Jisas lu feni lo 72 au teꞌe fiyariyei ne eimawesawi.
10
Moꞌo aꞌi pe Meni Owane Jisas lu feni tereꞌe tomu neꞌese (72 aiwawe aꞌi ne), Owane Sitewi lo peri au teꞌe fiyariyei ne ariariyeye. Le lowe werese hesi aꞌi hesi aꞌi omo omo werese maꞌe eimawesawi. Nowe meꞌiye su omo omo werese lu hesi aꞌi hesi aꞌi au teꞌeye ape, le moꞌo umasiyei.a 2 Sosu le lowe maꞌe eiye, “Lu taune tomu neꞌese omo omo werese sahe Owane Sitewi lo yo seni umasi se taꞌama ape, serai fene Owane Sitewi fene maꞌe lu taune ne apou ei towerire, ‘Owane Sitewi, lu weneri oso aꞌi tamo lai peri no au teꞌesiya. Lu taune tomu neꞌese peri no arisinamisiya. Serai ne lu neꞌese tereꞌe lowe maꞌe au teꞌeyei ne ariariyere. Serai ne lowe maꞌe peri no au teꞌe fiyariyei ne eimawesawire.’b 3 Serai fene omo werese maꞌe ire! Ane fene lu taune tamo maꞌe, ai marepi Owane Sitewi ne totesiya ape, eimawesawiyei. Fene fe sipsip lo yene wou aꞌi ne. Ane fene lu taune maꞌe eimawesawiyei su, lu taune ape mo you erauwe wou aꞌi ne. Lowe lai fene au luwaruweyei ne totesiya.c 4 Fene iyei su, ipi werese, owe ape waꞌaretire, niye owe ape waꞌaretire. Lowe tahe fene lo owe ape ani asire. Fene kaiyemo ta yo sahe siyeyei su, fene peri yahowaꞌi aꞌi owe ape tei teꞌe tiyatite.d 5 Fene meni owane ta lo wesi wiyei su, fene tu le maꞌe apou eire, ‘Marepi fetane aꞌi lu taune maꞌe wesi eite sahe ironamite.’ 6 Meni ape marepi fetane aꞌi wesi ape sahe iroteyei ape, Owane Sitewi marepi fetane aꞌi le mase ironamirowa. Meni ta ai marepi wesi ape sahe iroteyei su, Owane Sitewi lo marepi fetane aꞌi fene maꞌe si tame itiyaꞌu aiyerowa. 7 Wiyawi meni owane, le lai wiyawi lu tewi lo maꞌe maꞌaru auwei. Serai fene wesi ta wiyei su, meni owane lai fene maꞌe ayei ta, saꞌi ta au ene ayei. Ayei ape wiyawi maꞌaru fene lo ne fene faraꞌu ayei lo ene are. Fene wesi tereꞌe tereꞌe maꞌe owe ape sewiyetite!e 8 Sosu fene omo maꞌe wiyei su, lu taune fene maꞌe eriteyei su, fene ayei werese lowe fene maꞌe au ene ayei ape, are.f 9 Lu taune ta u tahe se, fene u tahe lowe lo au taꞌane faraꞌuwere! Sosu lowe maꞌe eiye, ‘Nowe ape se, Owane Sitewi lu taune au noweinoweirowa ape, fene mase ataheyewa!’ 10 Ahowa, fene omo ta maꞌe wiyei su, lu taune fene erite taꞌame su, fene omo lo pani amerame aꞌi maꞌe ire! Lu taune werese maꞌe apou eire, 11 ‘Peri nomo lo wanure! Peperi werese fene lo lowe nomo lo sahe nate tawesisiya su, nomo peperi werese au sasariyei. Nomo peperi fene lo au sasariyei su, marepi sitewi apou aꞌi totesiya, Owane Sitewi lai fene maꞌe ai marepi totenamisiya. Fene werese etiri ta ani soꞌoruwere. Nowe ape se, Owane Sitewi lu taune au noweinoweirowa ape, wiyeme aꞌi fene maꞌe ataheyewa.’g 12 Ane fene maꞌe eisiya. Nowe yeꞌewi su Owane Sitewi lai lu taune werese lo yo seni au hese ereirowa su, lu taune tewi ape mo, omo Sodom sahe tu naifa iroteye ape, Owane Sitewi lai lowe maꞌe fofowei oso aꞌi au irorowa. Ahowa, lu taune tewi ape mo peri fene lo wanu arisiyei su, Owane Sitewi lai yo seni lowe lo au hese ereirowa su, lowe fofowei erasi pefine aꞌi teriterowa.hFene marepi atati aresaiye taꞌame ape, fene weiyai!
13 Lu taune omo Korasin sahe irosiya ape, lu taune omo Betsaida sahe irosiya ape, fene werese weiyai! Ane wiyawi erasi pefine neꞌese aꞌi omo fene lo sahe au taꞌane atuatuteye. Meni ta Owane Sitewi lo wiyawi erasi pefine aꞌi ape mo, lu taune maꞌe omo Saidon, omo Tair irosiya ape, au taꞌaneteye su, lowe werese yo seni luwaru aꞌi, lowe iroteye ape, meꞌiyeni maꞌe witane aꞌi arunatirowawe, Owane Sitewi maꞌe atati teirowa. Lowe yo seni luwaru aꞌi lowe lo ape ne ewite erasi aꞌi toterowawe, lowe ipari tahe luwaru papaꞌu aꞌi se ani asiteye. Lowe yehe kere, peperi loꞌu aꞌi tepi tahe werese sahe aniterowa. Lowe Owane Sitewi maꞌe ewiteyei lowe lo au atuatu areiyerowa. 14 Nowe yeꞌewi se Owane Sitewi lai yo seni werese au hese ereirowa su, omo Tair, omo Saidon, lo lu tewi werese Owane Sitewi lai lowe maꞌe fofowei oso aꞌi aurowa. Ahowa, fene werese Owane Sitewi lo peri wanu tote arisinamiteye su, Owane Sitewi fene werese maꞌe fofowei erasi wiyeme aꞌi aurowa. 15 Fene lu tewi omo Kaperneam sahe irosiya ape, eiwerai fene werese Owane Sitewi lo omo hire maꞌe hene wirowa awere? Ahowa, fene Owane Sitewi lo omo hire maꞌe wirowata. Owane Sitewi lai ane fene werese yehe omo pefine aꞌi maꞌe ani fu arosawirowa.” 16 Sosu Jisas lu feni werese lo (72 aiwawe aꞌi), le omo werese maꞌe eimawesawi ape, tame au teꞌeye, “Lu taune werese peri fene lo wanu umasiyei su, lowe aiwawe aꞌi peri ano wanu umasiyei. Lu taune werese peri fene lo wanu tote arisiyei su, lowe werese peri ano wanu tote arisiyei. Lowe ane ne meꞌiyeni maꞌe atati aruwei su, lowe lai, Owane Sitewi ne, ane hi awei maꞌe eimawe arosai ape, lowe le ne aiwawe aꞌi meꞌiyeni maꞌe atati arunatinamiyei.” Serai Jisas peri ape au teꞌe tepaꞌasiye su, le lowe werese omo omo werese maꞌe Owane Sitewi lo peri au teꞌe fiyariyei ne eimawesawi.i
17 Sosu aꞌi pe lu feni werese lo, Jisas omo maꞌe eimawesawi ape, lowe le maꞌe si tame teꞌe areiyenarai. Lowe werese marepi wisere aꞌi se Jisas maꞌe apou eiye, “Meni Owane, nomo sepei luwaru aꞌi ne iyape no se au sasariye su, lowe werese peri nomo lo wanu umasiye.” 18 Sosu Jisas lowe maꞌe itiyaꞌu eiye, “Fene sepei luwaru aꞌi au sasariye su, ane lai sepei Satan, omo hire maꞌe winetairai ape, siyeye. Meraꞌo mi wou winetairai.j 19 Peri ano wanure! Ane fene maꞌe kairefiyeyei ano auwe. Fene haru aimesi, heripahari werese, fene lowe fene lo hire maꞌe uweiti arowatowei su, lowe fene lo sahe tomuwei su, fene fofowei se teriterowata. Kairefiyeyei ano se fene lai sepei luwaru werese aꞌi hi ani ararowe. Lowe werese fene maꞌe au luwaruwerowata.k 20 Ahowa, fene etiri ape ne marepi wisere aꞌi owe ape tote-re. Ane apou aꞌi totesiya, sepei luwaru werese aꞌi peri fene lo wanu umasiyei. Fene marepi erasi aꞌi owe ape totere. Ahowa, fene werese marepi wisere aꞌi se apou totere. Fene werese iyape towafi fene lo ne Owane Sitewi lai omo lo sahe lese tepaꞌasiye. Fene marepi erasi aꞌi tote nineꞌite.”l
Jisas lai Owane Sitewi maꞌe au teꞌe wisereyeteye.
21 Sosu aꞌi pe pereye nowe eite se, Jisas Owane Sitewi lo Hepene Waraꞌi aꞌi se Owane Sitewi Tai pefine aꞌi maꞌe au teꞌe wisereyeteye. Le Owane Sitewi Tai Pefine aꞌi maꞌe au teꞌeye, “Ane ne maꞌe au teꞌe wisereyesiya. Ne omo hire maꞌe no Meni Owane Pefine aꞌi ne! Awei hi maꞌe aiwawe aꞌi ne. Ne Meni Owane Pefine aꞌi ne. Lu taune tomu neꞌese apou totesiya, ‘Nomo etiri werese siye soꞌoruwe tepaꞌasiye.’ Serai etiri werese ape mo, ne lowe maꞌe au fareyaresiya. Ahowa, ne lu taune yahowaꞌi aꞌi maꞌe etiri werese au atuatu areiyeye. Ei! Tai Meni Owane ano, ne etiri ape mo lowe maꞌe, ne au fareyareye ape, ne lai marepi no umasinamiteye.” 22 Sosu Jisas lowe maꞌe au teꞌeye, “Tai ano lai etiri werese ane maꞌe au noweinoweiyei ne auwe. Owe lu taune tamo lai meni eime pefine soꞌoruwerowata. Ahowa, Tai ano, ne aꞌi lai aꞌi ane ne soꞌoruwesiya tene. Aiwawe aꞌi owe lu taune tamo Tai ano ne soꞌoru taꞌama. Meni eime lo aꞌi Tai topo aꞌi soꞌoruwe tepaꞌasiye tene. Ane lai marepi ano se lu taune, ane ariariyeye ape, ane lowe maꞌe Tai ano au atuatu areiyerowa.”m 23 Jisas peri tepaꞌasiye su, le, lu disaipel lo (12) eresene aꞌi fi. Jisas lowe maꞌe eiye, “Fene lai wiyawi erasi pefine aꞌi, ane taꞌaneteye ape, siyeye. Serai marepi fene lo wisere aꞌi ironamisiya. 24 Serai ane fene maꞌe eisiya. Tu naifa weriyei Owane Sitewi lo peri au teꞌe siye lu tomu neꞌese, awei lu owane aiwawe aꞌi, lowe lai etiri werese ane taꞌaneteye ape, siyeyei ne totesiya. Lowe werese etiri apou ape siye taꞌame. Fene lai etiri apou ape mo siyesiya. Lowe tu naifa peri apou ape mo wanuwei ne totesiya. Ahowa, lowe peri apou ape mo wanu se taꞌame. Fene lai peri werese wanu tepaꞌasiye. Serai fene Owane Sitewi maꞌe au teꞌe wisereyete.”
Meni Samaria ta Juda meni au pati ferafereiye.
25 Sosu aꞌi pe meni ta, Owane Sitewi lo yo peri siye soꞌoruweye ape, le Jisas maꞌe au areareyei ne fai. Le Jisas atahe aꞌi teirai. Apou ei toweriye, “Meni Owane, ane Owane Sitewi lo omo hire maꞌe wiyei ne totesiya. Ane eiwerou irowei su, ane marepi hepene heꞌi weriyei weriyei ani ironamirowa awere?”n 26 Sosu Jisas le maꞌe itiyaꞌu eiye, “Owane Sitewi lo yo peri sahe piye leseye awere? Ne piye siye teꞌeye awere?” 27 Meni ape Jisas maꞌe itiyaꞌu eiye,
“Ne Meni Owane Pefine aꞌi marepi erasi aꞌi tote wawesiyenamite. Ne marepi hepene werese no se, hepene werese no se, kairefi werese no se, sosu marepi werese no se, ne etiri werese ape se, ne Meni Owane Pefine aꞌi ne, marepi erasi aꞌi tote wawesiyenamite. Ne lu taune werese ne aiwawe aꞌi marepi erasi aꞌi tote wawesiyenamite. Ne tahe paꞌare topo no ape ne marepi erasi aꞌi tote wawesiyeyei su, sosu aiwawe aꞌi ne lu taune tereꞌe werese ne marepi erasi aꞌi tote wawesiyenamite.” Lo 6:5; Wkp 19:18
28 Jisas peri ape wanuwe su, le meni ape itiyaꞌu eiye, “Peri no wiyeme aꞌi teꞌeye. Ne etiri werese ne umasinamiyei su, ne marepi hepene heꞌi aꞌi weriyei weriyei ironamirowa.”o 29 Meni ape Jisas lo peri wanuwe su, le Jisas lo peri au hese ereiyei ne toteye. Le Jisas maꞌe ei toweriye, “Eiwerai kaiyemo ano awere?” 30 Jisas le maꞌe itiyaꞌu eiye, “Juda lo meni ta omo Jerusalem maꞌe arunatiyewe fi. Omo Jeriko maꞌe heneriyei ne toteye. Yo mai sahe memetaiteye su, taꞌarei lu luwaru aꞌi tamo le maꞌe etiri lo taꞌarei aniyei ne aine naye. Lowe tahe paꞌare aine naye su, lowe ipari tahe werese lo ani erauwe. Lowe etiri werese lo taꞌarei aniyewe, iteroti. Meni ape temeniyeyei ne ataheyeye. 31 Nowe oso aꞌi su, au heseyei meni owane ta memetaiteye. Le meni ape siyeye su, le yo mai tewiye sahe aweraꞌiyenatiyewe fi. 32 Sosu aiwawe aꞌi meni tereꞌe ta, Livai lo lu tewi yo mai memetaiteye. Le meni ape siyeye su, le yo tewiye maꞌe aweraꞌiyenatiyewe fi. 33 Sosu moꞌo meni ta Samaria lo meni yo sahe memetaiteye. Samaria lo lu taune werese lai Juda lo lu tewi ne ai marepi totenamiteye. Samaria lo meni yo sahe memetaiteye su, le meni ape siyeye. Apou toteye, ‘Sawi amou! Lu luwaru aꞌi meni ape maꞌe aine naye. Ane meni ape siye ferafereiyei.’ Ferafereiyei lo meni ape ne erasi aꞌi ne. 34 Serai le meni ape ataheyerai. Le saꞌi wisere aꞌi wain saꞌi aiwawe aꞌi enite werese papu ani teroso teineye. Sosu le enite werese au nateye. Le meni ape fe donki lo hire maꞌe au onuwe. Sosu le meni ape howeiyei wesi maꞌe au noweinoweiyei ne heneti. 35 Nowe moꞌo su, le howeiyei wesi meni owane maꞌe apou eiye, ‘Ne meni ape ne au noweinoweire. Ane maꞌaru hesi aꞌi ne maꞌe auwei. Maꞌaru hesi aꞌi aiwawe taꞌame su, ane si tame aiyeyei su, ane maꞌaru tereꞌe ne maꞌe aurowa.’” 36 Sosu Jisas Owane Sitewi lo yo peri ani soꞌoru siye meni maꞌe apou ei toweriye, “Lu hesi heta ape ne, eiwerai meni ape, lu luwaru aꞌi aine naye ape, lo kaiyemo awere?” 37 Meni ape itiyaꞌu eiye, “Meni ape lai meni maꞌe au ferafereiye.” Jisas le maꞌe eiye, “Ei, ne yo seni apou ape aiwawe aꞌi irorite.”
Jisas lai taune hesilo wesi maꞌe sewiyeyei ne fi.
38 Sosu aꞌi pe Jisas lu disaipel lo aiwawe aꞌi yo mai memetaiteye. Lowe omo ta heneri su, menitani ta le maꞌe ei toweriyei ne fai, “Meni Owane, ne wesi notosi lo sahe fetaneyeyei ne aiya.” Menitani iyape Mata. Le Jisas wesi lo maꞌe heneti. 39 Jisas wesi lo wiye su, Marta lo einei, iyape Maria, Jisas lo lowe saro onuteyewe, peri lo wanuteye.p 40 Ahowa, Marta lai etiri werese au taꞌuwe naneiteye. Sosu le Jisas maꞌe eirai, “Meni Owane, einei ano siyere! Le tahe onotaꞌano aꞌi ne! Ane etiri werese au taꞌuwe naneiyei ne irosiya. Ane wiyawi erasi taꞌane tohotesiya. Ne Maria maꞌe eire! ‘Ne einei no maꞌe au pati taꞌanere.’” 41 Meni Owane Pefine aꞌi lai Marta maꞌe itiyaꞌu eiye, “Marta, Marta, ne etiri tomu neꞌese marepi orese aꞌi se totesiya. Ne marepi orese aꞌi owe ape totere! 42 Menitani Maria, le peri ano wanuwei ne totesiya. Etiri werese tereꞌe yahowaꞌi aꞌi ne. Le yo seni pefine aꞌi umasiyei ne ariariyesiya. Serai ane le maꞌe apou eirowata, ‘Ne einei no fa au pati taꞌanere.’”q