5 Sosu aꞌi pe le lowe maꞌe eiye, “Nowe pasiyeyei su meni ta wesi no sewiyeyei ne fai. Ayei werese no ariye. Serai pasi ponei se, ne kaiyemo no lo wesi maꞌe iyei su, le maꞌe ei toweriyei, ‘Ne faraꞌu ene nau hesi heta ausaiyei awere? Nowe meꞌiye su ane ne maꞌe itiyaꞌu auwei. 6 Meni ta pasi aꞌi se ane maꞌe sewiyeyei ne fai. Le pani eyeri erasi maꞌe fai. Ane ayei werese le maꞌe au ayei ne poꞌuteye.’ 7 Meni ape, wesi papu iroteye ape, le maꞌe itiyaꞌu eiye, ‘Ne peri no ane maꞌe owe ape au teꞌe oreseyere. Wesi yo ano ti tawesi tepaꞌasiye. Nomo awaripi nihe teisiya. Ane etiri ta ne maꞌe auwei ne sinerowata. Ne arunatirowawe ire!’ 8 Weiya, ane fene maꞌe eisiya, meni ape kaiyemo no iroteye ape, etiri ta ne maꞌe auwei ne sine te taꞌame su, ne iyape lo ei uteteye, ei uteteye. Serai meni ape sineyei su, ne maꞌe etiri ayei ta auwei. 9 Sosu ane fene maꞌe eisiya, fene Owane Sitewi maꞌe etiri ta ne teꞌe toweriyei su, le fene maꞌe aurowa. Fene Owane Sitewi lo marepi siye soꞌoruweyei ne toteyei su, le aꞌi lai fene maꞌe marepi lo ne au atuatu areiyerowa. Ne Owane Sitewi lo yo tewiye sahe ereti se aineyei su, le ne ne yo ape au ani tosorowa. 10 Lu taune werese Owane Sitewi maꞌe ei toweriteyei su, le aꞌi lai lowe maꞌe etiri ape auwei. Lowe Owane Sitewi maꞌe siye nehi etiteyei su, le lai lowe maꞌe au atuatu areiyeyei. Lowe Owane Sitewi lo yo tewiye sahe ereti se aineteyei su, le aꞌi lai yo ape lo lowe ne ani tosowei. 11 Ane fene, aite werese ne, eisiya. Meni eime no, ne maꞌe hare taꞌi ei toweriraiyei su, ne haru aimesi le maꞌe aurowa awere? Ahowa! 12 Meni eime no ne maꞌe irowe hote ei toweriraiyei su, ne heripahari taꞌi le maꞌe aurowa awere? Piyete tene! 13 Serai fene, yo seni luwaru aꞌi ironamiteye ape, etiri wisere aꞌi ta eimane werese fene lo aunamisiya su, fene Owane Sitewi ne totere. Owane Sitewi lai fene maꞌe etiri luwaru aꞌi aurowa awere? Piyete tene! Fene Owane Sitewi hire maꞌe ironamisiya ape, ei toweriyei su, le aꞌi lai fene maꞌe Hepene Waraꞌi aꞌi lo aurowa.”

14 Nowe ta meꞌiye su meni ta ahi tomoꞌute tawesiyei se Jisas lai sepei luwaru aꞌi au sasarisawi. Sepei luwaru aꞌi au sasariye su, meni ape ahi lo au taꞌane faraꞌuweyewe, peri teꞌeteye. Lu taune werese etiri ta ape siyeye su, lowe hepene se suꞌariye. 15 Lu tamo le ne apou eiye, “Ahowa, meni ape, Jisas, le sepei luwaru werese aꞌi au sasarisawi su, le sepei Belsebul lo kairefi se au sasarisawi.” Sepei Belsebul, sepei luwaru aꞌi owane pefine aꞌi ne. Belsebul lo iyape tereꞌe sepei Satan.^a 16 Lu tereꞌe tamo lowe le ne au areareyei ne toteteye. Lowe le maꞌe peri kairefiyeyei se teꞌe toweriye, “Ne nomo maꞌe yaru hire maꞌe itoraiyei ape au atuatu areiyere. Nomo yaru erasi aꞌi ta, hire maꞌe itoraiyei ape, siyeyei su, nomo peri no wanu umasiyei.”^b 17 Jisas marepi lowe lo siye soꞌoruweye su, serai le lowe maꞌe eiye, “Omo pani tewi pa tewi ta ai atu tiyatirowa su, omo pani ape kairefiyeyei se taꞌama. Ai atu siye lu tamo omo pani tereꞌe maꞌe fai ape, lowe faraꞌu omo pani ape ai atu se hi ani ararorowa. Aiwawe aꞌi nairipi lo lu tewi, marepi taꞌi aꞌi toteye ape, kairefi aꞌi teinamiteye. Lu tewi feni ape ne lowe taꞌu, ai marepi ironamiteye ape, lu tewi feni ape kairefi se taꞌama. Lu tewi tereꞌe lowe maꞌe aine teraꞌerowa. 18 Serai sepei Satan lai sepei luwaru aꞌi tereꞌe ta au sasarisawiyei su, le kairefi aꞌi teinamirowata. Serai fene ane ne apou eirowata. ‘Jisas lai sepei Belsebul lo kairefi se sepei luwaru aꞌi tereꞌe au sasarisawi. Piyete tene! 19 Sepei Belsebul lo kairefi aꞌi ne totere. Ane lai Belsebul lo kairefiyeyei se sepei luwaru aꞌi tereꞌe ta au sasarisawiyei su, lu tewi fene lo ne, eiwerou lo kairefiyeyei se lowe sepei luwaru aꞌi au sasarisawiyei awere? Lowe lai marepi fene lo au hese ereiyei. Lowe peri fene lo ne meremereye aꞌi teꞌerowa. 20 Ahowa, ane lai sepei luwaru werese aꞌi Owane Sitewi lo kairefiyeyei se au sasarisawiyei su, fene werese etiri erasi aꞌi ta, hire maꞌe itoraiyei ape, siye soꞌoruwe tepaꞌasiyei. Owane Sitewi lo kairefiyeyei fene mase ironamitorowa. Fene werese etiri ape soꞌoru taꞌama. Ane lai sepei luwaru aꞌi ta Satan lo kairefi se au sasarisawirowata. 21 Meni kairefi aꞌi ta eine inapi se wesi lo au noweinoweiyei su, taꞌarei meni ta etiri werese lo taꞌarei aniyei ne wirowata. 22 Ahowa, meni owane kairefi erasi aꞌi ta lai meni kairefi aꞌi ape lo wesi aine towesi wiyei ne totesiya su, le meni kairefi aꞌi lo eine inapi ani towesi fusawiyei. Serai le lai meni kairefi aꞌi lo wesi wirowawe, etiri werese taꞌarei anirowa. Etiri werese taꞌarei anirowa ape, le lu tewi lo ani nonetirowa.^c 23 Meni ta yo seni ano umasi taꞌame su, le aꞌi lai ane maꞌe ai atu tiyatiyei. Meni ta wiyawi ano taꞌane taꞌame su, le aꞌi lai wiyawi ano au taꞌane luwaruwe fiyarisawirowa.^d

24-26 Sepei luwaru aꞌi meni lo marepi hepene nowe maꞌe heneraiyei su, le omo omo pani werese tei fetaneyeyei ne siye nehi etiyei. Le etiri ta papu siye wi taꞌame su, le marepi apou toteyei, ‘Ane meni lo marepi hepene papu si tame wiyei.’ Serai le meni ape si tame wiyei su, le marepi hepene lo waraꞌi aꞌi siyeyei. Serai le sepei luwaru aꞌi ereti feni werese feni hesi aꞌi ei aniyei. Lowe werese meni ape papu wiyei. Tu sepei luwaru aꞌi taꞌi se meni ape lo marepi luwaru aꞌi ne. Sosu sepei luwaru aꞌi ereti feni werese feni hesi aꞌi papu wiyei su, meni ape lo marepi luwaru hepene pefine aꞌi tene!”

27 Sosu aꞌi pe Jisas lu taune maꞌe au teꞌeye su, menitani ta le maꞌe peri morose aꞌi hare uteye, “Menitani ape, ne auteiye ape, sosu ne maꞌe moꞌu au aye ape, menitani ape le wisere aꞌi ironamisiya.”^e 28 Sosu Jisas itiyaꞌu eiye, “Ahowa, lu taune werese Owane Sitewi lo peri wanu tote umasisiya ape, lowe lai marepi wisere aꞌi ironamisiya.”

29 Jisas Owane Sitewi lo peri au teꞌe fiyari areiyeteye su, lu taune tomu neꞌese peri lo wanuwei ne taꞌuwerai. Serai le lowe maꞌe au teꞌeye, “Lu taune werese, nowe ape se irosiya ape, lowe yo seni luwaru aꞌi ironamisiya. Fene apou totesiya, ‘Owane Sitewi lai yaru erasi aꞌi nomo maꞌe pei atuatu areiyere.’ Ahowa Owane Sitewi lai tu naifa weriyei meni Jona maꞌe yaru erasi aꞌi au atuatu areiyeye. Serai yaru erasi aꞌi ape le Jona maꞌe au atuatuwe ape, le lai fene maꞌe tame au atuatuwei. Yaru erasi aꞌi tamo tereꞌe le lai fene maꞌe au atuaturowata.^f 30 Owane Sitewi lai Jona maꞌe yaru erasi pefine aꞌi ta au atuatu areiyeye. Lu taune werese, omo Niniva sahe iroteye ape, lowe yaru ape siye areiye tepaꞌasiye. Owane Sitewi lai meni Jona omo Ninive maꞌe peri lo au teꞌe fiyariyei ne eimawesawi. Sosu aiwawe aꞌi ane ne, meni ape, Owane Sitewi hi awei maꞌe eimawe arosai ape, Owane Sitewi lai ane maꞌe yaru erasi pefine aꞌi ta au taꞌanerowa. Sosu fene werese yaru ape aiwawe aꞌi siye areiyerowa. Le aꞌi lai ane lu taune werese maꞌe nowe ape se peri lo au teꞌeyei ne eimawesai. Fene werese ane ne tote tawesi se taꞌama. 31 Tu naifa weriyei Owane Sitewi lai meni owane Solomon maꞌe marepi wisere erasi aꞌi le maꞌe auwe. Menitani owane tutawe omo pani, eyeri erasi aꞌi maꞌe fai ape, le meni owane Solomon lo marepi wisere aꞌi wanuwei ne fai. Nowe yeꞌewi su, menitani owane tutawe ape, lu taune werese pereye irosiya ape, aiwawe aꞌi Owane Sitewi lai lowe werese si tame hene anirowa. Menitani owane tutawe ape le fene ne peri werese tu au teꞌe eti ereirowa. Menitani owane tutawe fene ne apou au teꞌe eti ereirowa, ‘Fene werese peri ano wanure! Ane omo pani eyeri erasi maꞌe Solomon lo peri wisere aꞌi wanuwei ne fai. Fene peri lo arisinamiteye.’” Sosu Jisas lu taune maꞌe tame teꞌeye, “Ane aꞌi lai meni owane Solomon hi ani ararowe. Ahowa, fene werese ane ne tote tawesi se taꞌama.^g 32 Nowe yeꞌewi su, Owane Sitewi lai omo Ninive lo lu si tame hene anirowa su, lowe aiwawe aꞌi fene werese ne, pereye nowe irosiya ape, peri ta au teꞌe hese ereirowa. Lowe peri ta apou au teꞌe hese ereirowa, ‘Fene werese peri nomo lo wanure! Meni Jona omo Ninive Owane Sitewi lo peri au teꞌe fiyariyei ne fai su, nomo werese Owane Sitewi lo peri werese wanu umasiteye. Nomo yo seni luwaru werese aꞌi nomo lo meꞌiyeni maꞌe atati arunati.’” Serai Jisas lowe maꞌe eiye, “Ane meni Jona hi ani araronamisiya. Fene werese peri ano arisinamisiya.”^h

33 “Meni ta lam ta taiso fu mitaiyeyei su, le awei yo papu fu fareyare taꞌame. Aiwawe aꞌi le lam ape wahu erasi unahi fu fareyareye taꞌame. Ahowa, le wesi papu metei hire sahe au onu tewi mitaiyeyei. Lu taune werese wesi papu wiyei su, lowe faraꞌu mitaiyeyei erasi siyeyei.ⁱ 34 Nihe fene lo tahe paꞌare lo mi wou aꞌi ne. Nihe fene lo amerame aꞌi su, tahe paꞌare werese fene lo mi erasi temeꞌeriyeyei. Sosu nihe fene lo pasiyeyei su, tahe paꞌare werese fene lo aiwawe aꞌi pasiye temeꞌeriyeyei. 35 Fene peri ano wanure! Weiyai, mi fene lo owe ape noroweyei su, fene pasi aꞌi saro ironamitorowata. 36 Sosu serai marepi werese fene lo aseyaro ironamisiya. Marepi tewi fene lo papu etiri luwaru aꞌi iro taꞌame su, tahe paꞌare werese fene lo aseyaro ironamisiya. Lu taune werese yo seni aseyaro fene lo siyeyei. Tahe paꞌare fene lo yehe erei lo mitaiyeyei wou aꞌi ne.”

37 Sosu aꞌi pe Jisas peri tepaꞌasiye su, meni Farisi ta le maꞌe apou ei toweriye, “Ne poweiye ponei se wesi ano maꞌe aiwawe ene ayei ne aiya.” Sosu Jisas le mase wesi lo papu wiyewe, metei sahe ene ayei ne onuwe. 38 Sosu meni Farisi ape Jisas metei sahe onuwei siyeye su, le le ne hepene se suꞌariye. Le marepi apou toteye, “Piyene Jisas ereti lo saꞌi se au hu taꞌame awere? Nomo werese tu ereti nomo lo saꞌi se au huwei. Sosu moꞌo nomo faraꞌu ene ayei. Yo seni lo ape ne amouwesiya tene!” 39 Ahowa, Meni Owane Jisas le maꞌe eiye, “Ne peri ano wanure! Lu weneri Farisi werese, fene siye auwe, wahu aiwawe aꞌi nowe maꞌe saꞌi se au huteye. Ahowa, marepi fene lo papu unou aꞌi temeꞌeriyenamisiya. Fene yo seni taꞌarei tamo seni luwaru tereꞌe tereꞌe ironamisiya. 40 Fene marepi meremereye aꞌi ne! Owane Sitewi lai tahe fene lo au taꞌaneye. Le aꞌi lai marepi fene lo aiwawe aꞌi au taꞌaneye. Serai fene marepi aiwawe aseyaro au hu aseyarowete. 41 Ahowa, fene marepi aseyaro se etiri maꞌaru ta lu feni maꞌe, maꞌaru ariyeye ape, au isafiye noneyei su, fene marepi fene lo aseyaro aꞌi henerairowa.

42 Fene Farisi werese weiyai! Fene haiye werese, one werese ani loto taꞌuwe ereiyei su,

45 Yo peri siye soꞌoru siye meni ta Jisas maꞌe itiyaꞌu eiye, “Meni Owane, ne lu Farisi ne peri ape au teꞌeye su, ne nomo maꞌe peri luwaru aꞌi au teꞌeye.”

46 Sosu Jisas le maꞌe itiyaꞌu eiye,

53 Sosu aꞌi pe Jisas lowe arunatiyewe fi su, lu Farisi, Owane Sitewi lo yo peri wanu soꞌoru siye lu tamo, lowe Jisas ne ai marepi erasi aꞌi totenamiye. Lowe Jisas lo yo seni werese ne ei toweri etiteye. 54 Lowe Jisas ne aine teraꞌeyei ne toteye. Lowe yo seni lo siye etiyei ne toteteye. “Jisas peri ta yo peri nomo lo hi ani ararowei awere? Le yo peri nomo lo au ani arisiyei su, nomo le pei aine teraꞌere.”