3 Jisas yo mai sahe iteye su, meni ape Jisas siyeyei ne totesiya. Le apou toteye, “Meni ape Jisas, eiwerai awere?” Ahowa, le Jisas siyerowata. Lu taune tomu neꞌese le tei tawesiteye. Le meni teꞌe aꞌi ne. 4 Sosu le Jisas siye taꞌame su, le soro maꞌe iteroti iteye. Le me sesi hire maꞌe Jisas siyeyei ne wiye. Jisas yo mai ape maꞌe aiyeteye. 5 Sosu Jisas me sesi maꞌe henerai su, le me ape hire maꞌe aute siyeye. Le le maꞌe apou eiye, “Sakius, ne witane aꞌi itora. Ane wesi no maꞌe ne mase aiwawe iroteyei ne iyei.” 6 Le Jisas lo peri wanuwe su, le me ape witane aꞌi itorai. Le Jisas eriteyewe, wesi lo maꞌe heneti. 7 Lu taune tamo lai Jisas meni ape mase siyesawi su, lowe ai marepi toteteye. Lowe apou toteye. “Le meni luwaru aꞌi lo wesi maꞌe fi. Yo seni luwaru aꞌi ne.”^a 8 Sosu Sakius peri lowe lo wanuwe su, le sine teiyewe, Jisas maꞌe eiye, “Meni Owane, weiya! Wanure! Etiri werese ano ne, ane tewi erasi aꞌi lu taune maꞌaru etiri ariye aꞌi ape mo aurowa. Ane lu taune tamo maꞌaru taꞌi areareye su, ane lowe maꞌe etiri maꞌaru hesiyo hesiyo si itiyaꞌu tame auwei.”^b 9 Sosu Jisas le maꞌe eiye, “Wanure! Pereye Owane Sitewi lai meni ape marepi hepene heꞌi aꞌi auwe. Meni ape sosu lu tewi werese lo, wesi sahe irosiya ape, Owane Sitewi lai lowe maꞌe marepi hepene heꞌi auwe. Meni ape Abraham lo tote tawesiyei aiwawe aꞌi ne.^c 10 Ane, meni hire maꞌe itorai ape, lu taune werese yo seni luwaru aꞌi ironamisiya ape, ane lai lowe ne siye nehiyei ne fai. Ane lowe siyeyei su, ane yo seni luwaru aꞌi lowe lo ani pamoweyei. Sosu ane lowe maꞌe marepi hepene heꞌi aꞌi aurowa.”^d

11 Sosu aꞌi pe lu taune werese Jisas lo peri wanuwe su, Jisas lowe werese mase omo Jerusalem atahe aꞌi teiteye. Lu taune tomu neꞌese Jisas ne apou toteye, Jisas omo Jerusalem papu wiyei su, le meni owane wiyeme tutawe heneraiyei. Sosu le Owane Sitewi lo omo pani werese au noweinoweiyei. Ahowa, Jisas lowe maꞌe peri anowe ta au teꞌeye. 12 Le apou au teꞌeye, “Meni owane ta pani eyeri maꞌe meni owane tutawe aꞌi heneraiyei ne fi. Meni ape meni owane tutawe aꞌi henerairowa su, le omo sitewi lo maꞌe lu tamo au noweinoweirowa. 13 Le etiri werese taꞌuweye su, le wiyawi yahowaꞌi aꞌi taꞌane siye lu ereti feni hesi (10) ei aniye. Sosu le lowe maꞌe eiye, ‘Ane fene taꞌi taꞌi aꞌi maꞌaru meni ta werese (20) auwei. Fene maꞌaru meni ta werese ape se wiyawi erasi aꞌi au taꞌanere. Serai ane si tame aiyeyei su, fene maꞌaru tomu neꞌese werese aꞌi ane maꞌe itiyaꞌu aure.’ 14 Ahowa, lu tamo meni owane ape ne ai marepi totenamisiya. Serai lowe lu tamo pani eyeri maꞌe eimawesawi. Lowe pani ape lo meni owane maꞌe apou eiye, ‘Meni ape luwaru aꞌi ne. Le omo pani nomo lo owe ape fu noweinoweire. Ne meni owane tutawe lo iyape le maꞌe owe ape aure.’ 15 Sosu meni ape meni owane tutawe henerai tepaꞌasiye su, le omo pani lo si tame fai. Si tame fai su, le wiyawi yahowaꞌi aꞌi taꞌane siye lu, lowe maꞌe maꞌaru auwe ape, ei aniye. Le lowe ei aniye su, le lowe maꞌe apou ei toweriye, ‘Ane fene maꞌe maꞌaru meni ta werese (20) auwe su, fene piye wiyawi taꞌaneteye awere? Maꞌaru eiwerou aꞌi si aitai awere?’ 16 Meni tutawe meni owane lo maꞌe henerai su, le le maꞌe eiye, ‘Maꞌaru meni ta werese no se ane wiyawi erasi aꞌi taꞌaneye. Serai ane maꞌaru lu hesi werese (40) ne maꞌe si tame aitaisiya.’ 17 Sosu owane le maꞌe eiye, ‘Wisere aꞌi ne. Ne wiyawi yahowaꞌi aꞌi taꞌane siye meni wisere aꞌi ne. Ne etiri oso aꞌi ape au noweinoweiye su, serai ane ne maꞌe omo ereti feni hesi werese ape (10) noweinoweiyei ne au ariariyerowa.’^e 18 Sosu meni toꞌuresi meni owane lo maꞌe fai. Le le maꞌe apou eiye, ‘Wanure! Ane maꞌaru meni ta werese (20) no se wiyawi erasi aꞌi taꞌaneteye. Serai ane maꞌaru ereti feni werese (5) ne maꞌe si tame aitaisiya.’ 19 Sosu owane wiyawi yahowaꞌi aꞌi ani siye meni maꞌe eiye, ‘Wiyeme aꞌi ne. Ane omo ereti feni werese ne maꞌe auwei. Ne lu taune omo ape mo sahe au noweinoweire.’ 20 Sosu wiyawi yahowaꞌi aꞌi ani siye meni naiteꞌe meni owane maꞌe fai. Sosu le le maꞌe eiye, ‘Meni Owane, siyere! Ane maꞌaru meni ta werese no si tame aitai. Ane maꞌaru meni ta werese (20) no hamau sahe ti tawesi asiteye. Sosu ane awei yo ta horuseyewe, sosu maꞌaru no yo papu fu fareyareye. 21 Ane ne ne atoweiye aꞌi ne. Ne meni kairefi aꞌi ne. Ne wiyawi erasi taꞌanerowata. Lu tereꞌe wiyawi no taꞌaneyei su, ne etiri lowe lo aniteye. Lu tereꞌe tamo awei sahe kewi yehe sameyei su, ne kewi so werese lowe lo aniyei.’ 22 Sosu owane le maꞌe itiyaꞌu eiye, ‘Ane peri topo lo se yo seni luwaru aꞌi no au hese etiyei. Ne wiyawi yahowaꞌi aꞌi siye meni luwaru aꞌi ne. Ne etiri ape soꞌoruwesiya awere? Lu tereꞌe wiyawi aniyei su, ane etiri lowe lo aniteyei awere? Aiwawe aꞌi, lu tereꞌe awei sahe kewi yehe sameyei su, ane kewi so werese lowe lo aniyei awere? 23 Ne ane ne atoweiyeye su, ne piyene maꞌaru ano ne maꞌaru wesi sahe fu taꞌame awere? Serai ane si tame aiyeyei su, ane maꞌaru meni ta werese sosu maꞌaru tereꞌe tamo aniyei.’ 24 Sosu le lu tamo, saro aꞌi teiteye ape, le lowe maꞌe eiye, ‘Fene maꞌaru meni ta werese ano anire. Sosu fene meni ape maꞌe maꞌaru lu hesi werese ereti feni hesi (30) werese irosiya ape aure.’ 25 Lowe meni owane maꞌe apou itiyaꞌu eiye. ‘Weiya, meni ape maꞌaru lu hesi werese ereti feni hesi iro tepaꞌasiye. Ne piyene le maꞌe auwei awere?’ 26 Ane fene maꞌe eisiya, Wanure! Meni ta etiri neꞌese irosiya su, ane etiri tereꞌe tamo le maꞌe tame aurowa. Ahowa, meni ta etiri irote taꞌame su, etiri oso lo irosiya ape, ane tamo etiri oso ape ani taꞌane sasari arosawirowa.^f 27 Serai ane lu tewi tereꞌe ne au totesiya, lowe ane ne ai marepi erasi aꞌi totenamiteye. Lowe yo ano, meni owane wiyeme heneraiyei ne einamitereme. Ahowa, ane meni owane tutawe aꞌi henerai tepaꞌasiye. Serai fene lu tewi ape mo ane maꞌe heneta. Fene lowe werese nihe ano se aine teraꞌere!”

28 Sosu aꞌi pe Jisas peri anowe au teꞌe tepaꞌasiye su, le lu disaipel lo mase omo Jerusalem maꞌe yaneyei ne toteye.

29 Lowe omo nepawe hesi aꞌi atahe ape sahe heneri. Omo hesi ape lo iyape omo Betfage, sosu omo Betani. Omo hesi ape omo iyape me Oliv atahe sahe iroteye. Jisas lu hesi omo Betani maꞌe eimawesawi. 30 Sosu le lowesi maꞌe eiye, “Fenesi omo yaro ape maꞌe ire. Fenesi omo ape wiyei su, fenesi fe donki yene ta wesi maꞌe wafei mino se ti tawesiteyei ape, siyeriyei. Fe donki ape owe meni ta lai meꞌiyeni sahe onu taꞌame. Fenesi fe donki ape siyeyei su, fenesi wafei mino lo ape ani eraure. Fe donki ape ane maꞌe heneta. 31 Meni ta fenesi fe donki ape ne apou ei toweriyei su, ‘Fenesi piyene fe donki lo wafei mino ani erau awere?’ Serai fenesi le maꞌe itiyaꞌu teꞌere, ‘Meni Owane notosi lo fe donki lo meꞌiyeni sahe onutiyei ne totesiya.’” 32 Sosu lu hesi ape omo Betani maꞌe fe donki henetaiyei ne fi. Lowe omo ape wiye su, lowe fe donki wesi maꞌe wafei mino se topeꞌeni teiteye ape siyeye. Meni Owane lowesi lo etiri ape ne aiwawe aꞌi teꞌeye. 33 Sosu lowesi fe donki lo wafei mino ani erauwe su, fe donki lo lu owane lai lowesi maꞌe apou ei towerirai, “Fenesi piyene fe donki nomo lo wafei mino se ani erau awere?” 34 Sosu lowesi lowe maꞌe itiyaꞌu eiye, “Meni Owane notosi lo fe donki fene lo meꞌiyeni sahe onutiyei ne totesiya.” Sosu lowe apou eiye, “Faraꞌu, henetire!” 35 Sosu lowesi fe donki ape Jisas maꞌe henetai. Lowe ipari tahe lowe lo fe donki lo meꞌiyeni hire fuwe. Sosu Jisas fe donki lo meꞌiyeni hire onuti. 36 Jisas fe donki lo meꞌiyeni hire onuwe su, le omo Jerusalem maꞌe yaneyei ne toteye. Yo mai sahe iteye su, lu disaipel lo ipari tahe lowe lo yo mai sahe futeye. 37 Sosu Jisas Omo Oliv itorai su, lu feni werese werese aꞌi yo tewiye sahe taꞌuwerai. Lowe werese Owane Sitewi maꞌe peri erasi uteye, “Nomo Owane Sitewi wiyeme ne au teꞌe wisereyesiya. Nomo wiyawi erasi aꞌi lo siyeteye. Serai nomo Owane Sitewi maꞌe au teꞌe wisereyesiya.

41 Sosu aꞌi pe le omo Jerusalem maꞌe ataheye heneri. Le omo ape siyeye su, le omo ape ne luwei erasi ewite uteye. 42 Le lu taune, omo Jerusalem sahe iroteye ape ne, apou eiye, “Etiri ape fene maꞌe marepi momotei aꞌi auwei ape, fene werese etiri ape ne ani soꞌoru taꞌama. Ahowa, pereye nowe eite se Owane Sitewi lai etiri ape ne nihe fene lo se fareyareye. 43 Nowe meꞌiye su, ai lu tamo lai fene erasi aine teraꞌeyei ne toterowa. Lowe tapiye fisahe pite aꞌi omo ape sahe yoseti taꞌane ti tawesirowa. Lowe lu taune werese, papu irorowa ape, titairu tawesiyei ne toteye. Fene nowe maꞌe itero henerowata. 44 Lowe fene noweripi aine teraꞌeyei ne toterowa. Lowe wesi werese fene lo aine towesi tapetirowa. Wesi aine towesi tapetirowa su, wesi tapiye werese ani fiyarisawirowa. Piyene etiri werese fene maꞌe henerairowa awere? Ane lai fene maꞌe ferafereiyei ne itorai. Ahowa, serai fene werese ane ne meꞌiyeni maꞌe atati arunati. Fene marepi luwaru aꞌi towafi fene lo umasinamiteye.”^g

45 Jisas omo Jerusalem ne luwei tepaꞌasiye su, le omo Jerusalem papu wiye. Le Owane Sitewi lo wesi tutawe papu wiye. Owane Sitewi lo wesi tutawe papu wiye su, le lu tomu neꞌese, etiri eteye ape, siyeye. Le ai marepi erasi toteye su, le metei werese lowe lo ani teroso fiyarisawi. 46 Le lowe maꞌe apou uteye, “Wanure! Tu naifa weriyei meni ta apou leseye.

47 Sosu aꞌi pe le lu werese Owane Sitewi lo wesi tutawe sahe au sasari tepaꞌasiye su, le lu taune werese Owane Sitewi lo peri au teꞌe fiyariye. Le mi mi werese Owane Sitewi lo wesi sahe au atuatuteye. Sosu au heseyei lu Owane werese, sosu Owane Sitewi lo peri au lese siye lu, sosu awei lo lu owane, lowe werese Jisas aine teraꞌeyei ne toteye.^h 48 Ahowa, lu taune werese Jisas lo peri ne wanu wisereyeteye. Serai au heseyei lu owane, Owane Sitewi lo peri au lese siye lu tamo, lowe Jisas lo yo seni siye etirowata. Lowe le aine teraꞌeyei ne totesiya. Ahowa, lowe yo ape siye soꞌoruwerowata.