6 Sosu aꞌi pe Jisas peri anowe ta lowe maꞌe au teꞌeye, “Meni ta me owarape taꞌaneyei awei lo sahe yehe sameyei ne fi. Nowe meꞌiye su, me owarape erasi aꞌi henerai tepaꞌasiye. Nowe ta se le me ape siyenari. Le me owarape siyeye su, owarape so werese ariye. 7 Sosu le wiyawi taꞌane siye meni lo maꞌe apou eiye, ‘Iyu menei hesi heta i tepaꞌasiye su, ane owarape so siyenarai. Ane owarape so werese siye poꞌuteye. Ne me owarape eite oure. Piyene awei sahe yahowaꞌi aꞌi tei tawesisiya awere? Ane etiri tereꞌe yaru ape sahe yehe sameyei ne.’^b 8 Wiyawi taꞌane siye meni lo le maꞌe itiyaꞌu eiye, ‘Weiya, iyu menei eite se ane faraꞌu me ape lo si sahe awei peperi heꞌi horuse fuwei. Ane yesi yehe lipawi me si ape sahe fuwei. Sosu iyu menei taꞌi i tepaꞌasiyei su,^c 9 Me owarape eite so taꞌe taꞌame su, ane faraꞌu me ape ouwei. Sosu me owarape so ta taꞌeyei su, wiyeme aꞌi ne.’”

10 Sosu aꞌi pe Jisas lu disaipel lo aiwawe aꞌi, taꞌuweyei wesi maꞌe fi. Le Owane Sitewi lo peri lu taune maꞌe nowe amou se au teꞌe fiyariyei ne fi. 11 Siyere! Menitani ta sato teiteye. Sepei luwaru aꞌi ta le maꞌe u tahe erasi aꞌi au irowe. Iyu menei ereti feni hesi lowe feni werese, feni hesi heta (18 aiwawe aꞌi) menitani ape meꞌiyeni apou aꞌi epeꞌenamiteye. Le meꞌiyeni lo fareraiyerowata. 12 Sosu Jisas le siyeye su, le menitani ape ei aniye. Le le maꞌe apou eiye, “Menitani u tahe no poꞌuteye.” 13 Le menitani lo meꞌiyeni maꞌe ereti topo lo se isawe hetesiye. Ereti lo se isawe hetesiye su, pereye aꞌi u tahe lo poꞌuteye. Le meꞌiyeni lo au sine fareraiyeye. Sosu le Owane Sitewi maꞌe erasi aꞌi au teꞌe wisereyeteye. 14 Sosu taꞌuweyei wesi meni owane etiri ape siyeye su, le Jisas ne ai marepi totenamiteye. Jisas nowe amou ape se menitani au taꞌane fareraiyeye. Eite amou ne. Sosu le lu taune werese maꞌe eiye, “Nowe ereti feni werese feni taꞌi se (6) nomo wiyawi faraꞌu taꞌaneyei. Fene u tahe irowei su, fene nowe ape mo se au faraꞌuweyei ne aiyeyei. Fene nowe se amou au faraꞌuweyei ne owe ape aiyete. Nowe amou se au taꞌane faraꞌuweyeyei ne amouwesiya.”^d 15 Ahowa, Meni Owane Jisas le maꞌe itiyaꞌu eiye. Fene, marepi hesi aꞌi umasinamisiya ape, wanure, nowe amou se fene fe bulmakau, fe donki wesi lo sahe wafei se ani eraurowawe, saꞌi maꞌe au ayei ne henetirowa awere?”^e 16 Menitani ape siyere. Le Juda lo menitani tene! Abraham lai menitani lo yaꞌariyei ne. Ahowa, sepei Satan nowe iyu menei (18 aiwawe aꞌi) menitani meꞌiyeni ani epeꞌe yaꞌore ironamiteye. Piyene ane u tahe lo poweiye amou se au taꞌane fareraiye taꞌame awere?” 17 Sosu Jisas au teꞌeteye su, lu owane werese marepi neritase aꞌi teriteteye. Lu taune werese etiri wisere aꞌi, le irowe ape, siyeye su, lowe Owane Sitewi maꞌe erasi aꞌi au teꞌe wisereyeteye.

18 Serai le lowe maꞌe tame au teꞌeteye. “Nowe ape se Owane Sitewi lai lu taune au noweinoweitorowa ape ne, peri piye anowe wou teꞌesiya awere? Ane piye peri teꞌesiya awere? Serai fene, Owane Sitewi yo seni tewi heꞌi aꞌi umasisiya ape, wanu soꞌoruwesiya. 19 Nowe ape se, Owane Sitewi lai lu taune au noweinoweitorowa ape, apou wou aꞌi ne. Saiyoho so oso poꞌo aꞌi ne. Meni ta me so ape taꞌaneyei awei lo sahe ani tosowei. Nowe meꞌiye su, me so ape peratiyewe, me erasi aꞌi henerai. Irowe tamo me ape lo nei sahe sine onuraiteye. Lowe me nei sahe uri lo taꞌaneteye.”

20 Sosu le lowe maꞌe tame au teꞌeye, “Owane Sitewi lo marepi heꞌi aꞌi, hire maꞌe iroteye ape, ane piye nihari wou au teꞌesiya awere? 21 Owane Sitewi lo marepi apou wou aꞌi ne. Menitani ta siye fi tewi oso aꞌi nau erasi aꞌi papu fuwe. Nowe meꞌiye su, siye fi ape nau werese erasi meiyei irowe.”

22 Sosu aꞌi pe Jisas taꞌuweyei wesi ape arunatiyewe, omo tereꞌe tereꞌe maꞌe Owane Sitewi lo peri au teꞌeyei ne fi. Le omo Jerusalem maꞌe iyei ne toteye. 23 Sosu meni ta le maꞌe apou ei toweriye, “Meni Owane, lu taune eiwerou aꞌi Owane Sitewi lo omo hire maꞌe wiyei awere? Lu taune tomu neꞌese awere? Lu taune tewi oso aꞌi awere?” Sosu Jisas le maꞌe itiyaꞌu eiye, 24 “Wanure! Yo hesi aꞌi irosiya. Yo taꞌi potu erasi aꞌi ne. Lu taune tomu neꞌese yo ape winamisiya. Yo tereꞌe oso poꞌo aꞌi ne. Lu taune tewi oso aꞌi wiyei. Fene werese yo oso poꞌo aꞌi papu wiyei ne tohotete. Lu taune tomu neꞌese yo tewiye oso poꞌo aꞌi papu wiyei ne totesiya. Serai lowe wirowata. Owane Sitewi lowe ne aweraꞌiyenatirowa. 25 Ane fene maꞌe eisiya. Wesi ape lo meni owane sinerowawe, yo ape anite tawesiyei su, fene lai yo ape ani tosorowata. Fene yo tewiye sahe aine taꞌaruwei su, fene meni owane maꞌe apou hare uteye, ‘Meni Owane nomo lo, ne yo ape nomo ne ani tosore. Serai nomo wesi no wiraiyei.’ Meni Owane ape peri lowe lo wanuwei su, le lowe maꞌe apou itiyaꞌu eiyei, ‘Fene piye omo maꞌe fai awere? Ane fene soꞌoru taꞌama.’^f 26 Sosu fene le maꞌe itiyaꞌu eiyei, ‘Nomo ne mase aiwawe aꞌi ayei ta saꞌi ta ene ateye. Ne omo nomo lo yo mai sahe peri au teꞌeteye su, nomo sato iroteye.’ 27 Sosu le lowe maꞌe itiyaꞌu eiyei, ‘Ane fene maꞌe eisiya, omo ape fene fai ape, ane soꞌoru taꞌama. Fene werese, yo seni luwaru aꞌi ironamisiya ape, fene ane arunatire.’^g 28 Nowe yeꞌewi su, fene Owane Sitewi lo peri au teꞌe siye lu werese omo hire maꞌe siyerowa. Lu yaꞌariyei fene lo meni Abraham, meni Aisak, meni Jekop, lowe werese Owane Sitewi lo omo hire sahe ironamirowa. Fene lowe siyerowa su, fene marepi orese erasi aꞌi totenamirowa. Fene ai peri pi se tomu ketetenirowa. Fene luwei erasi lunamitorowa. Fene werese Owane Sitewi lo omo maꞌe wirowata. Owane Sitewi lai fene yehe omo maꞌe ani fu arosawirowa.^h 29 Lu taune tomu neꞌese poweiye wiraisiya ape, poweiye pihatu itorisiya ape, eyate feni, opi feni maꞌe lu taune tomu neꞌese, omo omo werese maꞌe aiyerowa ape, Owane Sitewi lo omo hire maꞌe ene ayei ne taꞌuwerairowa.ⁱ 30 Sosu siyere! Lu taune tamo marepi apou toterowa su, ‘Nomo lu taune yahowaꞌi aꞌi ne.’ Owane Sitewi lai lowe yaru tutawe hene au onurowa. Lu taune tereꞌe apou aꞌi toterowa su, ‘Nomo yaru tutawe pei heneraire.’ Owane Sitewi lai lowe yaru yeꞌewi au ei onurowa.”^j

31 Jisas peri lo au teꞌeteye su, lu Farisi tamo le maꞌe apou eiye, “Ne omo tereꞌe maꞌe fa ire. Ne omo tereꞌe fareyare taꞌame su, awei meni owane Herot ne maꞌe aine teraꞌeyei ne totesiya.” 32 Sosu Jisas lowe maꞌe itiyaꞌu eiye, “Fene meni owane Herot maꞌe apou au teꞌeri. ‘Ne meni peri wawero aꞌi ne. Ane pereye, aperi aiwawe aꞌi wiyawi ano taꞌaneei. Ane sepei luwaru aꞌi au sasariyei. Ane u tahe tomu neꞌese au taꞌane faraꞌuweyei. Sosu nowe eweye su, ane wiyawi ano taꞌane tepaꞌasiyei.” 33 Weiya, ane pereye sosu aperi ane yo mai sahe iteyei. Sosu nowe eweye ane omo Jerusalem maꞌe heneriyei. Owane Sitewi lo peri au teꞌe siye meni ta fa temeniyeyei su, le omo Jerusalem nowe maꞌe temeniyerowata.” 34 Sosu Jisas omo Jerusalem lo lu taune maꞌe eiye. “Lu taune omo Jerusalem irosiya ape, peri ano wanure! Fene Owane Sitewi lo peri au teꞌe siye lu ape mo aine teraꞌeteye. Lu tamo Owane Sitewi lai fene maꞌe au teꞌeyei ne eimawesai ape, fene tapiye se fusawiyewe, aine teraꞌeye. Nowe tomu neꞌese aꞌi se ane fene ane maꞌe ei taꞌuwenamiteye. Apou wou aꞌi irowe kakaruk mai lo yene haipi unahi ei taꞌuwerai. Ahowa, fene peri ano arisinamisiya. Fene ane maꞌe taꞌuwerai taꞌama. 35 Fene werese siyere! Owane Sitewi lai wesi werese fene lo arunati tepaꞌasiye. Sosu ane fene maꞌe teꞌesiya, fene ane tame siyerowata. Nowe yeꞌewi su, ane si tame aiyerowa su, fene ane ne apou eirowa. ‘Meni ape, omo hire maꞌe itorai ape, owane pefine aꞌi lo iyape se aiyerowa. Le marepi wisere aꞌi au teꞌe nineꞌinami-rowa.’^k Nowe yeꞌewi ape se fene ane tame siyerowa.