3 Le lowe maꞌe eiye, “Fene iyei su, etiri werese mase owe ape aiti. Fene me epi, niye, nau taꞌase, maꞌaru tamo owe ape aiti. Ipari tahe taꞌi aꞌi fene ani asiyei. Ipari tahe tereꞌe owe ape aiti. 4 Omo ta maꞌe heneriyei su, fene wesi taꞌi wire. Fene wesi ape sahe aꞌi ironamire. Fene Owane Sitewi lo peri au teꞌe tepaꞌasiyei su, fene wesi ape arunatirowawe ire. 5 Lu taune tamo lai fene maꞌe erite taꞌame su, fene lowe meꞌiyeni maꞌe atati arure. Fene omo lowe lo arunatiyei su, fene awei onopu, lowe fene lo sahe irowei ape, aine tasenere. Fene peperi ato periperenatiyei su, fene lowe maꞌe Owane Sitewi lo ai peri au atuatu areiyeyei.”^a 6 Sosu Jisas lowe maꞌe au teꞌe tepaꞌasiye su, lowe omo pani werese maꞌe Owane Sitewi lo peri au teꞌeyei ne fi. Lowe lu taune u tahe werese au taꞌane faraꞌuweye.

7 Sosu aꞌi pe awei meni owane iyape Herot. Le wiyawi werese, Jisas iroteye ape, wanuwe su, le marepi lo tote eti perati iroteye. Lu tamo le maꞌe apou eiye, “Meni ape, wiyawi pefine erasi aꞌi iroteye ape, le meni Jon saꞌi au hu siye meni ne. Le si tame norohuwe sineye.”^b 8 Lu tamo tereꞌe apou eiye, “Meni ape Owane Sitewi lo peri au teꞌe siye meni Elaija si tame henerai.” Lu tamo tereꞌe apou eiye, “Meni ape Owane Sitewi lo peri au teꞌe siye meni tu naifa weriyei si tame norohuwe sineye.” 9 Awei lo meni owane Herot meni ape ne apou toteye, “Ane lai Jon saꞌi au hu siye meni lo mato aine tou aniye. Meni ape wiyawi erasi aꞌi irowe ape, eiwerai awere?” Le Jisas maꞌe siyeriyei ne toteye.^c

10 Sosu aꞌi pe Jisas lo lu feni si tame fai su, lowe le maꞌe peri heneruwe, etiri werese irowe ape, ne au teꞌeye. Serai Jisas lu taune werese arunatiyewe, lu disaipel lo mase omo Betsaida maꞌe eresene aꞌi fi. 11 Ahowa, lu taune werese lowe siyesawi. Sosu lowe werese moꞌo umasiti. Lowe le maꞌe taꞌuwerai su, le lowe maꞌe ei eriteye. Le Owane Sitewi lo peri lowe maꞌe au teꞌe fiyariteye. U tahe werese lowe lo au taꞌane faraꞌuweye.

12 Nowe poweiye itoriye su, lu feni werese lo le maꞌe teꞌerai, “Ne lu taune werese omo omo lo maꞌe eimawesawire! Nowe pasiyewa. Ne lowe maꞌe ayei ta eteyei ne eimawesawire. Aiwawe aꞌi lowe faraꞌu wesi ta howeiyei ne nehiye. Omo eite sahe wesi ariye aꞌi ne.” 13 Ahowa, Jisas lu disaipel lo maꞌe apou eiye, “Fene lai lowe maꞌe ayei ta au ene are!” Lowe le maꞌe itiyaꞌu eiye, “Wanure, nomo nau taꞌase oso ereti feni werese hare hesi aꞌi irosiya. Nomo ayei ta eteyei ne iyei awere? Lu taune tomu neꞌese aꞌi ne!” 14 Lu eiwerou aꞌi awere? Lu 5,000 aiwawe aꞌi ne! Ahowa Jisas lowe maꞌe eiye, “Fene lu taune werese maꞌe, weneri 50 aiwawe aꞌi, senarepe sahe ei taꞌuwe onurire.” 15 Sosu lu taune werese weneri ta weneri ta onuti. 16 Lu taune onu tepaꞌasiye su, le nau taꞌase ereti feni werese, hare hesi ereti aniteye. Sosu Jisas hire maꞌe siyeye su, Owane Sitewi maꞌe au teꞌe wisereyeye. Sosu le ayei werese ani topoto lu feni maꞌe auwe. Lu feni lu taune werese maꞌe none ereititeye, none ereitaiteye. Lu taune werese lire ene a temeꞌeriyeye. Sosu lowe none ereiti tepaꞌasiye. 17 Lowe werese ene a tepaꞌasiye su, lu disaipel ape mo nau taꞌase hare tewi aꞌi tamo si sowe taꞌuwe aniyewe, ipi papu sowe asi lotowe. Lowe ipi ereti feni hesi lowe hesi aꞌi (12) sowe asi temeꞌeriyeye.

18 Sosu aꞌi pe Jisas lu disaipel lo aiwawe aꞌi lu taune werese arunatiyewe, lu omo ariye aꞌi maꞌe fi. Le Owane Sitewi maꞌe au teꞌeyei ne fi su, le lowe maꞌe ei toweriye, “Lu taune werese, lowe ane ne, ane piye meni totesiya awere?” 19 Lowe le maꞌe itiyaꞌu teꞌeye, “Jon saꞌi au hu siye meni, lu taune tereꞌe Elaija totesiya. Lu taune tereꞌe apou totesiya, ne Owane Sitewi lo peri au teꞌe siye yaꞌariyei meni weriyei, si tame norohuwe sineye.”^d 20 Sosu le lowe maꞌe ei toweriye, “Fene lai, fene ane ne piye meni totesiya awere?” Sosu Pita le maꞌe itiyaꞌu eiye, “Ne meni wiyeme aꞌi Owane Sitewi lai ariariyeye ape.”^e

21 Serai Jisas Pita lo peri wanuwe su, le lowe maꞌe kairefi se apou eiye, “Fene peri eite lu taune werese owe ape au teꞌete!” 22 Le lowe maꞌe tame eiye, “Ane meni pefine aꞌi, hire maꞌe itorai ape, lu tamo lai ane maꞌe au luwaruweyei. Ane fofowei erasi aꞌi teriteyei. Au heseyei lu owane werese, lu Farisi werese, Owane Sitewi lo yo peri lese siye lu werese, lowe ane ne meꞌiyeni maꞌe atati arunatirowawe, peri ano arisirowa. Meꞌiye su lowe ane aine teraꞌerowa. Ahowa, nowe mi hesi heta se, Owane Sitewi lai ane si tame au taꞌane norohuwe sinerowa.”^f 23 Sosu le lowe werese maꞌe apou eiye, “Meni ta ane umasiyei su, le taꞌu marepi topo lo hi tote ani ararowei. Sosu mi mi werese se le me tapeꞌi topo lo ani sutetire. Ane maꞌe umasire. Etiri luwaru aꞌi lowe maꞌe heneraiyei su, lowe ane ne kairefi aꞌi se pei tote tawesite. Sosu ane maꞌe umasire.^g

24 Lu taune marepi towafi lowe lo umasiyei su, awei lo etiri werese ne tote tawesiyei su, lowe nowe teꞌe oso aꞌi iroteyei. Ahowa, lu taune ane ne marepi erasi aꞌi toteyei su, sosu awei lo etiri meꞌiyeni maꞌe atati aruwei su, Owane Sitewi lai lowe maꞌe marepi hepene heꞌi aꞌi mi mi pasi pasi aurowa.^h 25 Meni ta etiri werese werese aꞌi ani taꞌuwe lotowei su, sosu nowe meꞌiye le temeniyeyei. Etiri werese lo eiwerou irorowa awere? Meni ape lo yo seni luwaru aꞌi tene! Meni ape marepi hepene heꞌi aꞌi mi mi pasi pasi ironamitorowata. 26 Lu taune ta ane ne, peri werese ano aiwawe aꞌi ne, neritaseyeyei su, ane, meni pefine hire maꞌe itorai ape, ane awei hi maꞌe si tame itorairowa su, ane lowe ne au neritaseyerowa. Ane si tame aiyerowa su, ane mitaiyeyei erasi pefine ano aiwawe aiyerowa. Ane Owane Sitewi tai wiyeme lo mitaiyeyei erasi, sosu Owane Sitewi lo ipari wisere lo mitaiyeyei erasi ane mase aiyerowa.ⁱ 27 Peri wiyeme aꞌi wanure! Fene ane mase, pereye nowe irosiya ape, fene Owane Sitewi lo kairefiyeyei, hi awei maꞌe itoraiyei ape, siyerowa. Fene Owane Sitewi lo kairefiyeyei siyerowa su, sosu fene faraꞌu temeniyerowa.” Jisas peri lo tepaꞌasiye.

28 Nowe mi ereti feni werese feni hesi heta (8) i tepaꞌasiye su, Jisas lo disaipel hesi heta Pita, Jems, Jon, le omo hire sahe Owane Sitewi maꞌe au teꞌe tiyatiyei ne hene yaneye. 29 Le Owane Sitewi maꞌe au teꞌe tiyatiye su, nihari lo tereꞌe henerai. Ipari tahe lo wapo pefine aꞌi henerai. Mi waraꞌi wou aꞌi ne. 30-31 Jisas Owane Sitewi maꞌe au teꞌeye su, lu hesi hi maꞌe itorai. Lowesi lo iyape Moses, meni tereꞌe lo iyape, Elaija. Lowesi mi erasi mase itorai. Lowesi Jisas maꞌe au teꞌeteye. Lowe Jisas lo temeniyeyei lo nowe henerai ape, omo Jerusalem sahe teꞌe tiyatiteye.^j 32 Sosu Pita, lu hesi aiwawe fai ape, lowe nihe howeiteye. Lowesi nihe petane sine siyeye su, lowe Jisas lo mi pefine aꞌi lu hesi, le mase teiteye ape, siyeye.^k 33 Lu disaipel lowe maꞌe siyeye su, lu hesi, itorai ape, niꞌarawe hire maꞌe si tame siye aroweye. Serai Pita Jisas maꞌe eiye, “Meni Owane, nomo ne mase sato irosiya. Eite wisere aꞌi ne. Nomo ipo wesi hesi heta faraꞌu taꞌaneyei. Ipo wesi taꞌi ne ne taꞌaneyei, taꞌi Moses lo ne, taꞌi Elaija lo ne taꞌaneyei.” Pita peri topo lo soꞌoru taꞌama. 34 Sosu Pita peri ape lo au teꞌeye su, aitu sapu erasi, hi maꞌe itorai ape, lowe werese napetuwe. Aitu sapu lowe napetuwe su, lowe taweiru aꞌi iroteye. 35 Wanure! Peri erasi aitu sapu maꞌe apou uteye, “Meni ape meni eime ano ne! Ane tu naifa weriyei weriyei le ariariyeye. Fene peri lo wanu umasite!”^l 36 Peri ape teꞌe tepaꞌasiye su, Jisas, lu disaipel hesi heta lo aiwawe aꞌi sato iroteye. Aitu sapu ape, lu hesi hire maꞌe wiye. Lu disaipel hesi heta ape nowe ape se lowe lu taune werese maꞌe etiri werese, lowe siyeye ape, au teꞌeye taꞌama.

37 Nowe moꞌo su, lowe omo ape hi maꞌe itorai su, lu taune tomu neꞌese Jisas maꞌe siyeyei ne taꞌuwerai. 38 Omo hi maꞌe itorai su, meni taꞌi le maꞌe uteye, “Meni Owane, ne meni eime ano siyeyei ne fa aiya. Meni eime ape, meni eime taꞌi aꞌi ano ne. 39 Nowe tomu neꞌese se, sepei luwaru aꞌi le yaꞌorenamiteye. Le hareyei erasi uteteye. Sepei luwaru ape mo, lowe lai le hi awei maꞌe fu arowe. Tahe werese lo auseriye meremereyenamiteye. Ahi pisaꞌi wapo aꞌi heneraiteye. Sepei luwaru aꞌi ape mo mi mi werese le maꞌe au luwaruwenamiteye. Le meni eime arunatirowata. 40 Ane lu feni no maꞌe meni eime ano ei toweriyei ne henetai. Lowe sepei luwaru aꞌi ape au taꞌane sasarirowata.” 41 Sosu Jisas le maꞌe itiyaꞌu eiye, “Lu taune werese, fene tote tawesiyei fene lo ariye aꞌi awere? Fene marepi towafi fene lo tote fareraiye taꞌame. Nowe eiwerou aꞌi ane fene mase ironamirowa awere? Eiwerou su fene siye soꞌoruweyei awere?” Sosu le meni ape maꞌe eiye, “Ne meni eime no heneta.” 42 Sosu meni ape meni eime lo henetai su, sepei luwaru aꞌi ape mo meni eime hi awei maꞌe fu arowe. Tahe lo erasi aꞌi auseriye meremereyeteye. Serai Jisas meni eime siyeye su, le sepei luwaru aꞌi einamiyewe, au sasarisawi. Meni eime ape wisere aꞌi henerai. Sosu Jisas le tai lo maꞌe si tame auwe. 43 Lu taune werese etiri ape siyeye su, apou toteye, “Nomo hepene se suꞌariye, Owane Sitewi lai wisere pefine aꞌi tene!”

Lu taune werese hepene se suꞌariye irowe su, le lu disaipel lo maꞌe apou eiye, 44 “Fene peri ano marepi fene lo papu wanu etire! Ane, meni pefine aꞌi hire maꞌe itorai ape, meni ta lai ane lu tewi luwaru aꞌi maꞌe au henetirowa.”^m 45 Lu disaipel lo, peri lo sitewi wanu soꞌoru taꞌama. Owane Sitewi lai peri sitewi lo lowe maꞌe fareyareteye. Lowe Jisas maꞌe peri sitewi lo au ei toweriyei ne toteye su, Ahowa, lowe marepi atoweiyeye ne. Serai lowe le maꞌe ei toweri taꞌame.ⁿ

46 Sosu aꞌi pe lu disaipel lo lowe ai peri au teꞌe tiyatiteye. Lowe apou ei toweriye, “Nomo eiwerai aꞌi tutawe henerairowa awere?”^o 47 Serai Jisas marepi lowe lo siye soꞌoruwe tepaꞌasiye su, le meni eime ta lu disaipel lo ponei maꞌe au ani teiteye. 48 Sosu le lowe maꞌe eiye, “Meni ta iyape ano se meni eime ape au isafiye wisereyerowa su, le ane maꞌe aiwawe aꞌi au isafiye wisereyerowa. Serai meni ape ane maꞌe au isafiye wisereyeyei su, le Owane Sitewi Pefine wiyeme aꞌi maꞌe, ane hi maꞌe eimawe arosai ape, meni ape le maꞌe aiwawe aꞌi au isafiye wisereyeyei. Meni ta iyape topo lo hi ani ararowei su, le meni tutawe henerairowa.”^p

49 Serai Jon le maꞌe itiyaꞌu eiye, “Meni Owane nomo lo, nomo meni ta sepei luwaru aꞌi iyape no se au taꞌane sasarisawi ape, siyeye. Serai nomo meni ape einamiei ne toteye.” 50 Jisas le maꞌe itiyaꞌu eiye, “Fene meni ape owe ape einamire. Meni ta wiyawi nomo lo aiwawe aꞌi taꞌaneyei su, le nomo maꞌe ai atu tiyatirowata.”^q

51 Sosu aꞌi pe nowe ape se Jisas Owane Sitewi lo omo hire maꞌe wiyei ne ataheyeraiwa. Serai le apou tote eti kairefiyeye, “Ane omo Jeruralem maꞌe fa iyei ne.” 52 Sosu le lu tamo tu eimawesawi. Lowe lu Samaria lo omo maꞌe heneri su, lowe wesi ta Jisas, lu feni aiwawe aꞌi, nihe howeiraiyei ape, au taꞌuwe naneiyei ne fi. 53 Jisas lai omo Jeruralem maꞌe kairefi aꞌi se iyei ne toteye. Serai Samaria lo lu taune le ne meꞌiyeni maꞌe atati aruwe. Serai lowe wesi lo sahe howeirowata. 54 Lu ape mo Jisas maꞌe si tame fai su, lowe lu Samaria lo marepi au teꞌesai. Jisas lo lu disaipel hesi aꞌi Jems, Jon. Lowesi peri heneruwe ape wanuwe su, lowesi Jisas maꞌe ei toweriye, “Nomo faraꞌu Owane Sitewi maꞌe ei toweriyei, ‘Owane Sitewi ne yehe erasi hi awei se eito lowe werese fa ti seroꞌowei ne eimane arosa. Faraꞌu awere?’”^r 55 Ahowa, Jisas lowe maꞌe atati siye etiye su, lowesi maꞌe eiye, “Ahowa!” 56 Serai lowe werese omo ape aweraꞌiyenatiyewe, omo tereꞌe maꞌe howeiyei ne fi.

57 Sosu aꞌi pe lowe omo tereꞌe maꞌe fi su, meni ta Jisas maꞌe eiye, “Ane lai ne eiwerou maꞌe iyei ape, mi mi werese ane ne mase umasinamirowa.” 58 Jisas le maꞌe itiyaꞌu eiye, “Ne tu marepi no tote ereire. You erauwe awei yo sahe faraꞌu howeisiya. Irowe werese uri towafi lowe lo se howeisiya. Ahowa, ane, meni omo hire maꞌe itorai ape, ane yaru ta howeiyei se taꞌama.” 59 Sosu Jisas meni tereꞌe maꞌe eiye, “Ne ane moꞌo umasita!” Meni ape itiyaꞌu eiye, “Ei, ane ne moꞌo umasiyei. Weiya! Ane tu tai ano, temeniyeye ape, fisiye yo sahe towasi nariyei.” 60 Ahowa, Jisas le maꞌe itiyaꞌu eiye, “Lu tamo peri ano wanu umasi se taꞌama ape, lowe faraꞌu tahe paꞌare werese towasi nariyei. Ne lai Owane Sitewi lo nowe se, le lu taune werese au noweinoweitorowa ape, ne lu taune maꞌe omo omo werese sahe au teꞌe fiyarite. Ne lai Owane Sitewi lo kairefiyeyei ne omo omo werese sahe lu taune maꞌe au teꞌe fiyarite.” 61 Sosu meni tereꞌe Jisas maꞌe eiye, “Owane, ane ne moꞌo umasiyei. Weiya! Ane tu wesi ano maꞌe fa iyei su, ane lu tewi ano eriteyei ne iyei. Moꞌo su, ane ne moꞌo umasiyei.”^s 62 Ahowa Jisas le maꞌe eiye. “Meni ta ane moꞌo umasiyei ne toteyei su, le marepi farere aꞌi se umasiyei. Le marepi hesi aꞌi hesi aꞌi owe ape tote umasite. Meni ta marepi hesi aꞌi hesi aꞌi tote umasiyei su, le aꞌi lai, nowe ape se, Owane Sitewi lai lu taune werese au noweinoweitorowa ape, siyerowata. Owane Sitewi lai le ne meꞌiyeni maꞌe atati arurowa.”