Peri anowe ta fe sipsip arunatiyewe fi.
15
Sosu aꞌi pe takis maꞌaru aniyei siye lu tamo, lu taune tereꞌe, Juda lo yo peri arisiye ape, lowe Jisas maꞌe atahe aꞌi peri lo wanuwei ne taꞌuwerai. 2 Lu Farisi tamo, Juda lo yo peri lese siye lu tamo, lowe Jisas ne peri kokoti erasi aꞌi toteye. Lowe apou toteye. “Meni ape, Jisas, le lu taune yo seni luwaru irosiya ape, mase ene ateye. Le lowe maꞌe au wisereye eritesiya. Yo seni ape amouwesiya.”a 3 Sosu Jisas lowe maꞌe peri anowe ta au teꞌeye, 4 “Fene fe sipsip lu ereti feni werese (100 aiwawe aꞌi) irosiya. Sosu fe sipsip taꞌi arunatiyewe fi. Ne fe sipsip tereꞌe werese (99) yaru amerame wisere aꞌi arunatiyewe, fe sipsip taꞌi ani nehiti. Sosu ne fe sipsip ape nehitinauwe, nehitinauwe siyeri.b 5 Sosu le fe sipsip ape arunatiyewe fi ape, siyeye su, le fe sipsip ape wanoꞌo sahe marepi wisereye nineꞌiyewe, si tame suteti. 6 Sosu meni ape wesi lo si tame fai su, le kaiyemo mo werese lo ei taꞌuwe aniye. Le lowe maꞌe eiye, ‘Fene werese ane aiwawe Owane Sitewi maꞌe au teꞌe wisereyere. Ane fe sipsip ano, ipo maꞌe arunatiyewe fi ape, ane nehi siye teꞌi henetai.’ 7 Owane Sitewi lo omo hire maꞌe se aiwawe aꞌi ne. Meni ta yo seni luwaru aꞌi meꞌiyeni maꞌe atati aruwei su, Owane Sitewi lai etiri werese, hire maꞌe irosiya ape, ei taꞌuwe aniyei. Marepi wisere erasi aꞌi au nineꞌinamirowa. Lu taune tomu neꞌese Owane Sitewi lo yo seni umasinamiye. Owane Sitewi lo ipari werese lowe ne aiwawe aꞌi marepi wisere aꞌi nineꞌinamisiya.”Maꞌaru tau taꞌi wesi papu wiyeine fareyareye.
8 “Menitani ta maꞌaru tau ereti feni hesi iroteye su, le maꞌaru tau taꞌi winetainati. Menitani ape yehe erei fu etineyewe, wesi lo oroꞌoru koruwe nehiteye. Le oroꞌoru werese koruwe nehiteye su, le maꞌaru tau ape nehi siyeye. 9 Le maꞌaru tau ape siyeye su, le kaiyemo mo werese lo ei taꞌuwe aniye. Le lowe maꞌe eiye, ‘Siyere! Ane maꞌaru tau ano, winetainati ape, ane nehi siye tepaꞌasiye. Nomo werese marepi wisere erasi aꞌi au nineꞌinamirowa.’ 10 Owane Sitewi lo omo hire maꞌe aiwawe aꞌi ne. Owane Sitewi, ipari wisere werese aꞌi lo aiwawe aꞌi, meni ta, menitani ta yo seni luwaru aꞌi, meꞌiyeni maꞌe atati arunati ape, lowe marepi wisere erasi aꞌi nineꞌinamirowa.”
Meni eime ta wesi topo lo arunatiyewe fi.
11 Sosu aꞌi pe Jisas peri anowe ta au teꞌeteye. Le apou eiye, “Meni owane ta eimane hesi iroteye. 12 Eime Peiwe tai lo maꞌe apou ei toweriye, ‘Tai ano, ne maꞌaru tewi werese ano ausa!’ Sosu tai lowesi lo etiri maꞌaru werese eime Peiwe lo tewi aꞌi erei auwe. 13 Nowe meꞌiye ta se eime Peiwe etiri maꞌaru werese lo ani taꞌuweyewe, omo eyeri maꞌe fi. Omo eyeri maꞌe sahe eime Peiwe maꞌaru werese ete poꞌuteteye. Le yo seni luwaru aꞌi ironamiteye. 14 Sosu maꞌaru werese poꞌuteye su, omo pani sahe lu taune werese lau erasi ironamiteye. Eime Peiwe aiwawe aꞌi lau erasi iroteye. 15 Serai le meni owane ta maꞌe wiyawi ani nehiyei ne fi. Meni owane ape eime Peiwe fe werese lo maꞌe au ayei ne eimawesawi. 16 Eime Peiwe lau erasi ironamiteye. Le fe lo sawi tahe siye wisereyeyewe, ene ayei ne totesiya. Lu werese le maꞌe ayei ta au arowata. 17 Serai eime Peiwe marepi farere aꞌi toteye. Le apou toteye, ‘Weiya, tai ano wiyawi taꞌane siye lu tomu neꞌese irosiya. Lowe werese nau taꞌase tomu neꞌese ene asiya. Ane lau erasi aꞌi temeniye ataheyewa! 18 Ane tai ano maꞌe iyei ne. Ane le maꞌe apou eiyei. Tai ano, ane Owane Sitewi ne yo seni luwaru aꞌi iroteye. Ane ne ne aiwawe aꞌi yo seni luwaru aꞌi iroteye.c 19 Ne ane ne meni eime no eirowata. Ane meni yahowaꞌi aꞌi ne. Ane wiyawi meni yahowaꞌi aꞌi no henerayei.’ 20 Sosu meni eime Peiwe sineyewe, tai lo maꞌe si tame fi. Eime Peiwe tai maꞌe eyeri aiyeteye su, tai lo le siye aniye. Sosu le marepi ferafereiyei erasi toteye. Meni eime lo maꞌe iteroti. Le meni eime lo yaꞌore tawesiri. Le meni eime lo tu nihari yaꞌore ime imeye. 21 Sosu eime Peiwe tai lo maꞌe apou eiye, ‘Tai ano, ane Owane Sitewi ne yo seni luwaru aꞌi ironamiteye. Ane ne ne aiwawe aꞌi. Ne ane ne meni eime no eirowata. Ane meni yahowaꞌi aꞌi ne.’ 22 Ahowa, tai lo wiyawi yahowaꞌi aꞌi taꞌane siye lu maꞌe eiye, ‘Fene witane aꞌi ipari tahe tutawe aiseri. Meni eime ano maꞌe au asire. Fene afeiye ano aiseri, meni eime lo pereꞌi sahe au waꞌarere. Fene lowe tahe aiseri, meni eime lo lowe au asire. 23 Fe bulmakau yene piyoꞌu aꞌi hene aiseri. Fene fe bulmakau nei tou opaire. Nomo taꞌuwe hereiyei ta au taꞌaneyei. Nomo marepi wisere erasi aꞌi nineꞌinamiyei. 24 Siyere! Meni eime ano tu temeniyeye. Pereye nowe eite se le si tame norohuwe sineye. Le arunati poꞌuteye, pereye nomo nowe eite se le sato irosiya.’ Sosu lowe werese marepi wisere erasi aꞌi nineꞌiteye.d 25 Sosu aꞌi pe eime Poto taꞌaneyei awei sahe taꞌaneteye. Neriwei su le wesi lo atahe aꞌi fai. Le noꞌu erasi aꞌi wanuwe. Le wau noꞌu yakowei ahi wanuwe. 26 Sosu le wiyawi yahowaꞌi aꞌi taꞌane siye meni ta ei aniye. Le le maꞌe ei toweriye, ‘Piyene noꞌu erasi aꞌi, ane wanuwe ape, henerai awere?’ 27 Sosu wiyawi taꞌane siye meni le maꞌe itiyaꞌu eiye, ‘Paꞌise no si tame fai. Tai no fe bulmakau piyoꞌu aꞌi nei tou opaiye. Tai no lai paꞌise no si tame fai ape, au wisereye eritesiya.’ 28 Ahowa, eime Poto ai marepi erasi aꞌi toteye. Le wesi lo papu wi taꞌame. Sosu tai lai wesi lo nowe maꞌe henerai. Le meni eime lo maꞌe ei toweriye. Ne wesi papu wira. Marepi wisere aꞌi au iro nineꞌire.’ 29 Meni eime Poto tai lo maꞌe itiyaꞌu eiye, ‘Wanure, ane iyu menei tomu neꞌese wiyawi no taꞌane tohoteteye. Ane marepi werese no mi mi werese umasinamiteye. Ne fe meme taꞌi ane maꞌe nei tou opai au taꞌame. Sosu ane kaiyemo mo werese ano ei taꞌuwe hereiyei au taꞌane taꞌame. 30 Ahowa, eime Peiwe no ne totere. Le maꞌaru werese no ete poꞌuteye. Le yo seni luwaru aꞌi ironamiteye. Le taune luwaru aꞌi tamo tafaꞌe yo seni iroteye. Eime Peiwe no si tame fai su, ne fe bulmakau piyoꞌu aꞌi le ne nei tou opaiyewe, au ene ateye. 31 Sosu tai lo le maꞌe itiyaꞌu eiye, ‘Meni eime ano. Ne mi mi pasi pasi ane mase ironamisiya. Etiri werese ano no aꞌi ne. 32 Paꞌise no tu temeniyeye. Pereye nowe eite se le si tame sineteye. Le arunati poꞌuteye. Nomo le sato siye irosiya. Serai nomo marepi wisere erasi aꞌi fu nineꞌiyei ne.’”