4 Ane fene maꞌe eisiya, kaiyemo ano, lu tamo fene aine teraꞌeyei ne toteyei su, fene lowe ne owe ape atoweiyere! Lowe tahe paꞌare fene lo aine teraꞌeyei su, lowe hepene fene lo au luwaruwerowata. 5 Ahowa, ane fene maꞌe apou eisiya. Fene marepi towafi fene lo au hese eti ereite. Fene yo seni luwaru aꞌi irowei su, Owane Sitewi lai faraꞌu fene aine teraꞌerowa. Sosu yehe omo maꞌe ani fu arosawirowa. Fene meni ape ne erasi aꞌi fa atoweiyere! Ei, fene meni ape ne fa atoweiyere! 6 Fene ayei ta, au hese ereiyei ne toteyei ape, fene irowe peserowe ereti feni werese maꞌaru oso hesi aꞌi se ete aniyei. Wanure, Owane Sitewi lai irowe peserowe taꞌi ape tote iꞌanerowata. 7 Peri ano wiyeme aꞌi ne. Owane Sitewi lai mato towe werese fene lo nawiteye. Owane Sitewi lai fene werese au noweinoweinamisiya. Fene owe ape atoweiyere! Owane Sitewi lo nihe se fene lai irowe peserowe werese hi ani araronamiye.^b

8 Sosu ane fene maꞌe eisiya, lu taune tamo ane ne lu taune maꞌe au teꞌe fiyariyei su, ane meni hire maꞌe itorai ape, ane lowe ne Owane Sitewi lo ipari werese maꞌe au teꞌe areiyerowa. 9 Ahowa, lu taune ta ane ne apou teꞌeyei su, ‘Ane Jisas ne soꞌoru taꞌama.’ Ane lowe ne Owane Sitewi lo ipari werese aꞌi lo nihe se lowe ne apou eirowa, ‘Ane lowe ne soꞌoru taꞌama.’ 10 Lu taune tamo ane ne, meni hire maꞌe itorai ape, peri teꞌe naruwei su, Owane Sitewi lai yo seni luwaru aꞌi lowe lo faraꞌu au sasari pamowerowa. Weiya, lu taune tamo Owane Sitewi lo Hepene Waraꞌi aꞌi ne peri au teꞌe naruwei su, Owane Sitewi lai mi mi pasi pasi weriyei le yo seni apou ape lowe lo au ani sasari pamowerowata. 11 Lu tamo fene Owane Sitewi lo wesi sahe lu owane apou ape maꞌe etiyei ne henetiyei su, fene marepi luwaru orese aꞌi owe ape totere. Fene owe ape totere, ‘Ane peri ta eiwerou au teꞌeyei awere? Ane piye peri au teꞌeyei awere?’ Piyene awere?^c 12 Owane Sitewi lo Hepene Waraꞌi aꞌi nowe ape se peri lo ahi fene lo sahe au teꞌe atuatu areiyerowa. Serai fene peri wisere aꞌi au teꞌe areiyerowa.”

13 Sosu aꞌi pe Jisas peri teꞌe tepaꞌasiye su, meni ta peri lo wanuwe ape le maꞌe ei toweriyei ne fai. “Meni Owane, ne airu ano maꞌe apou eirire, ‘Ne tai lo etiri iyami werese paꞌise no au hese erei nonetire.’” 14 Ahowa, Jisas le maꞌe itiyaꞌu eiye, “Meni, ane aꞌi lai au hese erei siye meni taꞌama. Ane peri tewi pa tewi wanu siye meni no taꞌama.” 15 Sosu le lowe maꞌe eiye, “Fene weiyai! Fene maꞌaru lo marepi erasi aꞌi aniyei ne owe ape totenamite. Meni ta etiri tomu neꞌese taꞌuwe aniyei su, marepi hepene papu lo wisereyerowata. Etiri tomu neꞌese ape mo marepi hepene pefine aꞌi irorowata.”^d

16 Sosu le lowe maꞌe peri anowe ta apou au teꞌeye, “Meni ta etiri tomu neꞌese taꞌuwe aniye. Taꞌaneyei awei lo wisere aꞌi ne. Le ayei etiri tomu neꞌese tahe aniye. Sosu wesi lo maꞌe ani fu lotowe. 17 Serai meni ape marepi topo lo se erasi aꞌi totenamiteye. Le apou toteye, ‘Ane piye irowei awere? Wesi werese ano ayei etiri temeꞌeriyeye. Ane wesi tereꞌe ariye. Ayei ano ane eiwerou maꞌe fu lotowei awere?’ 18 Serai le apou teꞌeye. ‘Ane soꞌoruwesiya. Ane aꞌi lai wesi werese ano tapeti erauwei. Sosu ane wesi erasi, tomu neꞌese heꞌi aꞌi taꞌaneyei. Ane wesi werese taꞌane tepaꞌasiyei su, ane ayei etiri werese ano wesi heꞌi ape papu maꞌe ani fu lotowei. 19 Ane ayei etiri werese ano wesi heꞌi ani fu tepaꞌasiyei su, ane lai topo ane maꞌe au eiyei, ‘Ane aꞌi lai ayei etiri tomu neꞌese taꞌuwe ani tepaꞌasiye. Ne marepi hepene momotei aꞌi ironamirowa. Ane iyu menei tomu neꞌese faraꞌu arowa. Serai ane marepi momotei aꞌi ironamitorowa. Ane ayei erasi arowa, ane saꞌi meremereye erasi aꞌi arowa. Sosu ane faraꞌu yo seni eito eite ironamirowa.’ 20 Ahowa, Owane Sitewi lai le maꞌe itiyaꞌu eiyei, ‘Marepi no meremereye aꞌi tene! Pereye pasi aꞌi se ne temeniyerowa. Etiri werese no, ne taꞌuwe ani fu lotowe ape, ne temeniyeyei su, eiwerai etiri werese no aniyei awere?’” 21 Jisas lowe maꞌe tame eiye, “Meni ta ayei etiri tomu neꞌese taꞌuwe aniyei su, le Owane Sitewi lo etiri werese anirowata. Serai le, Owane Sitewi lo nihe se, meni luwaru aꞌi tene!^e

22 Sosu aꞌi pe le lu disaipel lo maꞌe eiye, “Serene ane fene maꞌe au teꞌesiya, fene etiri ta marepi erasi aꞌi owe ape totatote ewitete. Nomo piye ayei etiri ene ayei awere? Fene aiwawe aꞌi tahe paꞌare towafi fene lo ne marepi erasi aꞌi owe ape totatotete. Nomo piye ipari tahe ani asiyei awere? 23 Marepi hepene fene lo ene ayei etiri lo aꞌi taꞌame ne. Aiwawe aꞌi tahe paꞌare towafi fene lo ipari tahe etiri lo aꞌi taꞌame ne. 24 Fene irowe werese ne totere. Lowe werese awei sahe meso taꞌaneyei awei sahe yehe same taꞌame. Lowe meso tamo ani tou anirowawe, wesi ta sahe ani taꞌuwe furowata. Wanure! Owane Sitewi aꞌi lai irowe werese ape mo ene ayei lowe lo au ene anamisiya. Serai Owane Sitewi lai lowe maꞌe au ene asiya su, le fene maꞌe ayei etiri au taꞌame awere? Ahowa, fene werese Owane Sitewi lai au noweinoweisiya. Fene irowe werese hi ani ararosiya. 25 Meni ta fene mase irosiya awere? Le apou tote ewiteyei su, ‘Ane aꞌi lai marepi ano se, ane iyu menei tomu neꞌese ironamisiya.’ Meni ape marepi topo lo ape owe ape totete. Meni lo ape marepi meremereye aꞌi ne. Fene etiri oso aꞌi tamo marepi erasi tote ewiteteye su, fene piyene etiri erasi pefine aꞌi tamo marepi tote ewitesiya awere? 26 Serai meni ape etiri oso ape irorowata su, le etiri tereꞌe ne totatoterowata. 27 Fene mesu werese ne totere! Lowe wiyawi ta taꞌane taꞌame. Lowe ipari tahe iwisi taꞌame. Ahowa, tunaifa weriyei Juda lo meni owane Solomon ipari tahe tomu neꞌese wisere aꞌi ani asiteye. Mesu lo nihari Solomon lo ipari tahe werese hi ani araroteye. 28 Serai Owane Sitewi lai mesu werese nihari wisere aꞌi taꞌanesiya su, lowe pereye wisere aꞌi ne. Nowe moꞌo su, fene mesu werese poꞌuteyei ani fusawiyei. Wanure, Owane Sitewi lai fene werese au noweinoweinamisiya. Fene Owane Sitewi ne tote tawesiyei fene lo oso aꞌi ne. 29 Fene ayei etiri, fene ene ayei ape ne, marepi erasi aꞌi owe ape totere. Aiwawe aꞌi fene piye saꞌi, fene ayei ape, marepi erasi aꞌi owe ape totere. Fene marepi erasi aꞌi owe ape totatote ewitete. 30 Lu taune werese omo omo werese sahe etiri ape mo marepi erasi aꞌi tote nehinamiyei ne totesiya. Ahowa, tai fene lo, hire maꞌe irosiya ape, le lai etiri ape mo soꞌoruwesiya. Fene saꞌi a taꞌame su, fene witane aꞌi temeniyeyei. Fene ayei etiri ene a taꞌame su, fene aiwawe aꞌi temeniyeyei. Owane Sitewi lai soꞌoruwesiya tene!

31 Ahowa, fene Owane Sitewi lo marepi tote nehi umasisiya su, le aꞌi lai ayei etiri, saꞌi fene maꞌe aurowa. 32 Fene marepi ano umasisiya ape, fene taweiru sawa! Tai fene lo, hire maꞌe irosiya ape, le marepi lo se omo lo fene maꞌe aureme.

33 Serai ane fene maꞌe au teꞌesiya. Etiri werese fene lo lu tereꞌe tamo lai etere. Fene maꞌaru aniyei ape, lu taune maꞌe maꞌaru ariye ape, au nonetire. Fene maꞌaru fene lo aꞌi nonetiyei su, Owane Sitewi lai fene maꞌe hire maꞌe etiri lo au taꞌuwe ani lotorowa. Omo hire maꞌe etiri werese fene lo ne, Owane Sitewi lai taꞌuwe ani lotowei ape, taꞌarei lu werese etiri werese fene lo taꞌarei anirowata. Aiwawe yaꞌe etiri werese au luwaruwerowata.^f 34 Fene awei lo etiri ne marepi erasi aꞌi totenamiyei su, fene awei lo marepi tote umasinamiyei. Aiwawe aꞌi fene etiri werese, Owane Sitewi maꞌe fai ape, marepi erasi aꞌi totenamirowa su, fene Owane Sitewi lo marepi tote umasinamirowa.”

35-36 Sosu aꞌi pe Jisas lowe maꞌe tame au teꞌeye, “Fene wiyawi yahowaꞌi aꞌi iro siye lu wou fa heneraire. Meni ta naituwe taꞌuwe hereiyei iyei ne toteye. Serai le wiyawi yahowaꞌi taꞌane siye lu apou eiye, ‘Ane si tame aiyeyei su, fene yo ano ape ani tosore!’ Sosu le naituwe lo taꞌuwe ureꞌiyei maꞌe taꞌuweyewe fi. Wiyawi yahowaꞌi aꞌi taꞌane siye lu lowe etiri werese ne au taꞌuwenamiye. Ipari tahe lowe lo ani asi tepaꞌasiye, yehe erei werese taiso fu meteye. Lowe meni owane lowe lo si tame aiyeyei ne ninawesiya. Serai meni owane lowe si tame aiyeyei yo tewiye ape aineyei su, lowe faraꞌu witane aꞌi yo lo tosorowa. Serai fene wiyawi yahowaꞌi taꞌane siye lu ape aiwawe aꞌi fa heneraire.^g 37 Meni owane si tame aiyeyei su, wiyawi yahowaꞌi aꞌi taꞌane siye lu werese lowe le ne ninawenamiteyei. Wiyawi yahowaꞌi aꞌi iro siye lu werese ninawenamiteyei su, meni owane ape lowe ne au wisereyeyei. Peri wiyeme aꞌi ane fene maꞌe eisiya. Le ipari tahe lo ani asiyei, lowe metei sahe ei onurowawe, sosu lowe maꞌe au ene arowa. 38 Meni owane eiwerou su aiyeyei awere? Le pasi ponei aiyerowa awere? Nowe mitaiyeyei aiyerowa awere? Wiyawi yahowaꞌi aꞌi taꞌane siye lu lowe soꞌoru taꞌama. Serai lowe le ne ninawenamiteye. Sosu meni owane si tame aiyeyei su, wiyawi yahowaꞌi aꞌi taꞌane siye lu ninawenamiteyei. Le lowe le ne ninaweteyei siyeyei su, le marepi wisere aꞌi lowe ne au wisereyeyei.

39 Peri ano wanu soꞌoruwere! Taꞌareiye siye meni wesi ta aine tapeti wiyei ne toteyei. Wesi ape lo meni owane nowe ape siye soꞌoruwe tepaꞌasiyei su, taꞌareiye siye meni ape wesi ape aine tapeti wirowata.^h 40 Ane fene maꞌe au teꞌesiya. Fene etiri werese fene lo ani taꞌuwe naneire. Fene etiri werese ani taꞌuwe naneiyei su, ane, meni hire maꞌe itorai ape, si tame aiyerowa su, fene werese nowe ape se soꞌoru taꞌama. Serai fene werese etiri werese taꞌuwe naneinamite.”

41 Sosu aꞌi pe Pita Jisas maꞌe ei toweriye, “Meni Owane, ne peri anowe ape nomo maꞌe au teꞌesiya awere? Lu taune tereꞌe werese maꞌe au teꞌesiya awere?” 42 Sosu Meni Owane lai le maꞌe itiyaꞌu eiye, “Ane lu taune werese maꞌe peri ano wanu umasinamisiya ape, au teꞌesiya. Ane lu taune werese maꞌe marepi wisere aꞌi ironamisiya ape, aiwawe lu taune werese maꞌe marepi aseyaro aꞌi totenamisiya ape, au teꞌesiya. Ane lu owane werese ano maꞌe apou eiyei, ‘Fene werese wiyawi taꞌane siye lu ano au noweinoweite.’ 43 Serai meni owane wiyawi yahowaꞌi aꞌi taꞌane siye meni, wiyawi lo taꞌane tohoteyei ape, siyeraiyei su, le wiyawi yahowaꞌi aꞌi taꞌane siye meni ape ne marepi wisere aꞌi totenamiteye. 44 Wiyeme aꞌi ane fene maꞌe au teꞌesiya. Meni owane ape wiyawi yahowaꞌi aꞌi taꞌane siye meni maꞌe etiri werese lo au noweinoweiyei ne ariariyerowa.ⁱ 45 Ahowa, wiyawi yahowaꞌi aꞌi siye meni ape marepi topo lo se apou aꞌi toteyei su, ‘Meni owane ano witane se aiyerowata.’ Serai le wiyawi yahowaꞌi aꞌi taꞌane siye lu taune tereꞌe me au se aineyei. Le ayei tomu neꞌese ayei, saꞌi meremereye aꞌi erasi ayei, sosu marepi meremereye aꞌi heneraiyei. 46 Sosu nowe meꞌiye ta se, meni owane ape si tame aiyeyei. Wiyawi taꞌane siye meni ape nowe ape soꞌoru taꞌama. Le meni owane lo ne ninawe taꞌame. Meni owane si tame aiyerowa su, le wiyawi yahowaꞌi taꞌane siye meni luwaru aꞌi ape maꞌe erasi wiyeme aꞌi tewi pa tewi aine tourowa. Sosu le meni ape lu taune werese maꞌe Owane Sitewi lo peri umasi taꞌame ape, eimawesawiyei. 47 Wiyawi yahowaꞌi aꞌi taꞌane siye meni ta, le meni owane lo marepi soꞌoruwe tepaꞌasiye su, Ahowa, le meni owane lo etiri ani taꞌuwe nanei taꞌame. Aiwawe le meni owane lo marepi tote umasi taꞌame. Serai meni owane si tame aiyerowa su, le meni ape meꞌiyeni maꞌe wafei se erasi aꞌi aine nateye.^j 48 Ahowa, wiyawi yahowaꞌi aꞌi taꞌane siye meni tereꞌe meni owane lo marepi soꞌoru taꞌama su, le yo seni luwaru aꞌi irowei. Meni owane lo le meꞌiyeni maꞌe wafei se oso aꞌi aine nateye. Serai Owane Sitewi lai lu tamo marepi wisere aꞌi auwei su, lu ape mo wiyawi erasi aꞌi fa taꞌanere. Aiwawe aꞌi Owane Sitewi lai lu tamo etiri tomu neꞌese auwei su, le lowe maꞌe etiri erasi aꞌi itiyaꞌu ei toweriyei. Serai lu taune tamo lai meni taꞌi aꞌi maꞌe etiri tomu neꞌese aꞌi auwei su, lowe meni ape maꞌe etiri tomu neꞌese itiyaꞌu si tame ei towerirowa.”

49 Sosu aꞌi pe Jisas lowe maꞌe tame eiye, “Ane awei omo werese maꞌe yehe fu etiyei ne fai. Marepi ano apou aꞌi totesiya. Ane yehe ape pereye aꞌi fa henera. 50 Owane Sitewi lai wiyawi erasi aꞌi ane maꞌe irowei ne auwei. Ane tahe paꞌare ano fofowei erasi aꞌi teriterowa. Pereye ane marepi orese aꞌi fofowei erasi ne teritenamisiya. Ane wiyawi ape ani tepaꞌasiyei su, marepi ano wisere aꞌi ironamirowa.^k 51 Ane hi awei maꞌe lu taune werese maꞌe marepi fetane aꞌi ne auwei ne itorai taꞌama. Ahowa, ane hi awei maꞌe lu tewi aꞌi ne hese ereiyei irowei ne itorai. Lu taune tewi tamo peri ano wanu umasiyei. Sosu lu taune tewi tereꞌe tamo peri ano wanu arisiyei. 52 Nowe pereye eite se nohuweripi awaripi marepi hesi aꞌi hesi aꞌi tote umasinamisiya. Lu taune tewi hesi heta marepi taꞌi aꞌi tote umasiyei. Lu taune tewi hesi aiwawe marepi tereꞌe tote umasinamiyei. Aiwawe aꞌi lu taune hesi ai marepi awaripi tewi hesi heta maꞌe totenamisiya. 53 Lowe awaripi tai ai marepi meni eime lo ne totenamiyei. Aiwawe aꞌi meni eime ape ai marepi tai lo ne totenamiyei. Sosu mai lai eime taune lo ne ai marepi totenamiyei. Aiwawe aꞌi eime taune lai ai marepi mai lo ne totenamiyei. Sosu mai pape lai ai marepi ewite lo ne totenamiyei. Aiwawe aꞌi ewite lai mai pape lo maꞌe ai marepi totenamiyei.”^l

54 Sosu aꞌi pe Jisas lu taune werese maꞌe tame au teꞌeye, “Fene niꞌarawe erasi yaru poweiye itorisiya ape, sine wi siyeyei su, fene apou toteyei, ‘Wiyeme aꞌi saꞌi itorairowa.’ Serai nowe oso aꞌi su saꞌi itorairowa. 55 Sosu aiwawe aꞌi fene fiyaru maꞌe yaru poweiye itorisiya ape, teriteyei su, fene tahe fene lo sahe teriteyei. Serai fene apou toteyei, ‘Owei! Pereye nowe poweiye erasi aꞌi heneraiyei.’ Wiyeme aꞌi poweiye erasi umeri aꞌi heneraiyei. 56 Fene marepi hesi aꞌi umasinamisiya ape, fene niꞌarawe, fiyaru lo etiri hire maꞌe soꞌoruwe tepaꞌasiye. Fene piyene Owane Sitewi lo etiri werese, hi awei maꞌe henerai ape, fene siye soꞌoru taꞌama awere?”

57 Sosu Jisas lu taune werese maꞌe au teꞌeye, “Fene werese piyene yo seni waraꞌi aꞌi au hese erei taꞌame awere? Aiwawe aꞌi fene yo seni luwaru aꞌi au hese erei taꞌame. Fene piyene fene etiri ape mo au hese erei taꞌame awere? 58 Meni ta ne maꞌe etiyei ne totesiya. Fenesi au hese erei siye meni maꞌe yo sahe iteyei su, ne faraꞌu yo mai saro aꞌi marepi orese aꞌi ape au fareraiyeyei ne etire. Ne marepi orese aꞌi au fareraiye taꞌame su, meni ape ne au hese erei siye meni maꞌe henetiyei. Serai le lai ne ai atu siye meni ereti lo maꞌe fu henetiyei. Sosu ai atu siye lu ne kalabus lo wesi papu fu aroweyei. 59 Serai ane fene werese maꞌe au teꞌesiya. Fene kalabus lo wesi papu mi mi pasi pasi ironamirowa. Fene maꞌaru werese topo lo maꞌe itiyaꞌu auwei su, fene faraꞌu kalabus lo wesi arunatirowawe nowe maꞌe si tame henerairowa.”