Wiyawi taꞌane siye meni ta yo seni luwaru aꞌi irowe.
16
Sosu aꞌi pe Jisas lu disaipel lo maꞌe peri anowe ta au teꞌeye, “Meni owane ta wiyawi taꞌane siye meni iroteye. Meni Owane lai etiri werese lo meni ape maꞌe au noweinoweiyei ne auwe. Lu tereꞌe tamo meni owane maꞌe peri ta au teꞌesai. ‘Wiyawi taꞌane siye meni no etiri maꞌaru no ne yo seni luwaru aꞌi ironamiye.’ 2 Sosu meni owane lai wiyawi taꞌane siye meni ei aniye. Le le maꞌe ei toweriye, ‘Ne piye etiri maꞌaru ano yo seni luwaru aꞌi irowe awere? Ne maꞌaru lo peri ape ne ane maꞌe au teꞌesa. Ne wiyawi ano owe ape taꞌanere. Ne ane arunatire!’ 3 Sosu wiyawi taꞌane siye meni ape marepi apou toteye, ‘Ane piye irowei awere? Meni owane ano lai wiyawi ano au einamiye. Tahe ano pereꞌeyeye. Ane awei horuserowata. Ane yo mai sahe onuwewe, maꞌaru yahowaꞌi aꞌi ei anirowata. Ane yo seni ape ne neritase erasi aꞌi ne. 4 Weiya, ane soꞌoruwesiya. Ane etiri ta fa taꞌaneyei. Ane pereye aꞌi wiyawi wisere aꞌi lu tamo maꞌe au taꞌanerowa. Serai wiyawi ano ariye poꞌuteyei su, ane faraꞌu wesi lowe lo maꞌe isafiyeyei ne iyei. Lowe etiri tamo ane maꞌe aurowa. 5 Sosu le meni owane lo lu tamo, maꞌaru etiri tamo yahowaꞌi aꞌi aniye ape mo, ei aniye. Serai le meni taꞌi apou ei toweriye, ‘Ne meni owane ano maꞌe maꞌaru eiwerou aꞌi itiyaꞌu, pei auwei awere?’ 6 Sosu meni ape itiyaꞌu eiye, ‘Ane meni owane no 100 dram me oliv lo fisaꞌi itiyaꞌu fa auwei.’ Sosu wiyawi taꞌane siye meni le maꞌe eiye, ‘Ne one towe sahe witane aꞌi se apou lesere, 50 dram itiyaꞌu aure.’ 7 Sosu wiyawi taꞌane siye meni ape meni tereꞌe maꞌe apou ei toweriye, ‘Ne meni owane ano maꞌe maꞌaru etiri eiwerou aꞌi itiyaꞌu auwei awere?’ Meni ape le maꞌe itiyaꞌu eiye, ‘Ane kewi so 100 wahu erasi meni owane no itiyaꞌu fa auwei.’ Wiyawi taꞌane siye meni ape le maꞌe eiye, ‘Ne one towe sahe lesere, ane 80 kewi so wahu se ape itiyaꞌu auwei.’ 8 Nowe meꞌiye su, meni owane ape wiyawi taꞌane siye meni lo ne toteye. Wiyawi ani siye meni ano, le etiri ano areareteye. Ahowa, ane meni ape au teꞌe wisereyesiya. Le marepi wisere aꞌi toteteye. ‘Wiyawi taꞌane siye meni ano awei lo marepi erasi aꞌi siye soꞌoruwesiya.’” Sosu Jisas apou eiye, “Lu taune werese, awei lo marepi umasisiya ape, lowe werese awei lo yo seni erasi aꞌi siye soꞌoruwesiya. Lu taune Owane Sitewi lo yo seni umasisiya ape, lowe awei lo yo seni siye soꞌoru taꞌama.” 9 Sosu Jisas lowe maꞌe tame eiye, “Ane fene maꞌe eisiya. Fene lu taune tamo awei lo maꞌaru etiri tamo au pati taꞌaneyei ne auwei su, lowe nati wafei fene lo henerairowa. Sosu maꞌaru fene lo ariye poꞌuteyei su, Owane Sitewi lai fene ne au noweinoweirowa. Le lai fene omo lo maꞌe hene wirowa. Sosu fene le mase mi mi pasi pasi ironamitorowa.10 Meni ta etiri oso oso aꞌi ta au noweinoweinamiteyei su, le etiri erasi aꞌi aiwawe au noweinoweinamirowa. Sosu aiwawe aꞌi meni ta yo seni oso oso aꞌi au luwaruweyei su, le aiwawe aꞌi yo seni erasi aꞌi au luwaruweyei.a 11 Serai fene awei lo maꞌaru ta au noweinowei luwaruweyei su, Owane Sitewi lai etiri lo se fene maꞌe au noweinoweiyei ne aurowata. 12 Fene meni tereꞌe lo etiri au noweinowei luwaruweyei su, eiwerai fene maꞌe etiri towafi fene lo aurowa awere? 13 Wiyawi yahowaꞌi taꞌane siye meni ta le lu owane hesi aꞌi lo wiyawi taꞌanerowata. Le meni owane taꞌi lo marepi werese umasirowa. Sosu le meni owane tereꞌe maꞌe ai marepi totenamirowa. Aiwawe aꞌi le meni owane ne marepi erasi aꞌi tote wawesiyenamirowa. Sosu le meni owane tereꞌe lo marepi arisirowa. Fene awei lo maꞌaru erasi aꞌi totenamiyei su, fene Owane Sitewi ne toterowata.”b
14 Sosu aꞌi pe lu Farisi tamo, lowe maꞌaru marepi erasi totenamisiya ape, lowe Jisas lo peri sato onu wanuteye. Lowe le ne peri luwaru aꞌi teꞌe naruteye. 15 Sosu Jisas lowe maꞌe eiye, “Etiri werese, fene iroteye ape, fene lu taune lo nihe se au ironamiteye. Fene apou totesiya, ‘Yo seni nomo lo aseyaro aꞌi ne. Ahowa, Owane Sitewi lai marepi fene lo fareyareyei irosiya ape, Owane Sitewi lai siye soꞌoruwe tepaꞌasiye. Etiri werese ne, awei lo lu lai marepi erasi aꞌi totesiya ape, Owane Sitewi lo nihe se etiri werese ape mo ne, le lai oriyei ne totesiya.c
Jisas Owane Sitewi lo marepi ne au teꞌe atuatuwe.
16 Tu naifa nowe mi mi werese, Owane Sitewi lo peri au teꞌe siye lu lai, Owane Sitewi lo yo peri, Owane Sitewi lo peri lu tamo one towe sahe leseye ape, lowe lu taune maꞌe au teꞌe areiyeteye. Meni Jon saꞌi au hu siye meni, henerai su, Owane Sitewi lo peri lu tamo, one towe sahe leseye ape, au teꞌe tepaꞌasiye. Jon lo nowe se lu tamo lai peri heneruwe wisere aꞌi apou au teꞌe fiyari areiyeteye. Nowe ape se Owane Sitewi lai lu taune werese au noweinoweitorowa ape, Owane Sitewi lai lu taune maꞌe peri ape ne au teꞌenamiteye. Lu taune werese peri heꞌi wanuwe su, lowe werese Owane Sitewi lo omo sahe wiyei ne tote tohotereme.d 17 Nowe yeꞌewi ta se niꞌarawe werese awei werese perati poꞌuterowa. Weiya, Owane Sitewi lo peri werese arunati poꞌuterowata. Owane Sitewi lo peri tewi oso oso aꞌi arunati poꞌuterowata.e
Jisas naituwe fiyari luwaruweyei lo peri au teꞌeye.
18 Meni ta tani lo tai mai maꞌe si tame eimawesawiyei ape, le menitani tereꞌe naituwei su, le yo seni luwaru aꞌi iroteyei. Meni tereꞌe lai menitani tu tai mai maꞌe eimawesawi ape, le menitani ape naituwei su, meni ape tafaꞌe yo seni luwaru aꞌi iroteyei.”
Maꞌaru meni ta, sosu Lasarus, meni yahowaꞌi aꞌi ne.
19 Sosu aꞌi pe Jisas peri anowe ta lowe maꞌe au teꞌeteye, “Meni owane ta maꞌaru tomu neꞌese iroteye. Le mi mi werese ipari tahe loꞌu wisere aꞌi ani asiteye. Mi mi werese se le taꞌuwe hereiyei au asiya. Yo seni apou ape irosiya. 20 Meni yahowaꞌi aꞌi ta enite tomu neꞌese tahe werese lo yaꞌorenamiteye. Lu tamo meni ape, iyape Lasarus, meni owane ape lo yo sahe hene onuteye. 21 Le nau taꞌase tewi aꞌi meni owane lo metei, unahi winetaiteye ape, sowateyei ne totesiya. You tamo meni ape lo enite werese sorowe se peyoꞌoteye. 22 Nowe meꞌiye su, meni Lasarus temeniyeye. Owane Sitewi lo ipari wisere aꞌi tamo meni ape lo hepene hire maꞌe, meni Abraham mase ironamiteye ape, hene wiye. Aiwawe aꞌi meni owane temeniyeye. Lu tamo tahe paꞌare lo awei fisiye yo sahe fuwe. Owane Sitewi lai hepene lo yehe omo maꞌe eimawe arosawi. 23 Meni Owane lo hepene nihe lo hire maꞌe Abraham eyeri maꞌe siye ani aroweye. Le meni Lasarus,
Abraham mase iroteye ape, siyeye. Meni Owane ape fofowei erasi aꞌi teriteye. 24 Sosu le Abraham maꞌe peri morose erasi aꞌi uteye, ‘Abraham, yaꞌariyei ano, ne ane ne au ferafereire. Ne meni Lasarus ane maꞌe ito eimawe arosa. Serai le ereti tepi lo saꞌi naretei aꞌi sorowe ano au fu nareteiyere.’ 25 Ahowa, Abraham le maꞌe itiyaꞌu eiye, ‘Eimane, ne awei sato iroteye ape, ne etiri tomu neꞌese wisere aꞌi taꞌuwe ani funamiteye. Nowe ape se meni ape Lasarus le etiri luwaru aꞌi teriteteye. Serai pereye, le lai marepi fetane aꞌi ironamisiya. Ne aiwawe aꞌi lai fofowei erasi aꞌi teritenamisiya! 26 Siyere! Ne eyeri erasi hi yaro irosiya. Lasarus hire maꞌe irosiya. Le hi ne maꞌe itorirowata. Yaru yahowaꞌi aꞌi ponei sahe irosiya.’ 27 Meni owane le maꞌe eiye, ‘Ane ne maꞌe ei towerisiya, yaꞌariyei ano, ne meni Lasarus lu tewi ano hi maꞌe peri ape au teꞌesaiyei ne eimawe ito arosawire. 28 Ane lu nairipi ereti feni werese (5) hi maꞌe irosiya. Ne meni Lasarus nairipi ano teꞌe weiyai au teꞌeyei ne eimawe ito arosawire. Serai lowe fofowei erasi aꞌi, ane teritenamisiya ape, lowe yehe omo eite sahe fofowei erasi teriterairowata.’ 29 Ahowa, yaꞌariyei Abraham le maꞌe itiyaꞌu eiye. ‘Wanure, lowe yo peri ta, yaꞌariyei Moses leseye ape, Owane Sitewi lo peri au teꞌe siye lu werese lo peri irosiya ape, nairipi no ape mo lowe peri lowe lo faraꞌu wanuwei.’ 30 Ahowa, meni owane ape Abraham maꞌe itiyaꞌu eiye, ‘Ahowa, yaꞌariyei auwe ano, lowe peri lowe lo wanu umasi taꞌame. Weiya, meni ta temeniyeyewe, si tame sineye su, le nairipi ano hi maꞌe Owane Sitewi lo peri au teꞌeyei ne itoraiyei su, lowe peri werese ape mo wanu umasiyei. 31 Sosu Abraham le maꞌe itiyaꞌu eiye, ‘Nairipi no yaꞌariyei Moses lo peri, sosu Owane Sitewi lo peri au teꞌe siye lu lo peri wanu umasi taꞌame su, lowe meni ta temeniyeyewe, si tame sineye ape, lowe meni ape lo peri tote wanu umasi taꞌame.’”