Piye etiri tote tawesiyei nomo lo au luwaruweyei awere?
17
Jisas peri anowe ape lowe maꞌe au teꞌe tepaꞌasiye su, le lu disaipel lo maꞌe apou eiye, “Ane peri wiyeme aꞌi ta fene maꞌe au teꞌesiya. Meni ta marepi luwaru aꞌi lu taune maꞌe au atuatuwei su, serai lowe yo seni luwaru aꞌi ape ne siye wisereyeyei. Sosu lowe yo seni luwaru aꞌi ape lo umasinamirowa. Lowe yo seni luwaru aꞌi umasiyei su, meni ape ne weiyai! Owane Sitewi lai le maꞌe etiri luwaru erasi aꞌi itiyaꞌu aurowa. 2 Meni ape lu taune lo marepi tatai aniyei ne toteyei su, lu tamo tapiye erasi aꞌi meni ape lo pereꞌi sahe wafei se ti tawesirowawe, sosu saꞌi yaꞌorei papu ani fu arorowa. Serai meni ape lu taune marepi kairefi se taꞌama ape, le marepi lowe lo au luwaruwerowata. Lowe meni ape ani fu arorowa su, yo seni lowe lo wisere aꞌi tene! 3 Weiyai, fene marepi fene lo au noweinoweite. Meni ta yo ano umasisiya ape, si yo seni luwaru aꞌi irowei su, fene yo seni meni ape lo au fareraiyere. Sosu le yo seni luwaru aꞌi topo lo meꞌiyeni maꞌe atati aruwei su, fene yo seni luwaru aꞌi lo fu tote iꞌanere.a 4 Sosu meni ape yo seni luwaru aꞌi fene maꞌe nowe ereti feni werese feni hesi aꞌi se (7) au irowei. Sosu le fene maꞌe si tame nowe ereti feni werese feni hesi aꞌi se (7) aiyeyei su, fene maꞌe apou eiyei, ‘Ane yo seni luwaru aꞌi fene maꞌe irowe.’ Fene lai yo seni ape lo fu tote iꞌanere.”5 Sosu aꞌi pe Jisas lo lu feni ta le maꞌe apou eiye, “Meni Owane, peri ape no kairefi aꞌi ne. Ne tote tawesiyei nomo lo au kairefiyere!” 6 Sosu Meni Owane Pefine aꞌi lowe maꞌe itiyaꞌu eiye, “Tote tawesiyei fene lo ne, saiyoho so oso aꞌi aiwawe aꞌi irosiya su, fene me saiyoho ape maꞌe apou eiyei, ‘Saiyoho ne me napi mase tahe auwere, sosu saꞌi erasi ponei sahe teirire.’ Saiyoho peri no wanurowawe, umasirowa.b
7 Fene wiyawi yahowaꞌi aꞌi iro siye meni fene lo maꞌe apou eiyei su, ‘Ne taꞌaneyei awei ano maꞌe ire. Ne taꞌaneyei awei ano sahe wiyawi erasi aꞌi irore!’ Sosu neriwei su wiyawi yahowaꞌi aꞌi iro siye meni si tame aiyeyei su, fene piye peri meni ape maꞌe apou eiyei awere? ‘Ne metei ano sahe onura, ane ne au ayei.’ 8 Ahowa, meni ape taꞌaneyei awei maꞌe si tame aiyeyei su, fene le maꞌe apou eiyei, ‘Ne ipari tahe waraꞌi aꞌi ani asire. Moꞌo ne ayei ano au opai naneire. Sosu ane ayei, saꞌi a tepaꞌasiyei su, ne faraꞌu wesi no ene ayei saꞌi are.’ 9 Aiwawe aꞌi wiyawi yahowaꞌi aꞌi taꞌane siye meni lai etiri werese ape wanu umasi irowei su, meni owane lai meni ape au wisereye taꞌame. 10 Fene aiwawe aꞌi irore! Owane Sitewi lai fene maꞌe peri ta au teꞌeyei su, fene peri lo ape fu wanu umasire. Fene peri lo wanu umasiyei su, fene apou eire, ‘Nomo wiyawi yahowaꞌi aꞌi taꞌane siye lu no ne. Nomo peri no wanu umasi tepaꞌasiye.’”
Jisas lu lepra tamo (10) au taꞌane niyemaiyeye.
11 Sosu aꞌi pe Jisas lu disaipel lo mase omo Jerusalem maꞌe iteye. Lowe pani Galili, pani Samaria ponei sahe iteye. 12 Lowe omo ta heneri su, lowe lu ereti feni hesi (10) nowe maꞌe siyeye. Lu werese ape mo enite kairefi aꞌi, iyape lepra, iroteye. Lowe eyeri maꞌe teiteyewe, Jisas maꞌe peri morose eiye. 13 Lowe peri erasi apou uteye, “Jisas, Meni Owane, ne nomo ne au ferafereire!”c 14 Sosu Jisas peri lowe lo wanuwe su, le lowe maꞌe itiyaꞌu eiye, “Fene au heseyei lu owane maꞌe ire! Fene tahe fene lo lowe maꞌe au atuature.” Sosu lowe werese au heseyei lu owane maꞌe iyei ne toteye su, enite kairefi lowe lo waraꞌi aꞌi niyemaiye tepaꞌasiye.d 15 Meni taꞌi tahe topo lo waraꞌi aꞌi siyeye su, le atatiyewe, Jisas maꞌe si tame fai. Le Owane Sitewi maꞌe peri erasi aꞌi se au teꞌe wisereyeye. 16 Le Jisas maꞌe henerai su, le Jisas maꞌe lowe uporo apeꞌi onuwewe, Jisas maꞌe au teꞌe wisereyeye. Meni ape pani Samaria maꞌe fai. 17 Sosu Jisas le maꞌe itiyaꞌu eiye, “Ane lu ereti feni hesi (10) enite kairefi aꞌi au taꞌane niyemaiyeye. Lu tereꞌe tereꞌe ape mo, eiwerou maꞌe irosiya awere? 18 Lu ereti hesi werese feni hesiyo hesiyo (9) ape mo, lowe si tame atatiyewe, Owane Sitewi maꞌe au wisereye taꞌame awere? Meni taꞌi aꞌi pani tereꞌe maꞌe fai ape, le taꞌi aꞌi si tame atatiyewe, Owane Sitewi maꞌe au teꞌe wisereyeye.” 19 Sosu Jisas meni ape maꞌe apou eiye, “Sinere! Ne wesi no ire! Tote tawesiyei no lai enite kairefi no au taꞌane niyemaiyeye.”
Owane Sitewi lo marepi pani amerame aꞌi henerairowa.
20 Sosu aꞌi pe lu Farisi tamo Jisas maꞌe teꞌe toweriyei ne fai. Lowe apou teꞌe toweriye, “Nowe eiwerou su Owane Sitewi lai awei hi maꞌe itoraiyei awere? Eiwerou su le awei lu owane werese hi ani ararosawirowa awere? Sosu eiwerou su le lu taune werese wisere aꞌi au noweinoweiyei awere?” Sosu Jisas itiyaꞌu eiye, “Nowe ape, Owane Sitewi lai, lu taune au noweinoweirowa ape, heneraiyei su, lu taune werese yaro erasi aꞌi lo nowe ape se siyerowata. 21 Lu taune werese apou au teꞌerowata, ‘Siyere! Owane Sitewi lo omo ape ne saro ironamisiya.’ Ahowa, aiwawe aꞌi lowe peri eite apou au teꞌerowata, ‘Weiya, Owane Sitewi lo omo ape ne feni yaro irosiya.’ Ahowa, wanure! Nowe ape se Owane Sitewi lai, lu taune werese au noweinoweisiya ape, fene mase pereye ironamisiya.”
22 Sosu aꞌi pe Jisas peri ape itiyaꞌu au teꞌeye su, le lu disaipel lo maꞌe apou eiye, “Nowe ta se heneraiyei su, fene werese peri erasi apou eiyei, ‘Meni ape, hire maꞌe itorai ape ne, awei hi maꞌe witane se aꞌi fa itora. Nomo meni ape siyereme.’ Ahowa, fene nowe ape se siyerowata. 23 Lowe fene maꞌe apou au teꞌerowa. Meni hire maꞌe itorai ape, le hi awei maꞌe itorai tepaꞌasiye. Fene lai meni ape sato nehira! Fene feni yaro maꞌe siye nehiti!’ Weiya! Ahowa, fene lowe mase owe ape ire! Fene lai lowe moꞌo owe ape itero umasire.”e
Jisas lai si tame itorairowa.
24 “Fene meraꞌo ne totere. Fene pasi aꞌi se meraꞌo siyeyei su, fene meraꞌo lo mi niꞌarawe werese sahe tewi fiyari howeiyei. Sosu aiwawe aꞌi meni ape hire maꞌe itorairowa ape, nowe ape se le hi awei maꞌe itoraiyei su, lu taune werese omo omo werese sahe le ne aiwawe siyerowa. 25 Weiya, meni ape tu fofowei erasi aꞌi fa teriteyei. Lu taune tomu neꞌese le ne meꞌiyeni maꞌe atati aruwei. 26-27 Tu naifa weriyei yo seni apou ape aiwawe aꞌi henerai. Fene meni Noa ne totere. Lu taune werese ayei ahi aꞌi ene ateye. Lowe saꞌi meremereye aꞌi ene anamiteye. Lowe taune naituteye. Lowe taune maꞌaru eteteye. Sosu meni Noa lu tewi mase wai erasi papu arowato wiye su, lu taune werese yo seni apou ape ironamiteye. Sosu meni Noa wai erasi papu arowatowe su, Owane Sitewi lai saꞌi erasi eimawe arosai. Saꞌi ei erasi awei werese ani aporuwe. Serai lu taune werese saꞌi papu wi teniseye. Sosu aiwawe aꞌi meni ape hire maꞌe itorairowa ape, lu taune yo seni apou ape umasinamirowa. 28 Aiwawe aꞌi fene meni Lot ne totere! Nowe ape se lu taune werese yo seni apou ape ironamiteye. Lowe werese ayei ahi aꞌi ene a iroteye. Lowe saꞌi meremereye aꞌi anamiteye. Lowe etiri tamo etenamiteye, lowe etiri tamo au nonenamiteye. Lowe taꞌaneyei awei towafi lowe lo yehe sameteye. Lowe wesi towafi lowe lo au taꞌaneteye.f 29 Sosu nowe ape se meni Lot tani lo mase omo Sodom arunatiyewe fi su, Owane Sitewi lai yehe erasi aꞌi omo ape sahe eimawe arosai. Serai yehe ape lai lu taune werese, Omo Sodom iroteye ape, yehe tisoroꞌowe poꞌuteye. 30 Sosu aiwawe aꞌi ane, meni hire maꞌe itorairowa ape, si tame itorairowa su, lu taune werese yo seni luwaru aꞌi apou ape ironamirowa.
31 Nowe ape se, ane hi awei maꞌe si tame itorairowa su, meni ta wesi topo lo hire maꞌe onurowa ape, le wesi topo lo sahe owe ape wirowata. Ahowa, le etiri werese topo lo owe ape anirowata. Aiwawe aꞌi meni ta taꞌaneyei awei topo lo sahe taꞌanerowa su, le wesi topo lo si tame owe ape irowata. Ahowa, le etiri werese topo lo owe ape ani aitirowata.g 32 Fene meni Lot lo tani ne tote tawesire. Lot lo tani yo seni luwaru aꞌi siye wisereyeteye. Serai le omo Sodom maꞌe si tame atati siyeyei ne toteye. Sosu Owane Sitewi lai menitani ape aine teraꞌeye. 33 Serai ane fene maꞌe apou eisiya. Meni ta hepene topo lo anite tawesyei ne totesiya su, sosu marepi topo lo umasinamirowa. Hepene topo lo le arunatirowa. Sosu aiwawe aꞌi meni ta marepi ano tote umasinamirowa su, sosu le temeniyerowa su, hepene topo lo mi mi pasi pasi ironamirowa.h 34 Peri ano wanure! Lu hesi lai wari taꞌi sahe howeiteyei su, Owane Sitewi lai meni taꞌi aꞌi hene wirowa. Sosu meni tereꞌe ape, Owane Sitewi lai saro ahe arunatirowa. 35 Taune hesi nau taineteyei su, Owane Sitewi lai menitani taꞌi aꞌi hene ani wirowa. Sosu menitani tereꞌe Owane Sitewi lai arunatirowa.” 36 {“Lu hesi taꞌaneyei awei sahe taꞌaneteyei su, Owane Sitewi lai meni taꞌi aꞌi hene ani wirowa. Sosu meni tereꞌe ape, Owane Sitewi lai arunatirowa.”}i 37 Sosu Jisas peri au teꞌe tepaꞌasiye su, lu disaipel lo le maꞌe itiyaꞌu teꞌe toweriye, “Etiri ape mo henerairowa su, eiwerou maꞌe henerairowa awere?” Sosu Jisas lowe maꞌe itiyaꞌu eiye, “Lu taune tomu neꞌese temeniyeyei su, irowe yaruwapi tomu neꞌese yaru ape sahe tepi tahe lowe lo ayei ne taꞌuweraiyei. Fene werese yaru ape amerame aꞌi siyerowa.”