Jisas, le sepei luwaru werese aꞌi ano au sasari poꞌuteye. Serai ane meni aseyaro aꞌi henerai.” Serai meni ape wesi lo maꞌe fi. Le lu taune werese, omo werese iroteye ape apou au teꞌeye, “Jisas lai sepei luwaru aꞌi werese ano au sasarisawi.”

40 Sosu aꞌi pe Jisas hare ite ape si tame iyatu toneri su, lu taune tomu neꞌese le maꞌe wisere aꞌi au eriteyei ne taꞌuwerai. Lowe Jisas onu ninaweteteye. 41 Lowe wai saꞌi senitewi maꞌe furi su, meni ta iyape, Jairus, Jisas maꞌe peri ta ei toweriyei ne fai. Meni ape taꞌuweyei lo wesi meni owane ne. Le Jisas lo lowe sahe apeꞌi onurai. Le Jisas maꞌe apou ei toweriye, “Meni Owane, ne wesi ano fa aiya. 42 Eime taune ano u tahe erasi se temeniye ataheyewa.” Eime taune taꞌi aꞌi lo iyu menei ereti feni hesi lowe hesi aꞌi ne (12). Jisas meni ape aiwawe fi su, lu taune tomu neꞌese yo mai lowesi lo tei tawesinamiteye.

43 Sosu aꞌi pe menitani naihe Jisas maꞌe heneri. Le u fisaꞌi se iyu menei ereti feni hesi lowe hesi aꞌi (12) fisaꞌi weriyei weriyei heneraiteye. Lu dokta tomu neꞌese u tahe se lo au taꞌane faraꞌuwerowata. 44 Menitani apou toteye, “Ane ereti ano se Jisas lo ipari tahe tewi aꞌi sahe fu teriteyei su, u tahe ano poꞌuterowa.” Serai le Jisas lo meꞌiyeni maꞌe ipari tahe lo sahe isawe hetesiyeye su, u tahe lo poꞌute tepaꞌasiye.

45 Sosu Jisas apou eiye. “Eiwerai ipari tahe ano sahe isawe hetesiye awere?” Lu taune taꞌi taꞌi aꞌi le maꞌe itiyaꞌu eiye, “Ane lai taꞌame.” Sosu Pita itiyaꞌu eiye, “Meni Owane siyere! Lu taune tomu neꞌese ne maꞌe ataheyeraiwa. Ne piyene apou ei toweriye, ‘Eiwerai ipari tahe ano isawe hetesiyeye awere?’”

46 Ahowa, Jisas itiyaꞌu eiye, “Menitani ta ipari tahe ano sahe isawe hetesiyeye. Kairefiyeyei tewi aꞌi ano ane arunatiyewe, menitani tahe ape papu wiye.”

47 Serai menitani ape fareyarerowata. Sosu le Jisas atahe maꞌe auseriyetai. Le nihari lo awei maꞌe epeꞌe arowe. Le le maꞌe peri morose apou eiye, “Meni Owane, ane lai ipari tahe no sahe isawe hetesiyeye. Ane marepi se toteye, ‘Ane ipari tahe lo ereti ano se isawe hetesiyeyei su, u tahe ano poꞌute tepaꞌasiyei.’ Serai ane ipari tahe no sahe isawe hetesiyeye su, u tahe ano poꞌute tepaꞌasiye.” Lu taune werese lo nihe se, menitani ape le maꞌe eiye. 48 Sosu Jisas menitani ape maꞌe eiye, “Menitani, tote tawesiyei no lai u tahe no au iro poꞌuteye. Ne marepi fetane aꞌi se ire!”^e

49 Jisas peri teꞌeye su, meni ta taꞌuweyei wesi meni owane lo wesi maꞌe fai. Le apou eiye, “Jairus, eime taune no temeniyeye. Ne meni owane ape piyene yahowaꞌi aꞌi owe ape henetaire awere!”

50 Jisas peri ape wanuwe su, le Jairus maꞌe itiyaꞌu eiye, “Taweiru sawa! Owane Sitewi maꞌe tote tawesire! Ne Owane Sitewi maꞌe tote tawesiyei su, eime taune no si tame sineteyei. U tahe lo poꞌute tepaꞌasiyei.”

51 Serai lowe Jairus lo wesi heneri su, le lu taune werese wesi papu wiyei ape, einamiye. Lu disaipel lo hesi heta, Pita, Jems, Jon, eime taune lo tai mai, le lowe aꞌi wesi tewi papu hene wiye. 52 Lowe wesi tewi papu wiye su, lu taune tomu neꞌese ewite luwei erasi irowe. Sosu Jisas lowe werese maꞌe eiye, “Luwei sawa! Eime taune ape temeniye taꞌame. Le nihe howeisiya.” 53 Lu taune werese peri lo wanuwe su, lowe Jisas maꞌe niyeyei erasi irowe. Lowe eime taune temeniyeyei soꞌoruweye aꞌi ne. 54 Serai Jisas eime taune lo wari sahe atahe teiye su, le eime taune lo ereti aniteyewe, le maꞌe eiye, “Eime taune, ne sinere!” 55 Pereye aꞌi eime taune lo hepene tahe paꞌare papu si tame wiye. Le wari lo sahe sine onuwe. Eime taune sine onuwe su, Jisas lowe maꞌe eiye, “Fene eime taune ape maꞌe ayei ta au are!” 56 Eime taune lo tai mai siyeye su, lowesi hepene se suꞌariye. Serai Jisas lowesi maꞌe eiye, “Fenesi lu taune maꞌe owe ape au teꞌete!”