3 Omo ape sahe weiname tani iroteye. Menitani ape lai meni owane ape mi mi werese ei toweriyei ne fai. ‘Ne ane ani pati ferafereire! Meni ta ane maꞌe au luwaruwenamisiya. Serai ne yo seni ape lo au fareraiyere!’ 4 Meni owane peri ape wanuwe su, le peri lo ape umasi taꞌame. Sosu mi mi werese menitani ape meni owane ei toweriyei ne fai. Meni owane ape marepi erasi aꞌi toteye. ‘Weiya! Ane Owane Sitewi lo marepi tote umasi taꞌame. Aiwawe aꞌi ane lu taune werese ne marepi erasi aꞌi tote taꞌame. 5 Menitani ape lai marepi orese aꞌi ane maꞌe aunamisiya. Menitani ape mi mi werese ane maꞌe aiyeyei su, le marepi ano au luwaruweyei. Serai ane menitani ape au pati taꞌaneyei su, le ane maꞌe si tame aiyerowata.’” 6 Sosu meni owane wiyeme apou eiye, “Peri wanu eti siye meni owane luwaru aꞌi ape ne, fene peri ape lo wanu etire! 7 Meni owane lai menitani ape lo peri wanuwe su, fene Owane Sitewi ne erasi aꞌi totere! Aiwawe aꞌi lu taune werese, Owane Sitewi lo marepi umassiya ape, lowe Owane Sitewi maꞌe mi mi pasi pasi werese peri lowe lo teꞌe towerinamiyei. Le aꞌi lai peri lowe lo wanuwei. Sosu le marepi lowe lo au hese etiyei. Le peri lo lowe maꞌe witane aꞌi se itiyaꞌu au teꞌeyei. 8 Ane fene maꞌe au teꞌesiya. Lu tamo Owane Sitewi lo lu feni maꞌe marepi orese aꞌi au irowei su, Owane Sitewi lai witane aꞌi se marepi orese aꞌi lowe lo au fareraiyeyei. Ahowa, ane meni hire maꞌe fai ape, si tame aiyerowa su, lu taune taꞌi taꞌi aꞌi Owane Sitewi ne tote tawesiyei awere? Piyete awere?”

9 Sosu aꞌi pe Jisas lu tamo maꞌe peri anowe ta au teꞌeye. Lowe yo seni towafi lowe lo ei ani aroweteye. Lowe yo seni towafi lowe lo aseyaro toteye. Lowe lu taune tereꞌe werese ne ani araroteye. 10 Sosu Jisas peri anowe lowe maꞌe au teꞌeye. “Lu hesi Owane Sitewi lo wesi tutawe maꞌe wiye. Lowesi Owane Sitewi maꞌe au teꞌeyei ne toteye. Meni Farisi ta Moses lo yo peri werese umasinamiteye. Meni tereꞌe takis maꞌaru ani siye meni. Lu taune werese meni apou ape toteye. Takis maꞌaru ani siye lu werese lu luwaru aꞌi tene. 11 Meni Farisi ape Owane Sitewi lo wesi ponei sahe teiteye. Le peri morose erasi aꞌi apou eiye, ‘Owane Sitewi ane ne maꞌe au teꞌe wisereyesiya. Ane meni wisere aꞌi ne. Yo seni ano lu taune werese hi ani ararowe. Ane areareyei meni wou taꞌama. Ane etiri werese au hese etinamiye. Ane taune tafaꞌe yo seni luwaru aꞌi iro taꞌame. Ane takis maꞌaru ani siye meni ape aiwawe wou taꞌama. 12 Ane nowe hesi aꞌi se ayei werese siyenamisiya. Ane maꞌaru aniye su, ane maꞌaru tewi aꞌi ne maꞌe aunamiye.’^b 13 Ahowa, meni tereꞌe ape, takis maꞌaru ani siye meni, le Owane Sitewi lo wesi tutawe oweriye maꞌe teiteye. Le nihe topo lo hi maꞌe siyeteye. Le ereti neme tepi pi se tomuwe. Le Owane Sitewi maꞌe apou au teꞌeye, ‘Owane Sitewi, ane yo seni luwaru aꞌi ironamisiya. Ne ane maꞌe au ferafereire!’^c 14 Ane fene maꞌe teꞌesiya. Meni ape Owane Sitewi lo wesi arunati su, Owane Sitewi lai yo seni luwaru werese lo au sasari pamoweye. Owane Sitewi lo nihe se, meni ape waraꞌi aꞌi henerai. Meni tereꞌe ape Owane Sitewi lo nihe se yo seni luwaru aꞌi ironamitorowa. Lu taune werese iyape towafi lowe lo ei ani aroweyei su, Owane Sitewi lai lowe hi ani ararorowa. Lu taune werese marepi towafi lowe lo hi ani ararorowa su, Owane Sitewi lai lowe ne ei ani arowerowa.”^d

15 Sosu aꞌi pe Jisas peri anowe au teꞌe tepaꞌasiye su, lu taune tomu neꞌese eimane oso lowe lo Jisas maꞌe hene aitai. Lowe Jisas maꞌe eimane ereti lo hetesiyeyei ne hene aitai. Jisas lowe maꞌe ereti se hetesiye su, le eimane lowe lo maꞌe au wisereyeteye. Ahowa, Jisas lo lu disaipel lowe, eimane lowe lo hene aitai ape, siyeye su, lowe ai marepi se tai mai Jisas maꞌe aiyeyei ne einamiye. Lowe apou eiye, “Fene werese eimane werese fene lo Jisas maꞌe owe ape hene aitai.” 16 Ahowa, Jisas eimane werese ei aniye. Le mai tai lowe lo maꞌe eiye, “Fene faraꞌu eimane fene lo heneta. Fene lowe aiyeyei ne owe ape einamire! Owane Sitewi lo marepi aiwawe aꞌi ne. Nowe ape se Owane Sitewi lai lu taune au noweinoweirowa ape, le lu taune maꞌe eimane eito eite wou aꞌi aurowa. 17 Peri ano wiyeme aꞌi ne. Wanure! Omo hire maꞌe Owane Sitewi lai lu taune au noweinoweirowa ape, fene omo lo maꞌe wiyei ne totesiya su, fene eimane wou aꞌi fu heneraire. Fene marepi tote tawesiyei fene lo eimane wou taꞌame su, fene omo hire maꞌe wirowata.”^e

18 Sosu aꞌi pe Jisas eimane werese ereti se hetesiye tepaꞌasiye su, awei meni owane Jisas maꞌe peri ta ei toweriyei ne henerai. Le Jisas maꞌe apou ei toweriye, “Meni owane, ne wisere aꞌi ne! Ane marepi hepene heꞌi aꞌi mi mi pasi pasi aniyei ne totesiya. Ane piye wiyawi marepi hepene heꞌi aꞌi aniyei ne taꞌaneyei awere?”^f 19 Sosu Jisas le maꞌe itiyaꞌu eiye, “Ne piyene apou eiye awere? ‘Ne meni wisere aꞌi ne.’ Lu taune werese yo seni luwaru aꞌi ironamisiya. Owane Sitewi taꞌi aꞌi le wisere aꞌi ne. 20 Ne Moses lo yo peri soꞌoruwesiya awere?

28 Sosu Pita le maꞌe eiye, “Wanure! Nomo omo sitewi, sosu etiri werese aꞌi nomo lo arunatiyewe, ne maꞌe moꞌo umasitaiteye.” 29-30 Le lowe maꞌe itiyaꞌu eiye, “Peri ano wiyeme aꞌi ne. Wanure! Lu taune tamo wesi towafi lowe lo, tani towafi lowe lo, metare tamo, tai mai towafi lowe lo, eimane werese arunatiyewe, sosu Owane Sitewi lo wiyawi taꞌaneyei ne fi su, Owane Sitewi lai nowe pereye ape se lowe maꞌe etiri tomu neꞌese itiyaꞌu auwei. Sosu aiwawe aꞌi le aꞌi lai nowe yeꞌewi su lowe maꞌe marepi hepene heꞌi aꞌi aurowa. Serai lowe Owane Sitewi mase mi mi pasi pasi tei ironamitorowa.”

31 Sosu aꞌi pe Jisas peri ape teꞌe tepaꞌasiye su, le lu disaipel werese lo pani feni eiro maꞌe heneti. Sosu le lowe maꞌe eiye, “Peri ano wanure! Nomo omo Jerusalem maꞌe yaneyei. Tu naifa weriyei Owane Sitewi lo peri au teꞌe siye lu tamo lai, meni hire maꞌe itorai ape ne, apou leseye.^g 32 Lowe apou leseye, ‘Lu tamo lai meni ape hire maꞌe itoraiyei ape, lu tewi tereꞌe maꞌe henetiyei. Lowe lai meni ape maꞌe teꞌe naruwei. Lowe tahe lo au luwaruweyei. Sosu lowe le maꞌe pisaꞌi sineꞌiyei.’ Peri werese lowe lo, lowe tu naifa weriyei leseye ape, etiri werese ape ne, wiyeme aꞌi henerairowa.^h 33 Lowe wafei se tahe lo sahe aineyei. Lowe tahe lo aineyei su, lowe lai le nowe moꞌo su aine teraꞌeyei. Meni ape temeniyeyei su, lowe tapiye fisiye yo sahe tahe paꞌare lo fu arowe. Sosu nowe hesi heta se Owane Sitewi lai meni ape si tame taꞌane norohuwe sineyei.’ Peri ape Owane Sitewi lo peri au teꞌe siye lu tamo apou leseye.” 34 Sosu lu disaipel ape mo lo peri ape wanuwe su, lowe marepi sitewi soꞌoru taꞌama. Peri ape lo marepi sitewi ne Owane Sitewi lai lowe maꞌe ani fu fareyareye. Ahowa, etiri werese ape ne, lowe lai soꞌoru taꞌama.ⁱ

35 Sosu aꞌi pe lowe omo Jerusalem maꞌe yaneyei ne toteye. Sosu lowe omo Jeriko atahe maꞌe henerai su, meni ta nihe pokoweyei se yo mai tewiye sahe onuteye. Le lu taune werese maꞌe maꞌaru ei aniteye. 36 Meni ape yo mai tewiye sahe onuteye ape, le lu taune lo peri noꞌu erasi aꞌi wanu aniye. Serai le peri noꞌu ape ne ei toweriye. 37 Lu tamo le maꞌe itiyaꞌu eiye, “Meni ape, Jisas, omo Nasaret maꞌe fai ape, le nomo aweraꞌiyenatiyei.” 38 Meni ape peri lowe lo wanuwe su, le peri erasi apou uteye, “Jisas, ne Devit lo meni eime. Ne ane ne au ferafereire!” 39 Lu tamo Jisas mase aiyeteye ape mo, lowe meni ape lo peri einamiyei ne toteye. Lowe le maꞌe apou eiye, “Peri titanere!” Ahowa, meni ape peri erasi aꞌi tame uteye, “Devit lo meni eime, ne ane ne au ferafereire!” 40 Sosu Jisas peri ape wanuwe su, le saro aꞌi teiteye. Le meni ape ei aniye. Lowe meni ape Jisas maꞌe henetai su, le le maꞌe apou ei toweriye, 41 “Ane ne maꞌe piye au irowei awere?” Sosu meni ape itiyaꞌu eiye, “Meni owane, ane etiri werese siyereme.” 42 Sosu Jisas le maꞌe itiyaꞌu eiye, “Siyere! Ane nihe no au taꞌane petaneye. Tote tawesiyei no lai nihe no au taꞌane petaneye!” 43 Jisas peri teꞌe tepaꞌasiye su, pereye aꞌi meni ape etiri werese amerame aꞌi se tame siyeye. Le Jisas moꞌo umasiteye. Le Owane Sitewi maꞌe au teꞌe wisereyeteye. Lu taune werese meni ape siyeye su, lowe aiwawe aꞌi Owane Sitewi maꞌe au teꞌe wisereyeye.