7 Sosu aꞌi pe lu werese, ene ayei ne fai ape, lowe werese yaru tutawe onuwei ne toteye. Jisas lowe siyeye. Le lowe maꞌe peri anowe ta au teꞌeye, 8 “Meni owane ta ne naituwei lo taꞌuwe hereiyei ei taꞌuwe aniyei su, ne yaru tutawe owe ape onure. Ne yaru tutawe onuwei su, meni owane pefine aiwawe aꞌi aiyeyei ape, le piye yaru se onurowata.^c 9 Sosu meni owane ne fene ei taꞌuwe aniye ape, le ne maꞌe eiraiyei, ‘Ne yaru no meni ape maꞌe au onure.’ Sosu ne, yaru no onuwe ape, arunatiyei, yaru tewiye maꞌe fiyafe sahe onuriyei. Ne lai neritase erasi aꞌi teriteyei. 10 Ahowa, meni owane ne naituwe lo taꞌuwe hereiyei maꞌe ei aniyei su, ne yaru tewiye maꞌe fiyafe sahe onuri. Serai meni owane, ne ei aniyei ape, le ne yaru tewiye maꞌe onuwei siyeraiyei. Le ne maꞌe apou eiyei, ‘Kaiyemo ne yaru tewiye maꞌe arunatirowawe, yaru soro maꞌe onura.’ Serai lu taune ne mase metei onuwei ape ne siyeyei su, lowe ne ne marepi wisere aꞌi toteyei. 11 Lu taune werese iyape towafi lowe lo ei ani aroweyei ape, Owane Sitewi lai lowe werese hi ani ararowei. Lu taune werese marepi towafi lowe lo hi ani ararowei su, Owane Sitewi lai iyape lowe lo ei ani aroweyei.”^d

12 Sosu aꞌi pe le meni Farisi maꞌe, le naituwe lo taꞌuwe hereiyei ei aniye ape, apou eiye, “Ne taꞌuwe hereiyei ta au taꞌane naneiyei ne toteyei su, ne kaiyemo tamo, nairipi tamo lu tewi no tamo, lu taune maꞌaru irosiya ape tamo, ne lowe werese ape mo owe ape ei anire. Ne lowe ei aniyei su, nowe meꞌiye ta se lowe ne itiyaꞌu si tame pei ei anirowa. Lowe taꞌuwe hereiyei maꞌe ne ei aniyei su, lowe ne maꞌe itiyaꞌu aurowa. 13 Ahowa, ne taꞌuwe hereiyei au taꞌane naneiyei ne toteyei su, ne lu taune yahowaꞌi aꞌi maꞌaru ariye ape, lu taune lowe luwaru aꞌi iroteye ape, lu taune uwei taꞌame ape, lu taune nihe pokoweyei se ape, ne lu taune apou ape mo, taꞌuwe hereiyei no maꞌe ei anire. 14 Ne lu taune weneri apou ape mo ei aniyei su, lowe ne maꞌe si itiyaꞌu arowata. Ahowa, Owane Sitewi lai marepi fene lo ne au wisereyerowa. Sosu ne marepi wisere erasi aꞌi teriteye. Nowe yeꞌewi ape se lu taune yo seni aseyaro iroteyei ape, Owane Sitewi lai lowe si tame norohuwe sineyei su, nowe ape se le lowe maꞌe etiri erasi aꞌi si tame itiyaꞌu aurowa.^e

15 Meni ta taꞌuwe hereiyei saro onu ateye ape, le Jisas lo peri wanuwe su, le Jisas maꞌe apou eiye, “Lu taune werese Owane Sitewi lo omo hire sahe onu arowa su, lowe marepi wisere aꞌi irorowa.”^f 16 Sosu Jisas le maꞌe peri anowe ta itiyaꞌu apou eiye, “Meni owane taꞌuwe hereiyei erasi au taꞌane naneiyei ne toteye. Lu taune erasi maꞌe apou eiye, ‘Ayei etiri werese taꞌuwe nanei tepaꞌasiyei su, ane fene werese wesi ano maꞌe ei taꞌuwe aniye.’ 17 Taꞌuwe hereiyei lo nowe heneraiyei su, meni owane wiyawi yahowaꞌi aꞌi iro siye meni maꞌe eiye, ‘Ne lu taune werese maꞌe, ane tu ei aniye ape, ne lowe werese maꞌe ei anire. Ayei etiri werese taꞌuwe nanei tepaꞌasiye.’ 18 Sosu wiyawi yahowaꞌi aꞌi taꞌane siye meni lowe werese ei aniye su, lowe werese le maꞌe itiyaꞌu eiye, ‘Ane taꞌuwe hereiyei no aiyerowata. Ane taꞌaneyei awei tewi aꞌi ete tepaꞌasiye, sosu ane taꞌaneyei awei tewi ape pei siyerire. Serai ane aiyerowata.’ 19 Meni tereꞌe le maꞌe itiyaꞌu apou eiye, ‘Weiya! Ane fe bulmakau hesi aꞌi ete tepaꞌasiye. Sosu ane taꞌaneyei awei ano lowesi se pei au horusere. Serai ane taꞌuwe hereiyei no maꞌe aiyerowata.’ 20 Meni tereꞌe apou eiye, ‘Ane tani ano heꞌi naitu tepaꞌasiye. Serai ane taꞌuwe hereiye no maꞌe aiyerowata.’^g 21 Sosu wiyawi yahowaꞌi aꞌi taꞌane siye meni lai meni owane lo maꞌe si tame eirai. Meni owane ai marepi erasi aꞌi toteye. Sosu le wiyawi yahowaꞌi aꞌi taꞌane siye meni maꞌe apou eiye, ‘Ne omo lo yo mai maꞌe ire. Lu taune ereti lowe luwaru aꞌi, lu taune eiwerou uwei taꞌame ape, lu taune maꞌaru ariye ape, lu taune nihe pokoweyei irosiya ape, ne lu taune apou ape mo taꞌuwe hereiyei ano ei taꞌuwe anire.’ 22 Wiyawi yahowaꞌi aꞌi taꞌane siye meni lu taune apou ape ei ani henetai. Sosu le meni owane lo maꞌe si tame eirai. ‘Weiya! Ane marepi no umasiye, onuwei yaru tomu neꞌese irosiya.’ 23 Sosu meni owane ape lai wiyawi yahowaꞌi aꞌi taꞌane siye meni maꞌe eiye, ‘Ne ipo maꞌe ire, ipo lu taune apou ape aiwawe aꞌi ei henetaire. Lu taune lai wesi ano fa temeꞌeriyere. 24 Ane ne maꞌe eisiya. Lu taune weneri werese ape ane tu ei aniye ape, lowe wesi ano maꞌe taꞌuwe hereiyei ape sahe onu ene arowata.’”

25 Sosu aꞌi pe Jisas taꞌuwe hereiyei arunatiyewe fi. Lu taune tomu neꞌese le mase moꞌo umasititeye. Le lowe maꞌe atati teꞌeye, 26 “Meni ta, menitani ta ane moꞌo umasiyei maꞌe aiyeyei su, le ane ne tutawe marepi erasi aꞌi fu totete. Le tai mai, nairipi, einei werese fa arunatire. Le marepi topo lo pei hi ani ararore. Le etiri werese ape mo meꞌiyeni maꞌe arunatiyei su, le marepi ano fa umasite. Serai le lu feni ano henerairowa.^h 27 Nowe meꞌiye ta su, lu tamo lai ane me tapeꞌi sahe aine teraꞌe temeniyerowa. Lowe me tapeꞌi iyoꞌo ano sutetiyei ne furowa. Ane fofowei erasi aꞌi teriteyei. Serai ane fene maꞌe teꞌesiya. 28 Meni ta wesi taꞌaneyei ne toteyei su, le wesi ape taꞌaneyei etiri werese fa tote etire. Maꞌaru ano faraꞌu wesi ape taꞌane tepaꞌasiyerowa awere? Piyete awere? 29 Meni ape maꞌaru lo tote eti taꞌame su, le me tou aꞌi horuse asirowa. Serai maꞌaru werese lo poꞌuteyei su, le wesi lo taꞌane tepaꞌasirowata. Lu taune werese le ne au niyeyei irorowa. Sosu le neritase erasi aꞌi teriterowa. 30 Lowe meni ape ne apou eiyei, ‘Meni ape siyere! Le wesi lo ape taꞌaneyei ne toteye su, le wesi lo ape taꞌane tepaꞌasi taꞌame.’ 31 Fene awei meni owane tutawe ne totere! Le awei meni owane tutawe tereꞌe ai atu tiyatiyei ne toteyei su, le ai atu siye lu werese lo nawitere. Le apou toteyei, ‘Ane awei meni owane tutawe tereꞌe ai atu tiyatiyei su, ane ai atu tiyatiyei awere? Ane le maꞌe ai atu siye lu oso aꞌi se ai atu tiyatiyei awere? Awei meni owane tutawe tereꞌe lo ai atu siye lu 20,000 irosiya ape, ane faraꞌu ai atu siye lu 10,000 le maꞌe ai atu tiyatiyei awere?’ 32 Le apou totesiya. ‘Weiya, ane ai atu siye lu 10,000 meni owane tutawe tereꞌe lo ai atu siye lu 20,000 hi ani ararorowata. Serai ane awei meni owane ape maꞌe ai aturairowata. Ane awei meni owane tutawe ape maꞌe lu tamo teꞌeyei ne eimawesawiyei. Lowe marepi fetane aꞌi fa ironamite.’” 33 Sosu Jisas lowe maꞌe eiye, “Serai ane fene maꞌe teꞌesiya. Fene etiri werese fene lo arunatiyei taꞌama su, fene lu feni ano henerairowata.

34 Serai ipari sei fi wisere aꞌi ne. Ahowa, ipari sei lo fi poꞌuteyei su, fene piye se ani terosowei awere? 35 Ahowa, ipari sei lo fi poꞌuteyei su, luwaru aꞌi tene! Serai nomo ipari sei luwaru aꞌi ani fusawiyei. Meni ta peri ano wanuwei ne toteyei su, le peri ano wanu etiyei. Le faraꞌu ane ne tote tawesi umasinamirowa.”